1 Se biyifo Onanto eto bebi lala esoo, ele bǝ bekplatsya lǝ bitsyǝ fe wǝ. 2 Bilǝkǝ lelabi bete lǝ mi nkpǝsiǝsiǝ ǝsuǝ fe kase Kristo laala bo nya úfi wǝ ǝsuǝ fe kedi ka laanyi fififi útǝ Onanto lǝ bo disi. Nyamfo eyifo keditǝtǝ ka laakpe Onanto disuǝyuǝ.

3 Se biyifo Onanto eto betidi esoo, yensile bǝ bakpo sɛsɔnɔdi ku asinsayifoyifo saa nye kunǝkpǝ eto diye ko lǝ mi nti. 4 Nko ke yensile bǝ bɔtɛyi kulesa butsyiko lǝ asinsa ǝsuǝ ku akɔɛnsa nye amumusa ǝsuǝ. Bomu ele bǝ bufi lɛninsɔ butǝ Onanto. 5 Itsyise mi kosate yi biǝ utidi wǝ kee ni ɔsɔnɔdi nye leeyifo asinsa nye nkpe kunǝkpǝǝ, embunyǝ kedikɔ lǝ Kristo ku Onanto eto sekakedikɔ kǝmiǝ. Lǝ ɔnukualɛ ǝsuǝǝ, kǝnǝnsɛ lǝ asa ǝsuǝ akateko sifiǝsumu.

6 Biǝntǝ lǝ kuutsyuǝ saa lǝ ɔwɛ mi okpe ku etiki bimba saa, itsyise asa nyamfo eto kakle eso Onanto eto lefonyi looba lekpo lǝ mba nkpe letotidi ǝsuǝ nɛ. 7 Nyaso mi ku mǝ mamfloma ani bǝtsyuǝ lǝ mǝ eyifosa ǝsuǝ.

8 Itsyise kɔɔ, bɛkɛ lǝ ketuntu ǝsuǝ, fɛɛ mɔmɔɔ, se bíkafiani Bonamute eto betidi esoo, bifi bekpe lǝ diyǝnde ǝsuǝ. Nyaso bisiǝ nkpǝ fe betidi ba nkpe lǝ diyǝnde ǝsuǝ, 9 itsyise awɔnsa nnya laabɔ ketsyi lǝ betidi ba nsi nkpǝ lǝ diyǝnde ǝsuǝ ni asa sɛɛ buyifo, asa buyifo lǝ kusu ǝsuǝ ku ɔnukualɛ tɛyitɛyi. 10 Bekplatsya lǝ bekase asayifoyifo nnya laakpe Bonamute disuǝyuǝ. 11 Biankɔ ani ku mba eto eyifosa nsi nyɛ lǝ ketuntu nnya laambɔ awɔnsa saa ǝsuǝ. Bomu bilǝkǝ mǝ bete. 12 Itsyise iyifo afanisa tinti bǝ bedi etiki itsyiko lǝ eyifosa nyamfo eto okle ǝsuǝ lǝ kabiɔbiɔ ǝsuǝ kula tsya. 13 Nya lǝ bǝlǝkǝ asa nyamǝ kenke lǝ diyǝnde ǝsuǝ batée, ete boonyǝ mǝ ditsyǝbi nǝmǝ kosate wuee nɛ. 14 Itsyise lesa saa nǝ bǝlǝkǝ batee lekplee, aabɔ bǝǝnyǝ lǝ diyǝnde ǝsuǝ. Nyamfo eso baatɛyi bǝ,

15 Nyaso bebe sinini kase binsi nkpǝ. Biǝnsiǝ nkpǝ fe betidi ba lenyi kobe. Bomu bisiǝ nkpǝ fe betidi ba nyi kobe. 16 Biyifo kusu ko ditu mi mfo eto keyifo kukɔnɔ, itsyise asa buayifoyifo lǝ lefe nǝ bonkpe mfo ǝbǝ ebe kato tinti. 17 Le nyasoo, bienyifo mi ǝsuǝ fe betidibuki. Bomu bɛbɛbɛ lǝ bete asa nnya Bonamute ǝmǝ laala nkǝ biyifo. 18 Biǝnnǝ nte bikpǝ itsyise nyamfo akpe mi lǝ abuayifoyifo ǝsuǝ. Bomu bitǝ lǝ Lɛwɔnɔ Kɛnkɛ lǝ lefo disiǝ lǝ mi kenke. 19 Nya bifi Awɔnisa Kɛnkɛ eto Kukue eto ǝsǝ eto etiki, ku atɛsɛ eto ǝsǝ, ku bofokanɔ eto ǝsǝ bidinko mi bǝtsyuǝ etiki. Nya bifi atɛsɛ eto ǝsǝ ku ǝsǝ minimini bɛtɛsǝ Bonamute lǝ mi akɔɛsi. 20 Bɛsɔ Boanto Onanto ani lefe saa lǝ lesa saa ǝsuǝ ɛyɛ lǝ Bonamute Yesu Kristo eto diye ǝsuǝ.

21 Bebokosǝ mi ǝsuǝ kasɔ bitǝ bǝtsyuǝ fe kase biebu Kristo seka.

22 Besio bokosǝ mǝ ǝsuǝ kasɔ bǝtǝ mǝ kosate eto bǝsǝ fe kase baabokosǝ ǝsuǝ kasɔ kǝtǝ Bonamute ǝmǝ. 23 Itsyise usǝ ni disi utǝ usiǝ fe kase bafokanɔfɔ eto ditsyukpa eto disi ni Kristo. Ditsyukpa nǝmǝ ni Kristo eto ǝsuǝ eto sinǝ nya Kristo kosate ǝmǝ ni se Ofomfokǝtǝ. 24 Lǝ nyamfo esoo, fe kase bafokanɔfɔ eto ditsyukpa nǝmǝ lebokosǝ ǝsuǝ kasɔ dítǝ Kristoo, nko ke ini bǝ bǝsiǝ tsya bokasǝ mǝ ǝsuǝ kasɔ bǝtǝ mǝ bǝsǝ lǝ lesa saa ǝsuǝ nɛ.

25 Bǝsǝ, bela mi bǝsiǝ fe kase Kristo léla bafokanɔfɔ eto ditsyukpa nǝmǝ nya úfi wǝ nkpǝ útǝ lǝ ni disi seka. 26 Úyifo nyamfo lǝ ufi uyifo bafokanɔfɔ eto ditsyukpa nǝmǝ kɛnkɛ utǝ Onanto lǝ lefe nǝ eto lefe úflǝ ni ku wǝ ditiki fe ntu ókpasǝ. 27 Waanla nkǝ keni kukǝtsyuǝ saa lǝ kǝlǝ ni kukalebe saa lǝ kakpɔtsyi, nye lǝ keni kukǝtsyuǝ saa eto okle lǝ kǝtǝkǝ lǝ ni. Ola nkǝ lǝ bafokanɔfɔ eto ditsyukpa nǝmǝ lǝ diyifo kɛnkɛ, bǝnnyǝ kabiakɔ saa lǝ ni. Lǝ balɔkɔsǝ ni kukɔnɔ fɛ befi ni babɔnko lǝ wǝ ǝnǝmi. 28 Mmǝ ke ele bǝ bǝsǝ la mǝ bǝsiǝ fe kase baala mǝ kosate eto ǝsuǝ eto sinǝ nɛ. Nya osani wǝ laala wǝ usiǝǝ, wǝ kosate ɔnlɛ bola. 29 Kuutsyuǝ saa eenyifo wǝ ǝsuǝ eto sinǝ disiale. Bomuu, waalɛ se ola bǝ lǝ sɛkɛ ale, fe kase Kristo leeyifo kǝtǝ mba bafokanɔfɔ eto ditsyukpa nǝmǝ. 30 Itsyise wǝ ǝsuǝ eto lekpa buni butǝ wǝ. 31 Fe kase Awɔnisa Kɛnkɛ eto Kukue lɛtɛyi nkǝ, “Lǝ nyamfo eso osani du lǝ wǝ anto ku ambe ɔflɔ usu ɔkɔ ku wǝ usiǝ nya mǝ inuǝ bamǝ loofiani ǝsuǝ eto sinǝ sɔni.” 32 Kasɔnɔnɔ ka letsyoo, abiɔ kakpe lǝ ditiki nǝmfo kǝmiǝ. Mɔ éfi nnya fe Kristo ku bafokanɔfɔ eto ditsyukpa ǝsuǝǝ, banlɛ etiki budi ketsyiko. 33 Fɛɛ ɛlɛ etiki budi ketsyiko lǝ fintsya ǝsuǝ. Nya ni bǝ, ele bǝ mi utsyuǝ saa la wǝ usiǝ fe wǝ ǝsuǝ, nya usiǝ saa tsya lǝ ubu wǝ usǝ.