1 ᤂᤡᤏᤡ᤹ ᤏᤢ ᤗᤠᤀᤥᤍᤡᤁᤡᤕᤠ ᤐᤠᤱᤈᤢᤶᤒᤠ ᤛᤣᤛᤣᤜᤢᤵᤗᤰ ᤜᤧᤰᤁᤩᤠᤱ ᤘᤣ᤹ ᤕᤠᤵᤔᤡ ᤔᤧᤴᤍᤢᤶᤔᤣ ᤁᤧᤘᤠ᤹ᤒᤠ ᤁᤧᤖᤧᤰ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤗᤠᤃᤡ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥ 2 ᤂᤡᤏᤡ᤹ ᤁᤧᤖᤧᤰᤗᤧ ᤛᤡᤰᤗᤢᤱᤔᤥ ᤜᤠᤱᤜᤠᤱ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤥ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤖ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤖᤧᤰᤗᤧ ᤁᤢᤗᤡᤱᤎᤥ ᤀᤡ᤺ᤳᤇᤡᤱᤛᤠᤶ ᤁᤧᤄᤥ᤺ᤛᤢᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤖᤥ॥ ᤂᤧᤴ ᤁᤢᤛᤡᤒᤡ᤹ ᤐᤠ᤺ᤴᤏᤡᤱᤃ ᤂᤪᤡᤛ᤻ᤋᤧᤴᤏᤣᤖᤥ॥ 3 ᤂᤢᤏᤧ᤹ᤀᤣ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤠᤶᤈᤡᤰ ᤏᤡᤱᤘᤠ᤹ᤖᤧ ᤁᤢᤒᤢᤴᤗᤥ॥ 4 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤄᤧᤶᤃᤧᤏᤢ᤹ᤒᤠ ᤐᤠ᤺ᤴᤜᤠ᤹ᤗᤠᤶ ᤀᤡᤱᤃᤧᤔᤧᤸᤗᤧᤰᤋᤡᤴᤗ ᤑᤠ᤹ᤀᤠᤱ ᤀᤰᤂᤣ ᤔᤧᤳᤏᤡᤱᤒᤠᤖᤥ॥ 5 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤔᤠ᤺ᤱᤄᤠ ᤘᤠ᤹ᤀᤠᤛᤠᤱ ᤀᤠᤏᤡᤱᤘᤠ᤹ᤀᤡᤴ ᤂᤡᤏᤡ᤹ᤏᤢ ᤛᤥᤖᤡᤰᤁᤣ ᤘᤠ᤹ᤖᤥ॥ ᤜᤧᤰᤁᤩᤠᤱ ᤜᤡᤱᤔᤠ ᤁᤧᤒᤥ᤺ᤱᤒᤠ ᤜᤡᤱᤔᤴᤏᤥ ᤁᤧᤜᤡᤅᤡᤒᤠ ᤏᤢ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤏᤥ ᤕᤥ-ᤎᤥ ᤔᤧᤸᤗ᤹ᤀᤣ ᤁᤧᤘᤕᤡᤒᤠ ᤂᤧᤵᤛᤢᤱᤅᤠᤱ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥

6 ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋ ᤕᤧᤛᤢ ᤍᤠᤱᤒᤧᤴ ᤏᤛᤠ᤺ᤴ ᤁᤧᤈᤥᤃᤢᤶ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ᤏᤢ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤆᤰᤔᤧᤸᤗ᤹ᤀᤣ ᤜᤡᤅᤧᤶᤔᤧ᤹ᤀᤥ॥ 7 ᤂᤢᤏᤧ᤹ᤀᤥ. ᤁᤧᤜᤢ᤹ᤀᤠᤛᤡᤒᤠ ᤏᤡᤛᤠᤶᤔᤥ. ᤛᤠ᤺ᤵ ᤗᤣ᤺ᤳᤋᤧᤶᤔᤧ᤹ᤀᤠᤱ ᤐᤥ᤺ᤖᤧᤶᤔᤧ᤹. ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤖ ᤍᤠᤱᤒᤠᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥

8 ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤱᤃᤪ ᤔᤧᤴᤇᤠᤶ ᤕᤠᤵᤔᤡᤖᤧ ᤔᤧᤈᤥᤃᤢᤒᤠ ᤁᤢᤄᤧᤶᤃᤧᤏᤢ᤹ᤒᤠ ᤀᤡᤱᤗᤧᤰᤐᤠ ᤏᤡᤛᤠᤶᤜᤠ᤹ᤖᤧ ᤁᤧᤕᤢᤰᤋᤡ᤹ᤖᤥ॥ ᤂᤧᤴ ᤏᤡᤛᤠᤶᤜᤠ᤹ᤃ ᤂᤪᤡᤛ᤻ᤋᤗᤠᤶ ᤔᤧ᤺ᤴ. ᤁᤖ ᤔᤧᤴᤇᤠᤶᤌᤠ᤺ᤰᤗᤠᤶ ᤁᤧᤕᤢ᤺ᤒᤠ ᤌᤡᤶ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤜᤣ᤺ᤰᤛᤡᤱᤔᤥᤒᤠ ᤜᤏᤧᤒᤠ ᤂᤠᤜᤢᤴᤗᤠᤶ ᤁᤧᤍᤠ᤺ᤒᤠᤖᤰᤗᤥ॥ 9 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤀᤥᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠᤛᤡᤱᤃᤧᤴ ᤌᤰᤁᤥ ᤁᤢᤗᤡᤱᤎᤥ ᤁᤧᤳᤗᤥ॥ 10 ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤂᤡᤏᤡ᤹ ᤁᤢᤗᤡᤱᤎᤥ ᤁᤧᤵᤔᤠᤴ ᤁᤧᤄᤥ᤺ᤛᤢᤶᤔᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤔᤢᤰᤛᤠᤶ ᤏᤢ ᤕᤢᤰ ᤛᤶᤍᤠᤱ ᤕᤢᤰᤛᤠᤒᤠᤖᤥ॥

11 ᤜᤷᤍᤥ ᤜᤧᤰᤔᤠᤸᤗᤧ ᤏᤠᤛᤡᤱᤃᤧᤴ ᤌᤰᤗᤠᤶ ᤏᤧᤰᤛᤠ ᤛᤧᤶᤒᤣ᤺ᤰᤐᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧ ᤁᤢᤜᤷᤍᤥ ᤜᤧᤰᤔᤠᤸᤗᤧ ᤂᤡᤏᤡ᤹ ᤗᤠᤕᤥ ᤆᤥ᤺ᤰᤔᤠ ᤏᤡᤱᤘᤠ᤹ᤀᤡᤴ ᤛᤧᤴᤍᤢᤍᤣ᤹ᤖᤢᤀᤠᤱ ᤘᤠ᤹ᤖᤥ॥ ᤁᤱᤃ ᤔᤧᤴᤇᤠᤶ ᤜᤢᤰᤁᤥᤗᤠᤶ ᤐᤥ᤺ᤰᤂᤧᤒᤠ ᤔᤧ᤺ᤴ. ᤁᤖ ᤂᤪᤡᤛ᤻ᤋᤗᤠᤶ ᤐᤥ᤺ᤰᤂᤧᤒᤠᤖᤥ॥ 12 ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤧᤜᤢᤔᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤔᤢᤰᤛᤠᤶᤔᤥ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤜᤡᤅᤡᤀᤠᤱ ᤁᤧᤘᤕᤡ᤹ᤖᤥ॥

13 ᤂᤡᤏᤡ᤹ᤃ ᤗᤠᤕᤥᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤁᤧᤜᤥ᤺ᤵᤋᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤥ ᤁᤢᤛᤡᤘᤧᤳ ᤁᤧᤘᤕᤡ. ᤁᤖ ᤀᤠᤸᤗᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤱᤘᤧᤳ ᤁᤧᤈᤥᤃᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤀᤠᤏᤡ᤹ ᤁᤠᤰ ᤗᤠᤕᤥᤜᤠ᤹ ᤗᤧᤵᤔᤡ ᤀᤠᤒᤡᤖᤧᤀᤠᤱ ᤘᤠ᤹॥ 14 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤜᤠ᤹ ᤌᤧ᤺ᤰᤂᤢᤍᤣ᤺ᤛᤢᤀᤠᤱ ᤂᤢᤏᤧ᤹ ᤂᤧᤴ ᤁᤧᤖᤧᤰ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤡᤵᤛᤢᤀᤠᤱ ᤂᤧᤳᤋᤢᤍᤣ᤺ᤛᤢᤖᤥ॥ 15 ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤜᤠ᤹ ᤏᤢ ᤕᤢᤰᤜᤠ᤹ ᤏᤠᤵᤋᤢᤛᤡᤀᤠᤱ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤌᤱ ᤏᤠ᤺ᤴᤍᤢᤛᤡ. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤎᤠ᤺ᤛᤢ ᤐᤡᤖᤢᤛᤡᤖᤥ॥

16 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤠᤶᤕᤥ ᤋᤱᤏᤠᤶ. ᤗᤠᤛᤡᤒᤠ ᤛᤛᤠᤱᤛᤪᤥ᤺ᤳ. ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ ᤆᤠᤔᤏᤠᤒᤠ ᤌᤢᤱᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤀᤠᤵᤋᤡᤰ ᤁᤧᤔᤧᤴᤃᤢ᤺ᤳᤋᤡᤴᤗᤖᤥ॥ 17 ᤁᤴ ᤐᤠ᤺ᤴᤜᤠ᤹ᤃ ᤁᤧᤍᤠ᤺ᤒᤠ ᤐᤠ᤺ᤴᤜᤠ᤹ᤖᤧᤴ ᤛᤠᤶᤔᤪᤡ᤺ᤵᤐᤠᤖᤰ ᤘᤕᤧᤖᤥ. ᤁᤖ ᤛᤧᤰᤂᤠ ᤐᤠ᤺ᤴᤏᤡᤱᤃ ᤂᤪᤡᤛ᤻ᤋᤖᤥ॥ 18 ᤀᤠᤏᤡᤃᤧ ᤛᤢᤑᤥ ᤏᤡ᤺ᤶᤔᤏᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤖ. ᤏᤡᤃᤧᤍᤧᤵᤐᤠ ᤐᤠ᤺ᤴᤏᤥᤖᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤜᤠᤱᤛᤧᤶ ᤔᤧᤱᤄᤥ᤺ᤔᤏᤠᤒᤠ ᤁᤧᤔᤧᤴᤈᤥᤃᤡᤴᤗᤖᤥ॥ ᤁᤱᤜᤠ᤹ᤃ ᤌᤣᤏᤠᤎᤣ ᤗᤠᤕᤥᤒᤠ ᤏᤡᤱᤘᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤖᤥ॥ 19 ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤁᤢᤎᤧᤃᤣ᤺ᤰ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤌᤣᤀᤠᤱ ᤋᤱᤈᤢᤶ ᤜᤥ᤺ᤵᤗᤥ॥ ᤁᤱᤃ ᤂᤢᤏᤧ᤹ᤗᤠᤶᤒᤠ ᤏᤠᤛᤡᤱᤃᤧᤴ ᤌᤰᤗᤧᤴ ᤁᤠᤰ ᤕᤠᤶᤗᤰᤁᤡᤸᤗᤧ ᤁᤶᤒᤪᤠᤱ ᤂᤥ᤺ᤛᤢ᤹ ᤜᤧᤰᤁᤩᤠᤱ ᤌᤡᤰᤜᤢᤵ ᤐᤥ᤺ᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤐᤥ᤺ᤖ ᤐᤣ᤺ᤰᤗᤥ॥

20-21 ᤂᤡᤏᤡ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤧᤛᤩᤧ᤹ᤀᤡᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤒᤠ ᤜᤏᤧᤒᤠ ᤂᤠᤜᤢᤴᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤀᤥᤃᤵ ᤔᤧᤈᤥᤃᤧᤴᤏᤧ᤹. ᤂᤧᤴ ᤔᤧᤛᤠ᤹ᤖᤧᤴᤏᤧ᤹. ᤜᤧᤰᤁᤩᤠᤱ ᤔᤧᤛᤢᤛᤧᤴᤏᤧ᤹ ᤁᤧᤗ᤹ᤒᤠ ᤀᤡᤰᤛᤠᤒᤠ ᤌᤡᤶᤜᤠ᤹ ᤌᤣᤀᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤒᤠᤒᤣ᥅ 22 ᤁᤴ ᤐᤠ᤺ᤴᤜᤠ᤹ᤃ ᤀᤥᤃᤵ ᤆᤥ᤺ᤰᤔᤠᤀᤠᤱ ᤔᤠᤒᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤕᤢᤰᤂᤢᤒᤠ ᤏᤡᤛᤠᤶ ᤏᤢ ᤌᤡᤶᤜᤠ᤹ᤖᤰᤗᤥ॥ 23 ᤂᤧᤴ ᤜᤧᤰᤋᤱᤒᤠ ᤌᤡᤶᤜᤠ᤹ᤃ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤗᤧᤱᤛᤡᤱᤔᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤠ᤺ᤳᤇᤡᤱᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤜᤧᤰᤁᤣ ᤗ᤹. ᤁᤖ ᤁᤸᤗᤧ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤏᤥᤛᤪᤱᤅᤡᤸᤗᤧᤴ ᤑᤧᤴ ᤏᤡᤱᤘᤠ᤹ᤀᤡᤴ ᤕᤢᤰᤔᤠ ᤔᤧᤛᤢᤰᤋᤢᤴᤗᤥ॥