1 Pana totoso isa sa sa vaturua i Siza Oqasitasi na bangara pa Romu sa kai vavanau ko mai taanye ko mai takuti beto sira doru tinoni pa ona binangara sau. 2 Api sa na totoso momoe qai taanye ira na tinoni ko na anye tinoni isa sa sa taroiti tonai i Kuriniasi sa na qavuna pa pikata gugugusu pa Siria. 3 Ko ira doru tinoni sa qai okoto mumule riu pa dia gugusu togasadi ko mai takuti qarigu.

4 Ko i Josepa ba sa taloa tugu pa Nazareti kai gugusu pa Qalili, ko sa sae pa Jiudia pa gugusu Betilihema, na gusu ti Devita, ura na podo lame veina pa bubutu ti Devita sisa. 5 Ko sa toni saenia isa si Mere ko mai mekarai takuti sau. I Mere sa sa tei tavaiviva vakole tu ko mina alavia isa, beto ko sa tei bogata tu sa totonai. 6 Ko tonai qai korapa suvere pa Betilihema ira karu, sa sa kamu gu sa nona totoso okotona si Mere. 7 Ko sa vapodoa i Mere sa na tuna marene podo moena, ko sa udenia kai lage poko beto sa sa vakolea ketakoi qai vavavakole vaniria na gagani ira na manugu mamade nenedi, ura sa pugele sa na ruma susuverena tadira na tinoni kamudi ko kepore sa kai lose bai suveria.

8 Ego qai korapa suveredia tugu pa ia ketakoi sira kaki tinoni kopu sipi, qai korapa kopuniria na dia godo sipi na bongi. 9 Ko totonai sa sa bola vasiboro tadira sa kai mateana tana Bangara beto ko sa ude vailivutainiria sa na kabere lavata tana Bangara, ko qai matagutu vivitigi sira. 10 Beto sa pira sauniria sa na mateana, <<Muke matagutu! Doro! Ura ara sa qa pogoso lame vanigou kai nongoro vaivaqerana jola ko isa mina vaqera betoria doru tinoni. 11 Sa tei podo tu pa ngeni api pa gugusu tai Devita sa na miu inaalo, na Karisito Bangara! 12 Ko api sa na vinagigila muna batia agou. Tonai muna lao sa muna batia kai koburu, sa taudenia kai lage poko ko sa korapa koleona ketakoi qai vavavakoleniria na gagani tadira na manugu mamade nenedi,>> sau sa na mateana.

13 Beto sa pa totoso tugu isa sa lagere somana tavitia na mateana isa sa kai minete mateana lavata pa noka, ko qai kera vatarasaea ira sa na Tamasa, pira qarigu,

15 Ego ko ligudi qai taloa mule sae pa noka ira na mateana, sa qai kole vavaiparanga sira na tinoni kopu sipi, pira qarigu, <<Aria moko ko ta lao pa Betilihema, ko ta lao doria sa na manugu sa pidoko, isa vei sa ule vanigita na Bangara,>> qarigu.

16 Ko qai sisiqarai taloa riu sira, ko qai lao tugu batiria ira sira Mere, i Josepa beto ko na koburu melalu. Ko na koburu sa korapa tugu koleona ketakoi qai vavavangojaniria na manugu mamade nenedi. 17 Ko totonai qai batia ira na tinoni kopu sipi sa na koburu, poni sa qai vavakatonia sisa sa pojaniria na mateana na veveina na koburu. 18 Poni ira doru qai nongoria na vavakato tadira na tinoni kopu sipi sa qai gabara beto. 19 Goto i Mere sa kopuniria ko sa kole roroquria pa bulona sira doru sakasava aipira. 20 Ego beto sa qai taloa mule riudia sira na tinoni kopu sipi, ko qai vatarasaea ira sa na Tamasa, ura doru sakasava qai nongororia ko qai batiria sa sake goto, goto isa tugu vei sa pojai na mateana.

21 Ego ko tonai sa vesu ranena ko sa tapobe sa na koburu, poni sa sa tavakukunia i Jisu na isongona sisa, isa vei sa tei poja veiniria tu na mateana totonai sa oqoro tu pidoko pa iapana i Mere.

22 Ego tonai sa kamua sa na totoso ko mai roitinia ira Josepa i Mere sa na vavakukuvu vuvulasa isa vei sa pojai na Vavanau ti Mosese, poni sa qai pogoso saenia tugu pa Jerusalema ira karu sa na melalu ko mai vamadia tana Bangara qarigu. 23 Qai tutia ira karu sa isa vei sa takuti kolena pa Vavanau tana Bangara, pira sau, <<Doru koburu marene qai poraka moenia na kokolena koburu sa mai tavile kale vania na Bangara,>>Votu 13.2, 12, 15. sau. 24 Ko qai lao vavakukuvunia sisa vei sa pojai na Vavanau tana Bangara: karu kuru lavata babi karu tuni kuru,Iama 12.8. sau.

25 Ego ko api sa korapa suvereona pa Jerusalema pa totoso isa sa kai tinoni, na isongona i Simione, kai tinoni tuvisina beto sa isongia na pangagana na Tamasa. Ko sa korapa tugu vera vatalenia isa sa na totoso tonai na Tamasa mina vamanotoria sira na tinoni Izireli, ko sa gorea na Gagala Tabuna sisa. 26 Sa tei ule vamoenia tu na Gagala Tabuna isa sa minake oqani mate sisa tinganai mina batia mai tu isa sa na Karisito tana Bangara saunia. 27 Ko sa tonia na Gagala Tabuna si Simione ko sa lao tome pa kakabarena zelepade. Ko tonai qai geri laonia ira karu tinana na tamana pa kakabarena zelepade sa na koburu i Jisu ko mai vamadia ko mina taroiti vei isa sa tapoja pa vavanau tana Bangara qarigu, 28 poni sa sa teku geria i Simione sa na koburu ko sa vatarasaea sa na Tamasa, pira sau,

33 Ego ko qai gabarania ira karu tinana na tamana na koburu sira na paranga veveina na koburu sa pojaria i Simione. 34 Beto sa sa mananiria i Simione sira beto pira saunia si Mere, na tinana na koburu, <<Doro! Na koburu api sa na tavilena tana Tamasa ko mina vavukeleria beto mina vatururia ira kubo tinoni Izireli, beto ko isa sa kai vinagigila tana Tamasa mai kanai ira kubo tinoni. 35 Ko ira na roroqu qai kokole golomo pa bulodi na tinoni sa mina vavotu betoria isa pa kaberena. Goto ao mekamu sa na takulanga isa sa gea vei na likoto sa mina sobea na bulomu,>> saunia.

36 Ego sa suvereona tugu vei ketakoi si Hana kai rereko kokorotai, na tuna i Panuela, na bubutuna i Asa. Totonai sa tei qoele tu sisa. Na vaialavana perangana sisa, ko ka vitu aoro mai tu qai vaisuvere taviti sira karu marenena beto sa mate sa na marenena. 37 Ko sa suvere nanaboko tinganai sa kamua na totoso isa tonai sa vesungavulu made aorona sisa. Na rane na bongi sake selania isa sa na lalao vatarasaea na Tamasa pa kakabarena zelepade. Sa toania isa sa na toa mamadi ko nake teteku beto na toa vavara. 38 Ko pa totoso tugu isa sa sa kamu si Hana ketakoi, ko sa paranga jongana lao tana Tamasa, beto sa sa vaqatania isa tadira sa na veveina na koburu, tadira qai korapa verania na totoso na Tamasa mina ruvatia na gugusu Jerusalema.

39 Ego ko totonai qai vaokoto betoria ira Josepa i Mere sira doru ginugua qai tapoja pa vavanau tana Bangara, poni sa ira kue tatamana qai muledia pa Qalili, pa dia gugusu sosoto pa Nazareti. 40 Ko sa lavata sae ko sa neqi sa na koburu beto sa isongo vatatalea isa sa na gigalai tavagigala, beto ko na mana tana Tamasa sa kole somana tana.

41 Ego doru aoro sa ira karu tinana na tamana i Jisu sa qai sasae somanania na vaikamu vavolo Alokata pa Jerusalema. 42 Ko tonai sa manogarua aorona i Jisu sa qai sae mutugu somana pa vaikamu, qai vevei tugu doru totoso vavolo. 43 Ego ko tonai sa jola sa na vaikamu, poni sa qai gabala mule riudia sira Mere i Josepa, goto na tudia marene i Jisu sa suvere jolaona tu pa Jerusalema. Ba ira karu tinana na tamana sa qaike gigilai sa sa vei isa. 44 Qai roroqua ira karu sa palu sa tei tuti tu pa minete tinoni sa qarigu. Ko sa jola tu kai doru rane poni beto sa qai kole doro nyanyaqoa tadira na tavitidi beto na dia baere. 45 Ba qaike batia ira karu sisa, ko qai gabala mule bei tu pa Jerusalema ko qai mule nyaqoa. 46 Ko na rane vinaue tu sa qai batia ira karu pa kakabarena zelepade sisa. Sa korapa toqo vaisomanai tavitiria ira na tinoni qai vavaivagigalainia na Vavanau sisa, ko sa korapa nonongoro beto sa nananasaria. 47 Ko ira doru qai nongoria sa qai gabara jolania sa na gigalai beto na ninanasa tana. 48 Ko totonai qai batia isa sira karu tinana na tamana, poni sa qai gabara, beto pira saunia na tinana, <<Tuqu, ai sa vei ko qu roiti vei tu inara? Doro! Na tamamu beto ko ara! Qe takulanga jola na kole mamalagoso nyaqogo ao sagei karu,>> sau.

49 Poni sa oeria isa sira karu, <<Ai sa vei ko qu nyaqosiu tu? Quke gigilai tu agou sa na padaqu tugu mana suvere pa ruma tana Tamaqu sara?>> sauniria. 50 Ba qaike gigilai ira karu na ginuana sisa vei sa pojaniria isa.

51 Ego pa liguna sa vei isa sa beto sa tuti muleria isa sira karu na tinana na tamana ko qai gore pa Nazareti. Ko sa suvere vataberia isa ketakoi sira karu. Ko na tinana sa kopuniria ko sa kole roroquria pa bulona sira doru sakasava aipira.

52 Ego ko sa ijoko sae pa tinina beto pa gigigalai tavagigala si Jisu, ko sa qerania na Tamasa beto ira na tinoni sisa.