1 Ego ko gita taqe rangea na Tamasa sa taqe vagigila vataleria sira na sakasava taqe korapa vera gele vataleniria, beto ko taqe oqoro tu batiria sa na sakasa aipira ba taqe tei gigilariaoda tu sa na sosotodi sira. 2 Ura tonai qai rangea ira sa sa qeraniria na Tamasa sira noda tite pa moa.

3 Taqe isongia na rarange sa taqe vakoinonoa sa na Tamasa sa paranga gu poni sa tavapodaka na kasia gusu, ko ira na sakasa qai tabata sa qai taroiti pana sakasa qaike tabata.

4 Qi isongia na rarange si Ebolo ko sa vei sa qi vaivanania sa kai vavakukuvu sa jongana jolania ti Keni. Ko qi rangea na Tamasa sisa vei sa qi gigalania kai tinoni tuvisina na Tamasa sisa, ura na Tamasa sa qerania nona vaivana. Beto ko qi rangea isa sa na Tamasa ko sa tei mate tu sisa ba na ona roiti sa korapa tugu paranga vei na tinoni toana pana tadagita.

5 Qi isongia na rarange si Inoke ko sa vei sa qike gosoria na mate, goto qi tateku variu pa noka. Ko kepore kai tinoni bi batia sisa ura na Tamasa qi teku variua. Na Kukuti Tabuna sa pojai sa totonai qi oqoro tateku vasae sa qi vaqerai na Tamasa sisa sau.Popodalaina 5.24. 6 Na tinoni sa kepore na ona rarange sa sake boka vaqerai isa sa na Tamasa, ura na tinoni sa tata lame tana Tamasa sa mina vasosotoa mai tu isa sa na Tamasa sa na Tamasa toana beto ko isa sa mina vaniria na pinia sira qai nyaqo tutia isa.

7 Qi isongia na rarange si Noa ko qi vatabea isa sa na paranga vabalau tana Tamasa na veveidi ira na sakasa qai oqoro tabata. Qi vatabea isa sa na Tamasa ko qi roitinia sa na aka ketakoi qi tavasare sisa beto ira nona tatamana. Ko sa vei sa qi tapitu sa na kasia gusu, ba na Tamasa sa doro veinia na tinoni tuvisina si Noa ura qi rangea isa sa na Tamasa.

8 Qi isongia na rarange si Ebarahami ko tonai qi kukua na Tamasa poni qi vatabea ko qi taloa lao sa pana kai ia qi taringunguti vania na Tamasa. Ko qike gigilai isa sa ketakoi qi korapa valao veinia na Tamasa, ba qi loa pale tugu isa sa nona ia. 9 Qi isongia na rarange sisa ko qi suvere vei na tinoni gotona pana ia qi taringunguti vania na Tamasa. Qi suvere pana aqaqo tavitiria ira Aisake beto i Jekopi, ira karu qai tangungutinia tugu vei sa na taringunguti isa. 10 Ura i Ebarahami qi kole verania sa na podaka lamena na gusu sa kolea na kokovana mauruna, isa na ruma na Tamasa sa rorovenia beto sa vaturua. 11 Qi isongia na rarange si Ebarahami ko qi boka vaporea isa sa kai koburu marene, totonai qai tei baragoso na qoele vivitigi tu sira kao Sera. Qi rangea isa sa na Tamasa mina boka kopunia nona taringunguti. 12 Ko pana kalena na vapore koburu sa i Ebarahami qi tei jolania tu na totoso, sa vaitoto vei pu tei mateona tu sisa, ba pana kai memeka tinoni gu api qai podaka votu lame vei tugu qi taringungutinia na Tamasa sira na tutina qai soku vei na seru pa noka, beto qai mota vivitigi vei na nagasa pa poanana.

13 Ira doru tinoni rarange pira sa qai mate tonai qai korapa rarangeadia na Tamasa. Qai oqoro tekuria ira sira na sakasa sa taringungutiniria na Tamasa, ba pa souna tu qai gegele batiniria ko qai qeraniria beto ko qai ule votunia sa ira sa na tinoni gotodi beto na kamudi gu pa peso api sira qarigu. 14 Ira qai paparanga vei inara sa qai vakaberia sa qai korapa verania gu ira sa kai dia gusu togasana. 15 Vei na dia gusu qai loai sa bai kole roqu vakoititia, sa bai tei muledia tu sa pa dia gusu isa. 16 Ba kai gusu poreveveina jola tu, isa pa noka tu, sa qai kole kukuli gelenia ira. Ko na Tamasa sake keania ko ira mai gigalania na dia Tamasa sisa, beto ko sa vanaqiti vaniria kai gusu sira.

17 Qi isongia na rarange si Ebarahami ko tonai qi tapodeke poni qi malumu gu ko mi vavakukuvunia isa si Aisake qiu. Ti Ebarahami tugu sa qi vakolea na taringunguti na Tamasa, ba qi malumu vavakukuvunia gu isa sa na tuna mekai. 18 Pira qiu sa na Tamasa pana ti Ebarahami, <<Pana tutina i Aisake mai lame vei sira na tutimu qa taringungutinigo ara,>> qiunia.Popodalaina 21.12; Romu 9.7. 19 I Ebarahami qi rovea sa na Tamasa boka vaturu muleria gu pana mate sira na tinoni, ko pana kai dodorona sa qi teku mulenia tugu pana mate isa si Aisake.

20 Beto ko qi isongia na rarange si Aisake ko qi leve tariniria na mana mai tekuria vuka risa sira Jekopi i Isoa.

21 Qi isongia na rarange si Jekopi ko tonai qi tata mate poni qi mananiria sira na okokoto tuna i Josepa beto qi opo pa batuna na ona kolu ko qi vatarasaea na Tamasa.Popodalaina 48.15-16; 47.31.

22 Qi isongia na rarange si Josepa ko tonai qi tata okoto nona toa poni qi roqu vakoititia isa sa na veveina mai taloa pa Ijipi ira na tinoni Izireli beto ko qi loa vaniria sa na vavanauna ai mai veinia na pupudana.

23 Qai isongia na rarange sira na tinana na tamana i Mosese ko tonai qi koni podo poni qai golomo vapaea kue popu, ura qai doria sa kai melalu jojonga sisa ko qaike matagutu majai ira sa na paranga tai Pero.

24 Qi isongia na rarange si Mosese ko tonai qi lavata sae poni qi daiona tagigalania na koburu tana na tuna rereko i Pero sisa. 25 Qi doria sa vei isa mina somana vitigi tavitiria ira na tinoni tana Tamasa sa sa poreveveina jolania isa bi kole qeqera pa toa sela iapeki totoso qiu. 26 Qi doria sa vei isa mina tavakea talenia isa sa na veveina na Karisito sa sa poreveveina jolania doru isisongo pa Ijipi, ura qi doro laoa isa sa na pinia mina tekua vuka risa. 27 Qi isongia na rarange si Mosese ko qike matagutunia sa na kokora tana na bangara pa Ijipi, goto qi taloaona pa Ijipi. Sa vei qi batini matana sosoto isa sa na Tamasa paena, ko qike gabala. 28 Qi isongia na rarange sisa ko qi roitinia isa sa na vavolo Alokata beto qi pojaniria isa sira na tinoni Izireli ko qai orani orungu ira sira na dia atakamana, ko sa vei sa na mateana vaivamate qike vamateria sira na koburu marene moadi tadira na tinoni Izireli.

29 Qai isongia na rarange sira na tinoni Izireli ko qai rerege karovo veinia na peso pidilina sa na Kolo Jimiri. Goto ira na tinoni Ijipi tonai qai podeke karovo qarigu poni qi uderia na kolo ko qai kuju betodia.

30 Qai isongia na rarange sira na tinoni Izireli ko qai jegararia sa na toba pa Jeriko pa liguna qai rerege idi livutia ka vitu rane.

31 Qi isongia na rarange si Rehabi na tugele ko qike tavamate tavitiria ira qai kilunia na Tamasa, ura isa qi vatoga vataleria sira karu tinoni Izireli qai lame dogoro golomia na ia.

32 Ko na sa mule sa mana vavakatonia ara na veveidi ira qai vasosotoa na Tamasa? Sake kakasa sa na totoso ko manake boka vavakatoniria ara sa na veveidi ira Qidione i Beraki i Samusoni i Jepita i Devita i Samuela beto ko ira na tinoni kokorotai. 33 Qai isongia na rarange sira na tinoni veveidi pira ko qai rajaria na vakilasaria sira na goto binangara. Qai roitinia ira sa isa vei sa tuvisi ko qai tekuria sa ira na sakasa vei sa taringungutinia na Tamasa. Qai ngujupukuria sa na mangadi na laione, 34 qai vamateria sira na memea iku lavata, qai ukuniria sira qai kole nyonyogua vamateria pana benete. Na tinoni munyala sira ba qai tavaneqi. Qai varene pana vaipera beto ko qai vakilasaria sira na dia kana qai lame vei pana goto bubutu. 35 Ira na rereko iviva qai boka dogoro liguria sira na turadi qai tei mate tu ba qai tavaturu mule. Ira kaki qai daidia taruvata ko qai taaru vivitigi tinganai qai mate, ko qai vei ko mai tekua ira sa na toa poreveveina jola tonai mai tavaturu mule qarigu. 36 Goto ira kaki sa qai vavagoreniria qera, qai pipiqoloria beto qai vatomeria pa ruma vaipiu. 37 Qai tagona vamate, qai taso lomotorua, qai tavamate pana meana na benete. Na kopodi gu na sipi beto na qoti qai pokoniria tonai qai lekogo, qai golaba vaivasevi, qai takomiti beto qai taaru ngangangulu. 38 Pana tadira na tinoni vevei pira sa na kasia gusu api sa sake garo! Qai lekogo vei na tinoni karovodi pa qega beto pana ia tatabadi, qai suvere pa bevi beto pa baongo pa kauru peso.

39 Ira doru tinoni aipira sa qai isongia na rarange ko sa qeraniria na Tamasa. Ba qai oqoro tugu tekua ira sa na sakasa sa taringungutiniria na Tamasa, 40 ura na Tamasa sa tei doro momoea tu sa kai sakasa poreveveina tadagita. Na ginuana sa roiti vei isa sa vei ko ira sa mai somana gu tadagita sa mai tavaokoto.