Aipira sira na paranga tana sa aruria ka vitu seru pana kale matuana beto sa rerege pana vaikorapaidi ira ka vitu tuturuna juke qai taroiti pana qolo. Pira sau sisa, 2 <Qa gigilariaqua ara sira na mua roiti qu gosoro taleni vitigi, na mua turu vangaju, beto quke tavaraguaniria tugu vei sira na tinoni ikikeredi. Qu tei podekeria tugu ao sira qai gigala muleniria na tinoni tagarunudi, ko qu tei bati votuniria tu sa na tinoni nyonyoravadi gu sira. 3 Qu turu vangaju, beto ko qu gosoro taleni vitigi nisongoqu ara beto qu pavu talenia sao.

4 Ba api gu sa qake tavaraguania ara pana tamu: kopira quke vairoqu vei qu vevei na totoso momoe sao. 5 Ko mu roqu vakoititia sa na souna vei ketakoi qu koko vukele. Mu gabala ko mu roitiniria sira na roiti qu roitiniria na totoso momoe. Vei munake gabala sa kode mana lame ko mana varijo palea pana ona kokolena sa na mua tuturuna juke.

6 Ba api sa isa qa qeranigo ara ao: quke tavaraguaniria tu ao sa na roiti tadira kai puku tinoni qai gigalaniria na Nikolaitesi, ko ara ba qake tavaraguaniria tugu sira.

7 Na tinoni sa pore talingina sa mi nongoria sisa vei sa pojai na Gagala Tabuna tadira na ekelesia! Pana tadira na tinoni mai turu varene pana dia rarange, sa ara mana vamalumuria ko mai tekua sa na vuana na gou vaivatoana, isa sa pidoko pana inuma tana Tamasa,> sau,>> sau sisa.

Aipira sira na paranga tana na popodalaina beto na vinabetona, isa sa tei mate mai tu ba sa toa mule. Pira sau sisa, 9 <Qa gigilaiqua ara sa qu tangangulu na suvere golaba sao (ba pana toa gagala sa qu isisongo sao)! Beto qa gigilariaqua tugu ara sira na sakasava ikikeredi qai poja tarinigo ira qai gigala muleniria na tinoni Jiu, ba qai seke tugu goto na puku tinoni gu pana vaikamu tai Setani sira. 10 Munake isongo matagutuniria sira na tapata kode iapeki muna gosororia. Mu vainongoro lame ko! I Setani sa kode mina gona tomenigou pana ruma vaipiu sa kaki agou, ko mina podekegou, ko ka manogaputa rane mina vatapatagou. Ba vei muna tavamate tu ba muke beto rangesiu sara, ko ara mana vanigo na toa jola, isa sa vei na pinia sa tekua na varene tonai sa vakilasaria nona kana.

11 Na tinoni sa pore na talingina sa mi nongoria sisa sa pojai na Gagala Tabuna tadira na ekelesia! Ira mai turu varene pa dia rarange sa maike tavavitigi pana mate vinarua,> sau sisa.>>

Aipira sira na paranga tana na tinoni sa isongia na benete sa gani vaikale. Pira sau sisa, 13 <Qa gigilaiqua ara sa na ia ketakoi qu suveria ao sa na ia ketakoi sa kolea na totoqona bangara beto sa tavabangara i Setani. Ba ao qu aru tamana vamauru beto quke kilu palenia na mua rarange lame pana taqu, vei tugu pa totoso sa tavamate si Anitipasi. Isa na tinoni sake koroto vavakatonia na veveiqu ara pana tadira na tinoni sisa. Isa sa sa tavamate pa vaikorapaimiu agou, ketakoi sa suvere i Setani.

14 Ba ka vivisa sakasava gu sa sake vaqerasiu ara pana tamu. Koledia kaki agou sa qai tutia na vaivagigalai tai Balamu, isa sa vagigalaia si Balaki ko mi vavukeleria sira na tinoni Izireli ko mai tekuria sira na gagani qai tei tavavakukuvu lao tu tadira na beku beto mai roitinia na toa manugu sau. 15 Beto ko koledia tugu sira kaki tinoni pa vaikorapaimiu ao qai tutia na vaivagigalai tadira kai puku tinoni qai gigalaniria na Nikolaitesi, ko ira ba qai toa vei tugu na manugu. 16 Ko mu gabala! Munake vei sa nake sovaina beto kode mana lao tamu ko mana varajaniria na benete vaipera sa votu pana mangaqu ara sira.

17 Na tinoni sa pore talingina sa mi nongoria sisa sa pojai na Gagala Tabuna tadira na ekelesia! Tadira qai turu varene pana dia rarange, sa ara mana ianiria na teteku poreveveina kole golomona. Beto ko mana okoto vaniria na patu kekeala ketakoi sa takuti sa kai isongo koregana isa kepore kai tinoni sa gigilai, goto mekana vapupusalai gu na tinoni sa teku vakarovia isa sa sa gigilai,> sau,>> sau sisa.

Aipira sira na paranga tana Tuna na Tamasa, isa na matana sa tolanga vei na memeani iku beto na nenena sa kilanga vei na barasi sa tavalioso pa niku. Pira sau sisa, 19 <Qa gigilaiqua ara sira na mua roiti, na mua vairoqu, na mua rarange, na mua roiti ninabulu, beto na mua turu vangaju. Ko qa gigilaiqua tugu ara sa kopira qu roiti viviva jolania na totoso momoe sao.

20 Ba api sa sake vaqerasiu ara pana tamu: quke iju pale si Jezabelo, isa na rereko sa gigala mulenia na tinoni kokorotai tana Tamasa sisa sau. Ko pana ona vaivagigalai sa toni vapiruria isa pana toa lulasana sira na qua nabulu, beto sa vagigalairia ko qai gania sa na gagani qai tei tavavavakukuvu lao tu tadira na beku. 21 Qa tei vania tu na totoso ara sisa ko mi gabala qaunia, ba sake nyorogua gabala loa pale isa sa na toa lulasana. 22 Ko mu vainongoro ko! Kode mana gona vakole palea ara pana lovu sisa ko mina vakamunia na mo. Beto ko ira qai babarata tavitia isa ba mai gosoria tugu sa na vitigi vei maike gabala pana roiti ikikeredi tana sira. 23 Beto ko mana vamate paleria ara sira doru koburu tana. Ko ira doru ekelesia mai gigilai sa ara gu qa gigila betoria sa na roqudi beto na bulodi na tinoni, beto ko ara tugu mana okoto vanigou na tabarana na padana na miu roiti qu roitiniria sagou.

24 Ba pana tamugou kaki goto tinoni Tuateira quke somanania na ona vaivagigalai ikikerena beto qu oqoro gigilai na toa golomona ti Setani vevei isa, sa manake vanigou mule kaki pogoso mamata. 25 Goto mu aru tamana vamamauria gu sisa qu isongia tinganai mana lame ara.

26 Ko isa sa turu varene beto sa kopu vaokotoria na roiti taqu tinganai mina kamu pa bebetona, sa mana vania na neqi ara ko mina mamataniria na pupuku tinoni sisa. 27 Ko na tinoni isa sa mina bangaraniria ko minake aru qeqeraniria; goto mina aru veiniria na raro patu sa taimimete, 28 kai muqisi vei ara mekaqu ba qa teku neqi tana Tamaqu, beto mana vania na seru vuvugei jonga ara sisa.

29 Na tinoni sa pore talingina sa mi nongoria sisa sa pojai na Gagala Tabuna pana tadira na ekelesia,> sau,>> sau sisa.