6
ᤌᤡᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤌᤱ ᤁᤧᤏᤠ᤺ᤶᤒᤠ
ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡ ᤀᤣ᤺ᤵᤛᤠᤵᤐᤥ ᤌᤡᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥ ᤌᤡᤰᤛᤡᤃᤣ᤺ᤰᤐᤠᤸᤗᤧ ᤋᤠᤱᤛᤠᤰᤐᤧᤴ ᤁᤧᤗᤥ᤺ᤱᤒᤠ ᤀᤡᤰᤗᤠᤀᤥ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤑ᤺ᤍᤠᤱᤒᤠ ᤀᤴᤎᤡᤰ ᤏᤡ᤺ᤛᤢᤱ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤗᤳᤇᤠ ᤗᤡᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤧᤴ ᤋᤡᤆ᤺ᤎᤡᤰ ᤔᤧᤒᤡᤖᤢᤀᤠᤱ ᤌᤱ ᤁᤧᤏᤠ᤺ᤶᤒᤠ ᤁᤢᤀᤡᤛᤡ᤺ᤰ ᤁᤠᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤌᤠᤛᤡᤱᤗᤥ॥
ᤏᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤀᤡᤰᤛᤠᤀᤥ ᤌᤱ
ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤏᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤛᤡᤃᤣ᤺ᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤘᤣ᤹ᤛ᤻ᤔᤠ ᤀᤴᤎᤡᤰ ᤗ᤺ᤴᤍᤧ ᤑᤧᤖᤧ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤳᤇᤡᤱᤗ ᤑᤠ᤹ᤀᤠᤱ ᤀᤴ ᤁᤧᤕᤢᤰᤐᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤛᤏᤠᤖᤢᤱᤅᤡᤴ ᤂᤧᤵᤔᤠᤍᤣ᤺ᤔᤠ ᤔᤢᤰᤛᤠᤶ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤕᤶᤒᤠ ᤋᤠᤓᤣᤎᤡᤰᤁᤠᤱ ᤂᤧᤴ ᤔᤧᤒᤡᤖᤢ॥
ᤛᤢᤶᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤀᤡᤰᤛᤠᤀᤥᤒᤠ ᤛᤠᤰ
ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤛᤢᤶᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤛᤢᤶᤛᤡᤃᤣ᤺ᤰᤐᤠ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤔᤠᤰᤋᤠᤱᤒᤠ ᤀᤴᤎᤡᤰ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤋᤧᤴᤍᤢᤖᤡᤎᤡᤰ ᤁᤳᤋᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤌᤡᤰ ᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤌᤡᤰ ᤔᤠᤛᤡ ᤜᤧᤰᤁᤩᤠᤱ ᤌᤡᤰ ᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤛᤢᤶᤛᤡ ᤜ᤺ᤰᤛᤡ᤺ ᤐᤥ᤺ᤱᤗᤥ॥ ᤁᤖ ᤈᤤᤋᤢᤏ ᤏᤡ᤺ᤱᤃᤣ᤺ᤴ ᤏᤢ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤑᤧᤳᤔᤧᤗᤠ᤺ᤴᤍᤧᤏᤧ᤹ᤀᤥ॥”
ᤗᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡ᤺ᤔᤧᤴ
ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤗᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤗᤡᤛᤡᤃᤣ᤺ᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤶᤍᤠᤱᤒᤠ ᤀᤴᤏᤡᤴ ᤂᤧᤵᤔᤥ ᤏᤡ᤺ᤛᤢᤱᤗᤥ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤡᤱᤃ “ᤛᤡ᤺ᤔᤧᤴ” ᤘᤕᤧ॥ ᤜᤧᤰᤁᤩᤠᤱ ᤂᤧᤔᤠᤕᤱᤛᤱᤅᤥᤒᤠ ᤁᤧᤛᤡ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤗᤰ ᤗᤡᤛᤡᤀᤥ ᤁᤢᤗᤰ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤌᤱ. ᤛᤠᤰ. ᤋᤢᤰᤔᤠ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤗᤠᤶ ᤛᤧᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤕᤢᤰ ᤔᤧᤒᤡᤖᤢᤛᤡᤖᤥ॥
ᤅᤠᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤖᤢᤔᤣᤜᤠ᤹ᤖᤧ ᤔᤧᤈᤥᤃᤢᤒᤠ ᤐᤣᤗᤡ
ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤅᤠᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤔᤧᤈᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤔᤧᤛᤧᤖᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤀᤡᤱᤃᤠ᤹ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤡᤃᤠᤱ ᤏᤡ᤺ᤛᤢᤱᤛᤡᤱᤗᤥ॥ 10 ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤛᤣᤛᤣ ᤏᤢ ᤛᤧᤰᤂᤠᤒᤠ ᤔᤢᤰᤛᤠᤶᤍᤠᤱᤒᤠᤀᤣ. ᤂᤧᤏᤧ᤹ ᤕᤠᤵᤔᤡ ᤁᤧᤛᤧᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤑᤠᤸᤗᤧ ᤂᤠᤛᤧᤴ ᤁᤧᤗᤥ᤺ᤴᤍᤢᤛᤡᤀᤠᤱ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤒᤣ᥅” 11 ᤂᤧᤱᤜᤠ᤹ ᤁᤠᤰ ᤑ᤺ᤍᤠᤱᤒᤠ ᤋᤣ᤺ᤳ ᤔᤧᤒᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤛᤧᤵᤔᤠ ᤁᤧᤒᤥ᤺ᤱᤒᤠ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤔᤧᤴᤇᤧᤳᤇᤡᤱᤅᤣ ᤌᤠᤖᤡᤰ ᤜᤠᤱᤄᤧᤶᤔᤧ᤹ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥
ᤋᤢᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵ–ᤛᤡᤔᤡᤰᤗᤢᤱᤅᤥ ᤔᤢᤍᤥ᤺ᤱ ᤂᤠᤍᤥ᤺ᤱ
12 ᤀᤠᤸᤗ ᤔᤧᤸᤗᤢᤰᤛᤠ᤺ᤸᤗᤧ ᤋᤢᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡ᤺ᤛᤢᤱ॥ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤅᤧ. ᤏᤠᤶᤔᤡᤴᤏᤠᤱ ᤔᤠᤰᤌᤰᤋᤧᤀᤠᤱ ᤔᤠᤰᤋᤠᤱᤒᤠ ᤐᤥ᤺ᤰᤂᤧ. ᤗᤠ᤺ᤒᤠᤴᤏᤠᤱ ᤔᤠᤰᤂᤡ᤹ ᤁᤢᤀᤡᤛᤡ᤺ᤰ ᤜᤧ᤺ᤳᤋᤠᤱᤒᤠ ᤐᤥ᤺ᤰᤂᤧ ᤐᤣ. 13 ᤜᤧᤰᤁᤩᤠᤱ ᤐ᤺ᤳᤇᤣ᤹ᤒᤢᤱᤔᤠᤴ ᤛᤢᤖᤡᤳᤔᤠᤸᤗᤧ ᤛᤠ᤹ᤖᤡᤰ ᤘᤠ᤺ᤴᤍᤢᤸᤗᤧ ᤔᤧᤴᤍᤢᤶᤔᤏᤠᤒᤠ ᤐ᤺ᤳᤇᤣ᤹ᤜᤠ᤹ ᤔᤰᤌᤠᤒᤠ ᤁᤢᤀᤡᤛᤡ᤺ᤰ ᤕᤖᤡᤰ ᤂᤣ᤺ᤶᤛᤡᤰᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠᤱᤛᤠᤰᤐᤥᤗᤠᤶ ᤔᤰᤔᤧᤎᤩᤧᤖᤥ॥ 14 ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴᤏᤠᤱ ᤛᤠᤵᤁᤡᤳᤋᤡᤴ ᤁᤢᤀᤡᤛᤡ᤺ᤰ ᤁᤡᤳᤇᤡᤱᤅᤠᤱ ᤆᤳᤇᤡᤱ ᤐᤣᤖᤥ॥ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤘᤠᤃᤵᤂᤠᤶᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤖᤥ॥ 15 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹. ᤜᤠᤱᤕᤢᤰᤐᤠᤜᤠ᤹. ᤌᤰᤗᤡᤜᤠᤱᤜᤠ᤹. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹. ᤁᤧᤎᤢᤶᤒᤠ ᤔᤢᤰᤁᤧᤃᤢᤒᤠᤜᤠ᤹. ᤜᤧᤰᤁᤩᤠᤱ ᤁᤠᤰ ᤕᤥ᤺ᤰᤐᤠᤜᤠ᤹ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹ ᤁᤧᤖᤧᤰ ᤁᤥ᤺ᤰᤔᤠᤀᤥᤒᤠ ᤑᤢᤰᤁᤢᤜᤠ᤹ ᤏᤢ ᤕᤠᤰᤁᤣ᤺ᤰᤜᤠ᤹ᤀᤥ ᤔᤧᤈᤡᤱᤛᤡᤱᤗᤥ॥ 16 ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤜᤠ᤹ ᤏᤢ ᤗᤢᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤖᤥ. “ᤀᤠᤏᤡᤃᤧ ᤛᤶᤍᤠᤱ ᤔᤰᤌᤩᤧ᤹ᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤡᤰᤁᤧᤴᤗᤠᤶᤒᤠ ᤕᤠᤵᤔᤡ ᤀᤠᤎᤣ᤺ᤰᤋᤧ᤹ ᤀᤠᤈᤡᤰᤂᤧ᤹ᤀᤥ᥄ 17 ᤌᤣᤀᤠᤱᤓᤧᤸᤗᤧ ᤁᤵᤔᤥ ᤂᤢᤴᤇᤡ᤹ ᤁᤡᤵᤔᤠ ᤁᤧᤄᤢ᤺ᤒᤠ ᤛᤡᤰ ᤐᤥ᤺ᤰᤔᤠᤸᤗᤧᤴ ᤕᤶᤒᤠ ᤕᤧᤴ ᤋᤩᤧᤀᤠᤱ ᤘᤠ᤹॥ ᤜᤠ᤺ᤳᤗᤧ ᤂᤧᤴ ᤌ᤺ᤵᤔᤠ ᤛᤢᤰᤋᤢᤒᤣ᥅”