1 Ka visa tavitiqu, na qua kuta nyorogua pa buloqu beto na qua vavara lao tana Tamasa sa vei ko bai taalo sira na bubutuqu sosoto qau. 2 Ara qa vagigila vatalea sa ira qai ngangali nyaqo vivitigia sa na Tamasa, ba nake pa gigalai sosotona qai nyaqonia sisa. 3 Ura qaike doro gigalia ira sa na soana vei na Tamasa sa vatuvisiria ira na tinoni beto ko na dia soana tuvisi tu mekadi sa qai nyaqoa ko mai vaturua qarigu, ko qai kilu pale sa na soana vaivatuvisi tana Tamasa. 4 Ba na Karisito tu sa na vinaokotona na Vavanau, ko ira doru qai vasosotoa na Karisito sa mai tavatuvisi pa moena na Tamasa.

5 Ko i Mosese sa tei kutia tu sa na veveina na soana qai tavatuvisi ira na tinoni qai tutia na Vavanau, pira sau, <<Na tinoni sa tuti vikivokotoria na garunu tana Vavanau sa mina tekuniria na toa sira,>>Iama 18.5. sau. 6 Ba na veveina na soana na Tamasa sa vatuvisiria ira qai vasosotoa na Karisito sa pira tu sau, <<Muke paranga vei pira pa bulomu sao, <I sei sa mina sae pa noka?> mukeu,>>Vavanau 30.13. sau. (Na ginuana sa kaki mai sae mai tu ko mai valageria sa na Karisito ko mina ule vanigita na soana tana taalo.) 7 Babi <<Muke paranga vei pira sao, <I sei sa mina gore ketakoi qai kole na gagaladi ira na tinoni matedi?> mukeu,>>Vavanau 30.13. sau. (Na ginuana sa kaki sa mai gore mai tu ko mai toni vasalea sa na Karisito ko mina ule vanigita na soana tana taalo.) 8 Ba pira tu sau sa na Kukuti Tabuna,

Ko na nongoro isa sa na veveina na rarange ko isa tugu sa qe taraenia agei. 9 Ko vei muna ule votunia pa beberumu sa na Bangara si Jisu munagu beto vei muna vasosotoa pa bulomu sa na Tamasa sa vaturu mulea pana mate sisa, poni sa kode muna taalo sao. 10 Na tinoni sa vasosotoa pa bulona sa na Tamasa sa vaturu mulea pana mate si Jisu sa sa tavatuvisi pa moena na Tamasa sisa, beto ko na tinoni sa ule votunia sa na Bangara si Jisu sau sa sa taalo. 11 Ura pira sau sa na Kukuti Tabuna, <<Isa sa vasosotoa isa sa minake tavakea,>>Aisea 28.16. sau. 12 Ira na Jiu beto na tinoni karovodi sa kepore sa kame bi goto pa moena na Tamasa, ura kai muqisi Bangara gu sa na Bangara tadira doru, ko isa sa vaniria na mana lavata sira qai kiu alili lao pana tana. 13 Ura pira sau sa na Kukuti Tabuna, <<Ira doru mai kiu alili lao pa nisongona na Bangara sa mai taalo,>>Joili 2.32. sau.

14 Ego ko na veveidi ira na Jiu sa ira kaki bai paranga, <<Ai mai vei mai boka kiu alili lao pana tana isa qai oqoro vasosotoa sira? Beto ai mai vei mai boka vasosotoa sisa qai oqoro nongoronia? Beto ai mai vei mai boka nongoronia sisa vei minake tatarae sisa? 15 Beto ko ai mai vei mai boka tarae sira vei na Tamasa minake garunu laoniria sira mai tarae? Ura sa tei pojaiona tu na Kukuti Tabuna sa pira sau, <Sa vavagua jola sa na lamedi ira qai pogosia na nongoro jongana!>Aisea 52.7. sau,>> barigu sira kaki. 16 E sa sosoto tugu sisa, ba nake ira doru sa qai vasosotoa sa na nongoro jongana. I Aisea na tinoni kokorotai ba sa tei pojaiona tu, pira sau, <<Bangara, sa doro vei kepore sa kame bi vasosotoa na vavakato tamigei,>>Aisea 53.1. sau. 17 Ko na vinasosoto sa sa pidoko votu lame tonai sa tanongoro sa na vavakato, beto ko na nongoro api sa lame tonai sa tatarae sa na vavakatona na Karisito.

18 Ego ba ara qa nanasa, ai vei qai oqoro isongo nongoro sosoto sira? Dai, qai tei nongoriadia tu, vei tugu sa pojai na Kukuti Tabuna, pira sau,