1 Pa liguna sa jola ka manogamade aoro sa qa mule sae pa Jerusalema sara. Agei kao Banabasi sa qe sae, beto ko i Taetusi ba qe tonia tu sa totonai. 2 Ba qa sae pa Jerusalema sara totonai ura koko vei na Tamasa gu mule sa vadogoronisiu sa ma sae sau. Ko tonai qa kamu ketakoi sa qa vavakatonia tadira na kuta koimata gu mekadi sa na nongoro jongana qa kole taraenia ara tadira na tinoni karovodi. Na ginuana qa vavakato vaniria ira ara sa ura qake nyoroguania ko bi goboro sa na roiti qa roitiniria pa totoso qai jola pori beto isa vei qa korapa roitinia kopira qau. 3 Ba i Taetusi, isa sa tutisiu ara sa na tinoni Qiriki tu sisa, ba ira na koimata qaike jujukunia ko mina tapobe mai tu beto sa kode mina taalo sisa qarikeu. 4 Goto ira kaki qai tuti sesekea na Karisito sa qai mavo sulopo tome pana vaikamu tamigei ko qai nyoroguania ko mina tapobe tu si Taetusi qarigu. Ira na tinoni pira sa qai mavo tome golomo ko mai doro poai sa na toa taruvatana sa vanigei na Karisito agei qarigu. Na dia kuta nyorogua sa vei ko mai vapinausugita pana Vavanau tadira na Jiu qarigu. 5 Ba qeke isongo tuti podekia agei sa na nyorogua tadira ko qeke vamalumia ko bi tapobe si Taetusi, ura qe nyoroguania agei sa na nongoro jongana sosotona sa mina kole jola pana tamugou.

6 Ai tu bai tinoni poreveveidi vei sira na koimata pira pana totoso qai jola pori, ba pana taqu sa qai vaitoto beto gu sira. Na Tamasa sake doria na vinasari tana tinoni. Ura ira na tinoni qai tadoro vei na koimata ba kepore mule sa kai rorove koregana bai jokelenia sa na nongoro jongana qa kole vaivagigalainia ara. 7 Goto qai dogoro vakaberia ira sa na Tamasa tugu sa garunusiu sara ko qa taraenia na nongoro jongana tadira na tinoni karovodi, kai muqisi podeke vei tugu i Pita ba na Tamasa tugu sa vilea ko sa korapa taraenia na nongoro jongana tadira na Jiu. 8 Ura isa tugu na Tamasa sa vania na neqi ko sa garunia si Pita ko sa lao tadira na Jiu, sa isa tugu sa na Tamasa sa vanisiu na neqi ko sa garunusiu sara ko qa lao tadira na tinoni karovodi. 9 Beto ko ira Jekopi i Pita beto i Jone, ira kue qai tadoro vei na kuta koimata sa qai doro vakaberiadia sa na Tamasa sa vanisiu na roiti poreveveina api sara, ko qai vajonganagei sagei kao Banabasi. Qai vaegoa ko qe vaipikatainia sa na roiti ko agei kao Banabasi sa mene lao tadira na tinoni karovodi, goto ira sa mai lao tadira na Jiu qarigu. 10 Goto isa gu qai vapagalania ira tamigei karu sa ira na tinoni golabadi gu sa taneke koroto roquria qarigu, ko ara ba isa tugu sa qa kole popodeke vivitigi roitinia.

11 Tonai sa kamu pa Anitioki si Pita, sa qa toke kokolosia ara pa moedi ira na tinoni qai tutia na Karisito sisa ura na kaberena jola gu sa na roiti sa roitinia isa sa sa sela. 12 Tonai qai oqoro kamu sira kaki tinoni Jiu qai tutia na Karisito na koko lagere veidi tai Jekopi, sa i Pita sa boka teteku tavitiria gu sira na tinoni karovodi qai tutia na Karisito. Ba tonai qai kamu sira na tinoni Jiu na koko veidi ti Jekopi, poni sa sa podalai pikata taloaona mekana ko sa betona teteku tavitiria isa sira na tinoni karovodi. Ura sa matagutuniria i Pita sira na tinoni qai doro vaporeveveinaia sa na veveina ira na tinoni karovodi mai tapobe mai tu beto sa mai taalo qarigu. 13 Ira kaki tinoni Jiu pa ekelesia ba qai tutia tugu sa na soana selana sa roitinia i Pita. Ko i Banabasi ba sa somana tavagona tugu pana roiti qai gigilaidia na selana. 14 Ba tonai qa dogoria ara sa qaike toania ira sa na nongoro jongana sosotona, poni sa qa tokea ara si Pita pa moedi ira doru. Pira qaunia ara sisa tonai, <<Sosoto ao sa kai tinoni Jiu sao. Ba quke toania ao sa na tuti tadira na Jiu, goto qu toa vei gu kai tinoni karovona sao tonai qu suvere tavitiria mekadi sira na tinoni karovodi. Ko ai sa vei sa qu nyorogua vivitiginiria tu ao sira na tinoni karovodi ko mai tutiria sira na tuti tadira na Jiu qugu?>> qaunia.

15 Sosoto, agei sa na podo veimei tadira na Jiu beto ko qeke totoa vei ira na tinoni karovodi qai tadodoro vei na tinoni seladi. 16 Ba agei qe gigila vataleamei sa kepore kai tinoni mina boka tuti vatatalea sa na Vavanau ti Mosese ko mina tuvisi pana moena na Tamasa, goto tonai gu sa rangea i Jisu Karisito sa na tinoni poni sa mina tuvisi sisa. Ko agei na Jiu ba qe rangea tugu i Jisu Karisito beto sa qe tavatuvisi pana moena na Tamasa, nake tonai qe tutia na Vavanau ti Mosese. Ura kepore kai tinoni sa tutia na Vavanau ti Mosese sa boka tavatuvisi pa moena na Tamasa. 17 Ko vei tonai qe korapa nyogua vivitiginia agei sa na soana ko be tavatuvisi tonai qe rangea sa na Karisito sa agei, poni sa tonai tugu sa qe tinoni sela vei gu ira na tinoni karovodi sa agei. Ko ai sa vei sa vei? Na Karisito sa roiti veinigei ko qe sela? Dai ko dai tugu! 18 Vei ba vaturu muleria mule ara sira na vinaturu qa tei jegararia tu ko kopira qake tapiunia ara, poni sa totonai tugu qa tadoro votu kai tinoni qa maja vavanau sara.

19 Ara sa qa vei na tinoni matequ ko qa taruvata pana binangara tana Vavanau ti Mosese. Kai muqisi podeke vei na tinoni sa mate sa sa taruvata, sa ara kopira ba qa taruvata pana nyorogua tana Vavanau ti Mosese, ko kopira qa boka toa vania na Tamasa sara. Qa tei mate tavitia tu na Karisito pa korosi sara. 20 Ko kopira nake ara mekaqu sa qa korapa toa, goto na Karisito sa korapa toa pana taqu. Pana qua toa kopira qa totoravusia ara sa na Tuna na Tamasa, isa sa roroqusiu beto sa malumu matepaenisiu sara. 21 Qake gona pale ara sa na vairoqu vaialona tana Tamasa. Ura vei pana tutina na Vavanau ti Mosese sa bi boka tavatuvisi sa na tinoni, poni sa na mate tana Karisito sa sa kepore veveina sa vei.