1 Tehuu Yesus neni lete Setun lain neu. 2 Neu foꞌa fafain, boe ma Ana maso neni Uma Ina Huhule-haladoik pasan neu. Hataholi noꞌu kala mai lakabubua lo Ndia. Boe ma Ana nanggatuuk, de mulai nanoli sala.

3 Faik ndia, hambu inak esa nana humu nalak neu ledoeik ana hohongge. Boe ma mese anggama hida, ma hataholi Farisi hida hela lon neni Yesus neu. Ala lakaseti inak ndia nambadeik neu sila basa sala matan. 4 Boe ma lafada Yesus lae, “Ama Mesen. Ala humu lala inak ia, neu ledoeik ana hohongge. 5 Tungga baꞌi Musa heti-heu nala, na, hambu palenda nae, ‘Hataholi mana hohongge, na huhukun ndia, musi mbian losa maten.’ Tungga Lamatuak, na, leobee?”✡Malangga Anggama la Heti-heun 20:10; Tui Seluk laꞌeneu Dala Sodak 22:22-24 6 Ala sangga soba ika Ndia, fo bisa soli salak te sangga tao latuda Ndia.

Yesus taa nataa nakandoon, tehuu Ana nakatele de sulak neu dae, nenik Ndia lima kuꞌun. 7 Ala latane Ndia lakandondoo henin. Boe ma Ana nambadeik, de nafada sala nae, “Leoiak. Mete ma hambu neme ei mai taa tao nitak salak, na, ndia ndia mbia batu kaesan, fo huku inak ia.” 8 Boe ma Ana nakatele seluk bali, de sulak nakadaik neu dae.

9 Ledoeik lamanene Ndia kokolan ndia, de ala mae. Huu nai sila dale nala, ala bubuluk lae, sila boe tao litak salak. Basa de ala latanggelak esa-esa, mulai neme lasik losa mulik. Doo-doo boe ma ela kada Yesus no inak ndia mesa kasa lai mamanak ndia. 10 Boe ma Yesus nambadeik bali, de natane nae, “Heeh? Ala lai bee? Taa hambu hataholi feꞌek nai ia, sangga soli salak fo huku o do?”

11 Boe ma ana nataa nae, “Taa Ama.”

Basa de Yesus nafadan nae, “Au boe oo taa nau huku o. De, fali leo. Tehuu masanenedak. Boso tao salak bali!”]*7:53—8:11 Susula Malalaok dedeꞌa Yunani fo laak nalan seli ma malolen nalan seli taa sulak tutuik ia. Abad kasanahulun, bei fo tutuik ia sadu nai susula dedeꞌa Yunani

12 Boe ma Yesus kokolak bali no hataholi noꞌu kala sila nae, “Au ia, sama leo manggaledok neu hataholi daebafok ia. Hataholi mana tungga Au, taa nasoda nai makiuk, tehuu ana leo nai manggaledok fo maneni soda ndoos.”✡Mateos 5:14; Yohanis 9:5

13 Hambu hataholi Farisi luma sapa lae, “Wei! O nau dadik sakasii laꞌeneu o aoina hehelim do? Taa bisa! Huu tungga ai heti-heun, na, musi hataholi feꞌek dadik sakasii neu hataholi esa, tehuu, hataholi ndia taa mesa kana. De ai taa nau simbok, ma taa nau mamahele.”✡Yohanis 5:31

14 Yesus nataa nae, “Leoiak. Ela Au dadik sakasii neu Au aoina heheling, tehuu Au kokolang ndia, tetebes. Huu Au mesa nggau bubuluk ma no teteben, Au uma bee mai, ma sangga bee uu. Ei boe oo taa bubuluk Au uma bee mai, ma taa bubuluk dei fo Au sangga uni bee uu. 15 Ei timba-tai hataholi tungga dae-bafok uꞌukun. Tehuu Au taa pake dae-bafok uꞌukun fo timba-tai hataholi esa boe. 16 Mete ma Au timba-tai hataholi, na, Au uꞌukung ndia tetebes. Huu Au taa mesa nggau timba-tai, tehuu Au tao basan sama-sama ua Au Amang mana madenu Au. 17 Boso lilii henin. Huu nana sulak nai ei heti-heu anggamam, nae, ‘Mete ma hambu hataholi dua sakasii fo kokola nala sama, na, dedeꞌak ndia tetebes.’ 18 De taa kada Au mesa nggau fo dadik sakasii laꞌeneu Au aoina heheling. Huu Au Amang fo nadenu Au boe dadik neu sakasii fo kokolak laꞌeneu Au.”

19 Ala latane lae, “Te O Amam ndia, nai bee?”

Boe ma Yesus nataa nae, “Ei taa malelak tetebes neu Au. Ei boe oo taa malelak Au Amang. Huu mete ma ei malelak tebe-tebe Au, na, neu ko ei boe malelak Ndia.”

20 Basa ia, Yesus nafada neu faik Ana nanoli neme Uma Ina Huhule-haladoik, dekak no mamanak fo ala paken fo nakaduduluk kolete. Taa hambu humu Ndia, huu ndia fain bei taa nandaa.

21 Yesus kokolak nakadaik neu sala, nae, “Dei fo Au laꞌo ela ei, fo uni mamanak feꞌek uu. Dei fo ei masanggak Au, tehuu taa hambu Au. Huu ei taa maena haak mini mamanak ndia miu. Boe ma dei fo ei mate, na, ei bei lemba mahele ei sala mala.”

22 Basa de, hataholi Yahudi la malangga nala latatane aok esa no esa lae, “Ana kokolak hata ia? Ana sangga hala aon do? Huu Ana nae, ‘Ei taa bisa mini mamanak ndia miu.’ ”

23 Boe ma Yesus nafada sala nae, “Ei mima daebafok mai. Tehuu Au uma lalai mai. Ei, fo hataholi maneme daebafok ia mai. Tehuu Au taa uma daebafok ia mai. 24 Huu ndia de isinaak Au afada ae, dei fo mete ma ei mate, na, ei bei lelembak ei sala mala. Huu mete ma ei taa mamahele mae, Au ia, ndia Karistus, fo Lamatuak haituan mai so, dei fo mete ma ei mate, na, neu ko ei bei lelembak ei sala-singgo mala.”

25 Boe ma ala latane lae, “Wei! Tehuu, O ia see?”

Yesus nataa nae, “Au afada memak neme makasososan mai so.†Dedeꞌa Yunani nai ia, sosoa-ndandaan dua. Esak, fo ndia: ‘Au afada mema kana neme sososan mai.’ Esa bali, na ndia: ‘Hatina de Au sangga kokolak neu ei?’ 26 Hambu dedeꞌak noꞌuk, fo Au bisa afada laꞌeneu ei. Ei sala mala boe noꞌuk. Tehuu Au taa atudu dedeꞌa kala sila. Mana madenu Au uni mamanak ia mai, mete ma Ana kokolak, na, kada Ana kokolak ndoos. Ma Au kada afada hataholi daebafok ia, dedeꞌa kala fo Au amanene neme Ndia mai so.” 27 (Ndia maksud, Ndia Aman nai nusa-sodak. Tehuu ala taa lalelak Ndia maksud.)

28 Boe ma Yesus kokolak nakadaik nae, “Dei fo mete ma ei londa heni Au Hataholi Isi-isik ia, nai ai ngganggek lain, bei fo ei bubuluk, mae, Au ia, ndia Karistus. Ma Au taa tao hata-hata neme Au mesa nggau mai, tehuu kada Au anoli dedeꞌa kala fo Amak manai nusa-sodak nanoli Au so. 29 Mana madenu Au boe oo, sama-sama no au nakandondoo henin. Ana taa mboꞌi nitak Au mesa nggau, huu Au tao tungga Ndia hihii-nanaun taa-taa.”

30 Faik fo Yesus nafada basa dedeꞌa kala ia, boe ma hambu hataholi noꞌuk lamahele leu Ndia.

31 Basa de, Yesus nafada hataholi Yahudi kamahele kala leu Ndia nae, “Mete ma ei masoda nanambaꞌak mia Au nanonoli nggala ia, ma ei manoli makandoo neme Au mai, na, ei dadik Au ana mana tungga tetebe nala. 32 Boe ma ei bisa bubuluk dedeꞌa tetebe sala. Ma dedeꞌa tetebe sala sila, tao nakamboꞌik ei, fo ei boso dadik ata bali.”

33 Boe ma ala sapa lae, “Heeh! Ai ia, taa hataholi atan! Huu ai ia, baꞌi Abraham tititi-nonosin! Hatina de O kokolak mae, dei fo ai makamboꞌik?”✡Mateos 3:9; Lukas 3:8

34 Boe ma Yesus nafada sala nae, “Au kokolang ndia, tetebes. Huu basa hataholi kasoda kala tao salak, de ala dadik sama leo ata fo kada ala tungga salak hihii-nanaun. 35 Tehuu natetemen leoiak: ata la taa lateme leo lakandoo lai uma esa. Huu kada maumak ana nala leo lakandoo lai ndia. 36 De mete ma Au fo Lamatuak Anan koka heni basa ei sala-singgo mala, na, ei kalamboꞌis ndia so, de taa dadik sala-singgo kala ata nala bali. No leondiak, na, ei kalamboꞌi tetebes, ma taa tao tungga sala-singgok hihii-nanaun bali!

37 Au bubuluk so, ei ia, fo baꞌi Abraham tititi nonosi nala. Mae leondiak boe oo, tehuu ei mambue sangga dalak fo tao misa Au, huu ei taa nau simbok Au nanonoling. Huu nai ei dale mala, taa hambu mamanak so bali, fo mbeda Au Dedeꞌa-kokolang. 38 Au afada dedeꞌa kala fo Au ita sala so, fo Au Amang natudu Au so. Ma ei tao tungga dedeꞌa kala fo ei mamanenen, neme ei ama mala mai so.”

39 Ala lataa lae, “Ai ia, baꞌi Abraham tititi-nonosin!”

Yesus nafada nae, “Mete ma ei dadik baꞌi Abraham tiititi-nonosin teteben, na, ei musi dadik conto tungga ndia. 40 Tehuu baꞌi Abraham taa tao nitak manggalauk sama leo ei tataom ndia! Huu ei mambue sangga dalak fo sangga tao misa Au. Naa te Au ia, afada ei dedeꞌa tetebes, fo Au amanenen neme Lamatuak mai. 41 Ei tataom ndia memak taa dook neme ei ama mala mai.”

Tehuu ala sapa lae, “Heeh! Ai ia, kakana tetebes! Boso mae, ai ia, kakana kanae! Huu ai Aman, kada esak, fo ndia Manetualain!”

42 Boe ma Yesus nafada sala nae, “Tehuu mete ma Manetualain tebe-tebe dadik neu ei Amam, na, neu ko ei sue Au. Huu Au uma Ndia mai, ma Au nai ia. Au taa mai tungga Au hihii-nanau heheling. Tehuu Au mai, huu Ana nadenu Au. 43 Hatina de ei taa malelak Au kokolang? Fama huu ei taa nau mamanene!

44 Ei ia, mata-aok esa mia nitu la malanggan. Huu ei mahiik tao tungga ndia hihii-nanaun! Neme makasososan mai, ndia nateme tao nisa hataholi. Ana laban dedeꞌa ndoos, huu ana timba heni basa dedeꞌa ndoos. Mete ma ana nasapepeko, na, memak ndia natetemen ndia. Huu ndia ndia, mana masapepekok, ma kokolak masapepekok huun! 45 Au ia, mana mafada dedeꞌa ndoos. Tehuu ei taa mamahele neu Au. 46 Soba! See neme ei mai bisa natudu buti nae, Au tao salak so? Heran maa! Mete ma Au kokolang ia ndoos, na, hatina de ei taa nau mamahele neu Au?

47 Hataholi neme Manetualain mai, namanene Ndia Dedeꞌa-kokolan. Tehuu ei ia, taa mima Lamatuak mai, huu ndia de ei taa hii mamanene Au.”

48 Hataholi Yahudi malangga nala lataa lae, “Weih! Ai kokolak tetebes ndia so. Huu ai kokolak so mae, O ia, taa hataholi Yahudi Isi-isik, tehuu O hataholi Samaria. O boe oo nitu nalak!”

49 Boe ma Yesus nataa nae, “Au taa nitu nalak. Au fee hada-holomata neu Au Amang nai nusa-sodak, tehuu ei taa fee hadak neu Au. 50 Au taa sosoꞌuk aok, fo atudu Au ana seli heheling. Tehuu hambu Esa fo nau natudu Au ana seling. Ela Ndia ndia naketun mete ma Au kokolang ndoos, do taa.

51 Au Dedeꞌa-kokolang, memak tetebes! Boe ma hataholi mana mamanenek ma tao tungga Au Dedeꞌa-kokola nggala, neu ko taa mate.”

52 Lamanene leondia, boe ma hataholi Yahudi malangga nala lafada Ndia lae, “Hatematak ia ai bubuluk so, O kokolam kamuluk, huu O nitu nalak so. Huu baꞌi Abraham mesa kana maten so. Lamatuak mana kokola makahulun mate sala so boe. Tehuu O mae, ‘hataholi mamanene kala, ma tao tungga Au Dedeꞌa-kokolang, na, taa sangga mate sala.’ Memak O ia mamulu so! 53 Do O duduꞌa mae, O ana seli lena heni Abraham fo maten so? Do, O lena heni Lamatuak mana kokola nala fo mana mate kala so? O duduꞌa mae O ia see?”

54 Boe ma Yesus nataa nae, “Mete ma Au sosoꞌuk Aok, na hataholi la taa nau simbok. Naa te, Au taa ndia sosoꞌuk aok, tehuu Au Amang ndia soꞌu dema-demak Au. Ndia ndia, fo ei manaku mae, Ndia dadik neu ei Manetualain. 55 Tehuu ei taa malelak Ndia. Au ndia alelak Ndia no malole. Mete ma Au ae, Au taa alelak Ndia, na, Au mana kokola pepekok, sama leo ei. Tehuu Au alelak neulalau Ndia ma Au boe oo tao tungga Ndia Dedeꞌa-kokolan. 56 Ei baꞌim Abraham dalen namahoko nalan seli, faik fo ana nahahanik fo nau nita Au mamaing. Ndia memak nita so, de ana nameda dai so.”

57 Hataholi Yahudi la malangga nala lafada lae, “O teum bei taa losa teuk lima hulu boe! Tehuu O mae mita baꞌi Abraham so. Tetebes do?”

58 Boe ma Yesus nataa nae, “Tetebes! Huu baꞌi Abraham bei ta kana, tehuu Au akahuluk memak so.”

59 Basa de hataholi la sila haꞌi batu fo sangga mbia Ndia, huu Ana soꞌuk aon sama leo Lamatuak. Tehuu Ana laꞌok nafufunik de kalua neme Uma Ina Huhule-haladoik pasan mai.✡Yohanis 5:18