1 Kheh te cheaq te lehq, nig hehd awg lawn ngag hehd maq gha sir maq gha kad che haq te lehq khanr maq gha che te yand, Ser laq ngag nid-ag lehax Ar thenr med*3:1 Ar thenr med Kawd ren thuq med ve muhd ni tuhz phawd huh cawg che yaog. khuhn chehd lar haz tug ngag hehd duhd chez lar che yaog. 2 Ngag hehd ve a nax var Tiq mod ser haq ngag hehd nig hehd geh peha lar che yaog. Yawd awr lehr, Khreq ve ha lehg che bon khuhd mar sehr phad Ghig sa ve awg ceg phehq che yaog. 3 Tuq che khanr che teq pa haq nig hehd gha khanr liz, nig hehd ni ma yeg chehd tug awg pun lehd ma koz, yonr che ted ceng awg khuhn nig hehd kha nehax chehd yeg lehq awg ghad cawg tug awg pun lehd ma koz, ngag hehd yawd haq peha lar che yaog. Nig hehd awr lehr, che kheh te che tuq che khanr che teq pa haq a nig gha khanr tug awg pun Ghig sa duhd chez lar che yaog lehz nig hehd sir chehd che yaog. 4 Awg lawn ghod ver, tuq che khanr che†3:4 tuq che khanr che Khreq yad te che haq te lehq che kheh te gha khanr che haq koz che yaog. Cy 11:19, Rm 5:3 haq a nig gha khanr tug yaog lehz, ngag hehd nig hehd geh chehd che te yand nig hehd haq laex pawz koz-ax peg che yaog. Koz lar che heh phehq vehr che haq liz a meha nig hehd kha sehax sir vehr che yaog. 5 Che haq te lehq, ngag khanr maq gha che te yand, nig hehd khawd-ehg kheh te yonr chehd che haq ngag gha sir tug, Tiq mod ser haq ngag peha lar che yaog. Beg sehr phad‡3:5 Beg sehr phad Ned haeg haq koz che yaog. 2:18 nig hehd haq beg yug lehq, ngag hehd kanx te nar che teq pa kheha phehq vehr vix-aq lehz ngag duhd har che yaog.

6 Kheh ma khuhd, a meha Tiq mod ser ngag hehd geh kawq gag vehr lehq, nig hehd yonr che ted ceng he lehq haq pehnd che ted ceng awg lawn, ha lehg tug ir jad che tawd khuhd§3:6 ha lehg tug ir jad che tawd khuhd Khreq awg khuhn yonr yeg chehd che haq koz che yaog. 1:3 ngag hehd haq koz ax che yaog. Nig hehd khar thad liz ngag hehd haq haq che awg khuhn kha nehax duhd nuhd chehd lehq, ngag hehd nig hehd haq mawg gad che heh nig hehd liz ngag hehd haq mawg gad jad che awg lawn liz, yawd koz ax che yaog. 7 Kheh te cheaq te lehq a vix a nax teq paog, ngag hehd duhd har jad che he lehq tuq che khanr che awg ceng gha lia haq gha khanr liz, nig hehd ve yonr che ted ceng haq te lehq duhd sa che ted ceng haq ngag hehd gha che yaog. 8 Awg lawn ghod ver, Jawd mawd Yer suq awg khuhn nig hehd yeg chehd che ver, a meha ngag hehd awg pun teq che ted ceng*3:8 ngag hehd awg pun teq che ted ceng Ngag hehd ha lehg lehq awg ghad gha che lehd koz gad che yaog. phehq che yaog. 9 Nig hehd haq te lehq a nig ved Ghig sa mehz khuhd suhr ngag hehd ha lehg tug kha peh cawg che yaog. Kheh te lehq khawd-ehg kheh te ver nig hehd awg pun ngag hehd Ghig sa haq chid muh lawq tuawg le. 10 Ngag hehd nig hehd haq gha kawq mawg daq lehq, nig hehd yonr mad lawq ser che awg ceng†3:10 mad lawq ser che awg ceng Ha lehg che bon khuhd haq caz daq che awg lawn teq pa i hehd haq kawq caz mar vid gad che haq koz che yaog. cawg mad-ag tug, muhd kaw muhd khax ngag hehd bon hax ceh nux lawg chehd che yaog.

11 Nig hehd geh ngag hehd lag gha tug, a nig ved Awr pa Ghig sa yawd he lehq a nig ved Jawd mawd Yer suq ngag hehd awg pun yaq kaw ghu lar ax vid-oq. 12 Ngag hehd nig hehd haq haq che heh, nig hehd liz te ghad he lehq te ghad haq haq daq che lehd ma koz, chaw awg gha lia haq haq che lehd ma koz, nig hehd awg khuhn ir lag mad lag tug, Jawd mawd Yer suq tea vid-oq. 13 A nig ved Jawd mawd Yer suq, yawd ved daq kehg che muhd nuh maq cuh yad‡3:13 daq kehg che muhd nuh maq cuh yad Khreq yad teq pa haq liz koz che yaog. awg gha lia geh teq geha kawq yaq che te yand, a nig ved Awr pa Ghig sa mehz khuhd suhr nig hehd ve ni ma vend bax tar kig maq gha cawg tug, Jawd mawd Yer suq nig hehd ve ni ma haq daq kehg che awg khuhn lo yeg vid-oq.