5
ᤋᤢᤶᤓᤠᤰᤛᤠᤜᤠ᤹ ᤏᤢ ᤌᤠᤱᤒᤧᤴᤜᤠ᤹ᤖᤧ ᤗᤠᤃᤡ ᤛᤢᤈᤠ
1 ᤀᤠᤸᤗ ᤂᤪᤡᤛ᤻ᤋᤖᤧ ᤀᤡᤏᤥᤃᤧᤴ ᤁᤢᤍᤢᤰᤂᤣ᤺ᤸᤗᤧᤴ ᤋᤥ᤺ᤴᤍᤡ ᤏᤢ ᤋᤠ᤺ᤴᤍᤡ ᤀᤥᤛᤣ᤺ᤴᤍᤠᤱ ᤁᤧᤒᤥ᤺ᤱᤒᤠ ᤔᤡᤔᤡᤍᤡᤱᤅᤡᤸᤗᤧᤴ ᤗᤰᤛᤠᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤛᤣᤛᤣᤜᤢᤵᤗᤰᤁᤥᤒᤠ ᤗᤳᤇᤠ ᤋᤢᤶᤗᤠᤶᤗᤥ᤺ᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤐᤣᤗᤡ ᤑᤠᤰᤏᤡᤱᤗᤥ– 2 ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤰᤜᤠ᤹ ᤏᤢ᤺ᤖᤡᤰᤁᤠᤱ ᤁᤔᤧᤶᤛᤡᤶᤔᤧ᤹ᤀᤥ–ᤔᤢᤖᤠ ᤀᤠᤶᤔᤧᤳᤋᤡᤸᤗᤧᤖᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤁᤔᤧᤶᤛᤡᤶᤔᤧ᤹. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡᤃ ᤔᤧ᤺ᤴ. ᤁᤖ ᤂᤡᤏᤡ᤹ ᤛᤡᤰ ᤐᤛᤶᤛᤶᤗ ᤛᤣᤘᤠ ᤆᤥᤃᤧᤶᤛᤡᤶᤔᤧ᤹ᤀᤥ॥ 3 ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤛᤶᤍᤠᤱ ᤕᤢᤰ ᤆᤥ᤺ᤰᤔᤠ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤒᤡ ᤐᤥ᤺ᤱᤔᤠ ᤐᤥ᤺ᤱᤗᤥ॥ 4 ᤜᤧᤰᤁᤩᤠᤱ ᤋᤢᤶ ᤔᤧᤸᤗᤢᤰᤁᤶᤒᤠᤴ ᤕᤢ᤺ᤸᤗᤧ ᤀᤠᤵᤑᤠᤸᤗᤧᤀᤠᤱ ᤀᤡᤔᤧᤸᤗᤧᤶᤔᤏᤠᤒᤠ ᤔᤡᤔᤡᤍᤡᤱ ᤏᤢ ᤀᤡᤱᤎᤠ᤺ᤱᤅᤡᤸᤗᤧᤴ ᤋᤡᤆ᤺ ᤁᤧᤄᤥ᤺ᤛᤢᤶᤗᤥ॥
5 ᤂᤡᤏᤡ᤹ ᤌᤠᤱᤒᤧᤴᤛᤠᤛᤣ. ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱᤗᤥ॥ ᤂᤡᤏᤡ᤹ ᤁᤠᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤢ᤺ᤖᤡᤰ ᤔᤧᤳᤋᤠᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ.
“ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤀᤳᤋᤢᤛᤡ᤹. ᤁᤖ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤃᤢᤶ ᤐᤡᤖᤢᤛᤡ᤹ᤖᤥ॥”* ᤛᤡᤘᤠᤍᤡᤱ ᤂᤠᤜᤢᤴᤜᤠ᤹ ᥉.᥉᥊
6 ᤂᤧᤸᤗᤧ ᤆᤥᤃᤢᤸᤗᤧ ᤔᤢᤰᤛᤠᤶᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤂᤡᤏᤡ᤹ ᤆᤢᤱᤈᤡᤃᤧᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤛᤢᤕᤧᤶᤔᤥ ᤂᤡᤏᤡ᤹ ᤀᤡᤱᤎᤠ᤺ᤱ ᤁᤧᤒᤡᤖᤡᤀᤠᤱ ᤌᤠ᤺ᤱ ᤁᤧᤓᤥ᤺ᤰᤂᤡ᤹ᤖᤥ॥ 7 ᤁᤠᤰ ᤂᤡᤏᤡ᤹ ᤏᤡᤱᤛᤠᤶᤜᤠ᤹ ᤂᤢᤏᤧ᤹ᤀᤥ ᤋᤠᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤳᤋᤡ᤹ᤖᤥ॥
8 ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤏᤢ ᤆᤠᤱᤈᤠᤱ ᤗ᤹ᤖᤧᤶᤔᤧ᤹᥄ ᤂᤡᤏᤡ᤹ ᤏᤡᤱᤔᤡ ᤔᤠᤑᤧᤴᤛᤠᤶᤔᤡᤴ ᤁᤧᤜᤢ᤺ᤰᤐᤠ ᤌᤧᤖᤡᤱᤒᤠᤴ ᤁᤢᤀᤡᤛᤡ᤺ᤰ ᤀᤠᤳᤋᤡᤴ ᤂᤥ᤺ᤛᤢᤱᤅᤠᤱ ᤗᤖᤢᤱᤍᤣ᤺ᤛᤢᤱ ᤗ᤹ᤖᤡᤰ ᤁᤥ᤺ᤳᤋᤢᤖ ᤋᤠᤰᤁᤴᤗᤥ॥ 9 ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤂᤧᤴ ᤀᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤂᤡᤏᤡ᤹ ᤁᤧᤍᤢᤔᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ ᤜᤧᤰᤋᤱᤒᤠ ᤋᤢᤰᤂᤣᤀᤥᤀᤣ ᤔᤧᤘᤠ᤹ ᤁᤧᤗ᤹ᤒᤠᤴ ᤁᤧᤏᤡ᤺ᤛᤢᤶᤗᤥ॥
10 ᤁᤠᤰ ᤗᤢᤱᤃᤢᤶ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤔᤧᤴᤏᤢᤵᤔᤏᤠᤒᤠ ᤁᤢᤔᤡᤔᤡᤍᤡᤱᤅᤡᤴ ᤗᤰ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ ᤁᤖ ᤛᤵᤑᤠᤎᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤀᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢᤗᤡᤱᤎᤥ ᤁᤧᤃᤧᤳᤋᤡ᤹ ᤜᤧᤰᤁᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤏᤢ ᤁᤧᤎᤢᤶᤒᤠ ᤁᤧᤈᤥᤃᤡᤀᤠᤱ ᤔᤧᤶᤔᤢᤶᤔᤏᤠ ᤏᤧᤶᤓᤥᤀᤥ ᤁᤧᤕᤢᤰᤂᤡ᤹ᤖᤥ॥ 11 ᤁᤠᤰ ᤔᤢᤰᤛᤠᤶᤔᤡᤴ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤣ ᤐᤥ᤺ᤱᤗᤥ॥ ᤀᤠᤔᤧᤴ॥
ᤁᤢᤏᤢᤵᤔᤠ ᤛᤣᤘᤠ
12 ᤏᤛᤠ᤺ᤴᤛᤠᤒᤠ ᤀᤡ᤺ᤳᤋᤢᤱᤒᤠ ᤏᤢᤛᤠ᤹ ᤛᤡᤗᤠᤛᤖᤧ ᤁᤢᤓᤠ᤹ᤗᤠᤶ ᤁᤴ ᤆᤢᤰᤛᤠ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤜᤠᤱᤜᤠᤱ ᤔᤧᤳᤏᤡᤱᤗ ᤁᤱᤃ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤥ ᤗ᤹ᤖᤡᤰ ᤋᤥ᤺ᤴᤍᤡ ᤐᤡᤏᤡᤱᤗᤥ॥ ᤁᤴ ᤗᤢᤱᤃᤢᤶᤔᤥᤀᤣ ᤂᤡᤏᤡ᤹ ᤌᤎᤵ ᤔᤧᤴᤗ᤹ᤔᤏᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥
13 ᤂᤡᤏᤡ᤹ ᤜᤧᤰᤁᤣᤀᤣ ᤛᤣᤃᤧᤔᤠ ᤒᤧᤒᤡᤗᤥᤴᤒᤠ* ᤒᤧᤒᤡᤗᤥᤏ–ᤁᤸᤗᤧ ᤖᤥᤔ ᤕᤧᤰᤕᤰᤁᤡᤴ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤛᤣᤛᤣᤜᤢᤵᤗᤰᤁᤡᤸᤗᤧ ᤛᤣᤘᤠ ᤁᤧᤜᤠᤰᤋᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤛ᤻ᤛᤠ᤺ ᤔᤷᤁᤢᤛᤖᤧᤀᤠᤱ ᤛᤣᤘᤠ ᤁᤧᤜᤠᤰᤋᤡᤖᤥ॥ 14 ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ॥