1 Ara Jekopi kai nabulu tana Tamasa beto tana Bangara i Jisu Karisito. Na leta api sa qa garunu laonia tamugou ka manogarua bubutu qu qaqatia na kasia gusu.

Na paranga qeqera tamugou.

2 Ka visa tavitiqu, mu doro veinigou qu pera sagou tonai qu gosororia soku ngavulu okokoto podeke. 3 Ura qu tei gigilaimiu tu agou sa na podekena na rarange tamugou sa kode mina vuanigou na turu vangaju. 4 Na miu turu vangaju mi vua vatale, ko agou mu boka tinoni matuamiu beto mu maladoruru pana uana jongadi ko kepore sa kai sa jongana muna qasania pana toa matuana.

5 Ba vei kame agou sa bi qasania na gigalai tavagigalana, poni sa mi tepai na Tamasa ko isa mina vania na gigilai tavagigalana sisa. Ura na Tamasa sake vairutiniria beto sake suquturia sira nona vaivana. 6 Goto mi tepa pa rarange beto mike ruarabeke, ura na tinoni sa ruarabeke sa sa vei na ololobagea kolo sa iru pogoso lalamenia na gava. 7 Na tinoni vevei isa sa kita mi kole rorovea mina tekua kai sa tana Bangara. 8 Na tinoni sa vei inara sa na tinoni sa bararua na roquna ko ira doru ona uana qaike turu vatogasa.

9 Ego na tavitimu gogolabana sa sa mi qera tonai mi taovulu vasae. 10 Goto na tinoni isisongo sa mi qera tonai mi tavagore, ura kode minake ruavo mumuri jolaona kai muqisi vei na avoro mumuqu. 11 Tonai sa sagere na tapo ko sa alangania na mangini ko sa vamaleia sa na mumuqu, poni sa udo vukele riuona sa na avoro ko na babata jongana sa sa mumuriona. Ko na tinoni isisongo sa vei gu isa, tonai sa korapa jujunonia nona isisongo sa sa mumuri manyao riuona.

12 Ego mina tamana sa na tinoni sa vangajuria sira na podeke, ura pa liguna mina vakilasaria isa sira na podeke, poni sa kode mina tekua isa sa na pinia toa tana varene, na pinia isa sa na Tamasa tu sa taringungutiniria ira qai roroqua isa. 13 Na tinoni sa gosororia na totoke sa mike paranga vei pira, <<Na Tamasa sa korapa totokesiu sara,>> mikeu. Ura na Tamasa sake gosoria na totoke ko isa mekana ba sake totokea na tinoni. 14 Goto na tinoni sa gosoria na totoke tonai na ona nyorogua selana mekana qai toni vapirua beto qai vagonai sisa. 15 Ko na nyorogua selana isa sa tonai sa voraga votu poni sa pidokonia sa na sela, beto ko tonai sa matua sa na sela poni sa vuania isa sa na mate.

16 Kita mu kole siana, ka visa tavitiqu jojonga. 17 Doru vaivana jojongadi gu beto na puradi gu sa qai lagere vei pa nulu tana Tamasa sa vapodakaria na kabere pa vavagalo eqa. Ko na Tamasa isa sake boka bei babi vavarodomo vei na ongudi na lei pa vavagalo eqa. 18 Pana ona nyorogua mekana isa sa sa vapodogita tonai taqe vasosotoa na ona nongoro sosotona sa gita, ko gita sa na vua moeda pana vinapodaka tana.

19 Mu vakoititia api, ka visa tavitigu jojonga! Agou doru sa mu sisiqarainia na vainongoro, goto muke oqa sisiqarai paranga, beto muke oqa sisiqarai tagigiri. 20 Ura na kokora tana tinoni sa sake vapodoa na toa tuvisina tana Tamasa. 21 Ko mu loa paleria sira doru uana pajidi, beto doru toa ikikeredi qai lulasa pana vailivutaida. Goto mu teku isongia tu pana uana viketai agou sa na paranga isa tei tauma tu tamugou, na paranga isa mina boka aloa na miu toa.

22 Mu roiti votunia sa na paranga, muke kole nonongoria gu ura tonai qu kole gu nongoria poni sa qu vasianagou mekamiu. 23 Ura na tinoni sa nongoria na paranga ba sake roiti votunia, sa sa vei puputa na tinoni sa dogoro vatalea na isumatana mekana pana qelasi titirona. 24 Ko pa liguna sa dogoro vatalea na isumatana mekana sa sake ruavo tugu taloa riuona beto sa oqoro sovai poni sa sake ruavo roqu muma pale gu sa ai sa doro vevei sisa ko kepo tugu kai sa bi roitinia. 25 Goto na tinoni sa kole tiro vatatalea beto sa nongoro vakoititia sa na vavanau sosotona sa ruvatagita, beto ko sake nongoria gu ko sa roqu muma pale gu goto sa roitinia tugu, sa mina tamana pana ona roiti sisa.

26 Na tinoni sa rorovea sa tuti pulisi vatatalea sa na toa lotu, ba sake kopu mulenia na meana goto sa nyonyoravia sa na bulona mekana, poni sa sa kepore veveina sa na toa lotu tana. 27 Goto isa na toa lotu sosotona sa lioso beto sa sosotona tana Tamasa na Tamada sa pira tu sa vei: mu ovikiria sira kepore tinadi na tamadi beto na nanaboko pana dia suvere vaivasevi, beto mu kopu mulenigou ko muke tavapaji pana toa ikikeredi pa kasia gusu.