4
I Ebarahami sa tavatuvisi tonai sa vasosoto
1 Ego ko kopira mu vainongoronia sa na soana sa tadogoro vei na tuvisina si Ebarahami isa na tite tamigei. Pana soana sa sa tavatuvisi sisa? 2 Vei bi tavatuvisi pana moena na Tamasa ura sa roitinira na roiti jongadi si Ebarahami, poni sa bi boka vaqatania isa pana tadira tinoni sa nona tuvisi isa, ba pa moena na Tamasa bike boka vaqatania tugu isa sa na tuvisi isa. 3 Ura pira tu sau sa na Kukuti Tabuna,
<<I Ebarahami sa vasosotoa sa na Tamasa,
ko na Tamasa sa doro veinia na tinoni tuvisina sisa,>> sau.Popodalaina 15.6; Qelesia 3.6.
4 Na tei tagigilana tu sa na tinoni sa roiti sa sa tatabara tugu, ko na ona tabara sa sake tadogoro vei na vaivana goto sa tadoro vei na laona na ona roiti. 5 Goto na tinoni sake roitinia na roiti jongadi goto sa vasosotoa gu sa na Tamasa, isa sa boka vatuvisia na tinoni ikerena, poni sa pana ona rarange isa sa sa tadoro vei na tinoni tuvisina sa na tinoni isa. 6 Ko i Devita na bangara ba sa tei ulenia tugu sa na qeqera sa gosoria na tinoni sake roitiniria na roiti jongadi ba na Tamasa sa doro veinia gu na tinoni tuvisina sisa. Pira sau si Devita,
7 <<Qai tamana sira na tinoni na dia roiti ikikeredi na Tamasa sa taleosoniria,
beto na dia sela sa vapae paleniria isa!
8 Sa tamana sa na tinoni isa ira na ona sela na Bangara sake puku tutinia!>> Kera Vinatarasae 32.1-2.sau.
9 Ego ko na qeqera sa ulenia i Devita api sa na dia gu ira qai tapobe, ba tadira qaike tapobe tugu vei? Taqe tei batiaoda tu gita pana Kukuti Tabuna sa i Ebarahami sa vasosotoa sa na Tamasa, ko pana ona rarange isa na Tamasa sa doro veinia na tinoni tuvisina sisa.Popodalaina 15.6; Romu 4.3; Qelesia 3.6; Jekopi 2.23. 10 Ego ko ai totoso sa na Tamasa so dogoro veinia na tinoni tuvisina si Ebarahami? Totonai sa tei tapobe tu, ba totonai tu sa oqoro tapobe? Dai, nake pa liguna sa tei tapobe tu sa, goto totonai tu sa oqoro tapobe sisa. 11 Ko pa liguna tu sa tadoro vei na tuvisina beto sa tapobe sisa, ko na pobe sa na vinagigilana gu sa tei tekua tu i Ebarahami sa na tuvisi isa tonai sa vasosoto totonai tu sa oqoro tapobe sisa. Ko sa vei isa sa i Ebarahami sa na tamadi ira doru qaike tapobe ba qai vasosotoa na Tamasa ko na Tamasa sa dogoro veiniria na tinoni tuvisidi. 12 Beto ko i Ebarahami tugu vei sa na tamadi ira qai tapobe, ba nake pana mekana gu na ginuana vei ira sa na tinoni tapobedi sa, goto ira ba qai toania tugu sa na toa rarange isa na tamada i Ebarahami sa toania totonai tu sa oqoro tapobe.
Na taringunguti sa lame tonai sa kole na rarange
13 Ego ko nake pana ginuana i Ebarahami sa tutia na Vavanau sa na Tamasa sa taringungutinia sisa beto isa na tinoni mina podo pana tutina i Ebarahami ko mai isongia sa na mana tana kasia gusu, goto na taringunguti isa sa lame totonai gu sa rangea na Tamasa ko sa tadoro vei na tinoni tuvisina si Ebarahami. 14 Vei ira gu qai tutia na Vavanau sa bai isongia sisa sa taringungutinia na Tamasa, poni sa na rarange tana tinoni sa sa kepore veveina beto na taringunguti tana Tamasa sa na goborona gu sa vei. 15 Na Vavanau sa ule votunia sa na vinakilasa tana Tamasa, ba ketakoi sa kepore na vavanau sa sa kepore tugu sa na maja paranga.
16 Ko na taringunguti sa sa lame pana tadira qai vasosoto gu, ura na Tamasa sa valame veinia na vaivana. Ko sa vei sa na taringunguti api sa tavalao nake tadira gu qai tutia na Vavanau, ba tadira tugu vei qai vasosoto vei sa vei i Ebarahami, isa na tamada gita taqe vasosoto. 17 Ko sa tei pojaiona tu na Kukuti Tabuna sapi, pira sau, <<Ara qa tei vilego tu sao ko muna vei na tamadi ira soku puku tinoni,>> sau. Ko na taringunguti sa vavagua pana moena na Tamasa, isa na Tamasa sa vasosotoa i Ebarahami. Ko isa tugu sa na Tamasa sa vatoa muleria ira na matedi beto sa boka kuku vapodakaria ira na sakasava qai oqoro podaka.Popodalaina 17.5. 18 Ko i Ebarahami sa vasosoto ko sa kole vera vamaurunia sa na taringunguti totonai kepore kai sa bi boka tavasosoto ura isa beto na maqotana sa qai tei baragoso na qoele tu. Ko sa tavaisongo na tamadi ira soku puku tinoni sisa, isa tugu vei sa pojai na Kukuti Tabuna, pira sau, <<Ira na mua koburu mai soku vei na seru,>>Popodalaina 17.17. sau. 19 Sake rabeke pana ona rarange sisa ba sa dogoro vakaberia isa na tinina, ura sa tei tata kai gogoto aorona tu sisa ko sa tei baragoso tu beto i Sera ba sa egoro. 20 Ba na taringunguti tana Tamasa sake ruarabeke vasekea sisa, goto sa neqi sa nona rarange ko sa vatarasaea tu sa na Tamasa 21 beto sa vagigila vatatalea sa na Tamasa sa isongia na neqi ko mina boka vagore votua na manugu sa taringungutinia. 22 Ko sa vei sa i Ebarahami sa tadogoro vei na tinoni tuvisina pana moena na Tamasa.
23 Ego na veveina i Ebarahami sa tadogoro vei na tinoni tuvisina sa qaike takuti ko ti Ebarahami gu mekana, 24 goto qai takuti ko tadagita tugu vei taqe tadogoro vei na tinoni tuvisida pa moena na Tamasa. Gita sa taqe vasosotoa na Tamasa isa sa vaturu mulea pana mate si Jisu na oda Bangara. 25 Na Tamasa sa vamalumia ko sa mate sisa ura gita taqe roitiniria na roiti ikeredi, beto sa vaturu mulea ko sa vatadogoronia sa gita taqe tavatuvisi pana moena na Tamasa.