1 ᤁᤠᤰ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤛᤡ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤖᤥ॥ 2 ᤏᤛᤠᤏᤡᤒᤠ ᤍᤠᤱᤒᤠ ᤁᤧᤃᤵᤐᤠ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤜᤠᤖᤠ᤹ ᤀᤡᤱᤎᤠ᤺ᤱ ᤂᤥ᤺ᤔᤠ ᤛᤢᤶᤒᤥᤎᤠᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤂᤧᤱᤜᤠ᤹ᤃ ᤏᤛᤠ᤺ᤴᤏᤥ ᤂᤢᤏᤡ᤹ ᤑᤢ᤹ᤏᤢᤛᤠ᤹ᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤏᤢ᤺ᤖᤡᤰᤁᤠᤱ ᤂᤢᤏᤡ᤹ ᤏᤛᤠᤏᤡᤒᤠ ᤍᤠᤱᤒᤠᤜᤠ᤹ᤖᤧᤴ ᤛᤣᤘᤠ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤴᤎᤠ᤺ᤱ ᤁᤧᤄᤥ᤺ᤒᤠᤜᤠ᤹ᤃ ᤗᤢᤱᤔᤠ᤹ ᤋᤢᤰᤛᤡᤱᤔᤏᤠᤒᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤛᤡᤀᤣᤖᤥ॥ ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤂᤧᤴ ᤛᤣᤘᤠᤖᤥᤒᤠᤜᤠ᤹ ᤜᤢ᤹ᤔᤠᤛᤡ ᤐᤥ᤺ᤱ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤆᤥ᤺ᤰ ᤐᤠᤱᤔᤠᤛᤡ ᤐᤥ᤺ᤱᤗᤥ॥

3 ᤀᤠᤳᤋᤡᤸᤗᤧ ᤀᤡᤱᤗᤧᤰᤁᤣ ᤏᤡᤛᤠᤶ ᤜᤢ᤹ᤖᤢᤛᤡ᤹ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤧᤰᤂᤠᤒᤠ ᤁᤢᤏᤡᤛᤠᤶ ᤏᤢ ᤛᤧᤰᤂᤠᤒᤠ ᤁᤢᤛᤠᤶᤕᤥᤏᤡᤒᤠ ᤏᤡᤛᤠᤶᤔᤥ ᤔᤧᤒᤳᤏᤧᤴ. 4 ᤂᤧᤱᤃ ᤀᤠᤱᤍᤡᤱ ᤗ᤹ᤔᤠᤖᤧ ᤕᤶᤒᤠ ᤗᤧᤱᤛᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤌᤣᤀᤠᤱ ᤔᤧᤗᤧᤛ᤻ᤛᤢᤴᤗᤥ॥ ᤁᤖ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤛᤢᤳᤗᤠᤀᤥ ᤐᤠ᤺ᤴᤌᤰᤁᤠᤱ ᤂᤧᤔᤠ᤹ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤸᤗᤧ ᤏᤠᤜᤧᤶᤔᤠ. ᤂᤧᤔᤠ᤹. ᤆᤠ᤺ᤳᤌᤡ ᤐᤣ᤺ᤰᤔᤠ ᤏᤢ ᤋᤠᤵᤑᤧ᤺ᤶᤒᤠ ᤆᤵᤆᤡᤜᤠ᤹ᤖᤰ ᤋᤠᤖᤢᤖᤥ॥ 5 ᤂᤧᤸᤗᤧ ᤑᤧᤴ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤑᤥ᤺ᤰᤂᤢ᤹ᤖᤥ॥ ᤂᤧᤱᤜᤠ᤹ᤖᤧᤃ ᤛᤠᤶᤕᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤡᤴ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤗᤠᤶ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹ᤖᤥ॥

6 ᤁᤖ ᤏᤡᤱᤘᤠ᤹ ᤋᤠᤔᤠᤏᤢᤒᤠ ᤛᤠᤶᤏᤡᤔᤠᤴᤏᤣ ᤕᤶᤒᤠ ᤀᤡᤴᤎᤠ᤺ᤱ ᤘᤠ᤹ᤖᤥ॥ 7 ᤀᤠᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤧᤔᤠᤀᤠᤱ ᤔᤧᤴᤍᤠ᤺ᤳᤋᤣ ᤀᤠᤍᤩᤧ. ᤜᤧᤰᤁᤩᤠᤱ ᤀᤠᤸᤗ ᤀᤠᤒᤣ᤺ᤰᤁᤡᤸᤗᤧᤀᤠᤱ ᤌᤣᤀᤠᤱ ᤔᤧᤴᤍᤣ᤹ᤀᤣ ᤀᤠᤒᤣ᤺ᤰᤗᤥ॥ 8 ᤜᤧᤰᤁᤣ᤺ᤸᤗᤧ ᤆᤠᤔᤠ ᤌᤢᤱᤔᤠ ᤏᤢ ᤆᤠᤱᤔᤠ ᤀᤠᤄᤥ᤺ᤛᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤥ᤺ᤱᤗᤥ॥ 9 ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤕᤖᤡᤰ ᤕᤠᤱ ᤌᤰᤔᤠ ᤜᤱᤛᤠ᤹ᤔᤠᤀᤥ ᤏᤢ ᤕᤖᤡᤰ ᤐᤖᤡᤰᤐᤠ ᤔᤧᤰᤔᤠᤀᤥ ᤁᤧᤍᤣ᤹ᤒᤠ ᤀᤡ᤺ᤀᤥ ᤔᤧᤎᤠ᤺ᤖᤥ॥ ᤂᤧᤸᤗᤧᤃ ᤂᤧᤱᤜᤠ᤹ ᤋᤢᤰᤂᤣᤀᤥ ᤏᤢ ᤔᤧᤰᤔᤠᤀᤥ ᤌᤠ᤺ᤛᤢᤛᤡ᤹ᤖᤥ॥ 10 ᤌᤣᤀᤠᤱᤓᤧᤸᤗᤧ ᤕᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠᤱᤃ ᤁᤠᤰ ᤐᤖᤡᤰᤗᤧᤴ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ᤖᤧ ᤁᤢᤒᤢᤱᤗᤥ॥ ᤁᤢᤓᤠᤖᤧᤃ ᤕᤠᤱᤛᤠᤁᤢᤴᤎᤣ᤺ᤴ ᤔᤡ᤺ᤶᤈᤡ ᤔᤧᤔᤧᤳᤋᤢᤖ ᤂᤢᤏᤡ᤹ ᤏᤛᤠ᤺ᤴᤗᤠᤶ ᤋᤠᤵᤔᤧᤒᤣ᤹ᤖᤧ ᤔᤧᤒᤣᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤗᤧᤴ ᤋᤢᤰᤂᤣ᤺ᤸᤗᤧ ᤋᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥

11 ᤁᤖ ᤂᤧᤏᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤁᤴ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ. ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠ. ᤛᤠᤵᤆᤢᤘᤠᤒᤠ. ᤏᤛᤠ᤺ᤴᤛᤠᤒᤠ. ᤔᤡ᤺ᤶᤈᤡᤛᤠᤒᤠ. ᤏᤠᤛᤡ ᤁᤧᤎ᤺ᤵᤐᤠ. ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤔᤠᤸᤗᤧ ᤁᤢᤎᤡᤶ ᤐᤥ᤺ᤱᤔᤠ ᤋᤶᤛᤡᤴ ᤆᤥᤃᤧ᤹ᤀᤥ॥ 12 ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤌᤢᤶᤄᤥ ᤂᤥ᤺ᤔᤠ ᤑᤠ᤹ᤀᤠᤱ ᤏᤛᤠ᤺ᤴᤗᤧᤴ ᤌᤱᤅᤡᤴ ᤏᤢ᤺ᤖᤡᤰᤁᤠᤱ ᤌᤰᤋᤧ᤹ᤀᤥ॥ ᤕᤖᤡᤰ ᤋᤥ᤺ᤴᤍᤡᤜᤠ᤹ ᤋᤃᤡ ᤂᤧᤏᤧ᤹ ᤏᤛᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤋᤧᤴᤍᤡᤱ ᤁᤧᤈᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤒᤡᤖᤧᤀᤠᤱ ᤁᤧᤘᤕᤧᤖᤥ॥ 13 ᤁᤠᤰ ᤐᤠ᤺ᤴᤜᤠ᤹ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤐᤴᤋᤡᤕᤛ ᤐᤡᤗᤠᤋᤛᤖᤧ* ᤕᤧᤛᤢ᤺ᤴ ᤔᤧᤍᤧᤶᤛᤢᤒᤠ ᤕᤧᤶᤔᤥ ᤐᤴᤋᤡᤕᤛ ᤐᤡᤗᤠᤋᤛᤧᤴ ᤕᤜᤢᤍᤡᤜᤠ᤹ ᤔᤧᤕᤢᤅᤧᤒᤠ ᤗᤠᤈᤣ᤹ᤀᤥ ᤛᤢᤜᤠᤱᤃᤧᤶᤒᤠ ᤘᤕᤧ॥ ᤕᤧᤛᤢ᤺ᤴ ᤑᤥ᤺ᤶᤔᤠ ᤐᤥ᤺ᤱ ᤑᤠ᤹ᤀᤠᤱ ᤐᤠ᤺ᤴ ᤁᤧᤍᤱᤒᤠᤀᤥ ᤌᤡᤰᤐᤠ ᤂᤢᤏᤧ᤹ ᤘᤕᤧ॥ ᤁᤢᤍᤃᤡ ᤏᤢ᤺ᤒᤠ ᤋᤥ᤺ᤴᤍᤡ ᤁᤧᤒᤡᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤍᤃᤡ ᤁᤴ ᤀᤡᤱᤈᤠ᤺ᤱᤅᤡᤴ ᤐᤡᤏᤧᤖᤥ. 14 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤕᤠᤶᤔᤥ ᤀᤥᤛᤣ᤺ᤴ ᤔᤧᤴᤎᤠᤰᤛᤡᤱᤅᤣ ᤌᤠᤖᤡᤰ ᤁᤧᤄᤥ᤺ᤛᤢᤒᤠ ᤂᤧᤴ ᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤧ ᤏᤠ᤺ᤳᤋᤧᤖ ᤛᤣᤛᤣ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣ ᤁᤳᤋᤧ᤹ᤀᤥ॥ 15 ᤂᤢᤏᤧ᤹ᤀᤣ ᤔᤢ᤹ᤀᤡᤛᤠᤶ ᤍᤠᤱᤒᤠ ᤏᤢ ᤜᤠᤱᤕᤢᤰ ᤍᤠᤱᤒᤠ ᤜᤧᤰᤁᤩᤠᤱ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤐᤕᤶ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤕᤶ ᤍᤠᤱᤒᤠᤸᤗᤧᤀᤣ ᤛᤢᤕᤧᤶᤔᤥ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤀᤥᤛᤣ᤺ᤴᤎᤠᤰᤛᤡᤱᤔᤠᤴ ᤋᤠᤖᤢ᤹ᤖᤥ॥ 16 ᤂᤢᤏᤧ᤹ᤀᤥᤖᤰ ᤀᤠᤈᤢᤏᤡ ᤘᤠ᤹ᤖᤥ. ᤂᤢᤏᤧ᤹ ᤛᤢ᤺ᤔᤠ ᤏᤢ ᤁᤧᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤀᤥ᤺ᤳᤋᤡᤀᤥ ᤕᤢᤱᤗᤥ॥ ᤂᤢᤏᤧ᤹ᤃ ᤀᤠᤳᤋᤡᤸᤗᤧᤀᤠᤱ ᤔᤧᤴᤏᤡᤀᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡ᤺ᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥ ᤂᤢᤏᤧ᤹ᤀᤡᤴᤏᤣ ᤛᤍᤠᤍᤡᤱ ᤔᤢᤰᤛᤠᤶ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱ ᤐᤥ᤺ᤱᤗᤖᤥ॥ ᤀᤠᤔᤧᤴ॥

17 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤧᤛᤧ᤹–ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤴᤗ᤹ᤏᤧᤴᤗᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤛᤠᤱᤅᤡᤴ ᤆᤵᤗᤧᤰᤘᤠ ᤕᤠᤱᤛᤠᤁᤢᤴᤎᤣᤀᤥ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤕᤢᤰᤂᤢᤖᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤏᤡᤱᤘᤠ᤹ ᤋᤠᤖ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤠᤰ ᤀᤠᤒᤡ᤹ᤖᤥ॥ 18 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ᤹ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤒᤥ᤺ᤱᤗ ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ᤏᤢ ᤜᤠ᤺ᤔᤠ ᤆᤠᤔᤠ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤖ. ᤛᤢᤕᤠ᤺ᤶᤒᤰ ᤔᤧᤈᤥᤃᤢᤖ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤧᤛᤧ᤹ᤀᤥ॥ 19 ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤋᤠᤕᤧᤶᤔᤡᤸᤗᤧᤴ ᤏᤧᤶᤓᤥᤃᤧᤴ ᤐᤠᤱᤕᤰ ᤔᤧᤕᤢᤰᤂᤢᤖᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤰᤂᤠᤒᤠ ᤜᤡᤱᤔᤴᤏᤡᤴ ᤔᤧᤍᤧᤶᤛᤢ ᤔᤧᤕᤢᤰᤂᤢᤖᤖᤥ॥

20 ᤋᤡᤔᤥᤌᤡᤀᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤁᤳᤋᤧ᤹ᤀᤥ॥ ᤁᤢᤒᤢᤱᤏᤠ ᤁᤢᤛᤶᤒᤠ ᤀᤍᤱ ᤋᤠ᤹ᤈᤧᤱ ᤏᤢ ᤋᤰᤗᤧᤱᤘᤠ ᤐᤠ᤺ᤴᤜᤠ᤹ᤃ ᤀᤡᤱᤗᤧᤰᤐᤠ ᤛᤠᤶᤈᤡ᤺ᤰᤗᤥ. ᤂᤧᤴᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ॥ 21 ᤁᤢᤓᤠᤖᤧ ᤂᤧᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤏᤛᤠ᤺ᤴᤏᤡᤸᤗᤧ ᤏᤡᤱᤘᤠ᤹ᤛᤥ᤺ᤰᤗᤠᤶ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤀᤥ ᤘᤠ᤹ᤖᤖᤥ॥