1 A vix a nax teq paog, awg leh med ve tawd te khuhd awr lehr, Jawd mawd Yer suq awg khuhn ngag hehd nig hehd haq che kheh te lawg khawx lehq awg ghad pehar che yaog. Nig hehd khawd-ehg kheh gha te kenr che he lehq Ghig sa ni ma cawd tug khawd-ehg kheh gha te cawd che teq pa ngag hehd geh gha hend lar peg che*4:1 ngag hehd geh gha hend lar peg che Pawd loq liz Yer suq geh hend yug lar che yaog. 1K 11:1 heh, a meha nig hehd te chehd che heh te lehq cheaq keh lex lehq awg med awr hax ceh nux te kae ser. 2 Jawd mawd Yer suq ve kand pax awg huhx lo ngag hehd nig hehd haq tawd pehar lar che teq pa haq nig hehd sir chehd che yaog. 3 Awg lawn ghod ver, nig hehd daq che kehg che chaw phehq cawd che†4:3 daq che kehg che chaw phehq cawd che Hax chawd hax paz taq te lehd koz gad che yaog. 1K 5:1 awr lehr Ghig sa ve a lor cawd che yaog. Kheh te lehq, hax chawd hax paz te che ted ceng haq jaw kae-o. 4 Nig hehd awg gha lia daq che kehg che he lehq yawz yan che awg khuhn a sug yawd ved awg mid ma haq kha nehax he chehd-oq. 5 Ghig sa haq maq sir che bid saz a naz chaw teq pa, awg suhr awg sar a lor haq ghaq kae lehq pehq che juhz che awg khad haq te veh che heh, nig hehd u kheh taq te. 6 Kanx che ted ceng‡4:6 Kanx che ted ceng Hax chawd hax paz te che haq koz che yaog. awg khuhn chaw te ghad-eg liz a sug yawd ved a vix a nax haq maq gha te pong te lex lehq maq gha te yaq. Awg lawn ghod ver, pong lag thad ngag hehd nig hehd haq koz mar-ax lehq sa tiq kha nehax pehar lar che heh, Jawd mawd Yer suq awr lehr, u kheh te che vend bax awg ceng gha lia awg pun kawq te khuhq vid sehr phad phehq che yaog. 7 Awg lawn ghod ver, chaq chiz che chaw phehq tug awg pun Ghig sa a nig haq kug yug lar che ma hez. Daq kehg che chaw phehq vehr tug awg pun yawd kug yug lar che yaog. 8 Kheh te cheaq te lehq, che ve haq chid bag lar haz che chaw awr lehr, chaw yad haq chid bag lar haz che ma hez. Nig hehd haq yawd ved Daq che kehg che Awg ha phu pehar sehr phad Ghig sa haq chid bag lar haz che yaog.

9 A vix a nax te ghad he lehq te ghad haq haq daq che awg lawn te ghad-eg liz nig hehd haq liq buhq ax tug maq lor. Awg lawn ghod ver, te ghad he lehq te ghad haq haq daq tug Ghig sa nig hehd haq mar ax peor.§4:9 Ghig sa nig hehd haq mar ax peor Isy 54:13, Yh 6:45 10 Awg cehg mag koz ver, Mar ker dawd niq muhd mig awg kag gha lia lo chehd che a vix a nax awg gha lia haq nig hehd haq chehd che yaog. Kheh ma khuhd a vix a nax teq paog, che haq keh lex lehq te ghad he lehq te ghad haq haq mad-ag tug, ngag hehd nig hehd haq awg ghad pehar che yaog. 11-12 Kheh te lehq, awg bag phawd awr chehd che chaw teq pa nig hehd haq yawz yan lehq nig hehd chaw te ghad-eg haq liz maq gha ca cud tug, ngag hehd nig hehd haq koz ax peg che heh, taq hiax gawr lehd chehd tug haq cud cad lehq a sug yawd te kig te cawd che haq te lehq, a sug yawd awg ton awg pun laq kuhr kha sehax kanx te tug, ngag nig hehd haq awg ghad pehar che yaog.

13 A vix a nax teq paog, duhd law kig mad cawg che awg kag awr ve chaw teq pa duhd har che heh te lehq, nig hehd maq gha duhd har tug, suh vehr che chaw teq pa*4:13 suh vehr che chaw teq pa Khreq yad teq pa awr lehr, i hehd maq suh ser huh Khreq kawq yaq tug haq duhd law chehd che yaog. Kheh te cheaq te lehq, suh vehr che chaw khawd-ehg kheh te tug haq i hehd duhd har jad che yaog. awg lawn ngag hehd nig hehd haq sir vid lar gad che yaog. 14 Awg lawn ghod ver, Yer suq suh lehq kawq teq tuag che haq a nig yonr che yaog. Kheh te cheaq te lehq yawd kawq teq tuag che heh te lehq, Ghig sa awr lehr Yer suq haq yonr lehq suh vehr che chaw teq pa haq yawd geh teq geha kawq sir veha lag tug yaog.

15 Jawd mawd Yer suq ve tawd khuhd haq ngag hehd cud lehq nig hehd haq che kheh koz ax che yaog. Jawd mawd Yer suq kawq gag thad kha gag a saq teq lehq chehd chehd ser che a nig teq pa awr lehr, suh vehr che chaw teq pa haq keh awg kawd yawd geh gha gag tug ma hez. 16 Awg lawn ghod ver, Jawd mawd Yer suq awr lehr yawd awg ton muhd nuh maq lo kawq yaq che te yand, tawd pid lehq awg khuhd hehnd chawa kug tug yaog. Kheh te lehq, muhd nuh maq cuh yad ir che te ghad†4:16 muhd nuh maq cuh yad ir che te ghad Mid kher laq haq koz che yaog. Yd 9, Dyl 10:13, 12:1 ve awg khuhd he lehq Ghig sa ve behd mez che awg khuhd liz, buhg-ag tug yaog. U kheh te che awg khuhn yawd yaq tug yaog. Awg yand u ve haq, Khreq awg khuhn suh vehr che chaw teq pa awg kawd kawq teq tuag tug yaog. 17 U ve awg khaz nuhr a saq teq lehq chehd chehd ser che a nig teq pa awr lehr, muhd-aq lo Jawd mawd Yer suq haq phud daq tug, chaw u ve teq pa geh teq geha mog cawg kig lo a nig haq chid taez‡4:17 chid taez Du deh che haq maq gha khanr tug muhd-aq lo chid taez che haq koz che yaog. Mt 24:31, Dyl 12:1 ax tug yaog. Kheh te lehq, Jawd mawd Yer suq geh a nig khar thad liz gha chehd tug yaog. 18 Kheh te cheaq te lehq, tawd khuhd che teq pa haq yehd lehq, te ghad he lehq te ghad haq awg ghad pid daoq.