1 Basa ndia, boe ma Yesus sangga laꞌo ela Uma Ina Huhule-haladoik. Ledoeik Ana kalua, boe ma Ndia ana mana tungga nala latudu Uma Ina Huhule-haladoik malolen. 2 Tehuu Ana nataa nae, “Uma ia memak malole! Tehuu mamanene baa! Taa dook bali, ala tao latuꞌu heni basa batu nala ia.”

3 Basa de, Yesus ndaꞌe neu nanggatuuk nai lete Setun. Boe ma ana mana tungga nala mai lakokola lo Ndia mesa kana, lae, “Ama! Hena mafada seluk Ama kokolam isinaak ndia. Meda Ama fafali main ndia, laꞌeneu fai hida bae? Ma ndia tanda nala, meda leo hata? Talobee boe no daebafok babasan?”

4 Basa boe ma Yesus nataa, nae, “Manea matalolole aok baa! Fo ei boso nana kedi nalak. 5 Huu dei fo hataholi mata-mata kala mai fo babamba kalak, lae, ‘Au ia Karistus, Hataholi fo Manetualain heluk ndia so neme makahulun mai.’ No leondiak, ala kedi lala hataholi noꞌuk. 6 Mete ma ei mita hataholi latati, do ei mamanene, lae, hambu natatik sudi nai bee, na, ei boso bii. Huu dedeꞌa leondiak ndia, musi dadi dei. Tehuu daebafok fai babasan bei taa losa. 7 Dei fo leo esa natati no leo feꞌek. Nusak esa natati laban nusa feꞌek. Hambu dae nanggeꞌo sudi nai bee. Ma fai ndoen boe napadaka nalan seli! 8 Tehuu basa sila, bei fo tanda makasososak fo nafada, nae, daebafok fai babasan deka-deka mai so. Ndia sama leo inak bei fo nameda tein hedis, huu ndia fai bobonggin dekak so.

9 De, ei musi manea matalolole aok baa! Huu dei fo ala tao doidoso ma tao lisa ei. Ma hataholi leme basa nusa kala dei fo husembuluk lalan seli neu ei, huu ei tungga Au.✡Mateos 10:22 10 Faik ndia, hataholi noꞌu kala heok lasadea ma taa nau lamahele Au bali. Ala lahusembuluk, ma laseꞌok esa no esa. 11 Dei fo masapepeko kala lae sila ndia, Lamatuak mana kokola nala. De hataholi noꞌu kala lamahele sala. 12 Dei fo hataholi manggalaun nala tamba faik, na, tamba lamanoꞌu, losa hataholi taa lasueao esa no esa bali. 13 Tehuu hataholi mana nakatataka nakandoo losa maten, na, neu ko Manetualain tao nasodan.✡Mateos 10:22 14 Huu hataholi musi tui-bengga Manetualain Hala Malolen, losa daebafok buꞌu nala, fo suek basa hataholi bisa bubuluk Lamatuak dala soda ndoon. Basa ndia, bei fo daebafok fai babasan mai.”

15 Yesus kokolak nakandoo, nae, “Manetualain mana kokolan Daniel sulak so, laꞌeneu hataholi esa manggalaun ana seli. Ana maso mai, fo nambadeik neu mamana lulik, nai Manetualain Uma Ina Huhule-haladoin. No leondiak, ana tao nanggenggeo mamanak ndia. Huu ndia, de, Manetualain heok nasadea, laꞌo ela mamanak ndia. Mete ma ei mita leondiak so, na, mata neuk leo baa! (See les susulak ia, na, musi bubuluk neulalau!)✡Daniel 9:27; 11:31; 12:11 16 Huu ndia dadik tanda, nae, fai-fai toꞌa-taak nai lelesu matan so. Mete ma mita leondiak so, na, hataholi manai propinsi Yudea, foꞌa malai mini letek miu leo. 17 Mete ma hambu hataholi kalua neme uman mai, na, boso fali miu haꞌi buas bali. Malai lai-lai leo, fo suek boso hambu soe. 18 Hataholi manai osi, na, boso fali fo haꞌi sidi nalusek bali. Malai makandoo leo!✡Lukas 17:31 19 Nana kasian nalan seli neu ina kailus, ma ina kala mana masusu ana mbimbilanak. Huu ala taa bisa lalaik latingga. 20 De, malolenak ei hule-haladoi fo soe ndia taa mai laꞌeneu oefak, do mai laꞌeneu fai hahae tao ues. 21 Huu faik ndia totoꞌan ana seli! Mulai neme Manetualain nakadadadik daebafok ia, losa hatematak ia, hataholi bei taa latonggo lo totoꞌa ina-huuk matak leondiak.✡Daniel 12:1; Dae-bafok Mata Beuk 7:14 22 Tehuu ei maua-manale malan seli, huu Manetualain tao kekeꞌu faik ndia. Mete ma taa, na, taa hambu hataholi esa boe nakatataka nasoda. Huu Manetualain sue Ndia hataholi nala fo Ana hele nala kala, de Ana tao kekeꞌu fai-fai totoꞌa kala sila.

23 Dei fo mete ma faik ndia losa so, na, ei mamanene hataholi nae, ‘Mita dei! Karistus nai ia!’ Ma hataholi feꞌek lae, ‘Karistus nai ele!’ Tehuu ei boso mamahele baa! 24 Huu dei fo hambu hataholi kalua fo babamba kalak, nae, ‘Au ia, Karistus!’ Ma feꞌe kala bali lae, ‘Au ia, Manetualain mana kokolan.’ Dei fo ala tao tanda heran mata-mata kala pake nitu koasan, fo pepeko hataholi. Ala soba-soba fo suek Manetualain hataholi nala nana kedi nalak! 25 De, ei musi manea neulalau aok baa! Fai-fai totoꞌak ndia bei taa losa, tehuu Au asanenedak memak ei baa!

26 Mete ma hataholi nafada ei, nae, ‘Karistus nai mook ele!’ na, ei boso mini ele miu. Ma mete ma hambu nae, ‘Karistus nai uma ia dalek!’, na, ei boso mamahele sila pepeko nala ndia. 27 Huu, Au ia, Hataholi Isi-isik. Dei fo Au fali uni daebafok ia mai, na, basa hataholi la lita Au, sama leo hataholi lita mahadok nasaꞌa nai ledo sasadun neni ledo tetesan neu.✡Lukas 17:23-24

28 Mete ma Au fali maing, dei fo ei bubuluk Au nai bee. Sama leo hataholi bubuluk, nae, mete ma mbui manaꞌa mbombola kamates, lakabubua lai mamanak esa, na, neu ko hambu mbombola kamates nai ndia.”✡Lukas 17:37

29 Basa de Yesus tuti bali, fo nafada Ndia ana mana tungga nala, nae, “Mete ma fai-fai totoꞌa kala sila lateꞌe,

30 Basa ndia, boe ma basa hataholi lita tanda nai lalai, lae, Hataholi Isi-isik sangga fali main. Lita leondiak, boe ma basa hataholi nusa kala malai daebafok ia ala bii, losa lamatani. Huu, dei fo Au konda mai ua koꞌas, bei fo ala lita Au koasang, ma basa Au ana seling.✡Daniel 7:13; Sakarias 12:10-14; Dae-bafok Mata Beuk 1:7 31 Basa de, Au pake lii toꞌik lii ina-huuk, boe ma Au palenda Manetualain ata nala malai nusa-sodak, fo leu lakabubua lala basa hataholi fo Au hele ala kala leme basa daebafok buꞌu nala, neme ledo sasadu main losa ledo tetesa neu; neme kii mai losa kona.”

32 “Au haꞌi conto leo ai huuk. Mete ma doon mulai kuni, na, ndia tanda, nae, fai hanan deka-deka mai so. 33 Leondiak boe, mete ma ei mita fai-fai toꞌa-taak mai so, sama leo Au afada ei isinaak ndia so, na, ndia tanda, nae, Au deka-deka mai so. 34 Hatematak ia, mamanene neulalau! Neme basa hataholi bei kasodak hatematak ia, dei fo hambu bei taa maten, naa te fai-fai toꞌa-taa kala mai so. 35 Mae lalai ma daebafok mopo heni sala, tehuu Au dedeꞌa-kokolang ia, lahele lakandoo taa no mana basak.”

36 “Taa hambu hataholi bubuluk faik bee ndia, Au fali maing. Manetualain ata nala malai nusa-sodak boe oo, taa bubuluk, ma Au boe oo, taa bubuluk. Kada Au Amang mesa kana bubuluk. 37 Huu Au ia, Hataholi Isi-isik. Dei fo mete ma Au fali maing, na, ndia sama leo makahulun ele, faik fo Noh bei nasoda.✡Tutuik laꞌeneu Sososan 6:5-8 38 Faa tuak ndia bei taa mai, tehuu hataholi la laꞌa-linu neulalau, ma lasaok noꞌu, sama leo basa faik. Ala tao leondiak lakandondoo henin, losa Noh maso neni ofa ina-huuk ndia dalek neu. 39 Tehuu ledoeik faa tuak mai sapu heni basa sala, bei fo mata nala lalaak, fo bubuluk hata mana dadik ndia so. Leondiak boe, dei fo no Au mamaing.✡Tutuik laꞌeneu Sososan 7:6-24 40 Faik ndia, mete ma hataholi dua tao ues lai osi dale, na, kada nggengge neuk Manetualain soꞌu nala esa ma feꞌek Ana elan. 41 Mete ma inak dua mbau hade, na, nggengge neuk Manetualain soꞌu nala esa ma Ana ela feꞌek.

42 Huu ndia, de, ei musi manea leledo-leꞌodaen, huu ei taa bubuluk fai hida ei Lamatuam fali main. 43 Duduꞌa neulalau baa! Mete ma maumak bubuluk leꞌodae naꞌo sangga mai, na, neu ko ana nanea nakandoo, fo suek naꞌo boso maso neni uman neu. 44 Huu ndia, de, ei musi mahehele. Huu Au fafali maing ndia, kada kaiboik.”✡Lukas 12:39-40

45 Basa de Yesus kokolak nakadaik bali, nae, “Ei musi dadik sama leo nana nadedenuk fo tungga nakandondoo henin ndia malanggan hihii-nanaun. Huu, mete ma malanggan neni dae dook neu, na, ana soꞌu nala nana dedenu matak leondiak, suek nakaneni basa ndia uma isin nanaꞌa-nininu nala. 46 Mete ma malanggan fali, fo nita ndia nana nadedenun tao ues neulauk, na, neu ko ana sue hataholi ndia. 47 Mamahele Au, huu dei fo malanggan ndia, fee nana nadedenuk ndia koasa fo nakaneni basa ndia hata-heto nala.

48 Tehuu mete ma nana nadedenuk ndia manggalauk, na, neu ko ana kokolak nai dalen, nae, 49 ‘Malole! Malanggang laꞌo so, de see bubuluk nae fai hida ana fali bae!’ Ana duduꞌa leondiak, boe ma ana mulai mbomboko ndia nonoo mana tao ues feꞌe nala. Ma ana nanggatuuk naꞌa-ninu neulalau noꞌu no mana mafu kala. 50 Tehuu taa bubuluk, naa te kaiboik ndia malanggan fali. 51 Boe ma malanggan ndia huku nalan seli, de ana mbia henin deak neu, fo ana leo no hataholi mana dea-dale kala sila. Nai mamanak ndia, basa sala lamatani, huu ala doidoso lalan seli.”