1 Laꞌi esa, hataholi Farisi ma hataholi Saduki hida leni Yesus leu. Ala sangga latane-lataak lo Ndia, fo sangga tao latuda Ndia. Huu ndia, de ala loke Ndia, lae, “Ama aa! Tulun matudu tanda heran dei, fo dadik buti, nae, Ama hambu koasa neme Manetualain mai.”✡Mateos 12:38; Lukas 11:16

2 Tehuu Yesus nataa nae, “Mete ma ledo tesa ma lalai mbila, na, ei tandam mae, ‘Foꞌa tana uda.’ 3 Ma mete ma ledo sadu ma lalai koꞌa nggeok, na, ei mae, ‘Leledon ia sangga uda.’ Mete ma ei bisa tanda fai leondiak, na, hatina de ei taa bisa malelak tanda-tanda daebafok babasan? 4 Wei! Ei hataholi hatematak ia, kada malelak tao manggalauk! Ei taa mbali Lamatuak! Mae ei moke tanda heran, tehuu Au taa tao. Huu makahulun Lamatuak tao tanda heran pake Ndia mana kokolan Yunus. De, dai ndia so!” Kokolak basa leondiak, boe ma Yesus laꞌo ela sala.✡Mateos 12:39; Lukas 11:29

5 Ledoeik Yesus asa losa dano laladan, bei fo Ndia ana mana tungga nala lasaneda, lae, lafalende heni loti soaneu lepa-nggee. 6 Namanene ala kokolak leondiak, boe ma Ana nafada sala nae, “Ei musi mata neuk neu hataholi Farisi ma hataholi Saduki la lalu tein baa.”✡Lukas 12:1

7 Lamanene leondiak, boe ma Ndia ana mana tungga nala lasapangga. Ala lakokola aok, lae, “Tou lasik kokolak hata ndia? Fama Ana kokolak leondiak, huu ita taa teni loti do?”

8 Tehuu Yesus bubuluk sila duduꞌa nala. Basa de Ana kokolak bali, nae, “Wei! Ei ia ana seli maa! Hatina de ei kokolak laꞌeneu loti! Ei taa mamahele Au do? 9 Ei bei taa bubuluk Au koasang do? Huu faik ndia Au bibiꞌi loti kalima kala sila fo fee hataholi lifu kalima kala laꞌa ndia, de ei makaduduluk mala loti nana naꞌa ela kala lembeneu hida?✡Mateos 14:17-21 10 Basa de leobeek bali no loti kahitu kala fo Au baꞌe fee hataholi lifu kahaa kala sila? Hambu loti lenak sila ei makaduduluk mala sala lembeneu hida?✡Mateos 15:34-38 11 Hatina de ei taa bubuluk Au kokolang isinaak ndia? Au taa kokolak laꞌeneu loti. Tehuu Au nau asanenedak ei, fo suek ei mata neuk mia hataholi Farisi ma hataholi Saduki la nanonoli nala. Huu sila nanonolin bisa leꞌa-nole nala hataholi noꞌuk, sama leo lalu teik tao nala loti dadik ina-huu.”

12 Yesus kokolak leondiak, bei fo ala bubuluk, lae, Ana taa kokolak laꞌeneu loti. Tehuu Ana kokolak laꞌeneu hataholi Farisi ma hataholi Saduki la nanonoli kasala nala.

13 Basa ndia, boe ma Yesus asa leni dae babaꞌek fo mana dekak no kota Kaiseria Filipi. Nai dala laladak, Ana natane sala nae, “Tungga hataholi la kokolan na, lae, Au fo Hataholi Isi-isik ia, see?”

14 Ala lataa lae, “Hambu luma lae, Ama ia, na, Yohanis Mana Salanik nasoda fali so. Feꞌek lae, fama Ama ia, baꞌi Elia. Feꞌek bali na, lae, baꞌi Yeremia. Mete ma taa, na, Manetualain mana kokola feꞌen makahulun ele.”✡Mateos 14:1-2; Markus 6:14-15; Lukas 9:7-8

15 Boe ma Yesus natane sala bali nae, “Mete ma tungga ei mesa nggei duduꞌa mala, na, Au ia, see?”

16 Boe ma Simon Petrus nataa nae, “Ama ia, Karistus, fo ndia Hataholi fo makahulun ele Manetualain helu memak so, fo haituan mai! Ma Ama ia, Manetualain fo nasoda nakandondoo henin, Anan ndia!”✡Yohanis 6:68-69

17 Boe ma Yesus nae, “Simon, fo Yunus anan aa! O ia, maua-manalek bou! Huu hataholi taa nafada o dedeꞌak ia. Tehuu Au Amang nai nusa-sodak nafada o. 18 Mamanene baa! Hatematak ia Au foi o nade ‘Petrus’. Huu nadek ndia ndandaan, fo ndia batu.*Yesus nakaminak dedeꞌa deꞌek nai ia. Huu dedeꞌa Yunani nae, Πέτρος (Petros, na, nade hataholik ndia), ma πέτρᾳ (petra, na, batu.) Huu o namahehelem matea leo batu so, de dei fo o dadik fanderen neu Au hataholi kamahele nggala. Mae ala hambu doidosok losa mate boe oo, lahele lakandondoo henin. 19 Dei fo Au fee o hak, fo makaneni Au hataholi nggala, sama leo o toꞌu nusa-sodak nggoen. Huu hata fo o kaꞌim nai daebafok ia, na ndia Lamatuak kaꞌin nai nusa-sodak boe. Ma hata fo o mboꞌim nai daebafok ia, na Lamatuak mboꞌin nai nusa-sodak boe.”✡Mateos 18:18; Yohanis 20:23

20 Kokolak basa leondiak, boe ma Yesus kaꞌi sala, fo taa bole lafada sudi see, lae, Ndia ndia, Karistus.

21 Mulai neme faik ndia mai, Yesus nafada Ndia ana mana tungga nala, nae, “Au musi uni kota Yerusalem uu. Tehuu dei fo nai ndia, Au hambu doidosok noꞌuk neme basa lasi hadak, malangga anggama Yahudi la malangga nala, ma mese anggama la. Dei fo ala tao lisa Au, tehuu neu binesan, Au asoda fali.”†Nai dedea Yunani na, ala hingga neme: leledok ia (=1), foꞌa (=2), binesak (=3), balademak (=4). De, nai dedea Yunani, τῃ τρίτῃ ἡμέρᾳ (tē tritē hēmera) “neu fai katelun” ndandaan ndia nai dedea Lole nae, “binesak”. Masanedak te, Lamatuak Yesus maten laꞌe fai Lima (hingga esa). Faik foꞌa laꞌe fai Nee (hingga dua), Lamatuak Yesus bei nai lates dale. Neu binesan laꞌe Sosoda Ina (hingga telu), Lamatuak Yesus nasoda fali. De, tungga ita hihingga faik, na, Ndia mate leodaek dua, boe ma nasoda fali.

22 Yesus nafada leondiak, boe ma Petrus hela nalan neu dalak bifin, de kaꞌin, nae, “Ama boso kokolak leondiak! Taa bisa Manetualain elan leondiak!”

23 Tehuu Petrus kokolan ndia, taa tungga Lamatuak hihii-nanaun. Huu ndia de Yesus kaꞌi nasa falin, nae, “Heh! Boke heok ia! Ndia ndia, nitu malanggan kokolan ndia! O boso matabaa mala Au! Kada o duduꞌa tungga hataholi hihiin, huu taa tungga Lamatuak hihii-nanaun!”

24 Boe ma Yesus nanoli Ndia ana mana tungga nala, nae, “Hataholi mana nau tungga Au, ana musi nahele tungga nakandoo tungga-tungga faik! Ana musi nafalende heni ndia hihii hehelin, fo tungga kada Lamatuak hihii-nanaun. Mae hataholi sangga tao lisan boe oo, kada ana musi tungga nakandoo, sama leo hataholi lemba ndia ai ngganggen fo neu mate.✡Mateos 10:38; Lukas 14:27 25 Hataholi sadia mate huu ana tungga Au, dei fo ana hambu sodak nakandondoo henin no Lamatuak. Tehuu hataholi kada nau nasoda soaneu ndia ao-ina hehelin, neu ko ndia taa nasodan nakandondoo henin no Lamatuak!✡Mateos 10:39; Lukas 17:33; Yohanis 12:25 26 Mamanene baa! Mete ma o hambu basa daebafok isin, tehuu Manetualain timba heni o, na, nanalan hata? Mae o lemba muni basa daebafok isin boe oo, o taa bisa nggatin neu o samanem!

27 Au afada ei basa nggei dedeꞌa kala ia, huu Au ia, Hataholi Isi-isik. Dei fo Au konda fali maing, pake Au Amang koasan, fo ana seli ndia, sama-sama ua Ndia ata nusa-sodan nala. Faik ndia, dei fo Au bala hataholi lalaꞌen tungga hata fo ana taon so.✡Mateos 25:31; Sosoda Koa-kio kala 62:12; Roma 2:6 28 Masaneda neulalau baa! Neme ei basa nggei ia, dei fo hambu hataholi hida fo bei taa mate, losa faik bee ala lita Au, fo Hataholi Isi-isik ia, dadik Manek fo toꞌu palenda.”