2 Per troq liq
Awg meh he lehq phehq peg che awg lawn
Liq che ve haq haq yug che chaw teq pa vawr, 1 Per troq liq haq gha haq yug che chaw teq pa teq mor-a lehax yaog. Ma hez hez che sar lar teq pa kaod soq saq vid che haq te lehq, kuhz tuq ir jad che awg yand khuhn i hehd teq pa gha chehd chehd che yaog.
Buhq var he lehq buhq che awg yand
Liq che te koz haq buhq var yawd awg ton vawr Sid mor Per troq lehd koz che yaog. Kheh te lehq, 1 Per troq liq haq haq yug par u ve teq mor haq buhq vid lar che yawd ved liq ni koz te koz phehq che yaog lehd yawd koz lar che yaog (3:1). Kheh te lehq Pawd loq haq liz, “A nig haq che a nax var,” lehd koz lar che yaog (3:15). Liq buhq che awg khad liz Per troq buhq lar che lehd koz che haq hawnr daq che yaog. Liq che ve te koz haq A.D. 66 khuhq thad huh buhq lar che yaog.
A yed ir che awg lawn he lehq awg lawn kha peg
Per troq yawd Khreq ve “yawg huhnx var” phehq che haq te lehq ma hez hez che sar lar teq pa he lehq haeg che haq te che chaw teq pa Khreq yad awg mor khuhn ca khuhd gehag che awg lawn haq duhd har duhd khix jad che yaog. Kheh te lehq ma hez hez che sar lar che teq pa haq khawd-ehg kheh te tawr daq gha tug, yawd Khreq yad awg mor haq mar vid che yaog. Lex lehq, i hehd haq awg bon cawg jad che Khreq yad ve yonr khad nux he lehq daq che a saq teq khad awg lawn liz, yawd mar vid lar che yaog. Jawd mawd Yer suq Khreq vawr, awg cehg mag ni pawz te pawz kawq yaq tug yaog. Kheh te cheaq te lehq, yonr che chaw teq pa sa tiq tar che khuhn ghu lar hehnd lar cawd che yaog.
Awg lawn nux
1. Awg kawd ve tawd (1:1-2)
2. Khreq yad te pa ve daq che awg lid awg khad khuhn ir lag muh lag che (1:3-11)
3. Per troq sir vid gad che awg lawn (1:12-21)
4. Ma hez hez che sar lar teq pa awg lawn haq sa tiq pid che (2:1-22)
5. Jawd mawd Yer suq Khreq ni pawz te pawz kawq yaq tug awg lawn (3:1-16)
6. Awg leh med ve tawd (3:17-18)
1
Awg chawd teq pa haq duhd nuhd che tawd
Ngag awr lehr, Yer suq Khreq ve awg ceg he lehq cuh yad Sid monr Per troq* 1:1 Sid monr Per troq Mt 16:18, Yh 1:42, 1Pt 1:1 haq ngawx. yaog. Ngag nig hehd haq liq che buhq fea che yaog. A nig ved Ghig sa he lehq Thaer khuhq par Yer suq Khreq ve thed che cawd che haq te lehq nig hehd gha lar che yonr che awr lehr, ngag hehd yonr che heh phehq che yaog. Ghig sa he lehq a nig ved Jawd mawd Yer suq haq sir che awg khuhn, awg bon awg sinx he lehq duhd sa gad sa che nig hehd awg khod-aq mad-ag vid-oq.
Ghig sa ni ma tar che heh gha tar che awg lawn
A nig co ha teq lehq Ghig sa haq yawz yan gha tug, Ghig sa yawd ved kand pax a nig haq kha lor che awg gha lia pehar vehor. Yawd che kheh te che awr lehr, a nig yawd haq sir che haq cud lehq te lar che yaog. Yawd ved awg mig awg phond he lehq peh lawq jad che haq te lehq, a nig haq yawd kug yug lar peor. 1:3 kug yug lar peor Yawd ved yad phehaq tug lez yug che haq koz che yaog. Awg ceng che teq pa haq te lehq, yawd ved awg phuhd khaz jad lehq ir jad che kar tiq 1:4 ir jad che kar tiq Ghig sa ve muhd mig khuhn co co taer taer gha chehd tug haq koz che yaog. 1:11 teq pa liz, a nig haq pehar vehor. Kar tiq u ve teq pa haq te lehq Ghig sa phehq che heh nig hehd liz phehq gha lehq, mig gig khod-aq lo awg suhr awg sar a lor haq te lehq lug che sez che haq nig hehd pong tug yaog. Kheh te cheaq te lehq, hax ceh nux cud cad lehq nig hehd yonr che§ 1:5 yonr che Yer suq haq sir lehq haq yug che haq koz che yaog. ted ceng awg thang, daq che awg lid cawg vid-oq. Daq che awg lid* 1:5 Daq che awg lid Khreq yad awr lehr daq che awg lid khuhn a saq gha teq che yaog. awg thang, cud yiq cawg vid-oq. Cud yiq cawg che awg thang, a sug yawd awg ton haq ghad vix che ted ceng cawg vid-oq. A sug yawd awg ton haq ghad vix che awg thang, yeg khanr vix che ted ceng cawg vid-oq. Yeg khanr vix che awg thang, Ghig sa haq yawz yan vix che ted ceng cawg vid-oq. Ghig sa haq yawz yan vix che awg thang, a vix a nax haq haq lehq ngawx haq sax daq che ted ceng cawg vid-oq. A vix a nax haq haq lehq ngawx haq sax daq che awg thang, haq daq pehnd daq che 1:7 haq daq pehnd daq che Chaw awg gha lia haq liz gha haq che haq koz che yaog. Yh 10:15 cawg vid-oq. Awg lawn ghod ver, awg ceng che teq pa nig hehd awg khuhn cawg lehq mad-ag ver, a nig ved Jawd mawd Yer suq Khreq haq sir che awg khuhn, nig hehd awg bon cawg che chaw phehq lehq, awg sir kha peh nuhaq tug 1:8 awg sir kha peh nuhaq tug Co ha phawd ir lag che haq koz che yaog. Gal 5:22 yaog. Awg ceng che teq pa mad cawg che chaw awr lehr, mehz cox var heh§ 1:9 mehz cox var heh Khreq yad ve awg lid awg khad haq maq sir che haq koz che yaog. 1Yh 2:11 te lehq, mehz khoq haq lehax mawg gha che yaog. Yawd ved vend bax awg pir teq pa haq Ghig sa chuhd phu chuhd kehg vid che haq yawd lend vehr che yaog.
10 Kheh te cheaq te lehq a vix a nax teq paog, Ghig sa nig hehd haq kug yug lez yug lar che ted ceng awr lehr, awg cehg mag yeg che yaog lehz sir gha tug hax ceh nux teo. Che kheh te ver, nig hehd te pawz-a liz ma kuhd tug yaog. 11 Kheh te lehq, a nig ved Jawd mawd he lehq Thaer khuhq par Yer suq Khreq ve co co taer taer che muhd mig awg khuhn Ghig sa nig hehd haq ha lehg che awg khuhn haq yug ve gehe tug yaog.
12 Kheh te cheaq te lehq, che teq pa* 1:12 che teq pa Ghig sa ve cuh kar var teq pa pheq mar ax che tawd haq koz che yaog. 1:5-7 haq nig hehd sir lehq gha hend lar che thed che cawd che tawd khuhd awg khuhn nig hehd chehd yeg chehd liz, ngag duhd chez lehq awg ceng che teq pa haq khar thad liz nig hehd haq duhd nuhd vid tug yaog. 13 Awg ceng che teq pa haq nig hehd maq gha lend vehr tug, ngag awg ton teq chehd che kheh ceh, nig hehd haq duhd nuhd vid tug te che awr lehr cawd che yaog lehz ngag sawnr lar che yaog. 14 Awg lawn ghod ver, a nig ved Jawd mawd Yer suq Khreq ngag haq pheq mar lar che heh, maq muh tand ngag ved awg ton che haq gha chid bag lar haz tug 1:14 awg ton che haq gha chid bag lar haz tug Yawd gha suh tug haq koz chehd che yaog. ngag sir che yaog. 15 Mig gig khod-aq lo ngag tuhz veh peg khaz nuhr liz, che teq pa haq nig hehd khar thad liz duhd nuhd tug, a meha ngag hax ceh nux te tug yaog.
Yer suq ve awg mig awg phond haq gha mawg che awg lawn
16 Awg lawn ghod ver, a nig ved Jawd mawd Yer suq Khreq ve kand pax awg lawn he lehq yawd kawq yaq tug awg lawn ngag hehd nig hehd haq koz mar ax che te yand, cud yiq haq yehd lehq ca duhd koz che kad phed kad lao khuhd lehax phehq che ma hez. Kheh ma khuhd, ngag hehd awr lehr yawd ved ir jad che awg mig awg phond haq mehz sir gha mawg che 1:16 mehz sir gha mawg che Yer suq ve awg hoq awg han pa che haq gha mawg che haq koz che yaog. Yh 21:18-19 chaw phehq che yaog. 17 Awr pa Ghig sa yawd haq tar ir tar muh lehq awg mig awg phond pid che haq ngag hehd gha mawg che yaog. Chaw cheawg lehr, ngag haq jad che Yad phu yaog. Yawd haq ngag ni ma cawd jad che yaog lehz, Awg mig awg phond kha peh cawg Sehr phad yawd haq che kheh koz vid che tawd khuhd haq ngag hehd gha kad che yaog. 18 Daq kehg che keh u ve ted dig awg thang huh yawd geh chehd che te yand, tawd khuhd u ve muhd nuh maq lo tuhaz che haq ngag hehd gha kad che yaog.
19 Che haq te lehq, awg kawd thad loar koz teh lar che Ghig sa ve cuh kar var teq pa ve tawd khuhd haq a nig lex lehq yonr gha che yaog. Nig hehd ve ni ma awg khuhn muhd thid-ag lehq§ 1:19 muhd thid-ag lehq Ghig sa uq penr che awg ni gag che haq koz che yaog. 1K 15:22-18 pheq meg ma tuhaz* 1:19 pheq meg ma tuhaz Yer suq haq koz gad che yaog. Pheq 2:28, 22:16 thad kha gag, naz hoq che awg khuhn awg ghiz pawd chehd che a mir khehd haq cud che heh te lehq, Ghig sa ve cuh kar var teq pa ve tawd haq kha nehax na yug cawd che yaog. 20 Liq phu khuhn cawg che Ghig sa ve cuh kar var ve tawd, khar ve te khuhd lehd ma koz, a sug yawd khad yawd cuhx kig haq duhd tuhaz che ma hez lehz awg kawd sir-oq. 21 Awg lawn ghod ver, Ghig sa ve cuh kar var teq pa awr lehr, i hehd khad i hehd ve a lor haq te lehq yaw che ma hez. Kheh ma khuhd, Daq che kehg che Awg ha phu i hehd haq duhd pawnr vid lehq, 1:21 duhd pawnr vid lehq 2Ti 3:16 haq ngawx. i hehd Ghig sa ve tawd khuhd kawq yaw che yaog.

*1:1 1:1 Sid monr Per troq Mt 16:18, Yh 1:42, 1Pt 1:1 haq ngawx.

1:3 1:3 kug yug lar peor Yawd ved yad phehaq tug lez yug che haq koz che yaog.

1:4 1:4 ir jad che kar tiq Ghig sa ve muhd mig khuhn co co taer taer gha chehd tug haq koz che yaog. 1:11

§1:5 1:5 yonr che Yer suq haq sir lehq haq yug che haq koz che yaog.

*1:5 1:5 Daq che awg lid Khreq yad awr lehr daq che awg lid khuhn a saq gha teq che yaog.

1:7 1:7 haq daq pehnd daq che Chaw awg gha lia haq liz gha haq che haq koz che yaog. Yh 10:15

1:8 1:8 awg sir kha peh nuhaq tug Co ha phawd ir lag che haq koz che yaog. Gal 5:22

§1:9 1:9 mehz cox var heh Khreq yad ve awg lid awg khad haq maq sir che haq koz che yaog. 1Yh 2:11

*1:12 1:12 che teq pa Ghig sa ve cuh kar var teq pa pheq mar ax che tawd haq koz che yaog. 1:5-7

1:14 1:14 awg ton che haq gha chid bag lar haz tug Yawd gha suh tug haq koz chehd che yaog.

1:16 1:16 mehz sir gha mawg che Yer suq ve awg hoq awg han pa che haq gha mawg che haq koz che yaog. Yh 21:18-19

§1:19 1:19 muhd thid-ag lehq Ghig sa uq penr che awg ni gag che haq koz che yaog. 1K 15:22-18

*1:19 1:19 pheq meg ma tuhaz Yer suq haq koz gad che yaog. Pheq 2:28, 22:16

1:21 1:21 duhd pawnr vid lehq 2Ti 3:16 haq ngawx.