Susulak fee hataholi
Ibrani
fo bei fo laꞌo ela sila bei-baꞌi nala anggama nala fo lamahele neu
Yesus Karistus
1
Manetualain haitua Ndia Anan so fo koasan lena heni neme Ndia mana kokola nala mai
1 Makahulun ele, Manetualain pake Ndia mana kokola nala, fo kokolak lo ita bei-baꞌi hataholi Ibrani la.*a: Dedeꞌa deꞌe Ibrani ia, nade feꞌen neu hataholi nusa Yahudi. Hataholi Yahudi kamahelek neu Yesus Karistus, na hataholi lae, “hataholi Salani Ibrani”, huu ala feꞌe so, leme sila tolanoo Yahudi fo bei toꞌu heti-heu anggama Yahudi laak ndia. Ana pake dalak mata-mata kala fo kokolak laꞌi noꞌuk no sala.†b: Manetualain nafada Ndia hehelu nala nenik dala mata-matak. Conto leo: Ana nafada Abraham nenik heheluk, neu Musa pake heti-heu anggama, neu Dauk nenik sosoda koa-kiok, neu Yeremia pake nakandandaak. 2 Tehuu hatematak ia Ana haitua Anan mai so, fo Ana kokolak no ita, ta pake mana kokola feꞌek.
Neme sososan mai, Manetualain hele nala Ndia Anan ia so,
fo palenda noꞌu no Ndia.
Faik fo Ana nakadadadik lalai no daebafok, no basa isi nala,
Ndia Anan ia boe oo, tao noꞌu no Ndia.
3 Manetualain Anan ia, natudu Ndia Aman mandela-masaꞌan,
sama leo ledo saꞌan nasafali neme titilok mai.
Huu Ndia mata-aok esa leo Ndia Aman.
Ma Ndia pake Dedeꞌa-kokolan fo koasan ana seli,
fo nakalalaꞌok basa manai lalai ma daebafok.
Ndia boe oo soi dalak,
fo koka heni hataholi la sala-singgo nala,
fo ela ala dadik malalaok.
Basa de Ana neni nusa-sodak neu,
fo nanggatuuk neu Manetualain boboa konan,
nai mamana nana hadak nalan seli.
Manetualain Anan fo koasan manai lain seli, lena heni ata nusa-sodak
4 Manetualain ata nala manai nusa-sodak memak ana seli. Tehuu Ndia Anan, manai lain seli, lena heni sila basa sala. Manetualain panggan ndia, deman seli. Ana fee Ndia pangga hehelin neu Ndia Anan. Huu ndia de Ndia Anan, lena heni Ndia ata malai nusa-soda nala.
5 Manetualain kokolak nitak neu Ndia Anan nae,
“faik ia, Au soꞌu ala O toꞌu palenda.”✡Sosoda Koa-kio kala 2:7
Manetualain boe kokolak nae,
“Au ia, Ndia Aman.
Ma Ndia ia, Au Anang.”✡2 Semuel 7:14; 1 Israꞌel no Yahuda Tutuin 17:13
Manetualain kokolak memak leondiak, laꞌeneu Ndia Anan, tehuu Ana ta kokolak nitak leondiak, laꞌeneu Ndia atan malai nusa-sodak.
6 Faik fo Manetualain haitua Ndia Anan mai fo koasan manai lain seli ndia, na Ndia boe oo palenda Ndia ata manai nusa-sodak nae,
“Wei! Ata nggalei!
Ei musi miu fee hada-holomata,
ma makaluku-makatele neu Au Anang dei!”✡Tui Seluk laꞌeneu Dala Sodak 32:43; Lukas 2:13-14
7 Manetualain boe oo kokolak laꞌeneu Ndia ata manai nusa-sodak nae,
“Au tao Au ata nggala malai nusa-sodak,
sama leo ani makaluluuk.
Au tao Au ata nggala,
sama leo haꞌi.”✡Sosoda Koa-kio kala 104:4
Manetualain kokolak leondiak, huu sila ndia kada nana dedenuk.
8 Tehuu Ana kokolak feꞌek bali, laꞌeneu Ndia Ana hehelin nae,
“O ia, Manetualain.
Dei fo, O manggatuuk nai kadela mana palenda losa dodoon.
Dei fo O toꞌu koasa, fo palenda mua dale ndoos.
9 O dalem namahoko mita hataholi fo sodan ndoos.
Tehuu O dalem hedis mita hataholi fo sodan pepeko-papakik.
Huu ndia de O dalem namahoko,
de Au diꞌa mina neu O langgam,
fo soꞌu O dadi Manek, lena heni feꞌe kala.”✡Sosoda Koa-kio kala 45:7-8
10 Manetualain boe kokolak neu Ndia Anan nae,
“Ana nggo ei!
O ia Lamatuak, fo palenda muma makahulun mai.
O ia, madenu lalai dadi memak.
O ia, palenda daebafok dadi memak.
11-12 Dei fo lalai ma daebafok lakalulutuk heni sala.
Dei fo lalai ma daebafok mopo heni sala.
Tehuu O mesa nggo masoda makandondoo henin.
Dei fo O mbia heni lalai ma daebafok,
sama leo hataholi mbia heni baloꞌa sidak.
Dei fo O tao nggati lalai ma daebafok,
sama leo hataholi nggati baloꞌa papake beuk.
Tehuu O mesa nggo ta leondiak.
Huu O masoda losa dodoon neu.”✡Sosoda Koa-kio kala 102:26-28
13 Manetualain boe kokolak no Ndia Anan nae,
“Ana nggo ei!
Manggatuuk mai ia, nai mamana nana hadak nalan seli,
nai Au boboa konang ia.
Dei fo Au tao O musu mala,
losak ala loke doꞌo neu O.”✡Sosoda Koa-kio kala 110:1
Manetualain kokolak memak leondiak, laꞌeneu Ndia Anan, tehuu Ana ta kokola nitak leondiak laꞌeneu Ndia ata malai nusa-sodak. 14 Ndia ata nala memak kasosoak. Te Ana nadenu sala, leu lakaneni basa Ndia hataholi nala fo dei fo Ana nasalaꞌe nala sala leme sila sala-singgon mai. Tehuu mae leondiak boe, te Manetualain Anan, bei ana seli basa sala.
*1:1 a: Dedeꞌa deꞌe Ibrani ia, nade feꞌen neu hataholi nusa Yahudi. Hataholi Yahudi kamahelek neu Yesus Karistus, na hataholi lae, “hataholi Salani Ibrani”, huu ala feꞌe so, leme sila tolanoo Yahudi fo bei toꞌu heti-heu anggama Yahudi laak ndia.
†1:1 b: Manetualain nafada Ndia hehelu nala nenik dala mata-matak. Conto leo: Ana nafada Abraham nenik heheluk, neu Musa pake heti-heu anggama, neu Dauk nenik sosoda koa-kiok, neu Yeremia pake nakandandaak.
✡1:5 Sosoda Koa-kio kala 2:7
✡1:5 2 Semuel 7:14; 1 Israꞌel no Yahuda Tutuin 17:13
✡1:6 Tui Seluk laꞌeneu Dala Sodak 32:43; Lukas 2:13-14
✡1:7 Sosoda Koa-kio kala 104:4
✡1:9 Sosoda Koa-kio kala 45:7-8
✡1:11-12 Sosoda Koa-kio kala 102:26-28
✡1:13 Sosoda Koa-kio kala 110:1