1 Ego ko na sa sa isongia na tinoni Jiu vei sa poreveveina jolania isa sa isongia na tinoni karovona? Babi sa poreveveina jola tugu sa na veveina sa tapobe na tinoni? 2 E, kubo sakasava poreveveidi jola tugu sa isongia sa na tinoni Jiu! Momoe sa, ura pana tadira tinoni Jiu tugu qai tavagore vei sira na paranga tana Tamasa. 3 Ba ai sa vei sa? Ira kaki qai daidia vasosoto, ko ai vei na Tamasa minake kopunia na ona taringunguti sa vei ura ira qaike vasosoto? 4 Dai ko dai tugu! Qai tei tadogoro votu na gagale tinoni sesekedi gu sira doru tinoni, ba na Tamasa minake isongo tetea nona paranga. Kai muqisi podeke vei tugu sa pojai na Kukuti Tabuna sa pira sau,

5 Ba vei na roiti ikikeredi tu tadagita sa bai vakabere vavotu vatalea sa na tuvisi tana Tamasa, poni sa na sa tanagu sa vei? Ai vei na Tamasa sa sela tonai sa vakilasagita sa gita tanagu? (Qa korapa paranga vei qai rorovea kaki tinoni sara!) 6 Dai ko dai tugu! Ura vei bike vakilasagita sa na Tamasa, poni sa ai mina vei mina boka pitua isa sa na kasia gusu tinoni sa vei?

7 Ba vei na sosoto tana Tamasa sa bi vapugele nyonyoa votua na vinalavatana na Tamasa tonai qake roitinia ara sa na sosoto tana Tamasa, poni ai sa vei qa korapa tu tapitu vei kai tinoni selaqu sara? 8 Ego mina vei poni sa pira gu taunia ropi, <<Ariagada ko ta roiti vivikere ko na jongana mi soni lame!>> tau? Sosoto, ira kaki tinoni qai tei poja vivikeregei tu beto qai jutunigei sa agei qeu qarigu! Na padadi tugu ko mai tapitu sira.

9 Ego mu vainongoro vatale kopira. Ai vei agei na tinoni Jiu sa qe tuvisi jolaniria ira na tinoni karovodi? Bi mija tu iapeki! Ura agei qe tei vakabere momoea tu sa ira na tinoni Jiu beto na tinoni karovodi sa qai mekarai tapiu vaikamu gu pana kauruna na neqi tana na sela. 10 Na Kukuti Tabuna sa tei pojai tu sa pira sau,

19 Ego ko taqe tei gigilaioda tugu gita sa doru sakasava qai takuti pana Vavanau sa qai takuti vaniria tugu ira qai tatoni pana Vavanau, ko kepore sa kai tinoni mina boka paranga beia sa na vaipitu tana Tamasa, beto ko ira doru tinoni pa kasia gusu sa mai oe lao pana vaituti tana Tamasa. 20 Ego ko pana podeke roiti tutina na Vavanau sa kepore kai tinoni mina tadogoro vei na tuvisina pa moena na Tamasa, ura isa gu na manugu sa vagigilanigita na Vavanau sa na oda sela gu.Kera Vinatarasae 143.2; Qelesia 2.16.

21 Ego ba kopira na soana sa vatuvisiria na Tamasa ira na tinoni sa sa tei bola votu tu, ba na tuvisi isa sake kole pana Vavanau goto pana goto soana tu. Ba na Vavanau beto ira na tinoni kokorotai ba qai tei vavakatonia tu sa na veveina na tuvisi isa. 22 Na Tamasa sa vatuvisiria pana moena mekana sira na tinoni tonai qai rangea i Jisu Karisito. Na Tamasa sa roitinia sa api pana tadira doru qai vasosotoa na Karisito, ura kepore sosoto sa kai sa bi goto pana tadira na Jiu beto na tinoni karovodi, 23 ura ira doru tinoni sa qai sela beto gu ko qaike kamua sa na pada ululuna sa vakolea na Tamasa. 24 Ba na vatuvisida gita taqe vasosoto sa na ona vaivana isa sa koko lame vei pa ona vairoqu vaialona. Ko i Jisu Karisito sa pajuku teku mulenigita beto sa ruvatagita. 25 Ko i Jisu sa sa vaivanania na Tamasa, isa na vavakukuvu sa garo ko na vulasadi ira na oda sela tonai taqe rangea isa sa nyoa na orunguna pa korosi. Na Tamasa sa roitinia sa api ko sa vabatinigita sa na ona soana sa vatuvisiniria ira na tinoni pa moena mekana. Pa moa qike oqa tagigiriniria ko qi dogoro vajola paleria sira na sela tadira na tinoni, 26 ba kopira na Tamasa sake dogoro vajola paleria sira na sela tadira na tinoni ko gita taqe batia sa na ona tuvisi. Pana soana api na Tamasa sa ule vanigita sa isa mekana sa tuvisi beto isa sa vatuvisiria sira qai rangea i Jisu.

27 Ko sa vei sa na sa pana oda popodeke mekada sa tana boka vaqatania gita? Bi julingai tu! Ai vei ira na tinoni mai boka vaqatania sa na Tamasa sa dogoro veiniria na tuvisidi ura qai tutia na Vavanau? Dai sosoto! Tonai gu qai rangea ira na Karisito sa qai tavatuvisi sira. 28 Ura gita taqe tei dogoria tu sa na tinoni sa sa tavatuvisi pana moena na Tamasa tonai gu sa rangea na Karisito, nake pana ona tutidi na garunu tana Vavanau. 29 Ba ai vei na Tamasa sa na Tamasa tadira na tinoni Jiu gu? Ai vei nake Tamasa tadira na tinoni karovodi tugu vei sisa? Dai, isa ba na Tamasa tadira na tinoni karovodi tugu vei. 30 Ko na tei tagigilana tu sa isa gu sa na Tamasa sosotona, ko isa tugu mina vatuvisiria pana moena mekana sira na tinoni Jiu tonai qai rangea sa na Karisito beto ko ira na tinoni karovodi ba sa vatuvisiria pa moena mekana tonai tugu qai rangea na Karisito. 31 Ko, ai vei taqe vakepore veveinaia gita sa na Vavanau ura kopira taqe tavatuvisi pana rarange? Dai ko dai tugu! Taqeke dogoro vagorea gita sa na Vavanau, goto kopira tugu sa taqe sori vaturua pa peso mauruna sa na Vavanau.