1 Ghig sa mehz khuhd suhr lehd ma koz, teq chehd che chaw teq pa he lehq suh vehr che chaw teq pa haq suhx jehg suhx taz tug Yer suq Khreq mehz khuhd suhr lehd ma koz, yawd kawq tuhaz tug he lehq yawd uq penr tug haq cud lehq ngag nawg haq tawd che kheh pehar che yaog. 2 Bon khuhd kha nehax mar vid-oq. Har liz sa liz hax ceh nux te mar-og. Vend bax pheq mar vid lehq ded mar vid-oq. Duhd yehg gad yehg che he lehq mar vid che awg khuhn awg ghad pid-oq. 3 Awg lawn ghod ver, chaw yad teq pa awr lehr, daq lehq awg bon cawg che tawd khuhd haq maq na yug che awg yand cawag tug yaog. I hehd awr lehr a sug yawd ni ma cawd che heh kad gad lehq u kheh te mar che sar lar teq pa haq mad chawa i hehd geh chehd cuh vid lar tug yaog. 4 Awg cehg mag te che tawd khuhd haq maq gha na tug i hehd phuhz veh lehq kad phed kad lao khuhd haq kha sehax na tug yaog. 5 Nawg awr lehr, awg ceng gha lia awg khuhn ni ma tar vix che chaw phehq lehq sa tiq tar-oq. Tuq che khanr che haq khanr chehd-oq. Ha lehg che bon khuhd mar che kanx haq te chehd-oq. Nawg te chehd che bon kanx haq peh lawq thad kha gag teoq.

6 Awg lawn ghod ver, a meha liz tand tug*4:6 tand tug Yud daq chaw ve bon yehg nux khuhn tand tug tand vid che heh, Pawd loq ve a saq liz Ghig sa ve kanx awg pun tand vid lar che haq koz che yaog. heh te tand vid chehd che haq ngag gha khanr lehq, ngag gha koeq che awg yand gag vehr pad ned che yaog. 7 Daq jad che bawz daq tug haq ngag bawz daq peor.†4:7 ngag bawz daq peor Ghig sa te cuha che kanx haq Pawd loq yawd kar tiq yeg che awg khuhn te lar peor, lehd koz gad che yaog. Cex tehz daq che ted ceng haq awg leh med kha gag ngag cex peor. Yonr che ted ceng haq ngag kha nehax yug cid lar peor. 8 A meha awr lehr, thed che cawd che si ux cuhr ngag awg pun haq sax lar che yaog. Awg ni u ve‡4:8 Awg ni u ve Yer suq kawq yaq che awg ni haq koz che yaog. awg khuhn thed che cawd che suhx jehg sehr phad Jawd mawd Yer suq awr lehr, si ux cuhr u ve ngag haq pehar tug yaog. Ngag haq lehax ma hez. Yawd kawq tuhaz tug haq duhd law chehd che chaw awg gha lia haq liz yawd pid tug yaog.

9 Nawg ngag geh har naq lag gha tug cud cad-oq. 10 Awg lawn ghod ver, Der maz§4:10 Der maz Kaw 4:14 haq ngawx. awr lehr, mig gig haq haq che haq te lehq, ngag haq chid bag lar haz lehq, Thed sar lawd niq med lo veh vehor. Kar rer ker awr lehr, Gar lar tiq muhd mig lo kae lehq, Tid tuq awr lehr Dar lar mar tiq*4:10 Dar lar mar tiq A meha Ar bed ni-ad lehd koz kug che yaog. Te pawz pawz ax ver Id lud riq lehd liz koz che yaog. Rm 15:19 muhd mig lo kae che yaog. 11 Lud kar te ghad lehax ngag geh chehd chehd che yaog. Nawg lag che te yand, Mar koq†4:11 Mar koq Yod hanr Mar koq haq koz che yaog. Cy 12:12, 13:13 haq liz sir veha lar-og. Awg lawn ghod ver, kanx te che awg khuhn yawd ngag haq kha nehax ga gha che yaog. 12 Tud khiq‡4:12 Tud khiq Cy 20:4, Ef 6:21-22, Kaw 4:7-8 haq Ed fed suq med lo ngag kae pe che yaog. 13 Nawg lag thad ver, Tar rod aq med khuhn Kar puz geh ngag teh lar haz che a poq lehg maq he lehq liq teq pa loar lex lehq sar gig kox haq§4:13 sar gig kox haq U thad teq coaq, Ghig sa ve tawd khuhd sar gig kox haq buhq lar che yaog. buhq lar che liq teq pa ga yug veha lar-og.

14 Cag lex var Ar ler sar duq*4:14 Ar ler sar duq 1Ti 1:20 haq ngawx. awr lehr, ngag haq nar tug laex ceng tea che yaog. Yawd te che kanx teq pa haq kenr daq che heh Jawd mawd Yer suq yawd haq kawq te khuhq vid tug yaog. 15 Nawg liz yawd haq sa tiq teo. Awg lawn ghod ver, ngag hehd mar che tawd khuhd haq yawd hax ceh nux tawr tar che yaog.

16 Ngag awg ton awg pun ngag awg kawd te pawz gha yaw khuhq che te yand, chaw te ghad-e liz ngag phawd awr ma chehd. Chaw awg gha lia ngag haq chid bag vehr che yaog. I hehd teq pa haq vend bax taq tar vid-oq. 17 Chaw awg gha lia ngag haq chid bag lar haz liz, ngag awr lehr bon khuhd kha nehax mar vid lehq, bid saz a naz chaw awg gha lia gha kad tug, Jawd mawd Yer suq ngag geh chehd lehq awg ghad pehar che yaog. Kheh te lehq, lad cag six ve mawq kaw†4:17 lad cag six ve mawq kaw Cir yanr che haq koz gad che yaog. Awg yand u ve awg khuhn, vend bax cawg che chaw haq lad cag six cheq cad cuh vid che awg lid cawg che yaog. awg khuhn ngag haq pong ax che yaog. 18 Jawd mawd Yer suq awr lehr, haeg che teq pa awg khuhn ngag haq pong ax che awg khod-aq liz, yawd ved muhd nuh maq muhd mig kha gag ngag haq thaer khuhq ax tug yaog. Yawd haq co co taer taer chid ir chid muh vid-oq. A meng.

19 Pid kid laq he lehq Ar kud laq haq lehd ma koz, Awd ner sir phawd ve yehg yad ka yad teq pa haq lehd ma koz, ngag duhd nuhd chehd che yaog lehz i hehd haq koz vid-oq. 20 Ed rar tuz awr lehr, Kawd ren thuq med lo chehd lar haz che yaog. Tar rud pheq te ghad awr lehr, nag lehq, ngag yawd haq Mer ler tuz med khuhn lo teh lar haz che yaog. 21 Muhd kaz yand mad gag ser huh nawg har naq lag gag tug cud cad-oq. Ud bud luq, Pud de, Lid nuq, Kar lawd duq he lehq a vix a nax awg gha lia nawg haq duhd nuhd chehd che yaog lehz tawd sanr fea che yaog.

22 Jawd mawd Ghig sa awr lehr, nawg geh chehd vid-oq. Ghig sa awg bon awg sinx liz nawg geh cawg vid-oq.