1 Ego ko ara qa nanasa, ko ai vei sa kilu paleniria na Tamasa sira na ona tinoni mekana? Dai ko dai tugu! Ura ara gu ko ba kai tinoni Izireli tugu, na gore lagere veiqu pana ti Ebarahami, ko na bubutu Benijimani sara, ba na Tamasa sake kilu palenisiu tu. 2 Na Tamasa sake kilu paleniria sira na ona tinoni sa tei gigilariaona tu perangana tu. Ai vei quke gigilai tu agou sa isa sa pojai na Kukuti Tabuna na veveina i Elaija? Tonai sa ququmi lao pana tana Tamasa sisa, sa pira sau, 3 <<Bangara, ira na tinoni kokorotai tamu sa qai tei vamate beto pudala paleria tu, beto ira na mua idi tabuna vavakukuvudi sa qai tei jegara papaleria tu. Ara gu mekaqu sa qa kole jola, ko kopira qai korapa nyaqosiu ko mai vamatesiu mule qarigu,>> sau.1 Roiti Bangara 19.10, 14. 4 Ba na sa sau sa na ovovelena na Tamasa totonai? Pira sau sisa, <<Dai, nake ao gu mekamu. Koledia mule sira ka vitu tina tinoni ara qa tei vile kaleniria tu, ira qaike opo kokopo gore pa tutungudi ko bai vatarasaea sa na bekuna i Baala,>> sau.1 Roiti Bangara 19.18. 5 Ko sa vei tugu pana totoso totonai sa kopira ba koleona tugu sa kai minete kole jolana isa na Tamasa sa tei vileria tu ko qai vasosoto, ura isa sa roroquria sira. 6 Ko na vivile api isa sa roitinia na Tamasa sa sa koko vei pa ona vairoqu vaialona gu, nake pana kaki roiti jongadi qai roitiniria ira na tinoni. Ura vei na vivile tana Tamasa sa bi lame vei pana roiti tadira na tinoni, poni sa na vairoqu vaialona sa tonai mineke vei na vairoqu vaialona sa vei.

7 Ego ko na sa tanagu sa vei pira? Isa na soana mai tavatuvisi pa moena na Tamasa qai kole nyaqoa sa ira na tinoni Izireli sa qaike batia, ba ira kaki tinoni gu sa vileria na Tamasa sa qai batia. Goto ira doru sa qai tavakiqili, 8 isa tugu vei sa pojai na Kukuti Tabuna, pira sau,

11 Ego ko qa nanasa sara, ai vei tonai qai tatupe sira na tinoni Jiu poni sa ai vei qai gona vukeleniria sosoto ko qaike boka turu mule ligu? Dai ko dai tugu! Ba tonai qai maja paranga sira ko qaike vasosoto poni sa na inaalo sa sa lame tadira na tinoni karovodi, ko vei ko mi vakonoria sira na Jiu ko mai nyaqoa ko mai vasosotoa sa na Karisito. 12 Ko vei na maja paranga tadira na Jiu sa vaisisongia sa na kasia gusu beto na vukele tadira sa vaisongoniria na mana lavatana sira na tinoni karovodi, poni sa ai mina koi vei lavatana sa na mana mina lame tonai na vinaanye vaokotodi ira na Jiu sa mai vasosotoa sa na Karisito.

13 Ego kopira tamugou na karovomiu sa ma paranga. Ara tugu kisa na tinoni tagarunuqu qa tagarunu lao tadira na tinoni karovodi ko na roiti ninabulu sa udukunisiu na Tamasa api sa qa roqu vaporeveveina jolaia ara, 14 ko vei ko ba boka vakonoria sira na turaqu sosoto ko ba boka aloria sira kaki qau. 15 Ura tonai qai kilu palea ira sa na Karisito sa ira na goto tinoni mutu pa kasia gusu sa qai tavabaere lame tana Tamasa. Ko sa vei sa ai mina koi vei vavagua sa tonai mai mule lame ira? Kode mina vei puputa na tinoni sa mate sa sa toa ligu! 16 Beto ko vei na kipana sa tavaivana lao tana Tamasa vei na vua moena sa na madina, poni sa na batu bereti doruna ba na madina tugu. Beto ko vei ira na dia tite pa moa sa na madidi, poni sa ira na tudia ba na madidi tugu, ura vei na bagerena na gou sa bi madi, poni sa na kakaena na gou ba qai madi tugu.

17 Ego ko kaki kaena na gou olive taumana sa qai tei takaele pale tu ko na kaedi na gou olive piruna sa sa tasuni vatogasa lao ketakoi. Ko agou tinoni karovomiu sa qu vei puputa na kaedi na gou olive piruna isa ko qu somana tavagagani vatale pana tetekuna jongana sa koko sale vei pana bagerena na gou olive taumana. 18 Ko ao muke doro valavata mulenigo mekamu pa moedi na kae olive qai tei takaele pale tu. Ba vei muna rorove vei qu nyorogua valavata mulenigo mekamu poni sa mu roroqua sapi: nake ao na kaena sa qu pogosia sa na bagerena, goto na bagerena tu sa sa pogosigo sao na kaena.

19 Ba bu paranga sao, <<E, ba ira na kaena sosoto sa qai tei takaele pale tu ko ara tu sa kopira qa tasuni vatogasa lao,>> bugu. 20 E, sosoto tugu sisa. Ba na vuana qaike vasosotoa na Karisito sa beto qai takaele pale sira, goto ao sa qu vasosotoa gu na Karisito sa vei sa qu korapa turu vamauru. Ko sa vei sa muke doro vaululugo mekamu, goto mi kolego tu na pangaga. 21 Na Tamasa ira tu na Jiu qai vei na kaena sosoto na gou olive ba sake roqu tutumaniria goto sa kaele paleria tu, ko ao ba minake roroqu tutumanigo goto kode mina kaele palenigo tugu vei munake vasosoto sao. 22 Mu vainongoronia tu na vairoqu jongana beto na vaivakilasa neqina tana Tamasa ko! Ira qaike vasosotoa sa qai tekua na vinakilasa neqina, goto ao sa qu isongia nona vairoqu jongana vei munake beto totoravusia ao sa nona vairoqu jongana isa. Goto vei munake totoravusia ao sa nona vairoqu jongana isa poni sa ao ba muna takaele pale tugu sao. 23 Goto vei mai beto vasekea ko mai vasosotoa ira sa na Karisito, poni sa ira ba kode mai tavasuni ligu lao mule pana kuta gogouna na olive sira. Ura na Tamasa mina boka vatogasa ligu laoria mule ketakoi qai kole perangana sira. 24 Ura ao sa perangana sa qu vei na kae gou olive piruna na takaele kolena, ko nake tutina na toa umuma sa qu tasuni vatogasa lao pana kai gou olive taumana sao. Ko na munyalana jola gu sa na Tamasa mina suni vatogasa mule laoria sira na kaedi sosotona na gou olive taumana pana dia gou olive sosotona.

25 Ka visa tavitiqu tinoni karovomiu, ara qa nyorogua vivitiginia ko mu vakabere vatalea agou sa na vaivagigalai api isa perangana sa golomia na Tamasa, ko vei ko muke roroqua sa qu tavagigala pana miu roroqu mekamiu. Ira na tinoni Izireli sa qai vapatua na bulodi ba maike vei lalaodia sira, goto mai vapatua na bulodi tinganai mina kamua gu sa tonai na anye okotodi ira na tinoni karovodi mai tome lame. 26 Ego beto totonai sa ira doru tinoni Izireli sa mai taalo. Pira sau sa na Kukuti Tabuna,

28 Pana kalena qai kilu pale ira sa na nongoro jongana sa qai vei na kana tana Tamasa sira poni sa qu tatoka sagou, goto pana kalena ira sa na tinoni taviledi tana Tamasa sa na Tamasa sa korapa roroquriaona sira ura na ona taringunguti sa tei koleona tu tadira na tamadi pa moa tu. 29 Ura na Tamasa sake boka beia na roquna na veveina na ona vaivana beto na ona vivile. 30 Agou na tinoni karovomiu sa perangana ba quke vatabea sa na Tamasa, ba kopira qu tei isongia tu sa na roroqu vaitokai tana ura ira na tinoni Izireli qaike vatabea sisa. 31 Ko kopira sa ira mutu sa qaike vatabea sa na Tamasa, ko isa tugu sa roroqu toka veinigou agou sa ira ba mina roroqu toka veiniria tugu sira. 32 Ura na Tamasa sa tei loa laoniria tu pana dia toa nake vatabe sira doru, ko vei ko mi vadogoroniria nona roroqu vaitokai sira doru sau.

33 Sa vaivagabara jola ai koi vei korina beto na lavatana sa na tavagigala beto na gigalai tana Tamasa!