18
ᤕᤧᤛᤢ᤺ᤴ ᤔᤧᤍᤧᤶᤛᤢ᤹
ᤔᤳᤋᤡ ᥈᥌.᥊᥍-᥋᥌. ᤔᤷᤁᤢᤛ ᥇᥊.᥊᥉-᥋᥆. ᤗᤢᤁᤠ ᥈᥈.᥊᥍-᥋᥉
1 ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ ᤛᤢᤖᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤁᤡᤍᤪᤥᤏ ᤔᤧᤵᤔᤏᤠᤒᤠ ᤜᤱᤜᤱᤘᤠ᤺ᤸᤗᤧ ᤏᤠᤎᤠ᤺ᤶᤒᤡ ᤐᤣᤖᤥ॥ ᤂᤧᤵᤔᤥ ᤈᤤᤋᤢᤏ ᤛᤡᤱᤗᤠ ᤌᤡᤰ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤗᤠ᤺ᤛᤧ॥ 2 ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤂᤧᤴ ᤋᤧᤴᤏᤡᤴ ᤏᤡ᤺ᤛᤢᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰᤗᤧᤱ ᤂᤧᤵᤔᤥ ᤋᤢᤔᤢᤛᤡᤀᤠᤱ ᤘᤕᤧᤖᤥ॥ 3 ᤂᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤠ᤺ᤸᤗᤧ ᤁᤢᤓᤠ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ ᤂᤧᤴ ᤈᤤᤋᤢᤏ ᤛᤡᤱᤗᤠᤀᤥ ᤗᤠᤶᤗᤥᤛᤢᤛᤡᤀᤠᤱ ᤋᤠᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤋᤡᤕᤠᤗᤥ. ᤛᤣᤔᤡ ᤏᤢ ᤑᤧᤈᤢᤶ ᤑᤧᤕᤠᤜᤠ᤹ ᤔᤧᤃᤳᤋᤢᤖᤥ॥
4 ᤕᤧᤛᤢᤖᤧ ᤀᤠᤸᤗ ᤂᤢᤏᤧ᤹ᤏᤢ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤁᤠᤰ ᤏᤡ᤺ᤛᤢᤀᤠᤱ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅”
5 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤒᤠ ᤕᤧᤛᤢ᤺ᤴ॥”
ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤃ ᤀᤡᤱᤃᤠ᤹ᤀᤣᤖᤥ॥” ᤂᤧᤴ ᤕᤧᤶᤔᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤴᤏᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤧᤒᤧᤖᤥ॥ 6 ᤕᤧᤛᤢᤖᤧ ᤂᤧᤱᤜᤠ᤹ “ᤂᤧᤱᤃ ᤀᤡᤱᤃᤠ᤹ᤀᤣᤖᤥ” ᤔᤧᤳᤋᤢᤛᤡᤸᤗᤧ ᤂᤧᤱᤜᤠ᤹ ᤀᤣᤃᤠᤱ ᤔᤧᤈᤳᤇᤡᤱᤗ ᤗᤧᤖᤠᤱ ᤁᤠᤰᤐᤧᤳ ᤂᤠᤶᤔᤥ ᤔᤧᤗᤧᤰᤂᤧᤖᤥ॥
7 ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴᤗᤥ॥”
8 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤀᤠᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤏᤧ ᤑᤠ᤹ᤃᤪ ᤁᤱᤜᤠ᤹ᤃ ᤐᤣ᤺ᤰᤔᤠ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” 9 ᤁᤧᤒᤡᤖᤠᤱᤒᤠᤜᤠ᤹ᤀᤥ ᤌᤡᤰᤁᤠᤱ ᤔᤧᤔᤠ᤺ᤛᤢᤱᤅᤡᤴᤗᤥ ᤗ᤹ᤖᤡᤰ ᤕᤧᤛᤢᤖᤧ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤴ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
10 ᤜᤧᤰᤁᤩᤠᤱ ᤛᤡᤔᤥᤏ ᤐᤋᤪᤢᤛᤖᤧ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠ ᤔᤠᤸᤂᤛ ᤔᤧᤵᤔᤏᤠᤒᤠᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
11 ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹᥄ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤐᤡᤀᤠᤒᤠ ᤀᤡᤏᤥᤃᤧᤴ ᤋᤢᤰᤂᤣᤘᤠ ᤂᤥᤷᤕᤠᤀᤥᤗᤠᤶ ᤌᤢᤅᤢᤱᤗᤀᤣ ᤐᤥ᤺ᤱ॥”*ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤑᤠ᤹ᤀᤡᤱᤃ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤋᤢᤰᤂᤣ ᤆᤠᤔᤠ ᤕᤠᤖᤡᤵ ᤘᤕᤧ॥
ᤕᤧᤛᤢ᤺ᤴ ᤜᤴᤏᤠᤛᤖᤥ ᤔᤧᤍᤣ᤹ᤖᤢ᤹
ᤔᤳᤋᤡ ᥈᥌.᥋᥍. ᤔᤷᤁᤢᤛ ᥇᥊.᥋᥉. ᤗᤢᤁᤠ ᥈᥈.᥋᥊
12 ᤜᤧᤰᤁᤣᤗ᤹ᤖᤡᤰ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤍᤧᤶᤛᤢᤀᤠᤱ ᤀᤡᤔᤧᤄᤣ᤺ᤰᤂᤢ. 13 ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤴᤏᤥ᤺ᤵᤐᤠ ᤜᤴᤏᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤖᤥ॥*ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤴᤇᤡ᤺ᤀᤣ ᤌᤠᤖᤡᤰ ᤛᤣᤘᤠ ᤆᤥᤃᤢ. ᤁᤖ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤕᤖᤡᤰ ᤗᤧᤱ ᤗᤧᤰᤂᤢ॥ ᤏᤠᤈᤡᤖᤡ ᤋᤱᤒᤣ ᥌ ᤀᤥ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤛᤧ ᤜᤴᤏᤠᤛᤧᤴ ᤔᤧᤛᤣᤃᤢ. ᤜᤧᤰᤁᤩᤠᤱ ᤏᤠᤈᤡᤖᤡ ᤋᤱᤒᤣ ᥇᥋ ᤀᤥ ᤁᤢᤶᤒᤠᤱᤔᤡ᤹ ᤁᤤᤕᤠᤑᤠᤛᤧᤴ ᤔᤧᤛᤣᤃᤢ॥ ᤁᤖ ᤔᤧᤴᤇᤡ᤺ᤀᤣ ᤌᤠᤖᤡᤰ ᤜᤴᤏᤠᤛᤖᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤜᤡ᤺ᤛᤢᤛᤡ॥ 14 ᤒᤠ ᤁᤴ ᤁᤤᤕᤠᤑᤠᤛᤖᤧᤀᤣ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤌᤡᤰ ᤔᤏᤠ᤺ᤴ ᤛᤡ᤺ᤔᤠᤀᤣ ᤏᤢ᤺ᤒᤠ ᤐᤥ᤺ᤱ ᤗ᤹ᤖᤡᤰ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡᤀᤠᤱ ᤘᤕᤧᤖᤥ॥
ᤐᤋᤪᤢᤛᤖᤧ ᤕᤧᤛᤢ᤺ᤴ ᤏᤠ᤹ᤖᤢ᤹
ᤔᤳᤋᤡ ᥈᥌.᥌᥏-᥍᥆. ᤔᤷᤁᤢᤛ ᥇᥊.᥌᥌-᥌᥎. ᤗᤢᤁᤠ ᥈᥈.᥋᥋-᥋᥍
15 ᤛᤡᤔᤥᤏ ᤐᤋᤪᤢᤛ ᤏᤢ ᤘᤣ᤹ ᤁᤢᤜᤢ᤹ᤛᤠᤶᤒᤠᤎᤡᤰᤗᤧ ᤕᤧᤛᤢ᤺ᤴ ᤋᤡᤶᤍᤧᤳᤇᤢᤖᤥ॥ ᤂᤧᤴ ᤘᤣ᤹ ᤜᤢ᤹ᤛᤠᤶᤒᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴ ᤋᤡᤶᤍᤢᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤁᤧᤖᤧ॥ 16 ᤁᤖ ᤐᤋᤪᤢᤛᤖᤧ ᤗᤠ᤺ᤰᤁᤠᤳ ᤂᤢᤏᤧ᤹ ᤜᤠᤱᤄᤢᤖ ᤕᤧᤒᤧ॥ ᤂᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤜᤢ᤹ᤛᤠᤶᤒᤠᤴ ᤛᤡᤃᤠᤱᤗᤠᤶ ᤏᤢ᤺ᤰᤂᤧ ᤑᤧᤖᤧᤀᤠᤱ ᤗᤠᤶᤎᤣ᤺ᤵ ᤁᤧᤃᤥ᤺ᤔᤠ ᤛᤣᤘᤠᤖᤥᤔᤠᤴ ᤔᤧᤳᤋᤢᤀᤠᤱ ᤐᤋᤪᤢᤛᤧᤴ ᤛᤡᤃᤠᤱ ᤋᤣ᤹ᤖᤢᤖᤥ॥
17 ᤂᤧᤴ ᤛᤣᤘᤠᤖᤥᤔᤠᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅”
ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥”
18 ᤛᤠ᤹ᤖᤡᤰ ᤆᤢᤱᤈᤡ᤺ᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤛᤣᤘᤠᤖᤥᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤔᤡ ᤔᤧᤍᤢᤵᤋᤢᤀᤠᤱ ᤂᤡᤖᤡ ᤔᤡᤈᤠ᤹ᤏᤢ ᤔᤧᤕᤧᤒᤧᤖᤥ॥ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤐᤣᤛᤠᤱ ᤔᤡᤈᤠ᤹ᤏᤢ ᤕᤧᤒᤧᤖᤥ॥
ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ᤹
ᤔᤳᤋᤡ ᥈᥌.᥋᥏-᥌᥌. ᤔᤷᤁᤢᤛ ᥇᥊.᥋᥋-᥌᥊. ᤗᤢᤁᤠ ᥈᥈.᥌᥌-᥍᥇
19 ᤀᤠᤸᤗ ᤜᤡᤶᤛᤡᤃᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤧᤛᤢ᤺ᤴ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤢᤏᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤢᤖ ᤕᤠᤃᤧ॥
20 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤁᤠᤰᤗᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤖᤠᤱᤗᤥ. ᤀᤡᤱᤃᤠ᤹ᤃ ᤁᤠᤰ ᤕᤜᤢᤍᤡᤜᤠ᤹ ᤔᤧᤈᤢᤶᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤔᤠᤱᤜᤡᤶᤔᤥ ᤔᤏᤠᤜᤠ᤹ ᤛᤍᤠᤍᤡᤱ ᤜᤢ᤹ᤖᤢᤱᤛᤡᤱᤗ ᤘᤠ᤹ᤖᤥ॥ ᤀᤡᤱᤃᤠ᤹ ᤛᤫᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ॥ 21 ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤕᤠᤵᤔᤡ ᤛᤣ᤺ᤴᤃᤧᤍᤥ᤺ᤛᤡᤒᤣ᥅ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤄᤧᤶᤒᤠᤜᤠ᤹ᤀᤣ ᤛᤣ᤺ᤴᤍᤥ᤺ᤛᤧᤶᤛᤡᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ॥”
22 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤂᤧᤵᤔᤥ ᤏᤡ᤺ᤳᤋᤠᤱ ᤁᤧᤕᤧᤵᤐᤠ ᤛᤢᤜᤠᤱᤕᤢᤰᤐᤠᤎᤡᤰᤗᤧ ᤕᤧᤛᤢᤖᤧ ᤁᤢᤏᤧᤍᤧᤱᤒᤠᤴ ᤗᤧᤰᤂᤢᤀᤠᤱ ᤔᤧᤳᤋᤢ. “ᤀᤰᤂᤣᤗ᤹ᤖᤡᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴᤏᤢ ᤔᤢᤖᤠ ᤁᤧᤍᤥ᤺ᤒᤡ᥅”
23 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤐᤠ᤺ᤴ ᤑᤣ᤺ᤴᤍᤢᤱᤏᤧ ᤑᤠ᤹ᤃᤪ ᤐᤠ᤺ᤳᤋᤧ᤹॥ ᤁᤖ ᤀᤡᤱᤃᤠ᤹ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤌᤣᤀᤠᤱ ᤁᤧᤜᤡᤵᤐᤠᤒᤠᤒᤣ᥅” 24 ᤜᤧᤰᤁᤩᤠᤱ ᤜᤴᤏᤠᤛᤖᤧ ᤕᤧᤛᤢ᤺ᤴ ᤀᤡᤔᤧᤄᤣ᤺ᤰᤂᤢᤒᤠᤴ ᤔᤧᤶᤓᤠ᤺ᤱᤅᤣ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤥ ᤐᤠᤱᤄᤢᤍᤣ᤺ᤛᤢᤖᤥ॥
ᤐᤋᤪᤢᤛᤖᤧ ᤕᤧᤛᤢ᤺ᤴ ᤕᤠᤶᤔᤥ ᤏᤠ᤹ᤖᤢ᤹
ᤔᤳᤋᤡ ᥈᥌.᥍᥇-᥍᥋. ᤔᤷᤁᤢᤛ ᥇᥊.᥌᥏-᥍᥈. ᤗᤢᤁᤠ ᥈᥈.᥋᥎-᥌᥈
25 ᤛᤡᤔᤥᤏ ᤐᤋᤪᤢᤛᤧᤴ ᤔᤡᤈᤠ᤹ᤏᤢ ᤕᤧᤒᤧᤸᤗᤧ ᤁᤢᤓᤠᤖᤧ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤠᤱ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅”
ᤐᤋᤪᤢᤛᤖᤧ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥” 26 ᤐᤋᤪᤢᤛᤖᤧ ᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤒᤠ ᤔᤏᤠ᤺ᤸᤗᤧ ᤁᤢᤃᤠ᤹ᤀᤡ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤘᤣ᤹ᤛ᤻ᤔᤠ ᤁᤢᤛᤣᤘᤠᤖᤥᤒᤠᤎᤡᤰᤁᤠᤱ ᤂᤧᤵᤔᤥ ᤕᤧᤒᤧ॥ ᤂᤧᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤈᤤᤋᤢᤏ ᤛᤡᤱᤗᤠᤀᤥ ᤕᤧᤛᤢ᤺ᤴᤏᤢ ᤁᤧᤘᤕᤧᤒᤠ ᤏᤡ᤺ᤏᤧᤒᤠ ᤔᤧ᤺ᤶᤒᤡ᥅” 27 ᤐᤋᤪᤢᤛᤖᤧ ᤕᤠᤶᤔᤥ ᤔᤧ᤺ᤴᤗᤥ ᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤒᤠ ᤂᤧᤴ ᤕᤧᤶᤔᤥᤀᤣ ᤀᤡᤱᤘᤠ ᤁᤠ᤺ᤛᤧᤖᤥ॥
ᤕᤧᤛᤢ᤺ᤴ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤁᤢᤍᤃᤡ ᤔᤧᤕᤧᤵᤛᤢ᤹
ᤔᤳᤋᤡ ᥈᥍.᥇-᥈. ᥇᥇-᥇᥊. ᤔᤷᤁᤢᤛ ᥇᥋.᥇-᥋. ᤗᤢᤁᤠ ᥈᥉.᥇-᥋. ᥇᥉-᥈᥋
28 ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤕᤧᤛᤢ᤺ᤴ ᤋᤠᤏᤠᤶᤛᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥᤗᤠᤶ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤜᤠᤱᤜᤡᤶᤔᤥ ᤔᤧᤍᤣ᤹ᤖᤢ॥ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤠᤛᤢᤳᤌᤥ ᤀᤠᤒᤥ᤺ᤱᤅᤠᤱ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤆᤠ ᤆᤠᤔᤠ ᤂᤥ᤺ᤔᤧᤍᤧᤳᤏᤧᤴ ᤑᤠ᤹ᤀᤠᤱ ᤂᤧᤱᤜᤠ᤹ ᤜᤡᤶ ᤛᤡᤃᤠᤱ ᤔᤧᤴᤗᤠ᤺ᤛᤧᤴᤗᤥ॥*ᤕᤜᤢᤍᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤡᤶ ᤛᤡᤃᤠᤱ ᤗᤠ᤺ᤵᤔᤠ ᤔᤧᤴᤏᤢ᤺ᤶᤏᤠᤒᤠ ᤌᤡᤶ ᤘᤕᤧᤖᤥ॥ ᤔᤧᤗᤠ᤺ᤛ᤻ᤛᤧᤸᤗᤧ ᤀᤠᤛᤢᤳᤌᤥ ᤔᤧᤒᤥ᤺ᤱᤒᤠ ᤏᤢ ᤋᤱᤏᤠᤶᤖᤧ ᤆᤠ ᤆᤠᤔᤠ ᤔᤧᤱᤄᤥ᤺ᤛᤢᤴᤒᤠ ᤘᤕᤧ॥ 29 ᤜᤧᤰᤁᤣ᤺ᤸᤗᤧ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣ ᤀᤠᤵᤋᤡᤰ ᤁᤧᤍᤠ᤺ᤖᤢᤶᤔᤠᤱ ᤁᤧᤘᤕᤡ᤹ᤒᤣ᥅”
30 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤴ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤕᤧᤸᤗᤧᤃ ᤂᤧᤏᤧ᤹ᤀᤥ ᤔᤧᤍᤠᤖᤢᤶᤒᤧᤴ ᤔᤧᤴ॥”
31 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴ ᤋᤣ᤹ᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹॥”
ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤕᤢᤰ ᤔᤧᤃᤳᤋᤢᤶᤒᤧᤴᤗᤥ॥” 32 ᤁᤱᤃ ᤕᤧᤛᤢᤖᤧ ᤂᤢᤏᤧ᤹ ᤀᤠᤰᤋᤱᤒᤠ ᤛᤡ᤺ᤔᤧᤸᤗᤧ ᤛᤡ᤺ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ*ᤕᤧᤛᤢᤖᤧ ᥉.᥇᥊ ᤏᤢ ᥇᥈.᥉᥈-᥉᥊ ᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤁᤢᤗᤠᤱ ᤁᤢᤜᤢᤰᤜᤠ᤹ᤀᤥ ᤑᤧᤴᤋᤡᤱᤅᤡᤸᤗᤧ ᤔᤧᤎᤧᤵᤋᤢᤀᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢ᤹॥ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤛᤡ᤺ᤔᤧᤸᤗᤧ ᤂᤢᤶᤍᤡᤱᤅᤡᤴ ᤗᤢᤱᤅᤡᤸᤗᤧ ᤗᤧᤵᤔᤠᤀᤠᤱ ᤛᤧᤵᤔᤠ ᤘᤕᤧ. ᤁᤖ ᤖᤥᤔᤡ ᤌᤡᤶᤔᤥ ᤛᤡ᤺ᤔᤧᤸᤗᤧ ᤂᤢᤶᤍᤡᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤔᤠ ᤛᤧᤵᤔᤠ ᤘᤕᤧ॥ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
33 ᤐᤡᤗᤠᤋᤛᤧᤴ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤀᤠᤱ ᤕᤧᤛᤢ᤺ᤴ ᤀᤢ᤺ᤳᤋᤢᤀᤠᤱ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅”
34 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤀᤡᤸᤗᤧ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤁᤧᤶᤔᤧᤳᤋᤧᤒᤠᤒᤡ᥅”
35 ᤐᤡᤗᤠᤋᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤕᤜᤢᤍᤡᤀᤠᤒᤡ᥅ ᤀᤠᤒᤠᤅᤣ ᤁᤧᤕᤠᤵᤔᤡᤜᤠ᤹ ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤏᤧ᤹ ᤜᤢᤰᤔᤧᤛᤢᤵᤋᤠᤱᤅᤠᤱ ᤘᤠ᤹॥ ᤂᤧᤏᤧ᤹ ᤌᤣ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢ᥅”
36 ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤜᤠᤱᤈᤢᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤗᤥ॥ ᤁᤵᤔᤥᤒᤠ ᤘᤕᤧᤸᤗᤧᤃ ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤜᤠ᤹ᤖᤧ ᤀᤡᤱᤃᤠ᤹ ᤕᤠᤵᤔᤡ ᤋᤧᤶᤔᤠ ᤔᤧᤱᤄᤥ᤺ᤀᤠᤴᤗ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤏᤢ ᤌᤱ ᤔᤧᤈᤥᤃᤢᤒᤠᤔᤧᤴ. ᤁᤖ ᤀᤠᤜᤠᤱᤈᤢᤶᤔᤡᤴ ᤁᤵᤔᤥᤒᤠ ᤔᤧ᤺ᤴᤗᤥ॥”
37 ᤐᤡᤗᤠᤋᤛᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤜᤠᤱᤏᤧᤒᤡ᥅”
ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤜᤠᤱᤀᤠ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤰᤂᤠ᤺ᤸᤗᤧᤴ ᤋᤥ᤺ᤴᤍᤡ ᤐᤡᤛᤧ ᤀᤡᤱᤃᤠ᤹ ᤛᤠᤘᤠ᤺ᤴᤇᤡᤅᤠᤱᤒᤠᤖᤥ॥ ᤛᤧᤰᤂᤠᤀᤥ ᤁᤧᤒᤵᤐᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥”
38 ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢ. “ᤛᤧᤰᤂᤠ᤺ᤱᤃ ᤌᤧᤔᤠ᤺ᤴᤒᤣ᥅” ᤂᤧᤸᤗᤧ ᤜᤧᤰᤁᤣ ᤐᤠ᤺ᤳᤋᤢᤖ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤗᤥ॥ 39 ᤁᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤂᤡᤏᤡ᤹ ᤗᤠᤃᤡ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤗᤧᤖᤢᤱ ᤐᤡᤏᤡᤱᤒᤠ ᤌᤡᤶ ᤁᤧᤃᤳᤋᤢᤶ. ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤜᤠᤱᤅᤡᤴ ᤗᤧᤖᤢᤱ ᤐᤡᤏᤡᤱᤒᤡ᥅”
40 ᤂᤧᤱᤜᤠ᤹ᤖᤧ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤔᤧ᤺ᤴ᥄ ᤂᤧᤴ ᤔᤧ᤺ᤴ᥄ ᤒᤖᤒ᤻ᤒᤠᤛᤧᤏ ᤗᤧᤖᤧ ᤀᤠᤒᤡᤖᤧ᤹᥄” (ᤀᤠᤸᤗ ᤒᤖᤒ᤻ᤒᤠᤛᤧᤱᤃ ᤜᤠᤱᤒᤡᤑᤩᤢᤱᤒᤠ ᤘᤕᤧᤖᤥ॥)
*18:11 ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤑᤠ᤹ᤀᤡᤱᤃ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤋᤢᤰᤂᤣ ᤆᤠᤔᤠ ᤕᤠᤖᤡᤵ ᤘᤕᤧ॥
*18:13 ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤴᤇᤡ᤺ᤀᤣ ᤌᤠᤖᤡᤰ ᤛᤣᤘᤠ ᤆᤥᤃᤢ. ᤁᤖ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤕᤖᤡᤰ ᤗᤧᤱ ᤗᤧᤰᤂᤢ॥ ᤏᤠᤈᤡᤖᤡ ᤋᤱᤒᤣ ᥌ ᤀᤥ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤛᤧ ᤜᤴᤏᤠᤛᤧᤴ ᤔᤧᤛᤣᤃᤢ. ᤜᤧᤰᤁᤩᤠᤱ ᤏᤠᤈᤡᤖᤡ ᤋᤱᤒᤣ ᥇᥋ ᤀᤥ ᤁᤢᤶᤒᤠᤱᤔᤡ᤹ ᤁᤤᤕᤠᤑᤠᤛᤧᤴ ᤔᤧᤛᤣᤃᤢ॥ ᤁᤖ ᤔᤧᤴᤇᤡ᤺ᤀᤣ ᤌᤠᤖᤡᤰ ᤜᤴᤏᤠᤛᤖᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤜᤡ᤺ᤛᤢᤛᤡ॥
*18:28 ᤕᤜᤢᤍᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤡᤶ ᤛᤡᤃᤠᤱ ᤗᤠ᤺ᤵᤔᤠ ᤔᤧᤴᤏᤢ᤺ᤶᤏᤠᤒᤠ ᤌᤡᤶ ᤘᤕᤧᤖᤥ॥ ᤔᤧᤗᤠ᤺ᤛ᤻ᤛᤧᤸᤗᤧ ᤀᤠᤛᤢᤳᤌᤥ ᤔᤧᤒᤥ᤺ᤱᤒᤠ ᤏᤢ ᤋᤱᤏᤠᤶᤖᤧ ᤆᤠ ᤆᤠᤔᤠ ᤔᤧᤱᤄᤥ᤺ᤛᤢᤴᤒᤠ ᤘᤕᤧ॥
*18:32 ᤕᤧᤛᤢᤖᤧ ᥉.᥇᥊ ᤏᤢ ᥇᥈.᥉᥈-᥉᥊ ᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤁᤢᤗᤠᤱ ᤁᤢᤜᤢᤰᤜᤠ᤹ᤀᤥ ᤑᤧᤴᤋᤡᤱᤅᤡᤸᤗᤧ ᤔᤧᤎᤧᤵᤋᤢᤀᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢ᤹॥ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤛᤡ᤺ᤔᤧᤸᤗᤧ ᤂᤢᤶᤍᤡᤱᤅᤡᤴ ᤗᤢᤱᤅᤡᤸᤗᤧ ᤗᤧᤵᤔᤠᤀᤠᤱ ᤛᤧᤵᤔᤠ ᤘᤕᤧ. ᤁᤖ ᤖᤥᤔᤡ ᤌᤡᤶᤔᤥ ᤛᤡ᤺ᤔᤧᤸᤗᤧ ᤂᤢᤶᤍᤡᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤔᤠ ᤛᤧᤵᤔᤠ ᤘᤕᤧ॥