1 ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤖ ᤋᤢᤘᤠ ᤆᤥᤃᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤀᤠᤸᤗ ᤕᤧᤶ ᤐᤥ᤺ᤰᤂᤧᤖᤥ. ᤁᤧᤛ᤻ᤛᤠ᤺ᤸᤗᤧ ᤂᤧᤏᤧ᤹ ᤁᤧᤔᤡᤔᤡᤍᤡᤱ ᤆᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤆᤥᤃᤧ᤹ᤀᤥ॥ 2 ᤂᤧᤏᤧ᤹ ᤁᤧᤛ᤻ᤛᤠ᤺ᤴ ᤁᤧᤒᤡᤖᤢᤒᤠ ᤔᤏᤠᤜᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤂᤢᤏᤧ᤹ ᤕᤢᤰ ᤁᤧᤒᤡᤖᤢᤀᤠᤱ ᤁᤧᤘᤠ᤹ᤖᤥ॥ 3 ᤂᤧᤱᤜᤠ᤹ᤖᤧ ᤛᤧᤰᤂᤠᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤖᤰ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤠᤱᤄᤢᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤒᤠ ᤂᤧᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥ 4 ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤠᤱᤄᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤆᤥᤃᤢᤱᤛᤢᤖᤢᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤔᤡᤔᤡᤍᤡᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 5 ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤥᤗᤡᤱᤛᤥᤔᤢ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤠᤱᤎᤥ ᤂᤧᤏᤧ᤹ᤏᤢ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤳᤋᤢᤱᤒᤠ ᤔᤡᤔᤡᤍᤡᤱᤅᤡᤸᤗᤧ ᤂᤧᤏᤧ᤹ ᤁᤧᤍᤃᤡ ᤀᤠᤔᤡᤱᤛᤥ ᤀᤡᤱᤎᤠ᤺ᤱ ᤆᤥᤃᤧ᤹ᤀᤥ॥

6 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤃ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣ ᤔᤧᤘᤕᤧ॥ ᤂᤧᤴ ᤁᤧᤒᤡᤖᤠᤱᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤈᤠᤰᤁᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ 7 ᤀᤠᤸᤗ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤧᤏᤧ᤹ᤗᤠᤶᤒᤠᤀᤣ ᤋᤩᤧᤒᤠ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ॥ 8 ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤔᤧᤍᤠ᤺ᤰᤋᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤂᤧᤏᤧ᤹ᤗᤠᤶ ᤋᤩᤠᤱᤒᤠ ᤑᤠ᤹ᤀᤠᤱ ᤛᤧᤰᤂᤠᤀᤣ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥

9 ᤂᤧᤱᤜᤠ᤹ᤖᤧ ᤗᤠᤃᤡ ᤀᤡᤱᤃᤠ᤹ ᤋᤢᤘᤠ ᤆᤥ᤺ᤰᤁᤠ. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡᤃ ᤔᤧᤈᤥ᤺ᤰᤁᤠᤴᤗᤥ॥ ᤂᤧᤏᤧ᤹ ᤁᤧᤒᤡᤖᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤋᤢᤘᤠ ᤆᤥ᤺ᤰᤁᤠ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤁᤧᤔᤏᤠᤛᤡᤖᤥ॥ 10 ᤀᤡᤱᤃᤠ᤹ ᤁᤳᤋᤢᤱᤛᤡᤱᤒᤠ ᤁᤠᤰ ᤔᤏᤠᤜᤠ᤹ᤃ ᤂᤧᤏᤧ᤹ᤀᤡᤴᤇᤡᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤃᤳᤋᤢᤛᤡᤒᤠ ᤔᤏᤠᤜᤠ᤹ᤃ ᤀᤡᤱᤃᤠ᤹ᤀᤡᤴᤇᤡᤖᤥ॥ ᤂᤧᤱᤜᤠ᤹ᤀᤥ ᤀᤠᤔᤡᤔᤡᤍᤡᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 11 ᤀᤠᤸᤗ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤧᤏᤧ᤹ᤀᤥ ᤌᤥ ᤌᤠᤱᤅᤠᤖ ᤐᤳᤋᤠᤖᤥ॥ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤘᤠ᤹ᤀᤠᤴ. ᤁᤖ ᤂᤧᤱᤜᤠ᤹ᤃ ᤁᤵᤔᤥᤀᤣ ᤔᤧᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤛᤣ ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤱᤜᤠ᤹ᤃ ᤁᤧᤒᤡᤖᤠᤱᤒᤠ ᤔᤢᤰᤛᤠᤶᤃᤧᤴ ᤁᤧᤔᤡᤱᤅᤥ ᤁᤶᤒᤪᤠᤱ ᤔᤧᤳᤋᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤴᤇᤡ᤹ ᤌᤡᤰ ᤀᤠᤘᤠ᤹ᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤀᤠᤱ ᤌᤡᤰᤜᤢᤵ ᤔᤧᤒᤥ᤺ᤱᤗᤖᤥ॥ 12 ᤀᤡᤱᤃᤠ᤹ ᤁᤵᤔᤥ ᤘᤕᤠᤱᤗ ᤌᤠᤖᤡᤰ ᤂᤧᤴ ᤔᤡᤱᤅᤡᤸᤗᤧᤴ ᤔᤢᤰᤛᤠᤶᤔᤥ ᤁᤠᤰ ᤁᤶᤒᤪᤠᤱ ᤔᤧᤳᤋᤢᤱᤛᤡᤱᤗᤥ॥ ᤂᤧᤴ ᤔᤧᤰᤔᤠ ᤁᤧᤒᤥ᤺ᤱᤒᤠᤴᤏᤠᤱ ᤌᤥ ᤘᤣ᤹ ᤀᤠᤳᤋᤡᤴᤏᤠᤱ ᤔᤧᤔᤠ᤺ᤛᤢᤱᤅᤡᤴ. ᤁᤖ ᤁᤠᤰ ᤋᤠᤱᤛᤧ᤺ᤵᤋᤢᤱᤛᤡᤱᤗᤥ॥ ᤂᤧᤱᤃ ᤛᤠᤶᤕᤥᤛᤠᤵᤗᤠ᤺ᤴ ᤁᤧᤳᤗ ᤑᤠ᤹ᤀᤠᤱ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ 13 ᤀᤠᤸᤗ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤌᤠᤱᤅᤠᤖ ᤐᤳᤋᤠᤖᤥ॥ ᤀᤡᤱᤃᤠ᤹ ᤁᤳᤋᤢᤱᤒᤠ ᤀᤠᤕᤠᤶᤏᤠ᤺ᤶᤔᤡᤴ ᤂᤧᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤠ᤹ᤀᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥ 14 ᤂᤧᤱᤜᤠ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤜᤠ᤹ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤈᤡ᤺ᤳᤋᤢᤛᤡᤖᤥ॥ 15 ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤛᤧ᤹ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤠᤴ. ᤁᤖ ᤁᤢ᤹ᤀᤡᤃᤧᤓᤧ᤹ᤒᤠ ᤔᤠᤑᤧᤴᤛᤠᤶᤔᤥᤗᤠᤶ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤧᤛᤧ᤹ᤀᤥ॥ 16 ᤀᤡᤱᤃᤠ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤖᤥ॥ 17 ᤂᤧᤱᤜᤠ᤹ ᤛᤧᤰᤂᤠ᤺ᤸᤗᤧ ᤛᤣᤛᤣ ᤛᤠᤱᤛᤠᤱ ᤆᤥᤃᤧᤛᤧ᤹ᤀᤥ॥ ᤂᤧᤏᤧ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤁᤡᤱᤃ ᤛᤧᤰᤂᤠᤖᤥ॥ 18 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢᤱᤛᤡᤱᤗᤥ॥ 19 ᤂᤧᤱᤜᤠ᤹ ᤛᤧᤰᤂᤠᤀᤣ ᤛᤣᤛᤣ ᤛᤠᤱᤛᤠᤱ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤣᤛᤣ ᤛᤠᤱᤛᤠᤱ ᤆᤥ᤺ᤰᤛᤡᤱᤅᤠᤖᤥ॥ 20 ᤀᤡᤱᤃᤠ᤹ᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤀᤡᤱᤓᤴ ᤔᤧᤈᤥᤃᤢᤒᤠᤗᤠᤶ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ 21 ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤱᤜᤠ᤹ ᤁᤠᤰ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤠᤴᤇᤡ᤹ᤀᤥ ᤔᤧᤘᤠ᤹ᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤑᤠ᤹ᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖᤖᤥ॥ 22 ᤀᤠᤴᤇᤡ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ 23 ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤌᤡᤰᤜᤢᤵ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤡᤰᤜᤢᤵ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤁᤢᤈᤧᤰ ᤌᤡᤰᤜᤢᤵᤐᤥ ᤔᤧᤍᤠᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥

24 ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤁᤧᤒᤡᤖᤠᤱᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤔᤧᤘᤠ᤹ᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤔᤧᤏᤡ᤺ᤛᤢ᤹ᤖᤥ॥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤡᤔᤡᤍᤡᤱᤅᤡᤴ ᤁᤧᤒᤡᤖᤠᤱᤗᤥ॥ 25 ᤛᤠᤶᤕᤥᤏᤡᤒᤠ ᤀᤠᤶᤒᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤢᤛᤡᤱ ᤁᤧᤔᤧᤴᤏᤡ᤺ᤳᤏᤧᤴᤇᤠᤱ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤏᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤐᤠ᤺ᤴᤏᤡᤴ ᤁᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥ 26 ᤀᤡᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤗᤢᤱᤔᤠ᤹ ᤋᤢᤰᤔᤧᤴ ᤂᤢᤏᤡ᤹ᤏᤢᤀᤠᤱ ᤘᤠ᤹ᤖ ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ᤀᤥ ᤘᤠ᤹ᤀᤠᤖ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤁᤱᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤠᤶᤔᤥ ᤔᤧᤳᤋᤢᤱᤛᤡᤱᤗᤥ॥”