1 Basa boe ma, Yesus no Ndia ana mana tungga nala fali leni Yesus nggolon Nasaret leu. 2 Nandaa laꞌeneu hataholi Yahudi la fai huhule-haladoin, de Yesus maso neni uma huhule-haladoik dalek neu, de nanoli. Faik ndia, hataholi noꞌu kala leu hule-haladoi. Ledoeik lamanene Ndia nanonolin, boe ma ala heran lalan seli, de lae, “Hataholi ia malelan seli maa! Ndia boe oo, naena koasa maa! Talobee de Ana leondiak? 3 Naa te Ndia kada tuka ai. Ita talelak inan Maria; ma Ndia fadi nala, fo ndia Yakobis, Yoses, Yudas, ma Simon. Ndia boeoo, fadi inanan hida boe. Ita basa nggata leo nai nggolok esa naa!” Huu ndia, de ala dale hedin de ala taa nau lamanene Ndia so.

4 Boe ma Yesus nafada, nae, “Memak tetebes! Hataholi lahiik fee hada-holomata, neu Manetualain mana kokolan fo maneme mamana feꞌek mai, lena heni manai nggolo hehelin.”✡Yohanis 4:44

5-6a Tehuu hataholi sila dale nala lakababatu, losa tala nau lamahele Yesus so. Huu ndia, de Ana heran, boe ma Ana taa pake Ndia koasan bali nai ndia so. Kada Ana tao nahai hataholi kamahedik esa do duak.

6b Basa boe ma, Yesus laꞌok ndule basa nggolo mana deka kala, fo nanoli hataholi la Manetualain hihii-nanaun. 7 Ana noke nala Ndia ana mana tungga kasanahulu dua nala, de nadenu sala laꞌok dua-duak, fo leu lafada Manetualain Hala Malolen. Ndia boe oo, fee sala koasa fo husi heni nitu. 8-9 Ana palenda sala, nae, “Ei boso mini noꞌuk nai nai dalak. Boso mini lepa, doik, ma tas. Mini teteꞌe-aik, ma tabueis manai ei ei mala, ma kada badu esak. 10 Mete ma hataholi simbok ei nai uman, na, ei musi leo nai ndia, losa ei lao seluk. 11 Ma mete ma ei losa nai mamanak esa, boe ma hataholi malai sila kala, taa nau simbok, ma taa nau lamanene ei, na laꞌo ela mamanak ndia. Basa na, mafada sala, mae, ‘Ei taa nau mamanene, na, ela ei lemba aom ei natataam ndia!’*Nai Susula Malalaok dedeꞌa Yunani nana sulak nae, “sasambu heni afu neme sila ei nala mai”. Lelek ndia, nai ele, hataholi lateme sasambu heni afu neme ei nala mai, fo dadik tanda, nae, hataholi taa mana nau namanene, na, ana lemba aon natataan. Mete Lukas tatada kasanahulun, lalane kahaan losa kasanahulu esan; Nadedenu kala tutuin tatada kasanahulu telun, lalane kalima hulu esa.

12 Basa boe ma, ala tungga leu tui-bengga Hala Malole ndia. Ala lae basa hataholi la musi hahae leme sila sala-singgo nala mai leo, fo basa na, fali fo lasoda tungga Manetualain hihii-nanaun. 13 Boe ma ala husi kalua heni nitu la. Basa ndia, na, ala tao mina neu hataholi kamahedi kala langgan, fo ala hule-haladoi fee sala. De, ala hai memak.✡Yakobis 5:14

14 Faik ndia, hataholi lai sudi bee mesan, lalelak Yesus so. Tutuik laꞌeneu Ndia koasan ndia boe oo, ana losa Mane Herodes ndiꞌidoon boe. Hambu hataholi lae, “Yohanis Mana Salanik ndia, nasoda falik nai Yesus aon dale! Huu ndia, de Ana bisa tao basa tanda hera nala sila.”

15 Tehuu hataholi feꞌe kala bali na lae, “Taa! Elia ndia nasoda fali nai Ndia aon dale. Do Manetualain mana kokola feꞌen esa neme makahulun mai.”✡Mateos 16:14; Markus 8:28; Lukas 9:19

16 Tehuu ledoeik Mane Herodes namanene hataholi la kokolak laꞌeneu Yesus leo ndia, boe ma ana nataa, nae, “Neu ko Yohanis Mana Salanik fo fain au fee tete lala langgan ndia ia. Hatematak ia nasoda fali seluk so, maa!”

17-18 Mane Herodes nadenu leo ndiak, huu ana hambu dedeꞌa inahuuk no Yohanis. Tutuin leo iak. Fai maneuk ele, Mane Herodes sao nala fadin Filipus saon, nade Herodias. Naa te Filipus no Herodias bei taa lamaketu. Huu ndia de Yohanis ana kaꞌi taa-taa, nae, “Ama Manek taa bole sao mala fadim saon. Huu tatao leo ndiak ndia, na, Ama laꞌolena ita hada Yahudin so.” Tehuu Herodes kada sao nahele inak ndia. Basa boe ma, ana fee hataholi leu humu lala Yohanis de ala teen neni bui dale neu.✡Lukas 3:19-20

19 Huu Yohanis kaꞌi taa-taa leondiak, de inak ndia nambeda dalek neun fo ana sangga dalak fo ana tao nisan. Tehuu ana bei taa hambu lelak, huu Mane Herodes taon neni bui dale neu so. 20 Boe ma Ana fee soldadu la lanea lahelen.

Memak Mane Herodes bii Yohanis. Huu ana bubuluk Yohanis ndia, na, Manetualain nadenun mai so. Ma ndia boe oo, hataholi malole. Memak Mane Herodes nahiik namanene Yohanis dedeꞌa-kokolan. Tehuu laꞌi-laꞌi esa, na, dalen taa malole no Yohanis dedeꞌa-kokolan.

21 Basa ndia, boe ma faik esa, ina Herodias hambu fai lelak fo bala dale hedin. Faik ndia, ala tao Mane Herodes fai bobonggin. Ala hoka hataholi inahuu nala fo ala mai laꞌa feta fai bobonggik ndia. Mana maik sila, na hataholi mana palenda la, malangga soldadu la, ma nusa Galilea lasi haꞌda nala. 22 Neu feta laladan, boe ma Ina Herodias anafeꞌon neu longge. Ndia lolonggen lolen seli, losa ana tao namahoko Herodes ma ndia nana hoka nala Boe ma Mane Herodes noke nalan de natanen nae, “O nau moke au hata, na, kada mafada leo! Dei fo au fee o. 23 Leomae o moke baꞌe duak au nusa palendang boe oo, au fee o. Au soo neu Manetualain naden!”

24 Boe ma inanak ndia neu natane inan nae, “Ina aa! Ina duduꞌan, na, au oke hata fo neulaun seli neme ama mai?”

Boe ma inan nataa nae, “Naaa! Muu fo moke Yohanis langgan.”

25 Basa boe ma, inanak ndia lai-lai neni Herodes neu, de nae, “Ama aa! Au oke fo leni fee au Yohanis langgan, fo mbedan neu dulang esa dalek. Hatematak ia leo!”

26 Mane Herodes namanene leondia boe ma tutik tenden ana bokak. Tehuu ana taa bisa hela falik ndia sumba-soon so, huu basa hataholi la lamanene basan so. 27 Basa boe ma, ana palenda malangga soldaꞌdu esa, neu tete neni Yohanis langgan neme bui dale mai. 28 Boe ma ala tete lala Yohanis langgan, de ala taon neu dulang esa dalek, boe ma lenin neu inanak ndia. Ana simbo nala dulang ndia, boe ma ana koꞌo nenin neu inan. 29 Ledoeik Yohanis ana mana tungga nala lamanene lae ala tete leni Yohanis langgan, de leu haꞌi lala mbombolan de leu latoin.

Yohanis mamaten tutuin kada leondiak.

30 Faik esa, boe ma Yesus ana mana tungga nala fo nadenu sala leu ndia, basa sala lakabubua seluk lo Ndia. Ala tui basa hata fo ala taon so, ma hata fo lanoli hataholi la so. 31 Tehuu faik ndia hataholi noꞌu kala laꞌok leu mai sangga Yesus. Losak Yesus no ana mana tungga nala taa lalak laꞌa so. Boe ma Yesus nafada ana mana tungga nala nae, “Mai fo teu sangga mamana linok fo ita bisa hahae aok tala faa dei, ma.”

32 De, basa sala hene leni ofak dale leu, de leu sangga mamana linok, fo, dook neme nggolok mai.

33 Tehuu hataholi makadoto kala sila lita Yesus ofan tungga dano bifin. Boe ma ala kalua leme nggolok dale mai, tungga dala madak lain, de ala losa lakahuluk Yesus asa. 34 Ledoeik Yesus konda neme ofak lain mai, boe ma nita hataholi noꞌuk lahani Ndia so. Boe ma dalen tuda kasian neu sala, huu ala taa bubuluk tao leo bee so, leo bali biꞌilombo fo mana hoon taa. Boe ma Ana nanoli sala Manetualain hihii-nanaun,✡Lelekek 27:17; 1 Mane-mane kala 22:17; 2 Israꞌel no Yahuda Tutuin 18:16; Yeskial 34:5; Sakarias 10:2; Mateos 9:36 35-36 neme leledon mai losa bobok. Boe ma Yesus ana mana tungga nala lafada Ndia lae, “Ama aa! Malolenak Ama madenu basa hataholi la ia, fo leu hasa nanaꞌak nai nggolo-nggolo mana dekak lai ia. Huu ledo bobok ia so, de taa hambu nanaꞌak nai ia so.”

37 Tehuu Yesus nataa nae, “Bosok! Kada ei ndia fee sala laꞌa.”

Tehuu latane lasafalin lae, “Awii! Mete ma ita fee hataholi noꞌuk leoia laꞌa, na, ita musi kalua doik makadotok nalan seli! Sama leo tukan esa nggadin teuk esa!†Susula Malalao dedeꞌa Yunani isi-isik sulak, nae, “doi lilo fulak denari natun dua.” Doi lilo fulak denari esa nai lele uluk, na, sama leo tukan esa nggadin faik esa. Neme bee mai, ita bisa hambu doik noꞌuk leondiak!”

38 Boe ma Yesus nataa, nae, “Miu matane sudi kasa dei, see neni lepa-ngge.”

Basa boe ma leu latane sala de ala fali mai lafada lae, “Hambu kada loti lima ma iꞌak boak dua.”

39 Basa boe ma, Yesus nadenu basa hataholi la sila langgatuuk lakabubua leu naꞌu lain. 40 Boe ma leu langgatuuk lakabubua. Hambu lakabubua hataholi natun bekeꞌesak, ma hambu luma beke lima huluk.

41 Basa de, Yesus haꞌi nala loti ka lima kala, ma iꞌa boak kadua kala sila. Boe ma Ana nasale lalai neu, de noke makasi neu Manetualain. Basa ndia, boe ma Ana bibiꞌi loti sila de Ana loo fee sala leu Ndia ana mana tungga nala, fo leu babaꞌe sala leu basa hataholi la sila. Ana babaꞌe iꞌa boa kadua kala sila boe. 42 Basa de basa sala laꞌa losa lakabete. 43 Laꞌa basa, boe ma Ndia ana mana tungga nala, leu lakabubua lala nanaꞌa lena kala, de henu lembeneu sanahulu dua.

44 Meda hataholi lifun lima. Ala bei hingga kaꞌda tou mana naꞌa kala. Tehuu bei taa hingga tamba ina kala ma kakana kala.

45 Basa ndia, boe ma Yesus nadenu ana mana tungga nala, leu saꞌe ofak lakahuluk leni nggolok Betsaida, nai dano selik ele leu. Tehuu Ndia bei nai ndia, de nadenu hataholi la sila fali leo. 46 Ledoeik basa sala fali, boe ma Ana ndaꞌe neni letek esa lain neu, de Ana hule-haladoi.

47-50 Ledoeik leꞌodae so, boe ma Yesus konda fali. Ana nita ana mana tungga nala ofan losa nai dano laladan so. Tehuu ala sefe sota lalan seli, huu ofak laban ani solu. Ledoeik lolembilak, boe ma Yesus neu tungga sala. Tehuu kada Ana laꞌok nesik oe bafon. Ledoeik Ana sangga laꞌo seli ofak ndia, boe ma ala lita Ndia. Ala nggengge lalan seli. Boe ma latatane aok lae, “Awii! Hata ia? Nitu do hata?”

Tehuu Yesus kokolak nakandoon, nae, “Wei! Ei boso bii, baa! Au ndia ia.”

51 Ledoeik Yesus hene neni ofak dale neu, boe ma ani nakamate tutik. Ndia ana mana tungga nala heran lalan seli. 52 Dei fo ala lita Yesus pake koasan, fo Ana fee hataholi lifu kalima lena kala laꞌa. Tehuu ala bei taa bubuluk tebe-tebe Yesus koasan, huu dale nala bei lakababatu.

53 Ledoeik ala losa dano selik, boe ma ala see leu kota Genesaret tasi bifin. 54 Ledoeik ala konda leme ofak lain mai, tehuu hataholi noꞌu kala lita sala so. Boe ma ala bobouk lae, “Wei! Yesus mai so, bou.” 55-56 Sila basa sala lalai ndule nggolo kala, de leu hoka lafeok, boe ma hataholi la ndolo loo basa hataholi kamahedi kala mai.

Kekeꞌun neu, sadi lamanene Yesus nai mamanak esa, na, basa sala ndolo leni basa hataholi kamahedi kala fo lakambembeu sala leu mook ndia. Ala duduꞌa nai dale nala dalek lae, “Sadi hataholi kamahedi kala sila daba laꞌe Yesus badu mbedan, na, neu ko ala hai ndia so.” Daba leondiak, boe ma ala hai tutik.