22
ᤜᤡᤱᤔᤴᤗᤧᤴ ᤕᤱᤄᤱ
1 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤔᤠᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤕᤱᤄᤱᤅᤡᤴ ᤀᤥᤛᤣ᤺ᤴᤎᤠᤰᤋᤠᤱᤗᤥ॥ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤱᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠᤖᤥ॥ ᤂᤧᤴ ᤕᤱᤄᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰᤏᤠᤗᤠᤶ ᤘᤃᤢᤛᤧᤖ 2 ᤂᤧᤴ ᤕᤧᤰᤕᤰᤁᤥᤒᤠ ᤔᤠᤖᤠᤶ ᤗᤢᤶᤔᤥ ᤕᤧᤖᤥ॥ ᤕᤱᤄᤱᤅᤡᤸᤗᤧ ᤁᤢᤕᤠᤀᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤡᤴ ᤕᤢᤅᤧᤖᤥ॥ ᤂᤧᤴ ᤛᤡᤱᤒᤢᤱᤅᤥ ᤋᤱᤒᤣ ᤗᤠᤘᤠ ᤌᤡᤰ-ᤏᤧᤳ ᤐᤖᤡᤰᤗᤧᤴ ᤛᤡᤱᤛᤣᤜᤠ᤹ ᤌᤥ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤛᤡᤱᤒᤢᤱᤅᤡᤸᤗᤧ ᤁᤢᤓᤧᤰᤘᤠᤜᤠ᤹ᤃ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤘᤣ᤺ᤶᤒᤠ ᤛᤡᤍᤠ᤹ ᤆᤥᤃᤧᤖᤥ॥ 3 ᤂᤧᤴ ᤕᤧᤰᤕᤰᤁᤥ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤴᤇᤡᤴᤒᤠ ᤗᤳᤇᤠᤀᤠᤱ ᤔᤧᤜᤥ᤺ᤵᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰᤏᤠ᤺ᤴ ᤂᤧᤵᤔᤥ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤛᤣᤘᤠ ᤔᤧᤈᤥᤃᤢ᤹ᤖᤥ॥ 4 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ᤺ᤴ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤁᤢᤔᤡᤱᤅᤡᤴ ᤂᤢᤏᤡ᤹ ᤋᤥᤘᤠᤒᤥ ᤛᤠᤵᤋᤧᤀᤠᤱ ᤐᤳᤗᤥ॥ 5 ᤂᤧᤵᤔᤥ ᤕᤠᤶᤔᤥ ᤛᤧᤴᤍᤡᤰ ᤔᤧᤒᤥ᤺ᤱᤏᤧᤴ. ᤜᤧᤰᤁᤩᤠᤱ ᤌᤥ᤹ᤔᤠᤖᤧ ᤗᤠᤃᤡ ᤛᤣᤔᤡ ᤏᤢ ᤏᤠᤶᤛᤠᤱᤅᤠᤱ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤂᤢᤏᤡ᤹ ᤀᤥ᤺ᤳᤋᤡ ᤐᤥ᤺ᤱ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤍᤠᤍᤡᤱ ᤜᤠᤱ ᤔᤧᤈᤥᤃᤢ᤹ᤖᤥ॥
6 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤁᤴ ᤐᤠ᤺ᤴᤈᤠᤰᤜᤠ᤹ ᤋᤠ᤺ᤰᤐᤥ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤛᤧᤰᤂᤠᤒᤠ ᤆᤥ᤺ᤰᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤛᤣᤛᤣᤔᤠᤱ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤀᤠᤸᤗ ᤜᤠᤖᤠᤀᤣ ᤐᤥ᤺ᤱᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤁᤢᤔᤠᤱᤗᤠᤀᤡᤱᤒᤧᤴ ᤐᤠᤱᤄᤢ ᤕᤢ᤺ᤛᤢᤖᤥ॥”
ᤕᤧᤛᤢ᤺ᤴ ᤜᤠᤖᤠᤀᤣ ᤕᤢ᤺ᤔᤠ ᤆᤥ᤺ᤰ
7 ᤕᤧᤛᤢᤖᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ᥄ ᤜᤧᤰᤁᤩᤠᤱ ᤁᤴ ᤛᤠᤵᤐᤴᤏᤥ ᤁᤧᤒᤵᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥”
8 ᤀᤡᤱᤃᤠ᤹ ᤕᤢᤜᤢᤴᤏᤠᤖᤧ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢᤱ ᤂᤧᤵᤛᤢᤱᤗᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢᤱ ᤂᤧᤵᤛᤢᤱᤅᤡᤸᤗᤧ ᤁᤴ ᤐᤠ᤺ᤴᤜᤠ᤹ ᤕᤠᤵᤔᤡ ᤀᤥᤛᤣ᤺ᤴᤃᤧᤎᤠᤰᤐᤠ ᤔᤠᤱᤗᤠᤀᤡᤱᤒᤠᤴ ᤛᤣᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤜᤒᤳ ᤑᤴᤇᤡᤱᤅᤠᤱᤗᤥ॥ 9 ᤁᤖ ᤂᤧᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤀᤡᤱᤃᤠ᤹ ᤛᤣᤘᤠ ᤔᤧᤈᤥᤃᤠᤱᤅᤡᤴᤏᤧ᤹᥄ ᤀᤡᤱᤃᤠ᤹ᤃ ᤂᤧᤏᤧ᤹ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤏᤢ ᤁᤴ ᤛᤠᤵᤐᤴᤏᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤀᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤆᤥᤃᤧ᤹ᤀᤥ᥄”
10 ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤁᤴ ᤛᤠᤵᤐᤴᤏᤥᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤜᤠ᤹ ᤔᤧᤔᤠ᤹ᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥ 11 ᤜᤠᤖᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤣ ᤔᤧᤈᤥᤃᤢᤖᤖᤥ. ᤁᤧᤈᤡ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤈᤡ᤺ᤴᤇᤡᤱᤗ ᤔᤧᤘᤠ᤹ᤖᤖᤥ. ᤁᤖ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤜᤧᤰᤁᤩᤠᤱ ᤛᤣᤛᤣᤒᤠᤜᤠ᤹ ᤛᤣᤛᤣᤀᤣ ᤔᤧᤘᤠ᤹ᤏᤡᤖᤥ॥”
12 ᤕᤧᤛᤢᤖᤧ ᤐᤠ᤺ᤳᤋᤢ᤹.
“ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ᥄ ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰᤁᤣ ᤂᤢᤶᤍᤡᤱᤅᤡᤴ ᤏᤢ ᤜᤠᤱᤛᤧᤶᤔᤡᤴ ᤐᤡᤖᤢᤱᤛᤡᤱᤗᤥ॥ 13 ᤀᤡᤱᤃᤠ᤹ ᤀᤸᤑᤠ ᤏᤢ ᤀᤥᤔᤣᤃᤠ. ᤋᤃᤡᤒᤠ ᤏᤢ ᤀᤣᤃᤠᤱᤒᤠ. ᤜᤧᤰᤁᤩᤠᤱ ᤁᤢᤜᤣ᤺ᤰᤛᤡᤱᤔᤠ ᤏᤢ ᤁᤢᤏᤢᤵᤔᤠᤀᤠᤖᤥ॥
14 ᤜᤧᤰᤁᤩᤠᤱ ᤂᤢᤏᤡ᤹ ᤋᤣ᤺ᤳᤜᤠ᤹ ᤛᤣᤛᤣ ᤗ᤹ᤖᤡᤰ ᤘᤠᤃᤧᤜᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤋᤠ᤺ᤰᤜᤴᤜᤠ᤹ᤀᤥᤗᤠᤶ ᤕᤧᤰᤕᤰᤁᤥ ᤗᤠ᤺ᤵᤔᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤥᤗᤠᤶ ᤆᤠᤔᤠ ᤕᤢᤰ ᤔᤧᤄᤥ᤺ᤛᤢ᤹ᤖᤥ॥ 15 ᤁᤖ ᤁᤥ᤺ᤳᤆᤥ ᤜᤧᤰᤋᤱᤒᤠ ᤕᤧᤵᤗᤧᤰ ᤁᤧᤃᤵᤐᤠᤜᤠ᤹. ᤏᤡᤱᤘᤠ᤹ ᤁᤧᤔᤠᤒᤠ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹. ᤆᤠᤃᤧᤖᤠᤶᤒᤠᤜᤠ᤹. ᤔᤏᤠ ᤁᤧᤛᤧᤵᤐᤠᤜᤠ᤹. ᤏᤠᤘᤠᤀᤡᤳᤗᤠ ᤔᤠᤱᤃᤧᤄ᤺ᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰ ᤀᤡᤱᤗᤧᤰ ᤐᤠ᤺ᤵᤔᤠ ᤂᤢᤏᤡ᤹ ᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤗᤠ᤺ᤰᤁᤠᤳᤋᤣ ᤔᤧᤘᤠ᤹ᤖᤥ॥
16 ᤀᤡᤱᤃᤠ᤹ ᤕᤧᤛᤢᤖᤧ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤗᤠᤃᤡ ᤁᤴ ᤐᤠ᤺ᤴᤜᤠ᤹ ᤔᤧᤳᤇᤧ ᤀᤠᤔᤠᤱᤗᤠᤀᤡᤱᤒᤠᤴ ᤂᤡᤏᤡ᤹ᤀᤥ ᤐᤠᤱᤄᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤀᤠᤖᤥ. ᤜᤧᤰᤁᤩᤠᤱ ᤋᤠᤴᤇᤥ᤺ᤰᤐᤠᤀᤠᤖᤥ॥”
17 ᤛᤣᤛᤣᤔᤠᤱᤅᤡᤴ ᤏᤢ ᤛᤡᤛᤠᤔᤣ᤺ᤳᤋᤡᤸᤗᤧ ᤐᤠ᤺ᤳᤇᤢ᤹. “ᤕᤧ᤹ᤀᤥ᥄” ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤁᤧᤄᤧᤶᤒᤠᤸᤗᤧᤀᤠᤱ “ᤕᤧ᤹ᤀᤥ᥄” ᤐᤠ᤺ᤳᤋᤢᤖᤥ॥ ᤀᤠᤳᤋᤡᤴ ᤀᤠᤱᤃᤢᤃᤧᤴ ᤘᤠᤔᤡ᤺ᤰᤔᤠᤸᤗᤧ ᤋᤖᤢᤀᤠᤱ ᤘᤠ᤹. ᤂᤧᤴ ᤋᤠᤖᤖᤥ॥ ᤀᤠᤳᤋᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤁᤢᤔᤧᤸᤗᤢᤱ ᤔᤧ᤺ᤴᤏᤣᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤌᤢᤅᤢᤖᤖᤥ॥
18 ᤁᤴ ᤛᤠᤵᤐᤴᤏᤥᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤄᤧᤶᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤗᤥ–ᤜᤠ᤺ᤳᤗᤧ ᤁᤴ ᤛᤠᤵᤐᤴᤏᤥ ᤌᤣᤀᤡ ᤕᤥ᤹ᤖᤢ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤁᤴ ᤛᤠᤵᤐᤴᤏᤥ ᤆᤧᤱᤔᤏᤠᤒᤠ ᤔᤡᤴᤍᤣ᤹ᤜᤠ᤹ ᤂᤧᤴ ᤁᤧᤕᤥ᤹ᤒᤠᤸᤗᤧ ᤁᤢᤛᤶᤍᤠᤱ ᤕᤥ᤹ᤖᤢᤖᤥ॥ 19 ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤸᤗᤧᤴ ᤛᤠᤵᤐᤴᤏᤥᤗᤠᤶ ᤌᤣᤀᤡ ᤂᤰᤋᤢ᤹. ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤥᤗᤠᤶ ᤜᤧᤰᤁᤩᤠᤱ ᤛᤣᤛᤣ ᤕᤧᤰᤕᤰᤁᤥᤗᤠᤶ ᤂᤧᤸᤗᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤗᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤰᤋᤢ᤹ᤖᤥ॥
20 ᤁᤴ ᤐᤠ᤺ᤴᤏᤡᤴ ᤛᤠ᤺ᤰᤂᤡ ᤁᤧᤒᤡᤒᤠᤸᤗᤧ ᤐᤠ᤺ᤳᤋᤢ᤹. “ᤛᤧᤰᤂᤠᤀᤣ ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ॥”
ᤀᤠᤔᤧᤴ᥄ ᤍᤠᤱᤒᤠ ᤕᤧᤛᤢᤀᤣ. ᤕᤧ᤹ᤀᤥ᥄
21 ᤍᤠᤱᤒᤠ ᤕᤧᤛᤢᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥