1 Ara Paula na nabulu tana Tamasa, na tinoni tagarunuqu tai Jisu Karisito ko mana vaneqia na rarange tadira sa vileria na Tamasa beto mana tokaniria ko mai isongia na gigalaina na sosoto sa vuania na pangagana na Tamasa.

2 Na rarange beto na gigalai aipira sa qai vangangaligita ko taqe korapa gelenia gita sa na toa jola pa moa tu sa taringunguti vanigita na Tamasa sake seseke. 3 Ko pa ona totoso tavilena poni sa ule vakaberenia pana tarae na Tamasa sa na ona nongoro api, ko na roiti taraenia na nongoro api sa na Tamasa na oda inaalo sa garununisiu ara ko mana roitinia sau.

4 Na leta api sa lao tao Taetusi, ao qu vei na tuqu sosoto pana rarange taqe mekarai isongia.

Na vairoqu vaialona beto na bule tana Tamasa na Tamada beto tana Karisito i Jisu na oda inaalo mai somana tamu.

5 Na ginuana qa vasuverenigo ara pa nusa Kiriti sao sa vei ko mu vatuvisi vataleria sa na roiti qai oqoro okoto beto mu vile vatoqoria pa okokoto gugusu ketakoi sira na tinoni mamata, isa vei qa tei vavanaunigo tu.

6 Isa sa pada ko mina tinoni mamata sa na tinoni sa kepore na ona pake, kame gu na maqotana, ira na tuna qai tinoni rarange beto qaike tagigalania na toa gogoborodi babi na uana duduvilidi. 7 Ura sa poreveveina sa na tinoni kopu sa mina tinoni kepore na ona pake, ura isa sa mamatania sa na roiti tana Tamasa. Ko na tinoni isa sa nake tinoni tututiona roroqu mekana, nake tinoni oqoqanai kokora, minake tinoni didigere aruna, minake tinoni vavaipera goboro, beto nake tinoni sa nyaqo isisongona pana soana selana sisa.

8 Goto isa sa na tinoni vakamu goto tinoni tu, sa tavaraguania na jongana, sa boka gaiti vatalea na roquna, sa tuvisi, sa toania na toa liosona, beto sa aru mulenia mekana pana uana ikeredi. 9 Beto na tinoni sa aru tamana vamauria na vaivagigalaina na nongoro tarangena sisa ko sa boka paranga vaivaneqinia na vaivagigalai togasana beto sa boka udukia na dia sela ira qai paranga kakanai na vaivagigalai togasana.

10 Ura kubo sira qai duduvili, sa kokoba na dia paranga beto qai tinoni vaitoni vapiru. Ira kaki puku tinoni Jiu ira qai tapobe sa qai vajolai sosoto sa na roiti aipira. 11 Ira sa na tuvisina sa mai tangujupuku ura ira na sakasa qai vaivagigalainia ko qai isisongodia pana soana selana sa sake garo ko bai vaivagigalainiria ba qai vaivagigalainiria tugu ko qai vapeluku vapiruria sira na tatamana doruna. 12 Kai dia tinoni kokorotai mekadi tugu ira sa tei poja vataleaona tu sa pira sau,

13 Na vavakato api sa sa sosoto ko sa vei sa mu uduku votuniria na dia sela, ko mai togasa pana dia rarange 14 beto maike jujuno goboroniria na vivinei jojongadi gogoborodi tadira na Jiu beto na garunu tadira na tinoni qai gabala vapelenia na sosoto. 15 Doru sakasava sa qai lioso tadira qai lioso, goto tadira qai paji beto qaike vasosoto sa kepore tugu sa kai sa bi lioso, goto sa paji sa na vonanadi beto na monanadi. 16 Qai ule votunia sa na Tamasa qai gigilaidia qarigu, ba na roiti qai tabata votunia pana dia uana qai ulenia sa qai kilu palenia tu ira sa na Tamasa. Qai lulasa pa moena na Tamasa, qai duduvili, beto kepore kai roiti jongana bai boka roitinia.