1 Ego ko ira na mota tinoni vevei inara qai varene pana dia rarange sa qai idi livutugita aipira. Ko sa vei sa gita ta loa paleria sira doru sakasa qai suqutugita beto na sela sa aru tamanagita, ko ta abutu vangajua gita sa na vaivose sa korapa kole pa moeda gita. 2 Ta dogoro vatotogasia gita si Jisu isa na popodalaina beto na vinaokotona na oda rarange. Na qeqera sa sa koleona pa moena ko sa vakepore veveina pale isa sa na mate vaivakeana pa korosi, ko kopira sa korapa toqo pa kale matuana na Tamasa sisa.

3 Mu doro laoa sisa sa vangajuria na tapata qai vania ira na tinoni seladi, ko muke munyala beto muke oqani taloa pana miu rarange. 4 Ura pana miu rajana na sela sa agou sa oqoro votu talenigou na orungu. 5 Ba ai vei qu tei muma paleria tu agou sira na paranga vaivaneqi sa poja veinigou na tuna na Tamasa pa Kukuti Tabuna? Pira sau sisa,

7 Mu vangaju veiniria na vavanau agou sira na vitigi qu tomeria. Na vitigi qu gosororia sa ulenia sa na Tamasa sa korapa veinigou na tuna sagou. Ura kepore sa kai koburu bike tavavanau pana tana tamana. 8 Na Tamasa sa vavanauria sira doru tuna. Ko vei munake tavavanau sagou, poni sa nake tuna sosoto isa sagou goto na podo soanamiu gu. 9 Ira gu na tamada pa peso ba tonai qai vavanaugita poni sa taqe pangaganiria tu. Ko sa poreveveina jola sa tana tutiria sira na vavanau tana Tamada pana Gagala ko tana toa. 10 Ira na tamada mekada sa qai vavanaugita pana totoso papakana gu pana soana qai rove veinia sa tuvisi. Ba na Tamasa sa roiti vei ko mi tokanigita gita ko ta somana tekua sa na toa liosona vei sa toania isa sau. 11 Doru vavanau sa pana totoso qai tavaivavanauniria sa qaike vaivaqera goto qai vaivatakulanga. Ba ira qai teku varoitiria sa qai tekua na pinia toa bulena beto na tuvisina.

12 Ko sa vei sa mu alakaniria sira na limamiu qai mamako beto mu vaturu vatuvisiria sira na nenemiu qai neneqere pavu. 13 Beto mu vaemeseria sira na soana ketakoi mai rerege vei na nenemiu, ko na qao mike gabala vapele goto mi tasalana tu.

14 Mu podeke vivitigia ko mu toania na toa bubulena tavitiria doru tinoni beto na toa liosona pana tana Tamasa, ura na tinoni sake toa vei isa sa minake boka batia sa na Bangara. 15 Mu kopu vabalau kita kaki agou mai gabala loa pale na vairoqu vaialona tana Tamasa beto ko kita kaki mai vei na buburu ikikerena mai pidoko sae ko mai vaniria na tapata ira soku pa vaikorapaimiu. 16 Mu kopu vabalau kita kaki mai vei i Isoa sa toania na toa aru valulasa beto sake pangagania na Bangara. I Isoa ko pana kai iapeki gagani gu sa vavainia sa na ia tana koburu moa bi tekua isa. 17 Ko agou qu gigilaimiu sa pa liguna sa sa nyogua teku isongia isa sa na mana tana tamana ba sake taiania isa sisa. Ura sake boka peluku vamule ligua isa sisa na roiti sa roitinia, ko sa lukana tatalea tu isa ba sake boka.

18 Ura agou sa quke lame pana ia sa boka tauli beto sa kolea na memea iku na rodomo kukuni na gava ranebongi 19 na vaqorona na kuvili beto na ovovelena na parangana na Tamasa. Tonai qai nongoria ira na tinoni Izireli sa na ovovelena na Tamasa poni qai tepa vivitigia ko baike nongoro ligua mule sa kai paranga qarigu, 20 ura qai matagutunia sa na vavanau pira sau, <<Vei na manugu gavere gu sa mai ulia na kubo, ba mai tagona vamate tugu sira,>>Votu 19.12-13. sau. 21 Ko na sakasa sa votu tabata pa kubo isa sa vaivamatagutu vivitigi ko i Mosese pira sau, <<Qa matagutu vivitigi sara ko qa neneqere!>> sau.Vavanau 9.19. 22 Goto agou sa qu lame pa kubo Zaione beto pa gusu tana Tamasa toana, isa na Jerusalema pa noka, ketakoi qai kole na soku tina na tina mateana, 23 pana vaikamu qeqera tadira qai vei na koburu podo moadi, ira sa takuti na isongodi pa noka. Ko qu lame tana Tamasa, isa sa pituria doru tinoni, beto ko pana tadira na gagaladi ira na tinoni jongadi pa moadi qai toa vei sa nyoguania na Tamasa. 24 Ko qu lame pana ti Jisu isa sa vatoqoa na vinaego koregana beto ko na orunguna sa iparai valiosonigita, ko na orunguna isa sa uleniria na sakasa poreveveina jolaniria vei ira sa uleniria na orunguna i Ebolo.

25 Mu kopu vabalau ko muke dainiamiu na vatalinga lao tana Tamasa isa sa korapa paranga lao tamugou. Ura ira qaike vatalinga lao sa tana gu sa valageria pa peso na paranga vabalau tana Tamasa poni ba qaike boka uku. Ko mina vei sa gita tanake boka sosoto uku sa vei tana gabala loaia gita sa isa sa paranga lagere vei pa noka! 26 Na ovovelena isa sa jojoua na peso pana totoso isa, ba kopira sa tei paranga vakole vei tu aipira, <<Kode mana kai totoso joua mule ara sa nake peso gu mekana goto na oka tugu vei,>> sau.Gaqai 2.6. 27 Ko ira na paranga <<kai totoso mule>> na ginuana sa ira na sakasa qai tavapodaka sa mai tajou vakanoko ko mai tavarijo pale, ko ira na sakasa qaike boka tajou vakanoko mai turu jola. 28 Ko gita ta paranga jongana ura taqe isongia na binangara sake boka tajou. Ko sa vei sa ta qera beto ta vatarasaea na Tamasa pana soana mina qerania isa beto ko mi tavitia na matagutu beto na pangaga, 29 ura na oda Tamasa sa sa vei na iku pipiara.