1 Pai sa lao vei na roqumiu sagou pa Qelesia? I sei sa jukinigou ko qu duduvili? Qa gabaranigou tu! Beko qu tei nongoro vakakaberiamiu tu agou sa na nongorona i Jisu Karisito sa mate pa korosi! 2 Api gu sa kai sakasava mu ule vanisiu moko agou: ai vei, na Gagala Tabuna tana Tamasa sa qu tekua agou tonai qu tutia na Vavanau ti Mosese, ba tonai qu nongoria na nongoro jongana veveina na Karisito ko qu vasosoto? 3 Kepore na roqumiu sagou! Beko qu tei podalai vatalenia tu pana vaitokai tana Gagala tana Tamasa sa na toa koregana, ba ai sa vei sa kopira qu nyorogua vaokotia mutu pana miu neqi mekamiu? 4 Ai vei, na soku vitigi qu gosororia agou tonai qu vasosotoa na Karisito sa na goborodi gu? Ko na gagale goborodi sosoto gu sira? 5 Na Tamasa sa tei vanigou tu nona Gagala beto sa roitiniria na sakasava vaivagabaradi pana tamugou. Ai vei, na Tamasa sa roitiniria sa na roiti vei aipira pana tamugou tonai qu tutia agou sa na Vavanau ti Mosese, ba tonai qu vasosotoa agou sa na nongoro jongana?

6 Ta dogoro laoia tu i Ebarahami ko. Pira sau sa na Kukuti Tabuna, <<I Ebarahami sa rangea sa na Tamasa, ko tonai sa rangea isa poni sa sa pojania na tinoni tuvisina na Tamasa sisa,>> sau.Popodalaina 15.6. 7 Ko mu gigilai agou kopira sa ira gu na tinoni qai vasosoto sa na tuna sosoto i Ebarahami. 8 Na Kukuti Tabuna sa tei vakaberia tu pa moa sa na Tamasa mina vatuvisiria pa moena mekana sira na tinoni karovodi tonai mai rangea sisa sau. Sa vei isa sa na Tamasa sa tei poja momoea tu pana tai Ebarahami sa na nongoro jongana tonai pira sau, <<Pana laemu ao mina mananiria na Tamasa sira doru puku tinoni,>> sau.Popodalaina 12.3; 18.18. 9 I Ebarahami sa vasosoto beto sa tamana, ko ira doru tinoni qai vasosoto sa qai tamana tugu sa vei i Ebarahami.

10 Ira doru tinoni qai totoravusia na Vavanau ti Mosese ko mai tuvisi pa moena na Tamasa qarigu, sa qai kole pana leleve. Ura pira sau sa na Kukuti Tabuna, <<Qai taleve sira doru tinoni qaike tutiria sira doru Vavanau ti Mosese qai takuti vakole pa Buka Vavanau,>> sau.Vavanau 27.26. 11 Ko sa kabere vatale gu sa kepore sa kai tinoni mina tavatuvisinia pa moena na Tamasa sa na tutidi na Vavanau. Ura pira sau sa na Kukuti Tabuna, <<Na tinoni tuvisina mina toania na rarange,>> sau.Gabakuku 2.4. 12 Minake kilu kole mai sa na rarange beto mina boka tatuti sa na Vavanau ti Mosese, ba pira gu sau sa na Kukuti Tabuna, <<Na tinoni sa tutiria sa na sakasava sa pojaria na Vavanau, sa mina tekua sa na toa,>> sau.Iama 18.5. 13 Ba na Karisito sa taleve vanigita sa gita taqeke boka tuti vaokotia na Vavanau ko sa tei ruvatagita tu pana leleve tana Vavanau ti Mosese. Sa taleve sa na Karisito tonai sa titi vei kai tinoni ikikerena pa korosi, ura pira sau sa na Kukuti Tabuna, <<Na tinoni talevena sa na tinoni sa titi pa babara gou,>> sau.Vavanau 21.23. 14 Na Karisito sa ruvatagita ko na mana tai Ebarahami sa qai somana tekua ira na tinoni karovodi tugu vei tonai qai rangea si Jisu Karisito, beto ko gita tonai taqe rangea sisa poni sa taqe tekua sa na Gagala sa taringunguti vakolenia na Tamasa.

15 Ka visa tavitiqu, qa nyorogua tekua ara sa kai vavapada pana uana tadagita na tinoni gu. Tonai mai tei vatoqoa tu ira karu tinoni sa kai vinaego, poni sa kepore mule sa kai tinoni mina boka piaria babi beia sa na dia vinaego qai tei vatoqoa tu ira karu. Ko na taringunguti tana Tamasa ba sa vei tugu isa. 16 Ko tei soku totoso tu sa vakolea na Tamasa pana tai Ebarahami beto tana tuna sa nona taringunguti. Na Kukuti Tabuna sake pojai sa <<tadira na tumu>> sakeu. Ura vei <<tadira na tumu>> biu sisa, poni sa ira na soku tinoni tu sa sa rorovea isa. Ba pira tu sau sisa <<tana tumu>> sau, ko na ginuana vei isa sa kai tinoni gu sa sa rorovenia isa tonai sa paranga vei isa, ko na tinoni isa sa na Karisito. 17 Pira gu sa vei sa na ginuana qa korapa pojai ara, na vinaego sa tei vatoqo momoea tu na Tamasa. Ko na Vavanau ti Mosese sa tuti lame liligu ka made gogoto uengavulu aoro pa liguna na vinaego sake boka vakepore veveinaia sa na taringunguti kolena sa vania i Ebarahami. 18 Ura vei na vaivana sa bi tekua na tinoni tonai bi vatabea na Vavanau ti Mosese, poni sa na tekuna isa sa sake koko vei pana taringunguti tana Tamasa sau gu na ginuana. Ba na vaivana tana Tamasa lao ti Ebarahami sa sa koko vei pana ona taringunguti gu nake pana ginuana i Ebarahami qi tutia mai na Vavanau ti Mosese.

19 Ko na sa nona roiti sa na Vavanau sa sa vei? Na Tamasa sa valamea sa na Vavanau ko sa ule votunia sa na toa sela. Na Vavanau api sa koleona na ona neqi tinganai sa kamua gu totonai sa lame sa na Karisito isa na tutina i Ebarahami. Ko tana na koburu pana tutina isa sa vakolea na Tamasa sa nona taringunguti. Na Vavanau sa sa tagarunu valagere vei tadira na mateana ko koleona sa kame sa turu pa vaikorapaidi na Tamasa beto na tinoni. 20 Ba na tinoni sa turu pa vaikorapaina sa sa poreveveina gu vei mai kole sa karu kalena, ba na Tamasa sa mekana gu sa roitinia na taringunguti pana tai Ebarahami.

21 Ko inara sa vei poni sa ai vei, na Vavanau sa sake vajonganaria na taringunguti tana Tamasa? Dai ko dai! Ura vei bi koleona sa kai vavanau sa boka vanigita na toa, poni sosoto sa na tinoni bai boka tavatuvisi pana moena na Tamasa tonai bai tutia sa na vavanau isa. 22 Ba na Kukuti Tabuna sa ule vanigita sa na kasia gusu doruna sa sa tapiu pana neqi tana sela, ko sa vei sa na vaivana sa taringungutinia na Tamasa sa na dia gu ira qai rangea i Jisu Karisito.

23 Ko tonai sa oqoro kamua sa na totoso tonai taqe boka rangea gita si Jisu Karisito, sa na Vavanau sa bangaranigei beto sa piugei sagei tinganai sa vakaberia na Tamasa sa na totoso tana rarange. 24 Ko na Vavanau sa sa vei na oda tinoni totoli beto na tinoni vaitokai tinganai sa lame sa na Karisito, ko tonai sa lame sa na Karisito sa gita taqe tavatuvisi tonai taqe rangea sisa. 25 Ko kopira sa tei kamua tu sa na totoso tana rarange, ko gita sa kopira nake tinoni totoli sa korapa tonigita.

26 Agou doru tinoni Jiu beto nake Jiu sa kopira na tuna beto na Tamasa pana miu kole kame tana Karisito ura qu tei rangea tu agou sa na Karisito. 27 Tonai qu tapaputaiso ko qu kole kame pana tana Karisito, poni sa qu toa vei na Karisito mekana sagou. 28 Ko tonai qu kole kame pana tai Jisu Karisito poni sa qu vaitoto gu pana dodogoro tana Tamasa sagou doru. Kepore sa na vaipikatai Jiu babi na tinoni karovona, na pinausu babi na tinoni taruvatana, na rereko babi na marene. Kepore sa kame bi poreveveina jolania sa kame. 29 Ego ko agou sa na tei tinonimiu tu tana Karisito ko sa vei isa sa agou ba na tuna tugu vei i Ebarahami, beto ko kopira ba muna isongia tugu agou sa na mana sa taringunguti vakolenia na Tamasa.