1 Basa ndia, boe ma hambu fai malole anggama Yahudi esa. Huu ndia de Yesus asa laꞌo leni kota Yerusalem leu. 2 Nai ndia hambu kolam esa fo teras lima deka-deka no lelesu esa, fo naden Lelesu Biꞌilombo. Nai sila dedeꞌa Aram, na, kolam ndia naden ‘Batesda’.*Hambu susula dedeꞌa Yunani luma sulak ‘Betesda’, luma sulak ‘Betsata’, luma bali sulak ‘Betsaida’. Lelesu Biꞌilombo boe oo nai Nehemia 3:1, 32; 12:39. Kota Yerusalem lelesu nala noꞌuk. Lelesu feꞌe kala sosoan mata-mata kala. Makahulun ele, ala lateme pake Lelesu Biꞌilombo ia fo biꞌilombo la maso lesik ndia. 3 Hambu hataholi kamahedik noꞌu kala fo lateme lahani lai teras sila. Conto leo: hataholi mbokek, hataholi luꞌuk, ma hataholi fo taa bisa lakababalek. [Ala lahahanik ledoeik oe ndia mulai nakababalek. 4 Huu laꞌi-laꞌi esa, Lamatuak ata nusa-soda nala leni oe dale leu, fo tao oe nakababalek. Basa ndia, na, see maso nakahuluk neni oe ndia dalek neu, na, ndia ndia hai neme ndia hedin mai.]†Dedeꞌa deꞌek nai longga dale ia, taa nai susula dedeꞌa Yunani malolen nalan seli ma laak nalan seli.

5 Nai ndia hambu hataholi esa, namahedi teuk telu hulu falu so. 6 Boe ma Yesus nita ana sunggu nai ndia. Yesus bubuluk hataholi ndia namahedi dook ia so, de Ana natanen nae, “Kaꞌa aa! O hii hai, do?”

7 Ana nataa nae, “Au nau Lamatuak. Tehuu ndia dedeꞌan, na ndia: mete ma oe mulai nakababalek, na, taa hambu hataholi esa koꞌo au uni oe dale uu. Mete ma au mesa nggau soba, naa te hataholi feꞌek maso nakahuluk neme au mai so.”

8 Boe ma Yesus nadenun nae, “Mambadeik leo! Lulu mala o neneꞌim, fo fali leo.” 9 Yesus kokolak nateꞌe, boe ma hataholi ndia, hai memak. Basa boe ma ana foꞌa, de haꞌi nala neneꞌin, basa de mulai laꞌok fali.

Dedeꞌak ndia nandaa no hataholi Yahudi la fai huhule-haladoin. 10 Boe ma hataholi Yahudi la malangga nala lafada hataholi fo bei fo ana hai ndia lae, “Wei! O bubuluk do taa? Leledon ia, fai hahae tao ue-ledis. Tungga ita anggaman heti-heun, na, taa bole hataholi luꞌa neni neneꞌin, huu ndia naden tao ues!”✡Nehemia 13:19; Yermia 17:21

11 Ana nataa nae, “Awii, ama sala aa! Boso mamanasa. Huu Hataholi mana tao nahai au ndia, palenda au nae, ‘Lulu mala o neneꞌim, fo fali leo.’ ”

12 Basa de latanen lae, “Heeh! Mana madenu o fo haꞌi mala o neneꞌim ndia, na, see?”

13 Tehuu hataholi fo bei fo hai ndia, taa nalelak Yesus ndia na see. Yesus kalua no neneek, huu hataholi noꞌu kala lai ndia.

14 Taa dook, boe ma Yesus natonggo no hataholi ndia neme Uma Ina Huhule-haladoik pasan. Boe ma Yesus nafadan nae, “Mamanene, baa! Hatematak ia o hai so. Boso tao salak bali, fo suek o boso hambu huhuku mabela lena ia bali.”

15 Boe ma hataholi ndia neu sangga hataholi Yahudi la malangga nala, suek nafada sala nae, “Mana tao nahai au ndia, na, Ndia naden Yesus.” 16 Huu ndia de ala mulai tao doidoso Yesus, huu Ana tao nahai hataholi, nandaa no fai huhule-haladoik.

17 Tehuu Yesus nafada sala nae, “Leoiak. Au Amang taa hahae nalelak tao ues. De Au boe oo tao ues akandoo.”

18 Huu hataholi Yahudi la malangga nala cap so lae, Yesus laꞌolena sila heti-heu fai hahae tao ues, de ala lambue sangga dala manggalauk nalan seli, fo nau tao lisa Ndia. Nakalenak bali, Ndia boe oo nafada nae, Manetualain, na, Ndia Aman. No kokolak leondiak, na, Ana soꞌuk Ndia aon sama leo Lamatuak.

19 Basa de Yesus nafada sala nae, “Tetebes! Au afada memak ae, Au taa bisa tao hata esa boe neme Au aoina heheling mai. Huu Au ia, Manetualain Anan. Huu ndia de kada Au bisa tao tungga hata fo Au ita Amak taon. Au ita Au Amang tao hata, na, Au boe oo tao tungga leondiak. 20 Au Amang nai nusa-sodak sue Au nalan seli, fo Ndia Anan. Ndia boe oo natudu Au basa hata fo Ana tao kala. Dei fo Ana nau natudu Au dedeꞌa kala ia fo inahuuk nalan seli bali, fo suek ei mita, ma ei heran malan seli! Leoiak: 21 Au Amang tao nasoda falik hataholi mana matek. Leondiak boe, dei fo Au fee sodak tetebes neu sudi see, tungga Au hihiing. 22 Teteben, leoiak: Amak mesa kana taa naketu huhukuk neu hataholi. Tehuu Ana fee basan neu Au, huu Au ia, Ndia Anan. Boe ma Au ndia aketu ae, hataholi tao ndoos, do taa. 23 Au Amang nahiik fo basa hataholi la fee hada-holomata leu Au, sama leo basa hataholi la fee hada-holomata leu Ndia. Huu hataholi taa mana fee hada-holomata neu Au, fo Ndia Anan ia, na, ndia boe oo taa fee hada-holomata neu Amak fo mana madenu Au so.

24 Tetebes! Au afada memak. Hataholi mana mamanene Au kokolang, ma namahele neu Manetualain fo mana madenu Au, na, ana hambu soda tetebes fo taa namaketuk. Lamatuak taa huku ndia bali. Huu hataholi ndia, taa hambu huhuku mate bali, tehuu ana maso dadik hataholi mana masoda nakandoo no Lamatuak. 25 Tetebes! Au afada memak. Ndia fain deka-deka mai, mulai neme hatematak ia so, fo hataholi kamate kala lamanene Au halang. Au fo ndia Lamatuak Anan. Huu hataholi fo namanene ma simbok no malole Au kokolang ia, dei fo ana hambu soda tetebes. 26 Basa kasoda kala laoka lai Au Amang. Ndia boe oo fee Au soda tetebes. Huu Au ia, Ndia Anan. 27 Au Amang boe oo fee Au haak ma koasa, fo aketu basa hataholi la huhuku nala, huu Au ia, Hataholi Isi-isik. 28 Ei boso heran, huu doo-doo ana, basa hataholi mana mate kala lamanene Au halang. 29 Boe ma dei fo ala lasoda fali. Basa de, ala kalua leme late sala mai. Hataholi fo makahulun tao dedeꞌa malole, hambu soda tetebes, fo taa hambu namaketuk. Tehuu hataholi fo makahulun ana tao manggalauk, na, nana hukuk nakandoo.”✡Daniel 12:2

30 Yesus kokolak nakadaik nae, “Au taa bisa tao hata esa boe, mete ma Au bei ta amanenen neme Au Amang mai. Mete ma Au amanene basa so, bei fo Au aketu hataholi la dedeꞌa nala. Huu ndia de hata fo Au aketun ndia, tetebes. Huu Au taa kada soba tungga Au hihii-nanau heheling, tehuu tungga Au Amang hihii-nanaun. Huu Ndia ndia nadenu Au!

31 Mete ma Au mesa nggau afada laꞌeneu Au aoina heheling, na, Au kokolang ndia taa tetebes. 32 Tehuu hambu hataholi feꞌek dadik sakasii laꞌeneu Au. Ma Au bubuluk sila kokola nala ndia tetebes laꞌeneu Au. 33 Ei madenu mitak hataholi, fo neu natane Yohanis Mana Salanik. Boe ma ana kokolak tetebes laꞌeneu Au.✡Yohanis 1:19-27; 3:27-30 34 Au mesa nggau taa paluu hataholi leondiak fo sakasii laꞌeneu Au. Tehuu Au tao asanenedak dedeꞌa kala ia, fo suek ei bisa hambu nasalalaꞌek mima ei sala-singgo mala mai. 35 Yohanis kokolan ndia, leo bali banduk mana mbila manggaledok. Faik fo mbilan bei manggaledok, na, ei dale mala lamahoko.

36 Naa te, Hataholi fo ana selin lena heni Yohanis fo Ana kokolak tetebes laꞌeneu Au. Na ndia Au Amang nai nusa-sodak fo fee Au ues noꞌuk, suek Au akalalaꞌok losa basan. Ue sala ia, natudu buti nae, Amak nadenu Au. 37 Ma Ndia ndia nadenu Au, fo kokolak tetebes laꞌeneu Au. Ei mesa nggei bei ta mamanene makandoon mitak Ndia halan, do mita makandoon Ndia mata-aon.✡Mateos 3:17; Markus 1:11; Lukas 3:22 38 Lamatuak Dedeꞌa-kokolan taa nasoda nai ei dale mala, huu ei taa mamahele neu Au, fo Ana nadenu Au. 39 Ei mateme palisak lutu-lutuk Lamatuak Susula Malalaon, huu ei duduꞌa mae nai ndia dei fo ei matonggo mia dalan, suek hambu sodak tetebes fo taa namaketuk. Naa te Susulak sila, lafada laꞌeneu Au. 40 Tehuu ei taa nau mini Au mai, fo maso dadik neu Au hataholing, suek ei hambu soda tetebes fo taa hambu namaketuk.

41 Au taa paluu fo hataholi sosoꞌuk Au. 42 Tehuu Au bubuluk tebe-tebe ei dale mala. Huu ndia de Au bubuluk ae, ei taa maena dale susuek neu Manetualain. 43 Au uni daebafok ia mai, huu Au Amang toꞌu koasa, de nadenu Au mai. Tehuu ei taa simbok Au. Naa te mete ma hataholi feꞌek mai fo pake ndia koasa hehelin, na, ei simbo kana no malole. 44 Ei esa-esak hii nana koak. Tehuu ei taa mbali, mete ma Manetualain koa ei, do taa. Naa te Ndia ndia, Lamatuak! Taa hambu seluk so bali. De mete ma ei taa mbali Ndia, na, talobee fo ei bisa mamahele neu Ndia?

45 Boso duduꞌa mae, Au ndia soli salak neu ei, nai Au Amang matan. Taa. Mana soli salak neu ei ndia, na, ndia baꞌi Musa. Naa te, ei mamahehenak neu ndia, huu ndia ndia fee ei Lamatuam Heti-heun. 46 Mete ma ei mamahele tebe-tebe neu Musa, na, neu ko ei mamahele neu Au. Huu ndia sulak laꞌeneu Au. 47 Tehuu, huu ei taa mamahele tebe-tebe laꞌeneu hata fo ana sulak, talobee fo ei nau mamahele hata fo Au kokolang ia? Taa bisa hetu!”