4
Kristo Ǝtǝ Nkǝ Bafokanɔfɔ Kenke Yifo Bani.
1 Nyaso mɔ nwǝ nlabe lǝ diyo, se meeyifo Bonamute eto keyifo esoo, nlɛ mi kɔlɛ bɔlɛ minkǝ bisiǝ nkpǝ bo lɛflɔ bokate ko bokpadi bo Onanto lékpadi mi. 2 Bebokosǝ ǝsuǝ kasɔ lefe saa, biyuǝ buɛɛ ku lǝ bɛkɛ disuǝtsyǝ. Bilǝkǝ mi lelabi bete bǝtsyuǝ ku lǝ bɛkɛ dibusǝ bitǝ mi bǝtsyuǝ. 3 Bekplatsya lǝ biyifo lesa saa lǝ kɛnyɛ kani ǝsuǝ fe kase Lɛwɔnɔ Kɛnkɛ nǝmǝ dífi mi ɔ́kɔ, lǝ bisiǝ nkpǝ lǝ diyuǝ ǝsuǝ. 4 Ǝsuǝ ani ku Lɛwɔnɔ lɔni ete nkpe fe kase kusubebe kɔni hã nkpe mi nya ini nko eso Onanto lékpadi mi nɛ. 5 Onamute ɔni ku bofokanɔ bɔni ku ntuflǝsǝflǝsǝ eto lekpa lɔni tsya ete nkpe. 6 Nko ini bǝ Onamute ku Anto ɔni ete nkpe itǝ betidi ba kenke nya uyifo asa kenke eto Onamute, weeyifo keyifo kayɛ lǝ bo ǝsuǝ nya onkpe lǝ bomblɛ ǝsuǝ.
7 Nya ǝtǝsa nnya únǝ kafo útǝ bo utsyuǝ saa, akate ko kase Kristo dítǝ. 8 Nyaso Awɔnisa Kɛnkɛ eto Kukue lɛtɛyi nkǝ,
“Se óbe úsu kato fanlofanloo,
ókpa mba kpǝ úlǝkǝ utsyiko lǝ sidomu ǝsuǝ úsuko.
Nya úsie ǝtǝsa útǝ betidi.”
9 Nya se bátɛyi bǝ óbe úsu kato fanlofanloo, nnya kasɔ nkpǝ? Nnya kasɔ ni bǝ tutɛɛ, ɔ́yifǝ úbǝ taa kawunsiǝ kamfo eto kasɔ ke. 10 Nya utidi ɔni ǝmǝ lɛyifǝ úbǝ kasɔɔ, wǝ ke disi óbe úsu kato fanlofanlo nɛ, oso utsyuǝ saa nya ófo unsi lǝ lesa saa ǝsuǝ lǝ kato ku kasɔ kenke. 11 Wǝ ni nwǝ dísie ǝtǝsa útǝ utidi saa nya úlǝkǝ bǝtsyuǝ báfiani batɔnkpe nya bǝtsyuǝ tsya lefiani bǝnyɛlǝkǝtidi, nya bǝtsyuǝ tsya lefiani mba laabe Ditiki Sɛɛ nǝmǝ letsya, bǝtsyuǝ ni mba laalɛ bafokanɔfɔ ola, nya bǝtsyuǝ lefiani bateasa. 12 Úsie ǝtǝsa nyamfo útǝ nkǝ lǝ ufi ɔlɔ Onanto eto betidi utsyǝ bǝ lǝ ufi ɔlɔ bafokanɔfɔ utsyǝ lǝ beyifo wǝ keyifo, nya yɛkɔ ku nyamfoo, lǝ ufi ǝsuǝale okpe Kristo eto ǝsuǝ nnya ni bafokanɔfɔ eto ditsyukpa nǝmǝ. 13 Onanto éyifo nyamfo nkǝ lǝ bomblɛ lǝ bubǝ buyifo bani lǝ nnya bofo bɔnɔ ǝsuǝ, ku lǝ bubǝ bote Onanto eto Ubi ǝmǝ. Lǝ bubǝ bobe bɔflɔ butsyǝ fe Kristo nya lǝ wǝ ditsyǝbi nǝmǝ kenke lǝ leba didufǝ bo lǝ ǝsuǝ butsyǝ fe wǝ ke.
14 Nya boensi embutsyǝ fe bekpefi ba eto nsusu dímambe, ba asatete fɔfɔ saa nte fǝ ufiebi wǝ laasɔ keke mǝ kesuko sɛtɔ ku kama, nya bidiabidia eto bateasa laawɛ mǝ kakpe lǝ mǝ nsusu bua ǝsuǝ. 15 Lǝ nyamfo eto kɛnyɛ, bǝ lǝ bɔtɛyi ɔnukualɛ lǝ lelabi ǝsuǝǝ, bubǝ bobé lǝ kusu saa ǝsuǝ fe Kristo wǝ nwǝ ni bo disi. 16 Wǝ lɛkɔbe utidi eto uyi ǝmǝ kenke eto ntsyakɔ ku kate kenke ɔnlɛ ɔni, itǝ bǝ utidi eto uyi ǝmǝ kenke eeyifo keyifo lǝ kusu ǝsuǝ, kabé kaflɔ kawunsǝ lǝ lelabi ǝsuǝ.
Bisiǝ Nkpǝ Fe Onanto Eto Bebi Seka.
17 Nlɛ mi kɔlɛ bɔlɛ lǝ Bonamute eto diye ǝsuǝ minkǝ biensisiǝ nkpǝ fe mba lenyi Onanto, ini asa bimba hã eto disi beebu. 18 Nya mǝ nsusu nkpe lǝ ketuntu ǝsuǝ. Nya bǝmbǝ kedikɔ saa lǝ Onanto eto nkpǝ bo wǝǝtǝ ǝsuǝ, itsyise benyi nnya kulesa kon tsya, nya bankpe letotidi. 19 Benyi kofani nyaso asa buayifoyifo eto kama hã bǝǝtǝkǝko. Nya baasɛsǝ ǝnǝmi lǝ asa nnya laabiasǝ ǝsuǝ eto sinǝ saa eto buyifo ǝsuǝ.
20 Bebe, inni nyamfo eto okle békase bitsyi lǝ Kristo ǝsuǝ. 21 Mɔ éfi nnya minkǝ bɛnɔ asa itsyi lǝ wǝ Ditiki Sɛɛ nǝmǝ ǝsuǝ. Nya fe mba ntǝkǝko wǝ kamaa, báte mi ɔnukualɛtiki nnya nkpe lǝ Yesu ǝsuǝ. 22 Beyani ditsyǝbi koko eto nkpǝ bo bísiǝ, nǝ dítǝ bísiǝ nkpǝ bo eto okle bísiǝ léfe. Asa nyamfo díkawɛ mi kakpe nya bíkǝtǝkǝko ǝsuǝ eto sinǝ eto eyifosa eto nkpǝ bo laabiasǝ utidi eto nkpǝ. 23 Bɛtsyi mi ketu ku nsusu bɛwuninsǝ lǝ biyifo bafɔfɔ. 24 Nya bifi ditsyǝbi fɔfɔ nǝ béyifo lǝ Onanto eto ditsyǝbi ǝsuǝ nya weeyifo asa lǝ kusu ko diyifo kɛnkɛ bekpe fe awu.
25 Nyaso bɛyɛ sidia bɔtɛyi. Utsyuǝ saa tɛyi wǝ ɔyimitsyuǝ ɔnukualɛ itsyise bo nti eto utsyuǝ saa lɛkɔ buyifo Kristo eto ǝsuǝ. 26 Lǝ ǝnyǝ ɔblɔɔ, mǝntǝ lǝ fǝ ɔblɔ ǝmǝ lǝ okpa fǝ okpe lǝ lebua ǝsuǝ nya mǝntǝ lǝ kofe lǝ kudufǝ fǝ diyo ku ɔblɔ. 27 Biǝntǝ Obonsam kusu saa. 28 Utidi wǝ leeyuu, sinkli ɔyɛ buyu lǝ ufi wǝ ani uyifo keyifo sɛɛ lǝ ɔkɛ lesatsyuǝ nǝ ofo bufi kawunsǝko bakombo.
29 Biǝntǝ lǝ ditiki bua saa lǝ lɛbɔ ditsyi lǝ mi kɛnyɛ, bomu bidi etiki nnya lɔɔwunsǝko utidi lɔ wǝ utsyǝ, lǝ iyifo lɛwunsǝkobi itǝ mba lɛnɔ nnya. 30 Bienyifo kulesa nǝ lembutǝ Lɛwɔnɔ Kɛnkɛ nyǝ disuǝyuǝ. Itsyise Lɛwɔnɔ Kɛnkɛ befi bǝtsyǝ mi lekpo nǝ lete bǝ nǝ Onanto ebofo mi lǝ nkpǝ lǝ diyi fɛfɛ nǝmǝ ǝsuǝ. 31 Biǝntǝ lefonfi lɛkɛ lǝ mi ǝsuǝ, bilǝkǝ ɔblɔ kekleke ku lefonyi bitsyiko lǝ mi akɔɛsi. Bilǝkǝ lǝ mi nti kudukpokpo bimba, betidi eto diebiasǝbiasǝ ku nsusu bua saa kenke fifi lǝ utidi ǝsuǝ. 32 Lǝ nnya kɛnyɛɛ, bitǝ lǝ mi bǝtsyuǝ eto asa lǝ ɛlɛ mi kaminsǝ lǝ biyifo kafo ɛkpɛ bitǝ bǝtsyuǝ. Bifi abua bɛtsyɛ bǝtsyuǝ fe kase Onanto tsya dífi mi ale ɔ́tsyɛ mi ɛyɛ lǝ Kristo ǝsuǝ.