1 Ka visa tavitiqu, muke nenekenia agou sa ai vei ko mu tinoni vaivagigalai. Qu tei gigila vataleamiu tu agou sa agei na tinoni vavaivagigalai kode mene gosoria sa na vaituti lavatana jola. 2 Ura gita doru taqe tatupenia soku sakasa, ba na tinoni sake tatupenia na paranga sa isa na tinoni okotona ko isa sa boka gaitia na tinina doruna. 3 Vei tana pukunia kai kobu aeana ikete sa na mangana na hose ko mi tutigita tanagu, poni sa kode tana gatia gu sa na tinina doruna. 4 Mu doria na vaka tetepe ko! Kai sakasava lavata piru sisa beto sa iru lao lamenia na gava ranebongi, ba kai gaiti ikete gu sa gaiti laonia ketakoi sa nyorogua valao veinia na tinoni aru gaiti. 5 Ko sa vei gu isa sa na mea. Kai kobu tini iketena gu sa na mea, ba sa vavaqataniria na sakasava lalavata. Mu roroqua alepi: kai memea iku iketena gu ba sa boka vurungu beto pale sa na mumuqu lavata.

6 Na mea sa na iku. Na mea sa na kasia gusu ikikerena sa kole pa tinida gita. Na mea sa vapajia na toa doruna tadagita. Na mea sa boka vurungu vivikereria sa na toa doruna tana tinoni ko na memea iku isa sa na koko lame veina pa heli sosoto. 7 Ura qai boka tavasirana gu sira doru manugu mamade nenedi pirudi, na manugu tatava, na manugu gavere beto ko na igana pa kolo. Ko sa tei vasiranaria tugu na tinoni sira. 8 Ba na mea sa oqoro pore kai tinoni bi boka vasirania. Na mea sa kai sakasava ikerena jola sake boka tavamomoso, beto sa pugelia na paranga poizini vaivamate. 9 Na mea sa taqe vatarasaenia gita na Bangara na Tamada, beto sa na mea mutugu isa sa taqe leleveniria sira na tinoni qai taroiti pana kirena na Tamasa. 10 Ko pana kai momoqasa manga gu qai votu vei sa na paranga vinatarasae beto na leleve. Sake jonga sa sa vei pira, ka visa tavitiqu! 11 Ai vei mai boka mekarai nyoro votu pana kai vuvugu sa na pie lomosona beto na pie pasana? 12 Ka visa tavitiqu! Ai vei na gou piqi mina boka vuania na vua olive? Ai vei na qurepi mina boka vuania na vua piqi? Na ivere ba sake vuvugunia na pie lomoso.

13 Ego, i sei agou sa tavagigala beto na tinoni tome rorove? Na tinoni isa sa pana ona uana jongana mi vatadogoronia tu isa sira nona roiti jongana sa roitiniria pana uana viketai beto na tavagigala. 14 Ba vei na bulomiu sa mina pugelia na kono kokora beto na nyonyorogua bobokamiu gu mekamiu, poni sa muke vaqatania na miu gigalai ura muna vei sa qu vasekea gu agou sa na sosoto. 15 Na gigalai vevei isa sa nake lagere veina pa noka, goto na ona gu na kasia gusu. Nake koko veina tana Gagala sa na gigalai isa, goto na koko veina tana tomate mekana. 16 Ura ketakoi qai kole sa na kono beto na nyonyorogua bobokaona mekana na tinoni, poni sa qai kole gu sa na toa vaipipiarai beto doru toa ikikeredi. 17 Ba na gigalai koko veina pa noka sa momoe sa na liosona, sa kolea na toa bubule, sa vajongana lao tana goto tinoni, sa vainongoronia na roroqu jongana, sa vairoqu vaitokai beto sa kolea na vua jongadi. Ko na tinoni sa isongia na gigalai isa sa sake totoka kale beto sake vavatinoni tuvisia mekana. 18 Na vuana na tuvisi sa kolea na bule sa tauma vaniria sira qai roitinia na bule.