1 ᤀᤠᤸᤗ ᤏᤡᤁᤥᤍᤣᤔᤛ ᤔᤧᤵᤔᤏᤠᤒᤠ ᤗᤳᤇᤠ ᤑᤖᤡᤛᤡᤎᤡᤰ ᤘᤕᤧ. ᤂᤧᤱᤃ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤐᤠᤛᤡᤱᤐᤠᤍᤠᤱᤗᤠᤀᤠᤱ ᤘᤕᤧᤖᤥ॥ 2 ᤌᤡᤰ ᤛᤧᤴᤍᤡᤰ ᤂᤧᤴ ᤕᤧᤛᤢᤖᤧ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶᤔᤣ ᤁᤧᤍᤩᤧᤒᤠᤖᤥ ᤑᤠ᤹ᤀᤠᤱ ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤢᤏᤧ᤹ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤘᤠ᤹ᤏᤧᤴᤏᤡᤸᤗᤧᤃ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥”

3 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤕᤠᤶᤔᤥ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤔᤠ ᤔᤧᤛᤢᤰᤋᤢᤴᤗᤥ॥”* ᤕᤜᤢᤍᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤠᤱᤜᤢᤵ ᤁᤧᤈᤥ᤺ᤰᤐᤠ ᤕᤠᤁᤢᤒ. ᤀᤡᤛᤜᤠᤁ ᤏᤢ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤕᤥᤒᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤧᤴᤗᤠ᤺ᤳᤏᤧᤴ ᤁᤖ ᤀᤠᤏᤡᤃᤧᤖᤰ ᤗᤠ᤺ᤵᤔᤠ ᤂᤥ᤺ᤛᤢᤶᤒᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤘᤕᤧᤖᤥ॥

4 ᤜᤧᤰᤁᤣ᤺ᤸᤗᤧ ᤏᤡᤁᤥᤍᤣᤔᤛᤖᤧ ᤁᤢᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤍᤥᤛᤢ. “ᤔᤧ᤺ᤶᤒᤧ. ᤀᤠᤰᤂᤣᤗ᤹ᤖᤡᤰ ᤂᤍᤠᤰᤔᤡ ᤕᤠᤵᤔᤡ᤺ᤴ ᤕᤠᤶᤔᤥ ᤛᤠᤘᤠ᤺ᤴᤇᤡᤱᤒᤣ᥅ ᤂᤧᤴ ᤛᤧᤰᤂᤠᤀᤣ ᤁᤢᤶᤔᤠᤖᤧ ᤁᤢᤛᤠᤵᤐᤥ᤺ᤰ ᤛᤡᤃᤠᤱ ᤕᤠᤶᤔᤥ ᤗᤠ᤺ᤳᤋᤠᤱ ᤛᤠᤘᤠ᤺ᤴᤇᤡᤱᤔᤠ ᤛᤢᤰᤐᤡ᥅”

5 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤆᤫᤠ᤺ᤳ ᤏᤢ ᤛᤣᤛᤣᤔᤠᤱᤗᤠᤶᤒᤠ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤀᤠᤳᤋᤡᤴᤏᤠᤱ ᤗᤠ᤺ᤵᤔᤠ ᤔᤧᤛᤢᤰᤏᤧᤴᤗᤥ॥ 6 ᤏᤠᤛᤡᤱᤃᤧᤴ ᤌᤰᤗᤠᤶᤒᤠᤃ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤛᤠᤘᤠ᤺ᤴᤇᤡᤱ ᤜᤧᤰᤁᤩᤠᤱ ᤛᤣᤛᤣᤔᤠᤱᤗᤠᤶ ᤕᤠᤶᤛᤠᤶᤔᤡᤴ ᤁᤢᤛᤱᤅᤠᤱ ᤛᤠᤘᤠ᤺ᤴᤇᤡᤱᤗᤥ॥ 7 ᤜᤧᤰᤁᤣ᤺ᤸᤗᤧ ‘ᤂᤧᤏᤧ᤹ ᤕᤠᤶᤔᤥ ᤛᤠᤃᤧᤘᤠ᤺ᤴᤇᤡᤱᤗᤀᤣ ᤐᤥ᤺ᤱ’ ᤔᤧᤳᤏᤧᤸᤗᤧ ᤁᤧᤏᤡᤱᤘᤠ᤹ ᤔᤧᤔᤕᤧᤴᤏᤧ᤹ᤀᤥ॥ 8 ᤛᤢᤖᤡᤳ ᤁᤣᤈᤱᤅᤡᤴ ᤀᤠᤳᤋᤠᤴᤛᤠᤱ ᤜᤢ᤺ᤔᤠ ᤛᤢᤰᤗᤥ॥ ᤂᤧᤏᤧ᤹ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤒᤠ ᤁᤧᤄᤧᤵᤛᤢ᤹. ᤁᤖ ᤀᤠᤳᤋᤥᤗᤠᤶ ᤋᤠ᤺ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰ ᤂᤧᤴ ᤂᤧᤏᤧ᤹ ᤐᤠ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤛᤣᤛᤣᤔᤠᤱᤗᤠᤶᤒᤠ ᤛᤠᤘᤠ᤺ᤴᤇᤡᤱᤔᤠ ᤐᤠ᤺ᤴᤏᤡᤴᤏᤠᤱ ᤐᤥᤎᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥”

9 ᤜᤧᤰᤁᤣ᤺ᤸᤗᤧ ᤏᤡᤁᤥᤍᤣᤔᤛᤖᤧ ᤛᤣ᤺ᤴᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤴ ᤀᤠᤰᤂᤣᤗ᤹ᤖᤡᤰ ᤐᤥ᤺ᤱᤔᤠ ᤛᤢᤰᤐᤣ᥅”

10 ᤜᤧᤰᤁᤩᤠᤱ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤛᤡᤰᤛᤠᤶᤒᤠᤏᤧ ᤜᤧᤰᤁᤣᤛᤠᤱ ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤒᤡ᥅ 11 ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤔᤧᤳᤏᤧ᤹ᤖᤥ॥ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤗᤧᤛ᤻ᤛᤢᤶᤒᤧᤒᤠ ᤐᤠ᤺ᤴᤜᤠ᤹ᤀᤣ ᤂᤡᤏᤡ᤹ ᤔᤧᤳᤋᤠᤛᤡᤃᤧ᤹. ᤁᤖᤛᤠᤱ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥ 12 ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱ ᤜᤧᤰᤁᤣᤛᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴ॥ ᤜᤧᤰᤁᤣ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤒᤣ᥅ 13 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤏᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤔᤧᤶᤒᤣ᤺ᤰᤁᤣ ᤘᤠ᤹ᤖᤥ॥ 14 ᤀᤡᤛᤪᤠᤀᤡᤗᤡᤜᤠ᤹ ᤕᤧ᤺ᤱᤄᤠᤍᤧᤴᤏᤥ ᤗᤠᤶᤍᤡ᤺ᤰ ᤔᤧᤈᤥᤃᤧᤸᤗᤧ ᤔᤥᤛᤠᤖᤧ ᤐᤡᤳᤋᤥᤗᤡ ᤀᤛᤣ᤺ᤰᤐᤧᤴ ᤐᤰᤂᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤴᤏᤠᤱ ᤐᤱᤗᤀᤣ ᤐᤥ᤺ᤱᤗᤥ॥* ᤛᤠᤶᤕᤥᤛᤠᤵᤗᤠᤀᤥ (ᤂᤠᤏᤡ᤺ᤳ ᥈᥇.᥊-᥏) ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤒᤠ ᤀᤡᤛᤪᤠᤀᤡᤗᤡᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤀᤛᤣ᤺ᤰᤐᤠᤜᤠ᤹ᤖᤧ ᤀ᤺ᤰᤐᤠᤱᤄᤢᤛᤡ. ᤁᤖ ᤗᤠᤕᤥᤗᤠᤶ ᤁᤧᤏᤢ᤺ᤱᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤛᤡᤱᤅᤥ ᤑᤥ᤺ᤴᤐᤠᤱᤄᤢᤒᤠ ᤀᤛᤣ᤺ᤰᤐᤧᤴ ᤀᤥᤔᤧᤔᤧᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤜᤡᤱᤗ ᤕᤠ᤺ᤴᤍᤢᤛᤡᤖᤥ॥ 15 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥

16 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤌᤡᤰᤗᤰ ᤁᤢᤛ᤻ᤛᤠ᤺ᤴ ᤐᤠᤱᤄᤢ ᤕᤢ᤺ᤛᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤃ ᤔᤧᤶᤔᤧᤰᤏᤧᤴ. ᤁᤖ ᤂᤧᤱᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥ 17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤛ᤻ᤛᤠ᤺ᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤑᤠ᤹ᤀᤠᤱ ᤐᤠᤱᤄᤢᤒᤠ ᤔᤧ᤺ᤴᤗᤥ ᤁᤖ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖ ᤑᤠ᤹ᤀᤠᤱ ᤐᤠᤱᤄᤢᤒᤠᤖᤥ॥

18 ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤂᤢᤶᤍᤡᤱ ᤔᤧᤱᤄᤥ᤺ᤛᤢᤴᤗᤥ ᤁᤖ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧᤱᤃ ᤋᤃᤡᤀᤣ ᤂᤠᤛᤧᤴ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤰᤗᤰ ᤁᤢᤛ᤻ᤛᤠ᤺ᤀᤥ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥ 19 ᤂᤢᤏᤡ᤹ ᤂᤠᤛᤧᤴᤏᤡᤴ ᤒᤠ ᤁᤴᤗᤥ. ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤕᤧ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧᤒᤠᤸᤗᤧ ᤂᤧᤱᤜᤠ᤹ᤖᤧ ᤀᤥ᤺ᤳᤋᤡᤴᤏᤢ᤺ᤸᤗᤧ ᤂᤠᤍᤠᤶᤔᤠᤴᤏᤣ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧ॥ 20 ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤀᤥ᤺ᤳᤋᤡ᤺ᤴ ᤔᤧᤈᤡ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤴ ᤏᤡᤎᤠ᤺ᤵ ᤑᤠ᤹ᤀᤠᤱ ᤔᤧᤃᤡᤀᤠᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤔᤧᤴᤍᤠ᤺ᤏᤧᤴᤗᤥ॥ 21 ᤁᤖ ᤀᤠᤳᤋᤡᤴᤜᤠ᤹ ᤛᤧᤰᤂᤠᤀᤥ ᤗᤠᤱᤔᤧᤄᤣ᤺ᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤥ᤺ᤳᤋᤡᤀᤥ ᤔᤧᤍᤠᤖᤥ॥”

22 ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔᤗᤠᤶᤒᤠ ᤕᤜᤢᤍᤡᤕᤠ ᤌᤢᤶ ᤁᤒᤪᤡᤱᤒᤠ ᤗᤠᤈᤣ᤹ᤀᤥ ᤔᤧᤒᤣᤀᤠᤱ ᤂᤧᤵᤔᤥ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤘᤕᤧᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖᤥ॥ 23 ᤂᤧᤴ ᤕᤧᤶᤔᤥ ᤕᤢᤜᤢᤴᤏᤠ᤺ᤴ ᤛᤠᤗᤡᤶ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱ ᤀᤣᤏᤥᤏ ᤔᤧᤵᤔᤏᤠᤒᤠ ᤋᤧᤴᤏᤥ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤃᤧ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤆᤫᤠ᤺ᤳ ᤏᤧᤛ᤻ᤛᤧᤀᤠᤱ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤧᤵᤔᤥ ᤔᤧᤍᤩᤧᤖ ᤔᤧᤘᤕᤧᤖᤥ॥ 24 (ᤁᤴ ᤒᤵᤋᤡᤛ᤻ᤔᤠ ᤐᤡᤔᤠ ᤕᤠ᤺ᤶᤒᤰᤁᤡᤱᤃ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤔᤠᤏᤢ᤺ᤸᤗᤧ ᤋᤃᤡᤒᤠ ᤐᤠ᤺ᤴ ᤘᤕᤧᤖᤥ॥)* ᤕᤢᤜᤢᤴᤏᤠᤖᤧ ᤁᤢᤛᤠᤵᤐᤴ ᤁᤧᤏᤡ᤺ᤵᤐᤠᤜᤠ᤹ᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤛᤠᤰᤐᤠ ᤌᤩᤧᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤀᤡ᤺ᤳᤋᤢᤒᤠᤖᤥ॥ ᤁᤴ ᤐᤠ᤺ᤴᤏᤡᤴ ᤘᤣ᤹ ᤛᤢᤏᤠᤀᤡᤱ ᤛᤠᤵᤐᤴᤏᤥᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ (ᤔᤳᤋᤡ ᥇᥊.᥇-᥇᥈. ᤔᤷᤁᤢᤛ ᥌.᥇᥊-᥈᥏. ᤗᤢᤁᤠ ᥉.᥇᥏-᥈᥆)॥

25 ᤕᤢᤜᤢᤴᤏᤠ᤺ᤸᤗᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤜᤢᤍᤡᤎᤡᤰᤏᤢ ᤛᤣᤛᤣ ᤆᤥ᤺ᤰᤛᤡᤱᤔᤠ ᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ ᤐᤥ᤺ᤰᤂᤧᤖᤥ॥ 26 ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤋᤥ᤺ᤴᤍᤡ ᤁᤧᤒᤡᤖᤢᤒᤠ ᤔᤏᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤰᤗᤥ॥ ᤀᤠᤏᤡ᤹ᤀᤥ ᤁᤧᤖᤧᤰ ᤔᤏᤠᤜᤠ᤹ ᤋᤠᤔᤠᤖᤧ ᤁᤢᤗᤧᤰᤘᤠ ᤂᤢᤏᤧ᤹ᤀᤥ ᤔᤧᤒᤣ᤺ᤰᤗ ᤔᤧᤒᤳᤗᤥ॥”

27 ᤕᤢᤜᤢᤴᤏᤠᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤶᤒᤡᤀᤣᤃ ᤔᤏᤠ᤺ᤸᤗᤧ ᤌᤧᤔᤠᤀᤠᤱ ᤂᤥ᤺ᤔᤠ ᤔᤧᤛᤢᤰᤋᤢᤴᤗᤥ॥ 28 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧ᤺ᤴᤏᤠ᤹ᤖᤥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤏᤢ᤺ᤸᤗᤣ ᤋᤃᤡ ᤐᤠᤱᤄᤠᤱᤒᤠᤖᤰ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ᤀᤣ ᤋᤥ᤺ᤴᤍᤡ ᤐᤡᤔᤠ ᤁᤧᤛᤢᤰᤋᤢᤶᤗᤥ॥ 29 ᤛᤡᤛᤠᤔᤣ᤺ᤳᤋᤡᤱᤃ ᤏᤠᤗᤡᤛᤠᤱᤅᤡᤸᤗᤧᤴᤏᤣᤖᤥ॥ ᤏᤠᤗᤡᤛᤠᤱᤅᤡᤴ ᤀᤠᤳᤋᤥ ᤘᤠ᤹. ᤂᤧᤵᤔᤥᤀᤣ ᤛᤡᤛᤠᤔᤣ᤺ᤳᤋᤡᤴ ᤐᤣ᤺ᤰᤗᤥ॥ ᤏᤠᤗᤡᤛᤠᤱᤅᤡᤴ ᤁᤢᤴᤍᤣ᤺ᤱᤒᤠᤸᤗᤧ ᤜᤠᤱᤄᤢᤀᤠᤱ ᤂᤢᤏᤧ᤹ ᤁᤢᤒᤠ᤺ᤴ ᤂᤧᤵᤛᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤋᤠ᤺ᤸᤗᤧ ᤛ᤺ᤳᤗᤥ॥ ᤀᤡᤱᤃᤠ᤹ᤀᤠᤱ ᤜᤧᤰᤁᤣᤗ᤹ᤖᤡᤰ ᤛ᤺ᤳᤋᤠᤖᤥ ᤜᤧᤰᤁᤩᤠᤱ ᤀᤠᤸᤗ ᤀᤠᤛ᤺ᤵᤔᤧᤴ ᤁᤢᤗᤡᤱᤎᤥ ᤁᤧᤖᤧᤖᤥ॥ 30 ᤂᤪᤡᤛ᤻ᤋᤖᤧ ᤁᤢᤔᤡᤱᤛᤥ ᤀᤡᤱᤎᤠ᤺ᤱ ᤜᤠᤖᤠ᤹ ᤐᤥ᤺ᤖ ᤐᤣ᤺ᤰᤗᤖᤥ. ᤀᤡᤱᤃᤠ᤹ᤃ ᤆᤢᤰᤐᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥”

31 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤴᤏᤢ᤺ᤸᤗᤧ ᤕᤶᤒᤠᤃ ᤀᤠᤳᤋᤡᤴᤏᤠᤱ ᤜᤥ᤺ᤵᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠ ᤁᤧᤒᤥ᤺ᤱᤒᤠᤱᤃ ᤂᤠᤶᤒᤣ᤺ᤰᤔᤥᤒᤠᤀᤣᤖᤥ ᤜᤧᤰᤁᤩᤠᤱ ᤂᤧᤸᤗᤧᤃ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤏᤡᤴᤗᤰ ᤐᤠ᤺ᤳᤋᤢ᤹. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤖᤥ॥ 32 ᤂᤢᤏᤧ᤹ᤃ ᤏᤡ᤺ᤛᤢᤒᤠ ᤏᤢ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ᤀᤣ ᤐᤠ᤺ᤳᤋᤢ᤹. ᤁᤖ ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤴᤗᤥ॥ 33 ᤀᤠᤳᤋᤡᤸᤗᤧ ᤂᤢᤏᤧ᤹ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠ ᤆᤥ᤺ᤰ ᤑᤠ᤹ᤀᤠᤱ ᤐᤷᤔᤠᤱᤃᤡ ᤐᤡᤖᤢ᤹ᤖᤥ॥ 34 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠᤖᤥ॥ ᤂᤧᤸᤗᤧ ᤏᤡᤱᤘᤠ᤹ᤑᤢᤐᤠ᤺ᤴᤗᤰ ᤐᤠ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤌᤡᤶᤛᤢ᤹ᤖᤥ॥ 35 ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ᤴ ᤗᤢᤱᤔᤠ᤹ ᤋᤢᤰᤋᤢ᤹. ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤁᤢᤜᤢᤰᤁᤥ ᤐᤡᤖᤢᤀᤠᤱ ᤘᤠ᤹ᤖᤥ॥ 36 ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤥ᤺ᤛᤢᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤧᤱᤜᤠ᤹ ᤛᤶᤍᤠᤱ ᤆᤢᤰᤗᤥ॥