Tid tuq liq
Awg meh he lehq phehq peg che awg lawn
Pawd loq Anr tiz awr med khuhn tuhez lehq Yer ruq sar lehnr med lo chehd che Khreq yad awg mor ve awg hox chaw mawd teq pa geh “yawd mar che ha lehg che bon khuhd” awg lawn ca jehg daq thad huh, yawd Tid tuq haq liz sir ve kae che yaog. Cuh yad liq awg khuhn Tid tuq ve awg lawn haq mad buhq lar liz, Tid tuq che te ghad awr lehr Pawd loq sehr pawz te pawz ha lehg che bon khuhd ca tuhz maer thad huh, Ed fed suq med lo Pawd loq geh teq geha kanx ga te vid che phad yaog. U huh te lehq Kawd ren thoq med lo Khreq yad awg mor khuhn kanx ga te vid tug Pawd loq yawd Tid tuq haq kae pe che yaog. Pawd loq Rod maq thawnr khuhn awg kawd maq te pawz geh lar haz lehq tuhaz vehr khaz nuhr, yawd he lehq Tid tuq Kar rer ter muhd mig khuhn teq cuhx nehax teq geha kanx te jaw che yaog. U ve khaz nuhr Pawd loq yawd Tid tuq haq kanx aq vid lehq te mad peg ser che kanx teq pa haq te peg vid tug, yawd awg tan te lehq u huh chehd cuh lar haz che yaog.
Buhq var he lehq buhq che awg yand
Pawd loq A.D. 64 khuhq kheh thad huh Kawd ren thoq med lo buhq lehq Tid tuq haq fe vid lar che liq phehq che gha hawg.
A yed ir che awg lawn he lehq awg lawn kha peg
Pawd loq liq che ve te koz buhq che vawr, Tid tuq haq kand pax pid lehq ha lehg che bon khuhd haq tawr chehd che chaw teq pa haq tawr daq tug awg khad bez mar vid che yaog. Yonr che awg lawn he lehq kanx te che awg khad tawd sanr vid lehq, ma hez hez che sar lar teq pa awg lawn haq sa tiq pid lar che yaog. U ve awg khod-aq liz, awg ghud suhr phawd awr Tid tuq yawd khawd-ehg kheh gha te tug awg khad koz mar vid lar che yaog.
Awg lawn nux
1. Khreq yad awg mor khuhn ve awg hox chaw mawd teq pa awg lawn (1:1-9)
2. Ma hez hez che sar lar awg lawn sa tiq pid che (1:10-16)
3. Khreq yad awg mor khuhn ve chaw laex ceng haq seh kae tug awg lawn mar che (2:1-15)
4. Yonr che chaw teq pa awg lawn (3:1-8)
5. Khreq yad awg mor khuhn co ha phawd awr ve phehq har che awg lawn haq khawd-ehg kheh gha te tug sa tiq pid che (3:9-15)
1
Awg chawd haq duhd nuhd che tawd
1-4 Ghig sa ve awg ceg he lehq Yer suq Khreq ve cuh yad phehq che ngag Pawd loq awr lehr, yonr che khuhn ngag ved yad awg cehg mag phehq che Tid tuq haq liq che ve buhq fea lar che yaog. Ghig sa lez yug lar che chaw teq pa ve yonr che ted ceng haq awg ghad pid tug lehd ma koz, awg cehg mag te che tawd khuhd haq koz mar vid tug lehd ma koz, thed che cawd che haq te tug mar vid tug Ghig sa ngag haq lez yug lar che yaog. Kanx che ve awr lehr, Ghig sa duhd lar lehq mig gig che ve mad cawg ser thad loar a nig yawd geh co co taer taer gha chehd vid tug kar tiq te lar che yaog. Ghig sa maq her ka jaw. Awg yand gaeg che te yand, yawd awg cehg mag te che tawd khuhd u ve pheq mar ax tug yaog. A nig ved Thaer khuhq par Ghig sa awr lehr, tawd khuhd u ve mar vid tug ngag haq tawd pehar lehq chid aq ax lar che yaog. Awr pa Ghig sa he lehq a nig ved Thaer khuhq par Yer suq Khreq ve awg bon awg sinx he lehq duhd sa gad sa che ted ceng nawg geh cawg vid-oq.
Ker rer ter muhd mig khuhn Tid tuq ve kanx
5 Ngag nawg haq mar vid lar che heh, lor ser che kanx teq pa haq kawq ghu te lehq, med awg mag ga lia khuhn awg hox chaw mawd teq pa haq lez teh vid tug, ngag nawg haq Kar rer ter muhd mig khuhn chehd cuh lar haz che yaog. 6 Awg hox chaw mawd teq pa awr lehr, vend bax tar kig mad cawg lehq, awg mid ma te ghad lehax cawg che chaw gha phehq che yaog. I hehd ve yad teq pa liz Khreq yad phehq lehq chaw haeg chaw me, juhg buhz juhg ka he lehq awr pa awr ye ve khuhd haq maq na yug vix che chaw awg lawn haq su koz gid ghig gid tug maq gha te hawg. 7 Awg lawn ghod ver, Khreq yad awg mor teq pa haq ngawx haq sax che chaw teq pa awr lehr, Ghig sa ve med nged haq haq sax sehr phad te cheaq te lehq, vend bax tar kig mad cawg che chaw gha phehq che yaog. A sug yawd ved a lor haq te che chaw, ni ma ngeh che chaw, a pehx med ghig dawg pong dawg lex che chaw, su haq yaq daq dawz daq che chaw he lehq phu si muhd jeg haq sex lae vix che chaw maq gha te hawg. 8 Kheh te lar, khehx chaw haq haq yug vix che chaw, daq che haq ni ma cawd che chaw, ni ma tar vix che chaw, thed che cawd che chaw, daq che kehg che chaw he lehq a sug yawd awg ton haq ghad vix che chaw gha phehq che yaog. 9 Awg bon cawg jad che tawd khuhd teq pa haq mar vid lehq, tawr chehd che chaw teq pa haq i hehd te yaq kig haq mar vid gha tug, mar vid lar che kar tiq yeg che tawd khuhd haq khar thad liz yeg chehd che chaw gha phehq che yaog.
10 Awg lawn ghod ver, su khuhd maq na yug vix che chaw, awg bon mad cawg che tawd khuhd haq kheha ca kaod koz gid che chaw he lehq her ka vix che chaw kha peh vad-ag cawg che yaog. Awg gig med soer che chaw teq pa awg khuhn mad awr ve cawg mad che yaog, 11 I hehd teq pa ve mawq kaw haq gha hoz tehr lar che yaog. Awg lawn ghod ver, i hehd awr lehr, phu si he lehq med nged jeg kor gha tug awg pun, mar vid maq kenr che awg ceng haq mar vid lehq, yehg ka teq pa awg khuhn soq saq tug te che yaog. 12 I hehd awg khuhn i hehd ve cuh kar var te ghad koz che, “Kar rer ter chaw teq pa awr lehr, khar thad liz her ka che chaw, haeg che to nud to saz heh te che chaw, kha mawg kha sir che ca kaod ghawz cad che chaw he lehq chaw bawg che chaw phehq che yaog,” lehd koz lar che yaog. 13 Kheh te lehq, i hehd koz lar che tawd khuhd u ve awr lehr, awg cehg mag cawd che yaog. Kheh te cheaq te lehq, i hehd yonr cuhz cawg vid tug awg pun, i hehd haq hehnd chawa ded mar vid-oq. 14 Kheh te lehq, Yud daq chaw ve kad phed kad lao teq pa he lehq awg cehg mag ve tawd khuhd haq chid bag lar haz che chaw ve awg lid awg khad teq pa haq maq gha na yug vid tug yaog. 15 Daq kehg che chaw teq pa awg pun awr lehr, awg ceng gha lia daq kehg che yaog. Kheh ma khuhd chaq chiz che chaw he lehq maq yonr che chaw teq pa awg pun awr lehr, daq kehg che te ceng-ar liz mad cawg. I hehd ve duhd khad he lehq i hehd ve sir vix che ni ma awr lehr, chaq chiz che yaog. 16 Ghig sa haq sir che yaog, lehz i hehd koz chehd liz, i hehd te che awg ceng teq pa khuhn Ghig sa haq maq sir che heh te che yaog. Su i hehd haq chaq nag che chaw, maq na yug vix che chaw he lehq daq che kanx teq chaweh liz te maq kenr che chaw phehq che yaog.