1 Ego pa vinamanogalima aorona na binangara ti Tiberiosi, isa na kuta bangara pa Romu, sa i Ponitiasi Paelati sa na qavuna pa Jiudia, i Herodi na bangara pa Qalili, goto i Pilipi na tasina sa na bangara pa Ituria beto pa Tarakonitisi, goto i Lusaniasi sa na bangara pa Abilini, 2 beto ira Hanasi i Kaiapasi sa na kuta iama lavata. Na totoso isa sa lame pa qega ti Jone, na tuna i Zakarae, sa na paranga tana Tamasa. 3 Ko sa lekogia i Jone sa doruna na ia pa karu kale vaikarovona na pie Jodani ko sa taraenia isa sa na veveina ira na tinoni sa mai gabala loa paleria na dia sela beto mai tapaputaiso ko na Tamasa mi taleosoniria sau. 4 Ko sa gore votu sa isa vei sa takuti pa buka tai Aisea na tinoni kokorotai, isa pira sau,

7 Ego na motadi sira na puku tinoni qai vovotu lao tai Jone ko mai tapaputaiso qarigu. Poni pira sauniria isa sira, <<Boko tuni dole ikikeremiu! Qu siana sagou! I sei sa pojanigou sa muna boka ukunia agou sa na vinakilasa sa korapa jojoro lame? 8 Goto mu gabala ko mai tabata sira na vua jongadi pa miu uana. Muke sianania sa na tutina i Ebarahami sagei ko kode mene taalomei gu kita mugu. Ura ma poja vatalenigou gu ara sagou: na Tamasa sa mina boka roiti vania na koburu gu i Ebarahami sira na vavaikamu patu pira! 9 Ko kopira na vaituti sa sa tei tavanaqiti vakole tu, sa vei na rio sa tavakole pa kutana na gou ko mi paduru paleniria na bageredi na gou sau. Ko ira na gou qaike vuania na vua jongana sa kode mai tario pale ko mai tagona lao pale pa niku!>> sau si Jone.

10 Poni qai nanasa sira na minete tinoni, <<Ego ko na sa sa mene roitinia agei?>> qarigu.

11 Poni sa oeria isa sira, <<Isa na tinoni sa karu na ona soti, sa mi vania kame isa kepore ona. Beto isa sa poregana gagani, sa mi iaria tugu sira sa keporeniria,>> sauniria.

12 Ego ko ira na tinoni teteku takisi ba qai lame ko mai tapaputaiso tana qarigu, ko qai nanasia ira sisa, <<Tinoni vaivagigalai, agei pira sa na sa mene roitinia?>> qarigunia.

13 Poni sa oeria isa sira, <<Na padana gu vei sa vaigarununia na qavuna sa mu tekua, goto muke teku vajolai na takisi,>> sauniria.

14 Ira na solodia ba qai lame mutugu tana ko qai nanasia, <<Goto agei pira sa ai mene vei? Na sa sa mene roitinia?>> qarigu.

Poni sa oe laoria isa sira, <<Muke teku ragataria babu jutu goboro sesekeria ko bu teku variuniria na dia poata sira na tinoni! Mu qerania gu sa na miu tabara!>> sauniria.

15 Ego totonai sa ira na tinoni sa qai kole verania kode kaki sakasava mai pidoko qarigu. Ko qai kole vaiperania ira doru pa dia roroqu sa palu api tugu sa na Karisito qarigu. 16 Poni sa poja betoniria i Jone sira doru, <<Ara sa qa paputaisonigou na kolo, goto isa tu sa poreveveina jolanisiu ara sa sa korapa tuti lame. Ko ara ba nake padaqu ko mana ruvatia na pikona nona sadolo sisa. Isa tu sa mina paputaisonigou na Gagala Tabuna beto na iku. 17 Ura na sevolo vavaipikatai sa sa tei arunia tu pa limana sisa ko mi pikata paleniria sau sira na kopo ikika pa ia iru vaipipikatainiria ira na kiko, beto ko mi boko vaikamuniria pa ona ruma vavakoleni gagani sira na kiko vuiti sau. Goto ira na ikikadi sa mai tagona lao pale pa iku sa ilili kare,>> sau sisa. 18 Ko soku mule sira na vavanau sa kole tarae vabalauria i Jone totonai sa taraenia isa na nongoro jongana tadira na tinoni.

19 I Jone sa kole tugu udukia vei si Herodi na bangara, na ginuana vei sa alava tekua i Herodiasi, na maqotana i Pilipi na tasina gu beto ko koledia mule kaki roiti sake vagosoro vei sa roitiniria i Herodi. 20 Ego beto sa sa vatamo laonia mule i Herodi sa kai roiti ikerena jola, sa vakolea isa pa ruma vaipiu si Jone.

21 Ego pa liguna qai beto tapaputaiso ira na tinoni sa sa lao si Jisu ko sa somana tapaputaiso tugu. Ko totonai sa korapa vavara isa sa sa tarevanga sa na oka, 22 ko sa gore lagere vei na tinonina na kuru tana sa na Gagala Tabuna, ko sa gore toqo makele tana. Beto kai ovovele sa sa gore lagere vei pa noka, pira sau, <<Ao sa na Tuqu qa roroqugo ara! Qa qera jolanigo ara sao!>> sau.

23 Ego ko totonai sa podalainia na ona roiti si Jisu sa sa pada vei uengavuluputa aorona sisa. Pana dodogoro tadira na tinoni sa i Jisu sa na tuna gu i Josepa qarigu, isa i Josepa na tuna i Eli. 24 Ko i Eli sa na tuna i Matati isa na tuna i Livai, isa na tuna i Meleki, ko isa na tuna i Janai tai Josepa. 25 Ko i Josepa api sa na tuna i Matatiasi tai Emosi, isa na tuna i Nahumi, na tuna i Esili tai Nagai. 26 Ko isa i Nagai api sa na tuna i Maati, na tuna i Matatiasi, na tuna i Semeini ti Joseki, na tuna i Joda. 27 Ko i Joda sa na tuna i Joanani, isa na tuna i Resa, isa na tuna i Zorobabele, isa na tuna i Salatieli tai Neri, 28 isa na tuna i Meleki tai Adi, isa na tuna i Kosamu, isa na tuna i Elamadamu tai Ea. 29 Ko i Ea sa na tuna i Josua tai Elieza, isa na tuna i Jorimi, isa na tuna i Matati tai Livai. 30 I Livai sa na tuna i Simione, isa na tuna i Jiuda, isa na tuna i Josepa, isa na tuna i Jonamu tai Eliakimi. 31 Ko i Eliakimi sa na tuna i Melea tai Mena, isa na tuna i Matata tai Netani, isa na tuna i Devita. 32 Ego ko i Devita sa na tuna i Jese, isa na tuna i Obedi, isa na tuna i Boazi tai Salamoni, isa na tuna i Nasoni. 33 Ko i Nasoni sa na tuna i Aminadabi tai Adamini, isa na tuna i Ani tai Hezironi, i Hezironi sa na tuna i Perezi tai Jiuda. 34 Ko i Jiuda api sa na tuna i Jekopi, isa na tuna i Aisake, isa na tuna i Ebarahami, isa na tuna i Tera, isa na tuna i Nahoa. 35 Ko i Nahoa sa na tuna i Seruqi tai Raqau, isa na tuna i Peleqi, isa na tuna i Ebea tai Sala. 36 Ko i Sala api sa na tuna i Keinani, isa na tuna i Apakasadi tai Semu, isa na tuna i Noa, na tuna i Lameki. 37 Ko i Lameki sa na tuna i Metusela, isa na tuna i Inoke, isa na tuna i Jareti, isa na tuna i Maleleili, isa na tuna i Keinami. 38 Ego ko isa i Keinami api sa na tuna i Enosi tai Seti, ko i Seti sa na tuna i Adama, isa na tuna na Tamasa.