18
Lamatuak Yesus ana mana tungga nala, latane lae, see ina-huuk nalan seli
(Markus 9:33-37; Lukas 9:46-48)
1 Faik ndia, Yesus ana mana tungga nala mai latonggo lo Ndia, de latane, lae, “Ama! See ndia ina-huuk nalan seli neme basa Manetualain hataholi nala?”✡Lukas 22:24
2 Boe ma Yesus noke nala kakana kadiꞌik esa, de nambededein neu sila lalada nala. 3 Boe ma Ana nae, “Mamanene neulalau! Hataholi mana nau maso dadik Manetualain hataholin, na, ana musi tao nasa fali ndia dala duduꞌan, fo dadik sama leo kakana kadiꞌik ia, fo taa sosoꞌuk nalelak aok.✡Markus 10:15; Lukas 18:17 4 Huu hataholi dale kadiꞌi-taidaek ia, sama leo kakana kadiꞌik ia, de ndia ndia hataholi ina-huuk nalan seli nai Lamatuak matan. 5 De, hataholi mana simbok hataholi kadiꞌi-taidaek sama leo kakanak ia, huu namahele Au, na, hataholi ndia simbok Au so.
Lamatuak Yesus fee nasanenedak laꞌeneu hataholi mana tao nala hataholi feꞌek tao salak
(Markus 9:42-48; Lukas 17:1-2)
6 Boe ma Yesus nafada sala bali, nae, “Mete ma hambu hataholi tao nala kakana kadiꞌik esa tungga dala salak, losa taa namahele Au bali, na, mata neuk baa! Malolenak hataholi mbaꞌa batu ina-huuk esa*Susula dedeꞌa Yunani nana sulak, nae, ‘nggili batu’ fo ala paken nggili hade-gandum. neu lesuhaꞌin, fo nabolon neni tasi laladan neu. 7 Memak daebafok ia mamana soe, huu hambu dedeꞌak noꞌu kala tao lala hataholi tuda leni salak dale leu. Tehuu hataholi mana hambu soe manai lain seli ndia, na ndia, hataholi fo mana tao nala hataholi feꞌek tao salak.
8 Mete ma o tao salak munik o limam, do o eim, na, tete henin leo! Huu malolenak o maso muni nusa-sodak muu, mua kada limak seli, do eik seli, lolen lena heni ala mbia heni o muni haꞌi naraka muu, mua o limam ma eim dua sala.✡Mateos 5:30 9 Mete ma tao salak munik o matam seli, na kada doꞌi heni o matam leo! Huu malolenak o maso muni nusa-sodak muu, mua kada o matam seli lolen lena heni, ala mbia heni o muni naraka muu, mua o matam dua sala.”✡Mateos 5:29
Lamatuak Yesus fee nakandandaak laꞌeneu biꞌilombo mana mopok
(Lukas 15:3-7)
10 Yesus kokolak bali nae, “Mata neuk baa! Boso makadadaek kakana kadiꞌik leoiak. Huu Lamatuak ata nusa-sodan nala lanea sala. De, ata nusa-soda kala sila, maso leu sudi faik bee, fo lafada Manetualain hataholin dedeꞌa nala.
11-13 Ei duduꞌa neulalau, huu Au sangga fee nakandandaak leoiak: hambu hataholi esa biꞌilombon natun esa. Boe ma laꞌi esa biꞌilombo esa laꞌo nasalak, de, mesa kana tungga ndia dalan. Ei maehetuk hataholi ndia musi tao hata? Neu ko ana laꞌo ela biꞌilombo kasio hulu sio kala sila leu letek lain, de neu sangga biꞌilombo esak mana mopok ndia.✡Lukas 19:10
Mete ma ana hambu fali kana so, na, dei fo ana namahoko nalan seli, huu nita ndia biꞌilombon esak ndia, lolen lena heni ndia biꞌilombo kasio hulu sion, fo taa mana mopo kala sila. [Au, Hataholi Isi-isik ia, mai fo sangga fee sodak neu hataholi mana laꞌo heok neme dala ndoos mai.]†Susula dedeꞌa Yunani neulauk nalan seli, ma laak nalan seli, taa sulak dedeꞌak manai longga dale ia. 14 Huu mae kada kakana kadiꞌik esa mopon boe oo, Au Amang nai nusa-sodak taa nameda malole.
Lamatuak Yesus nafada dalan talobee fo ita malole fali to hataholi mana tao salak neu ita
15 Yesus kokolak bali, nae, “Mete ma o tolanoo kamahelem tao salak neu o, na, o musi muu matonggo muan. Basa na, mete ma ei dua nggei mesang, bei fo mafada ndia salan. Mete ma ana namanene o kokolam, na, ei dua nggei malole seluk ndia so.✡Lukas 17:3 16 Tehuu mete ma ana taa nau namanene o, na, muu mala o nonoom esa do dua, fo miu sama-sama. Miu matonggo mia hataholi ndia, fo kokolak seluk mian. Huu nai Manetualain Susula Malalaon nana sulak nae, ‘Nai dedeꞌak esa, musi hambu sakasii dua do telu kokola nala sama, na, bei fo simbok sila kokolan nala ndia.’✡Tui Seluk laꞌeneu Dala Sodak 19:15 17 Tehuu mete ma ana bei taa nau namanene ei, na, miu mafada salani kala. Ma mete ma ndia boe oo, taa nau simbok salani kala kokolan nala, na, taon neu ndia sama leo hataholi taa mana malelak Lamatuak. Mete ma taa, na, taon neu ndia manggalaun sama leo mana susu-bea.
18 Masanenedak matalolole Au kokolang ia baa! Hata fo ei kaꞌin nai daebafok ia, na Lamatuak kaꞌin nai nusa-sodak boe. Ma hata fo ei makamboꞌi kana nai daebafok ia, na, Lamatuak nakamboꞌi kana nai nusa-sodak boe.✡Mateos 16:19; Yohanis 20:23
19 Ma Au afada seluk bali, ae, mete ma hambu hataholi dua leme ei mai hule-haladoi dalek esa, na, neu ko Au Amang nai nusa-sodak fee hata fo ala lokek ndia. 20 Huu mete ma hambu hataholi dua do telu lakabubua fo hule-haladoi sama-sama, huu sila ndia, Au hataholing, na, Au boe oo, nai sila laladan.”
Lamatuak Yesus fee nakandandaak laꞌeneu pegawe taa mana fee ambon neu ndia nonoon
21 Basa ndia, boe ma Petrus mai natane Yesus nae, “Lamatuak, au sangga atane fa. Mete ma au tolanoong hataholi kamahelek, tao salak taa-taa neu au, na, au musi feen ambon laꞌi hida? Losa laꞌi hitu do?”
22 Boe ma Yesus nataa nae, “Taa! O musi fee ambon neu ndia laꞌi hitu laꞌi hitu hulu,‡Dedeꞌa Yunani nai ia, bisa ndandaan nae, “hitu laꞌi hitu hulu. Bisa boe, laꞌi hitu hulu hitu”. losa o taa bisa hingga malan so bali.✡Lukas 17:3-4 23 Ei musi tao tungga leondiak, huu Manetualain sama leo manek hingga ndia pegawe nala huta nala. 24 Ledoeik ana mulai hingga, boe ma nadenu ndia hataholin neu noke nala pagawe esa fo mana mahutak ndia doin kefi-kefin.§Susula Malalaok dedeꞌa Yunani nana sulak nai ia, nae, “lifun sanahulu τάλαντον (talanton)”. Talonton esa belin na hataholi mana tao ues nggadin teuk sanahulu lima losa teuk dua hulu. Susula Malalaok Indonesia nai ia nae, ‘talenta’. 25 Tehuu pagawe ndia taa bisa bae nggati nala hutan ndia. Boe ma manek palenda nae, ‘Miu seꞌo heni hataholi ndia no basa sao-ana nala, fo ala dadik ata. Ma seꞌo heni basa hata nala, fo bae huta nala.’
26 Namanene leondiak, boe ma pagawe ndia sendek lunggulanggan neu manek matan, de ana kokoen nae, ‘Awii! Ama aa! Ama manek tulun fee au fai fa dei! Dei fo au bae falik basa au hutang.’ 27 Namanene leondiak, boe ma manek nameda kasian neu ndia. De ana koka heni tutik basa ndia pegawen hutan. Basa de ana mboꞌi heni pegawe ndia.
28 Tehuu ledoeik pagawe ndia kalua, de, natonggo no nonoon esa fo nahutan doik fa.*Susula Malalaok dedeꞌa Yunani nana sulak nai ia nae, “δηνάριον (deinarion) natun esa”. Denarion esa belin, ndia hataholi mana tao ues nggadin faik esa. De, mete ma nakasasaman no τάλαντον (talanton) lifun sanahulu nai (lalane kadua hulu haan), na, hutak ia belin taa fa boe. Boe ma ana humu nala nonoon ndia, de ana kidu neu lesuhaꞌin ma nasapala kana, nae, ‘Weih! Hatematak ia bae o hutam leo!’
29 Namanene leondiak, boe ma nonoon sendek lunggulanggan de ana kokoen nae, ‘Awii! Tolanoo aa! Tulun fee au fai fa dei! Dei fo au bae ketu au hutang neu o.’
30 Tehuu pegawe ndia nae, ‘Taa bisa! Mae leobee boe oo, o musi bae hatematak ia!’ Basa de nandee nonoon ndia neni bui dale neu, losa ana bae basa hutan ndia. 31 Ledoeik manek namanene neme pegawe feꞌek fo nita hata mana dadik ndia so, boe ma dalen hedis. Basa de neu nafada manek.
32 Namanene leondiak, boe ma manek noke pegawe fo taa nameda nalelak aon ndia. Ana kasilanggan, nae, ‘Heh, hataholi manggalauk! Huu o moke au kasian neu o, huu ndia de, au koka heni basa o hutam. 33 Tehuu hatina de o taa kasian neu o nonoom fo sama leo au kasian neu o?’ 34 Manek ndia manggalau, losa nadenu leu landeen neni bui dale neu, fo suek ala tao doidoson, losa ana bae ketu basa hutan.”
35 Boe ma Yesus nateꞌe tutuin, ma nafada nae, “Naa, Au Amang nai nusa-sodak boe oo, nahinggak leondiak. Dei fo Ana huku ei, mete ma ei taa mafalende heni tebe-tebe ei tolanoo kamahelem sala nala.”
✡18:3 Markus 10:15; Lukas 18:17
*18:6 Susula dedeꞌa Yunani nana sulak, nae, ‘nggili batu’ fo ala paken nggili hade-gandum.
†18:11-13 Susula dedeꞌa Yunani neulauk nalan seli, ma laak nalan seli, taa sulak dedeꞌak manai longga dale ia.
✡18:16 Tui Seluk laꞌeneu Dala Sodak 19:15
✡18:18 Mateos 16:19; Yohanis 20:23
‡18:22 Dedeꞌa Yunani nai ia, bisa ndandaan nae, “hitu laꞌi hitu hulu. Bisa boe, laꞌi hitu hulu hitu”.
§18:24 Susula Malalaok dedeꞌa Yunani nana sulak nai ia, nae, “lifun sanahulu τάλαντον (talanton)”. Talonton esa belin na hataholi mana tao ues nggadin teuk sanahulu lima losa teuk dua hulu. Susula Malalaok Indonesia nai ia nae, ‘talenta’.
*18:28 Susula Malalaok dedeꞌa Yunani nana sulak nai ia nae, “δηνάριον (deinarion) natun esa”. Denarion esa belin, ndia hataholi mana tao ues nggadin faik esa. De, mete ma nakasasaman no τάλαντον (talanton) lifun sanahulu nai (lalane kadua hulu haan), na, hutak ia belin taa fa boe.