1 Na sosotona sa ma pojai ara kopira ura ara sa qa tei kole kame tavitia tu na Karisito. Qake seseke sara, ko na monanaqu sa tatoni pana Gagala Tabuna ba sa ulenia sa ara qake korapa seseke. 2 Ma pojanigou gu sa na mamata takulanga qa isongia ara na veveidi ira na turaqu sa sa lavata jola beto na vitigi sa kole pa buloqu ara sa sa kepore vinabetona! 3 Qa nyoroguania sa vei ba boka sa ara mekaqu ba taleve pale beto ba tapikata pale pana tana Karisito, vei pana roiti vei isa sa ira na turaqu sosoto pana toa masa na orungu mai boka vasosotoa na Karisito. 4 Ira sa na bubutu Izireli, beto ko na Tamasa sa teku pausu veiniria na tuna, beto ko ira tugu sa sa vabatiniria nona malakapi, beto ko tadira tugu sa na Tamasa sa roitiniria nona vinaego, ko ira tugu sa qai tekua na Vavanau, ko ira tugu sa qai tavagigalainia na vinatarasaena na Tamasa. Beto ko tadira tugu sa na Tamasa sa valameria nona taringunguti, 5 ko ira tugu sa qai podo lame vei pana tutidi ira na kuta tamadi pa moa, beto ko pana bubutu tugu tadira sa podo lame vei na masa na orungu sa na Karisito, isa sa na Tamasa sa bangaraniria doru sakasava, ko mi tavatarasae kamua na kamua. Agua.

6 Ego sa sosoto tu sa ira soku tinoni Izireli sa qaike vasosotoa sa na Karisito, ba inara qai vei ira sa sake ulenia sa na taringunguti tana Tamasa sake gore votu. Na taringunguti tana Tamasa sa tei gore votu tu, ba ura nake ira doru qai podo lame vei na tinoni Izireli sa qai tadoro vei na tinoni Izireli sosoto tana Tamasa. 7 Beto ko nake ira doru tugu qai podo tuti lame vei ti Ebarahami sa na koburu sosoto ti Ebarahami pana moena na Tamasa. Goto pira tu qiu sa na Tamasa pana ti Ebarahami, <<Pana ti Aisake tu mina tavaisongo sa na tutimu ao,>> qiu.Popodalaina 21.12. 8 Ko na ginuana isa sa pira gu sa vei, nake ira qai podo pana nyorogua tana tinoni sa na koburu tana Tamasa, goto ira tu qai podo pana taringunguti tana Tamasa sa qai tadoro vei na tutina i Ebarahami. 9 Ura pira tu qiu sa na taringunguti tana Tamasa pana ti Ebarahami, <<Papada totoso vei tugu api na aoro lame ina sa mana mule lame ko totonai sa na maqotamu i Sera mina vaporea kai tumu marene,>> qiu.Popodalaina 18.10, 14. 10 Ba nake isa gu mekana sa na vinapapada, goto i Ribeka ba sa bogataniria tugu sira karu koburu pa liguna sa puta tavitia i Aisake isa na tamada gita. 11 Ba tonai tu qai oqoro podo babi tonai tu qai oqoro roitinia kai sakasa jongana babi na ikerena ira karu tamatasi, poni sa vei ko mi vatadogoronia sa na ona vivile sa na vuana gu na ona nyorogua mekana gu, 12 ko na vivile isa sa sake koko lame vei pana dia roiti jongana goto sa koko vei gu pana tana Tamasa mekana isa sa vileria sau sa na Tamasa, poni sa pira sau ti Ribeka, <<Na podo moana tu sa mina nabulunia sisa pa ligu,>>Popodalaina 25.23. sau 13 Ko na tei tapojana tu pa Kukuti Tabuna sa pira sau sa na Tamasa,

14 Ego ko na sa tanagu sa gita sa vei? Na Tamasa sake tuvisi totonai sa vileria gu ira sa nyorogua vileria tanagu? Dai ko dai tugu! 15 Pira tu sau sa na Tamasa pana ti Mosese,

19 Ko kame agou bi paranga lame vei pira pana taqu, <<Ko vei doru sakasa sa qai taroiti vagore votu pana nyorogua gu tana Tamasa poni sa doru sakasa taqe roitinia gita sa sa tutia gu na nyorogua tana Tamasa sa vei, ko ai sa vei na Tamasa sa tokea tu ropi na tinoni sa sela sa vei? Ura i sei mai tu sa tei raja kokolosia tu sa na nyorogua tana?>> biu sa kame. 20 Qokolo, goto i sei sao qu korapa tokea na totolinia na Tamasa? Ai vei na raro patu mina boka paranga karovia tu na tinoni sa korapa roitinia ko pira minagunia, <<Ai sa vei ko qu roiti veinisiu tu api?>> minagunia tu? 21 Na tinoni gu sa roitinia na raro patu sa sa gigilai sa ai mina varoiti veinia sa na peso roroitini raro. Ko pana kai kipa peso isa mina boka roitiniria karu raro, ko kai raro mina tavaroiti pana roiti poreveveidi goto kai raro mina tavaroiti pana roiti nake poreveveidi.

22 Sosoto na Tamasa sa nyorogua ulenia sa isa sake tavaraguania sa na sela beto sa nyorogua vatadogoronia sa isa koleona ona neqi, ba sa mavo vera vamomosoniria sira qai vakokorai beto ko qai talevenia ko mai gosoria na vinakilasa, 23 ko vei ko mi vatadogoronia sa na ona neqi lavata pana tadira sa roroqu tokaniria beto sa vanaqitiria perangana tu ko mai somana isongia sa na malakapi tana pa noka. 24 Ko gita sira na tinoni sa kuku tekugita isa, ko nake gita Jiu gu mekada ba ira na tinoni karovodi tugu vei, 25 vei sa tei pojai tu na Tamasa pa kukuti ti Hosea, pira sau,

26 Beto pira sau mutu,

27 Goto na veveidi ira na tinoni Izireli, pira sau si Aisea,

29 Ko kai muqisi podeke vei tugu sa tei korotonia tu i Aisea pa moa tu sa,

30 Ego ko pira gu sa vei na ginuana sa. Ira tu na tinoni karovodi qaike nyaqoa na tuvisi sa qai tekua sa na tuvisi, ko na tuvisi isa sa qai tekua ira ura qai vasosotoa na roiti sa roitinia na Karisito. 31 Goto ira na tinoni Izireli qai nyaqoa na vavanau mina vatuvisiria sa qai oqoro tu teku vatogai sa na tuvisi isa. 32 Ai sa vei sa ko qaike tekua tu na tuvisi? Ura qaike nyaqoa ira sa na Tamasa mi vatuvisiria pana dia vinasosotona na Karisito, goto qai nyaqoa tu ira sa ai vei ko mai tavatuvisi pana dia roiti jongadi. 33 Ko qai vei gu isa sa tei pojai tu na Kukuti Tabuna sira, tonai pira sau,