1 Goto ao sa mu vaivavanauniria sira na sakasava sa garo pana vaivagigalai togasana. 2 Mu vavanauria sira na marene iviva kokoleidi ko maike tinoni gua goboro, mai tinoni tapangagadi, mai gaiti vatalea na roqudi, mai togasa pana dia rarange, pana dia vairoqu beto pana dia turu vangaju.

3 Mu vavanauria tugu vei sira na rereko iviva kokoleidi ko mai toania na uana pangagana, maike vaipopoja vikere, maike pinausunia na kole bubuku gojo, goto mai vaivagigalainia tu ira sa na uana jongadi. 4 Ko mai vei sa mai vatavagigalaria sira na iviva rereko koregadi ko mai roroquria na marenedi, mai roroquria na tudia, 5 mai gaiti vatalea na roqudi, mai lioso na dia toa, mai rereko vatana vatale pa dia tatamana, mai vajongana lao tadira na goto tinoni, beto mai kole vaiketai tadira na marenedi. Ko mai toa vei ira sa ira na goto tinoni maike poja vivikeria sa na paranga tana Tamasa.

6 Ira na marene sae korega tugu vei sa mu paranga vaneqiria ko mai gaiti vatalea na roqudi.

7 Pana doru ginugua sa mu vabatiniria na mua toa mekamu ko mi kai dodoro tutina pana roiti jongadi. Na mua vaivagigalai mi kolea na uana jongana, na pangaga 8 beto na paranga vavagegoai sa lenoniria na vaipitu, ko ira qai kanago sa mai kea ura kepore sa kai sa ikerena mai boka vakesanigita.

9 Mu vavanau vataleria sira na pinausu ko pana doru sakasava sa mai kole vaiketai tadira na dia bangara, mai vaqeraria, maike paranga kakarovoria 10 maike aru golomoria na isisongo, goto mai vabatiniria na dia toa tarangena vatale, ko doru dia roiti mai sari vabata jongai sa na vaivagigalai tana Tamasa na oda inaalo.

11 Ura na vairoqu vaialona tana Tamasa sa pogoso lamenia na inaalo sa sa tei bola votu tu tadira doru tinoni. 12 Ko na vairoqu vaialona isa sa totoli vatavagigalagita ko ta kilu paleniria sa na uana vavakepore Tamasa beto ira na nyorogua ikikeredi tana kasia gusu, ko ta toania gita pa oda susuvere pa kasia gusu api sa na roroqu tavagigalana, na uana tuvisina, beto na toa madina, 13 tonai taqe korapa kukulinia gita sa na rane tamanana taqe gegelenia totonai mina bola votu na neqi ta noda Tamasa lavata i Jisu Karisito na oda inaalo. 14 Isa sa sa vania na ona toa mekana ko sa ruvatagita pana doru toa ikeredi beto sa valiosogita ko na ona tinoni poreveveina jola isa sa gita ko taqe ngangaliniria sira na roiti jongadi.

15 Aipira sira na sakasa mu vavanauniria, mu paranga vaivaneqiniria beto mu vaiudukuniria pana doru neqi qu isongia. Muke vamalumigo mekamu ko mai doro vagorego ira na tinoni.