1 Pana buka api sa qai takuti sira na sakasava sa vavotu lameria pana dodogoro i Jisu Karisito. Na Tamasa tu sa vania i Jisu Karisito sa na dodogoro isa, ko mina ule votu vakabere vaniria ira na ona nabulu sira na veveidi na sakasava nake sovaina beto kode mai pidoko lame saunia. Ko i Jisu sa garunia sa nona mateana ko sa ule votu vania sa na ona nabulu i Jone, 2 ko i Jone sa sa vavakatoniria sira na sakasa sa batiria. Ko na sakasava sa batiria i Jone sira na paranga tana Tamasa beto na vavakatona i Jisu Karisito. 3 Mina tamana sisa mina tiro votuniria na paranga kokorotai aipira, beto ko mai tamana sira mai vainongoroniria beto mai tutiria na paranga qai takuti pana buka api! Ura sa tei tata lame tu sa na totoso totonai mai gore votu sira na sakasava aipira.

4 Ara Jone sa qa kuti lao pana tamugou ka vitu ekelesia pa ia pa Esia.

Mi kole somana pana tamugou sa na vairoqu vaialona beto na bule na lame veidi tana Tamasa, isa sa korapa kopira, sa kole perangana tu, beto kode mina korapa tu vuka risa. Beto ko na vairoqu vaialona beto na bule isa sa sa koko lame vei tugu tadira ka vitu gagala pana moena na ona totoqo bangarana; 5 beto ko na vairoqu vaialona beto na bule isa sa sa koko vei pana tai Jisu Karisito, isa na tarangena nona vavakato, na tinoni sa turu mule vamoe pana mate, beto ko isa sa bangaraniria na babangara pa kasia gusu.

Isa sa roroqugita sa gita ko pana orunguna sa sa ruvatagita pana oda sela sa gita, 6 beto ko sa roiti veinigita na ona bubutu iama isa, ko taqe nabulunia gita sa na Tamasa na Tamana. Ko pana ti Jisu Karisito mi kole sa na vinalavata beto na neqi kamua na kamua! Agua.

8 <<Ara sa na popodalaina beto na vinabetona,>> sau sa na Bangara na Tamasa, <<isa sa korapa kopira, sa kole perangana tu, beto kode mina korapa tu vuka risa, na Tamasa vivana jola.>>

9 Ara Jone, ara na tasimiu qa tutia i Jisu ko qa somana vitigi tavitigou pana binangara tana Tamasa beto turu vangaju. Qa taloa pale pa nusa pa Patimosi sara, ura qa vavaqatania ara sa na paranga tana Tamasa beto na vavakatona i Jisu Karisito. 10 Pana rane tana Bangara qa taaru pana neqi tana Gagala Tabuna sara beto qa nongoria sa kai ovovele lavata sa vaqoro viva vei na kuvili pa liguqu. 11 Pira sau sa na ovovele isa, <<Mu kuti vakoleria pa buka sira qu batiria beto mu garunu laonia pana tadira ka vitu gugusu lavata aipira: pa Episasi, pa Simuna, pa Peqamosi, pa Tuateira, pa Sadeisi, pa Piladelapia beto pa Laodikeia,>> sau.

12 Poni ma balinga ko ma batia i sei sa sa korapa parangasiu qau, ko qa balinga poni sa qa batiria sa ka vitu tuturuna tana juke. Ko na tuturuna tana juke ira sa qai taroiti pa qolo, 13 ko koleona pana vaikorapaidi ka vitu tuturuna tana juke sa kale vei kai Tuna na Tinoni sa vasaea na poko kakasa gojo doruru sa gore tu kamu pa nenena, beto ko na qolo sa sa kilisavarania pa raraqona. 14 Na vurunguna pa batuna sa sa keka vavalaka vei na vulu babi na lei, na matana sa tolanga vei na memeani iku, 15 na nenena sa vei na kilangani barasi sa tavalioso pana iku, beto na ovovelena sa vei na ovangani kijara pie. 16 Na lima kale matuana sa aruniria ka vitu seru, pana mangana sa votu na benete sa gani vaikale, beto na isumatana sa sa kabere tolanga vei na tapo korapa rane.

17 Ko totonai qa batia ara sisa, poni sa qa matagutu vivitigi, ko qa vukele gona kole pa nenena kale pu vei na tinoni matequ. Poni sa vaoponisiu na lima matuana beto sa parangasiu, <<Muke matagutu! Ara sa na momoe beto na liligu. 18 Ara sa na toaqu! Qa mate mai tu perangana, ba dotu kopira sa qa toa kamua na kamua. Ara qa isongia sa na viduluna na mate beto na ia tadira na tinoni matedi.

19 Ko kopira mu kuti vagoreria sira na sakasava qu korapa dogororia, beto ko ira na sakasava mai pidoko votu vuka risa. 20 Api sa na ginua golomona ka vitu seru qu batiria pa lima kale matuaqu, beto ko ka vitu tuturuna na juke. Ira ka vitu seru sa ka vitu mateana tadira ka vitu ekelesia, goto ka vitu tuturuna na juke sa ka vitu ekelesia.>>