1 Lesa tutɛ nǝ moola miǝ bete ni bǝ bikato ola bikǝtǝ Onanto lǝ bikalɛ wǝǝ lekpakpa kasɔ wǝ ani lǝ betidi ba tã eto disi. Bikǝfi mi ku mǝ mblɛ eto ahiã bikǝtsyǝ lǝ Onanto eto ǝnǝmi. 2 Nya bikato ola kǝtǝ Onanto lǝ baka ku betidi ba kenke ntɔnko betidi bǝ lǝ bomblɛ lǝ bɔkɛ lǝ diyuǝ ǝsuǝ kalebe saa. Itǝ bǝ lǝ bobokosǝ bo ǝsuǝ kasɔ butǝ Onanto nya bufi dibu butǝ utsyuǝ saa. 3 Olatoto eyifo lesa nǝ laakɛ bo Ofomfokǝtǝ Onanto ɔkɔɛ. 4 Itsyise ola nkǝ utsyuǝ saa te wǝ Ditiki Sɛɛ nǝmǝ lǝ ote ɔnukualɛ ǝmǝ bǝ lǝ utǝ wǝ nkpǝ. 5 Lǝ ɔnukualɛɛ, Onanto ɔni ete nkpe. Nya Ofomfokǝtǝ tsya ɔni ete nkpe. Wǝ ni utidi wǝ baakpo Kristo Yesu. Wǝ ni futsyǝ laalɔ bonko Onanto eto nti. 6 Wǝ ni fuutsyuǝ dífi wǝ ǝsuǝ útǝ fe kedi lǝ kawunsiǝ kenke eto betidi eto disi. Yesu éyifo nyamfo sitinti bǝ Onanto eto kɛnyɛ ka útsyǝ nkǝ woofo utǝ wǝ betidi kenke eto lefe eboyo. 7 Nyamfo eso Onanto lékpe mɛ fe wǝ ɔtɔnkpe ku wǝ oteasa. Nyamfo menyifo bǝ sidia minlɛ bɔtɛyi. Nlɛ mi bɔtɛyi sitinti minkǝ wǝ dílǝkǝ mɛ fe oteasa nkǝ lǝ mbǝ nlǝkǝ wǝ bofokanɔ eto Ditiki Sɛɛ nǝmǝ nte betidi ba lennitɔ Yudafɔ.

8 Lǝ bafokanɔfɔ eto katsyakɔ saa, nla minkǝ basani besǝ mǝ ani kato bato ola ku ketu ka lekpa kɛnkɛ. Nya ɔblɔ nye kǝnǝ saa mankɛ mi lǝ nti. 9 Nla tsya miǝ besio lɛ mǝ ǝsuǝ ola ɛyɛ lǝ mǝ bikelɛlɛ ǝsuǝ, lǝ ete bǝ balɛ mǝ ǝsuǝ kasɔ bobokosǝ. Inni bǝ bakle mǝ esi ku sika eto bikǝ akpa akpa nya lefo koya kpǝ nya loote bǝ balɛ mǝ ǝsuǝ kato bobesǝ. 10 Bomuu, ele bǝ mǝ ditsyǝbi sɛɛ te bǝ beyifo besio ba laate Onanto sikpi. 11 Nya ele bǝ usio saa bokosǝ wǝ ǝsuǝ kasɔ lǝ okase asa, lǝ busiǝ kpo ǝsuǝ. 12 Minlɛ mǝ kusu butǝ minkǝ baté basani asa nye bǝtǝkǝ basani kato. Bomu ele bǝ bǝsiǝ kpoo, betsyue koto. 13 Itsyise Adam ni futsyǝ Onanto leka buyifo fɛ úlǝkǝ Eva utsyiko lǝ wǝ. 14 Nya inni Adam ni nwǝ olo ǝmǝ lɛwɛ, bomu usio ǝmǝ ni nwǝ ɔwɛ. Nya útǝ úyifo lebua. 15 Nya lǝ usio ebuńyǝ kekleke lǝ wǝ bofokanɔ ǝsuǝ ku lǝ lelabi ǝsuǝ nya wuusiǝ nkpǝ kɛnkɛ nya woobokosǝ ǝsuǝ kasɔɔ, wɔɔyɛ lǝ kanyi ka nkpe lǝ ubilele ǝsuǝ ɔbɔ ofe.