17
Manetualain natudu Lamatuak Yesus nula-nambun
(Markus 9:2-13; Lukas 9:28-36)
1 Seli faik nee, boe ma Yesus noke nala Petrus, Yakobis no fadin Yohanis, de ala sama-sama ndaꞌe leni lete madema esa lain leu, fo kada mesa kasa lai ndia. 2 Losa lain, boe ma lita Yesus namata-ao feꞌe so. Matan nasaꞌa leo ledo, ma Ndia baloꞌa papaken dadik fula manggahadok. 3 Kada nggengge neuk, lita Ana nakokola no baꞌi Musa ma baꞌi Elia. 4 Boe ma Petrus mopo duduꞌan, losa ana kokolak nadabak, nae, “Ama aa! Ita malole hiak nai ia, maa! De malolenak ai tao mala lak telu. Esa soaneu Ama, esa neu baꞌi Musa, ma esa bali neu baꞌi Elia.”
5 Ledoeik Petrus kokolak leondiak, boe ma kada nggengge neuk koꞌas konda de mboti nala sala. Boe ma ala heran lalan seli lamanene halak esa kalua neme koꞌas ndia mai, nae, “Mamanene baa! Yesus ia Au Ana susueng. Ana tao namahoko Au daleng taa-taa. Mamanene neulalau neu Ndia baa!”✡2 Petrus 1:17-18; Tutuik laꞌeneu Sososan 22:2; Sosoda Koa-kio kala 2:7; Yesaya 42:1; Mateos 3:17; 12:18; Markus 1:11; Lukas 3:22; Tui Seluk laꞌeneu Dala Sodak 18:15
6 Lamanene leondiak, boe ma ana mana tungga nala bii lalan seli, losa ala tuꞌu latotonok. 7 Tehuu Yesus mai tao nafofoꞌa sala, boe ma Ana nae, “Wei! Ei foꞌa leo. Boso bii!” 8 Boe ma ala botik mata nala, tehuu taa lita esa boe nai ndia. Huu kada Yesus mesa kana.
9 Basa ndia boe ma, ala mulai konda leme letek ndia mai. Boe ma Yesus kaꞌi sala, nae, “Boso mafada sudi see, hata fo isinaak ei mitak ndia baa! Huu Au, Hataholi Isi-isik ia, musi mate dei. Basa na, dei fo mete ma Au asoda fali so, bei fo ei mafada hataholi.”
10 Boe ma latane Ndia lae, “Ama ia memak Karistus, tehuu baꞌi Elia nai bee? Huu mese anggama la sila, lanoli lae, baꞌi Elia musi mai dei, bei fo Karistus mai. Tehuu tungga Ama, na, leobee?”✡Maleaki 4:5
11 Yesus nataa nae, “Memak tetebes. Baꞌi Elia musi mai dei, fo soi dalak fee Karistus. 12 Tehuu mamanene neulalau baa! Baꞌi Elia mai so, tehuu hataholi taa lalela kana. Ala lakatotoꞌa kana, tungga sila hihiin. Leondiak boe, dei fo ala tao Au, Hataholi Isi-isik ia.”✡Mateos 11:14
13 Lamanene basa leondiak, bei fo ala bubuluk, lae, baꞌi Elia fo Yesus kokolak ndia, na ndia, Yohanis Mana Salanik.
Lamatuak Yesus tao nahai kakana nitu nalak esa
(Markus 9:14-29; Lukas 9:37-43)
14 Boe ma ledoeik Yesus asa fali so, latonggo lo hataholi noꞌuk lahani sala. Boe ma touk esa mai sendek lunggulanggan, de noke tulun 15 nae, “Lamatuak aa! Kasian neu au anang dei! Huu ana hambu hedi mulu biꞌik, ma ana doidoso nalan seli. Mete ma hedis ndia foe, na, nasiꞌa tuda neni oe dale neu, do haꞌi dale neu. Tulun dei, Lamatuak! 16 Au uan neni Lamatuak ana mana tungga mala neu so, tehuu taa bisa tao lahain.”
17 Namanene leondiak, boe ma Yesus nasapala Ndia ana mana tungga nala, nae, “Heh! Ei ia ana seli maa! Au anoli ei taa-taa so, tehuu ei taa malelak neulalau. Ma ei taa mamahele tebe-tebe neu Au! Au musi nggaleloak neu ei losa fai hida bali? Mua kakanak ndia mai leo!”
18 Ala loo kakanak ndia neu Ndia, boe ma Ana husi heni nitu neme kakandak ndia mai. Boe ma nitu ndia kalua laꞌo ela kakanak ndia, de ana hai tutik.
19 Basa ndia, boe ma ledoeik Yesus mesa kana no Ndia ana mana tungga nala, ala latane Ndia lae, “Ama aa! Hatina de isinak ai taa bisa husi kalua heni nitu ndia?”
20 Yesus nataa sala nae, “Ei taa bisa husi heni nitu ndia, huu ei taa mamahele tebe-tebe neu Au. Masanenedak baa! Mete ma ei mamahele tebe-tebe neu Au, na, mae kada fa anak boe oo, sama leo ai deꞌe kadiꞌi anak esa,*Lamatuak Yesus nakasasama hataholi namahehelen no ai deꞌe kadiꞌi anak. Nai ia, ai deꞌek ndia ina-huun penting, taa ndia numban. Susula Malalaok Indonesia nai ia, nae, “sasawi deꞌek”, tehuu bei hambu dedeꞌak luma laꞌeneu nakandandaak ndia. tehuu ei bisa palenda letek esa, mae, ‘Heh letek! Lali muni ele muu!’ Neu ko ana lali. De, ei bisa tao sudi hata, sadi ei mamahele tebe-tebe neu Lamatuak.✡Mateos 21:21; Markus 11:23; 1 Korintus 13:2 21 [Tehuu mamanene baa! Nitu matak leoiak, memak manggalauk. Mete ma ei taa hule-haladoi ma puasa, fo moke tulu-falik neme Lamatuak mai, na, ei taa bisa husi nitu matak leondiak.”]†Susula dedeꞌa Yunani nelaun nalan seli ma laak nalan seli, taa sulak lalane kadua hulu esak ia.
Lamatuak Yesus kokolak kalaꞌi duan laꞌeneu Ndia mamaten
(Markus 9:30-32; Lukas 9:43-45)
22 Basa de laꞌi esa, Yesus ma Ndia ana mana tungga nala lakabubua lai propinsi Galelea. Ana nafada sala nae, “Taa dook so bali, huu ala sangga seꞌo heni Au neu hataholi feꞌek. 23 Boe ma ala tao lisa Au Hataholi Isi-isik ia. Memak Au mate, tehuu dei fo neu binesan, Au asoda fali.”
Lamanene Ndia kokolan leondiak, boe ma ana mana tungga nala dale hedi lalan seli.
Lamatuak Yesus kokolak laꞌeneu uma huhule-haladoik bean
24 Faik fo Yesus no Ndia ana mana tungga nala leni Kapernaum leu, boe ma mana susu-bea la, mai latane Petrus lae, “Ei Mesem bae Uma Ina Huhule-haladoik bean, do taa?”✡Kalua neme Masir mai 30:13; 38:26
25 Boe ma Petrus nataa nae, “Bae maa!”
Faik ana fali, boe ma Yesus nafada nakahuluk ndia nae, “Wei Simon! O duduꞌa sudik. Mane kala lai daebafok ia haꞌi bea neme see mai? Neme sila ana heheli nala, do neme hataholi feꞌek mai?”
26 Petrus nataa, nae, “Neme hataholi feꞌek mai!”
Yesus tuti bali, nae, “Mete ma leondiak, na, manek ana hehelin taa bae, hetu? 27 Leondiak boe no Uma Ina Huhule-haladoik bean. Tehuu boso ita tao tala mana susu-bea la luli. De, malolenak, kada o muu dolu iꞌak nai dano dale leo. O mala iꞌa makasososak, na, huꞌa bafan. Dei fo o hambu doi lilo fulak esa nai ndia. Basa na o pake doik ndia, fo muu bae ita dua nggata bean. Huu ndia dai ita dua nggata bean.”‡Tungga-tungga teuk, tou Yahudi teun dua hulu lain neu so, musi bae bea matak esa, fo tulun nakaneni neu Uma Ina Huhule-haladoik (Les nai Kalua neme Masir 30:12-16). Faik fo Lamatuak Yesus bei nasoda, ala hingga bea ndia nenik doi dikdrama belin sama leo dinari dua. Dinari esa, sama leo tukan esa nggadin faik esa. Nai ia, Yesus nafada Petrus, nae, dei fo ana hambu doi stater nai iꞌak bafan. Stater esa belin didrakma dua, fo, dinari haa na, dai bae Yesus no Petrus bean.
✡17:5 2 Petrus 1:17-18; Tutuik laꞌeneu Sososan 22:2; Sosoda Koa-kio kala 2:7; Yesaya 42:1; Mateos 3:17; 12:18; Markus 1:11; Lukas 3:22; Tui Seluk laꞌeneu Dala Sodak 18:15
✡17:10 Maleaki 4:5
*17:20 Lamatuak Yesus nakasasama hataholi namahehelen no ai deꞌe kadiꞌi anak. Nai ia, ai deꞌek ndia ina-huun penting, taa ndia numban. Susula Malalaok Indonesia nai ia, nae, “sasawi deꞌek”, tehuu bei hambu dedeꞌak luma laꞌeneu nakandandaak ndia.
✡17:20 Mateos 21:21; Markus 11:23; 1 Korintus 13:2
†17:21 Susula dedeꞌa Yunani nelaun nalan seli ma laak nalan seli, taa sulak lalane kadua hulu esak ia.
✡17:24 Kalua neme Masir mai 30:13; 38:26
‡17:27 Tungga-tungga teuk, tou Yahudi teun dua hulu lain neu so, musi bae bea matak esa, fo tulun nakaneni neu Uma Ina Huhule-haladoik (Les nai Kalua neme Masir 30:12-16). Faik fo Lamatuak Yesus bei nasoda, ala hingga bea ndia nenik doi dikdrama belin sama leo dinari dua. Dinari esa, sama leo tukan esa nggadin faik esa. Nai ia, Yesus nafada Petrus, nae, dei fo ana hambu doi stater nai iꞌak bafan. Stater esa belin didrakma dua, fo, dinari haa na, dai bae Yesus no Petrus bean.