1 ᤁᤴ ᤀᤣᤃᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤁᤧᤕᤧᤵᤐᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤠᤶᤒᤣ᤺ᤰᤔᤥ. ᤘᤠᤜᤱᤅᤥ. ᤛᤡᤱᤒᤢᤱᤜᤠ᤹ᤀᤥ ᤛᤢᤖᤡᤳ ᤁᤣᤈᤱ ᤔᤧᤜᤢᤏᤧᤴᤗ ᤑᤠ᤹ᤀᤠᤱ ᤗᤡᤛᤡ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱᤅᤡᤴ ᤔᤧᤎᤣ᤺ᤰᤋᤢᤒᤠ ᤏᤡ᤺ᤛᤢᤱ॥ 2 ᤜᤧᤰᤁᤩᤠᤱ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵ ᤁᤧᤒᤱᤒᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤠᤅᤧᤒᤠ ᤏᤡ᤺ᤛᤢᤱ॥ ᤂᤧᤸᤗᤧ ᤂᤧᤴ ᤂᤠᤶᤒᤣ᤺ᤰᤔᤠᤴ ᤏᤢ ᤘᤠᤜᤱᤅᤡᤴ ᤑᤧᤳᤗᤠ᤺ᤶᤔᤠ ᤕᤢᤰ ᤁᤧᤄᤥ᤺ᤒᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢᤛᤡ. 3 “ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤠᤏᤡᤃᤧ ᤀᤣ᤺ᤵᤛᤠᤵ ᤔᤧᤴᤕᤢᤰᤁᤣ ᤌᤠᤖᤡᤰ ᤂᤡᤏᤡ᤹ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤅᤡᤴ. ᤛᤡᤱᤒᤢᤱᤜᤠ᤹ ᤌᤣᤀᤠᤱ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹ᤀᤥ॥”

4 ᤜᤧᤰᤁᤩᤠᤱ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤛᤡᤒᤠᤜᤠ᤹ ᤔᤧᤏᤡ᤺ᤖᤢᤛᤡᤒᤠ ᤂᤧᤵᤛᤢᤱ॥ ᤁᤠᤰ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ᤖᤥᤗᤠᤶ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤧᤘᤕᤧᤖᤥ–

9 ᤁᤴ ᤀᤣᤃᤠᤱ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤔᤏᤠᤜᤠ᤹. ᤁᤧᤖᤧᤰ ᤗᤠᤈᤣ᤹ᤜᤠ᤹. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹ᤗᤠᤶ. ᤜᤠᤱᤕᤢᤰᤏᤠ᤺ᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤁᤒᤪᤡᤱ ᤔᤧᤕᤧᤒᤧᤒᤠ ᤏᤡ᤺ᤛᤢᤱᤛᤡᤱ॥ ᤂᤧᤱᤜᤠ᤹ᤖᤧ ᤑ᤺ᤍᤠᤱᤒᤠ ᤋᤣ᤺ᤳ ᤔᤧᤈᤠᤰᤂᤢᤀᤠᤱ ᤂᤢᤏᤡ᤹ ᤜᤢᤰᤁᤥ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤥᤖᤠ᤺ᤰᤜᤠ᤹ ᤔᤧᤒᤰᤂᤢᤀᤠᤱ ᤔᤧᤕᤧᤒᤧ॥ 10 ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤗ᤹ᤖᤡᤰ ᤔᤧᤀ᤺ᤰᤋᤧ. “ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤢᤰᤛᤠᤶ ᤁᤳᤇᤢ᤹ᤖᤥ॥” 11 ᤜᤧᤰᤁᤩᤠᤱ ᤜᤠᤱᤕᤢᤰᤏᤠ᤺ᤴ. ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤂᤢᤏᤡ᤹ ᤁᤒᤪᤡᤱ ᤁᤧᤖᤧᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤀᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤛᤣᤘᤠ ᤔᤧᤈᤥᤃᤢᤖᤥ. 12 “ᤀᤠᤔᤧᤴ᥄ ᤏᤠᤖᤠ ᤑᤥ᤺ᤔᤠᤴ. ᤔᤡᤔᤡᤍᤡᤱᤅᤡᤴ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ. ᤏᤥᤃᤧᤴᤏᤡᤴ. ᤀᤡᤱᤎᤠ᤺ᤱᤅᤡᤴ. ᤔᤢᤰᤛᤠᤶᤔᤡᤴ ᤏᤢ ᤌᤢᤶᤔᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤣᤖᤥ॥ ᤀᤠᤔᤧᤴ᥄”

13 ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤎᤡᤰᤗᤧ ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥ᤺ᤛᤠᤱ “ᤁᤴ ᤑ᤺ᤍᤠᤱᤒᤠ ᤋᤣ᤺ᤳ ᤁᤧᤈᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅ ᤜᤧᤰᤁᤩᤠᤱ ᤀᤠᤳᤋᤥᤗᤠᤶ ᤔᤧᤍᤩᤧᤒᤠᤒᤣ᥅”

14 ᤀᤡᤱᤃᤠ᤹ ᤂᤢᤏᤧ᤹ ᤏᤥᤃᤵ ᤐᤡᤖᤢᤱ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤔᤧᤏᤡ᤺ᤛᤢᤱᤛᤡᤱᤅᤡᤴᤗᤥ. ᤂᤧᤏᤧ᤹ᤀᤣ ᤁᤧᤏᤡ᤺ᤛᤢ᤹ᤖᤥ॥”

ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤁᤴᤜᤠ᤹ᤃ ᤐᤕᤶ ᤕᤶᤒᤠ ᤏᤡᤱᤄᤢᤶᤗᤠᤶ ᤁᤧᤍᤠ᤺ᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥ ᤂᤢᤏᤡ᤹ ᤋᤣ᤺ᤳ ᤆᤠᤱᤜᤠ᤹ ᤘᤠᤔᤧᤜᤵᤋᤢᤀᤠᤱ ᤑ᤺ᤍᤠᤱᤒᤠ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥* ᤑ᤺ᤍᤠᤱᤒᤠ ᤑᤠ᤹ᤀᤡᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤀᤠᤱ ᤛᤠᤶᤕᤥᤏᤡᤒᤠ ᤏᤢ ᤛᤣᤛᤣ ᤛᤠᤱᤛᤠᤱ ᤔᤧᤒᤥ᤺ᤰᤂᤧ॥ 15 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤁᤱᤜᤠ᤹ᤃ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤧᤵᤐᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤁᤢᤜᤡᤶᤔᤥ ᤛᤣᤘᤠ ᤔᤧᤈᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤂᤢᤏᤡ᤹ᤏᤢ ᤘᤠ᤹ᤀᤠᤱ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥ 16 ᤁᤱᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤧᤳᤗᤠ᤺ᤰᤔᤠ ᤏᤢ ᤀᤠᤱᤃᤢᤃᤧᤴ ᤘᤠᤔᤡ᤺ᤔᤠᤸᤗᤧ ᤔᤧᤍᤖᤢᤛᤡᤴᤗᤥ॥ ᤜᤧᤰᤁᤩᤠᤱ ᤏᤠᤶᤛᤠᤱᤅᤡᤸᤗᤧᤀᤠᤱ ᤛᤧ᤺ᤵᤔᤠᤀᤠᤱ ᤔᤧᤛᤧ᤺ᤵᤋᤢᤛᤡᤴ. ᤕᤧᤶᤔᤠᤀᤠᤱ ᤔᤧᤕᤧᤶᤍᤢᤛᤡᤴᤗᤥ॥ 17 ᤌᤣᤀᤠᤱᤓᤧᤸᤗᤧ ᤜᤠᤱᤕᤢᤰᤏᤠ ᤗᤢᤶᤔᤥ ᤁᤧᤘᤠ᤹ᤒᤠ ᤔᤧᤸᤗᤢᤰᤛᤠ᤺ᤸᤗᤧ ᤁᤱᤜᤠ᤹ ᤁᤔᤢᤛᤡ᤹. ᤂᤢᤏᤧ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤘᤠᤒᤢᤴᤏᤥ ᤗᤠᤶᤗᤥᤛᤢᤛᤡᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤔᤡᤰᤘᤠ᤺ᤴ ᤋᤢᤃᤢ ᤐᤡᤖᤢᤛᤡ᤹ᤖᤥ॥”