14
Boso sapa madabak ei tolanoo salani mala
1 Hambu hataholi fo namahele neu Lamatuak so, tehuu ndia namahehelen bei ta matea, ma ndia bei ta bubuluk dedeꞌa noꞌuk. Malengga dalek, fo simbok ndia no malole. Boso masisimbo bafak laꞌeneu ndia duduꞌan. Elan, fo kada ana nanonoo no ei. 2 Hambu hataholi fo namahele neu Lamatuak, fo ana duduꞌa nae, hataholi salanik na bisa naꞌa sudi hata, leo mba, do hata. Tehuu hambu hataholi salani feꞌe kala, fo sila namahehele nala ta matea, fo kada nau laꞌa aidoo. Te ala laluli mbaa. 3 Tehuu mamanene bou! Hataholi salanik fo nameda naꞌa sudi hata, na, boso makadadaek hataholi fo ta nau naꞌa mbaa. Leondiak boe, hataholi salanik ta mana naꞌa mbaa, boso nafada hataholi mana naꞌa mbaa, nae, “Wei! Naꞌa mbaa ndia na, sala!” Huu Manetualain simbok nala dua sala, fo dadik neu Ndia hataholi nala!
4 Mete ma o mambue sapa o tolanoo kamahele mala leondiak, na o dudua mae o ia, see? O maena hak hata, fo soli salak neu hataholi feꞌek? Hataholi ndia, o atam ta ndia! Ma ndia malanggan ta o. Te kada ndia Lamatuan naena hak, fo nafada ledo-ledo ndia tataon ndia, tetebes, do sala. Tehuu boso mafalende henin. Neu ko ndia Lamatuan, simbok hataholi ndia no malole, huu ndia Lamatuan nabeꞌi taon boe balakai, fo bisa nakatataka.
5 Hambu hataholi luma fo laketun, lae, faik esa malole, neme fai feꞌe kala mai. Hambu hataholi feꞌek duduꞌa, nae, basa fai kala leo esak, ta hambu mana feꞌek. Hataholi esa-esak musi naketu aon, laꞌeneu dedeꞌak ndia. 6 Mete ma hataholi duduꞌa nae, hambu faik fo lolen lena fai feꞌe kala, na ana tao leondiak, fo natudu hada-holomata neu ita Lamatuan. Hataholi manaꞌa mbaa, ma nanaꞌa feꞌe kala, bisa naꞌa, fo natudu hada-holomata neu ita Lamatuan, huu noke makasi neu Lamatuak. Leondiak boe, no hataholi ta manaꞌa mbaa. Ndia boe nau natudu hada-holomata neu ita Lamatuan, ma ndia boe oo noke makasi noꞌuk neu Lamatuak.✡Kolose 2:16
7 Naa! Faik fo ita tasoda, na ita ta kada tasoda soaneu ita ao-ina hehelin. Ma mete ma ita mate, na ita ta kada mate soaneu ita ao-ina hehelin. 8 Te mete ma ita bei tasoda, na, ita nanambaꞌak to ita Lamatuan. Leondiak boe mete ma ita mate, te ita bei nanambaꞌak to ita Lamatuan. De, mae ita tasoda, do ita mate boe, ita bei dadik neu Ndia enan. 9 Huu ndia de Karistus maten, boe ma nasoda fali. Ana tao leondiak, fo Ana bisa dadik neu Lamatuak, neu hataholi mana mate kala so, ma neu hataholi bei kasoda kala boe.
10 De, boso o soꞌuk aom leo mana kee dedeꞌak, fo sapa o tolanoo salanim. Ma boso o makadadaek ndia. Te dei fo ita basa nggata musi tasale Manetualain, fo Ana palisak ita esa-esak sodan.✡2 Korintus 5:10 11 Nana sulak neme makahulun mai, nai Lamatuak Susula Malalaon, nae,
“Ita Lamatuan mesa kana nafada, nae,
‘Basa hataholi la dei fo ala sendek lunggulanggak fo lakaluku-lakatele neu Au,
ma natudu hada-holomata neu Au.
Hataholi esa-esak dei fo pake sila bafa nala, fo manaku,
lae, Au dadik neu sila Lamatuan,
huu Au ia, Manetualain.’ ”✡Yesaya 45:23
12 De, ita basa nggata dei fo musi tanggon-natataak, fo tafada ita Lamatuan, tae, ita tao leobeek ma hatina de ita tao leondiak.
Boso tao matuda o tolanoo salani mala
13 Makahulun, ei nai Roma na mambue soli salak neu ei tolanoo salani mala. Boso leondiak bali! Malolenak, ita taketun leoiak: boso tao tala ita tolanoo nala lakatunu. Boso ita soba tao tatuda sala, losa ala tao salak.
14 Huu au nanambaꞌak ua ita Lamatuan Yesus, de au bubuluk no teteben, leoiak: ta hambu dedeꞌak esa boe, fo bisa tao nanggenggeo hataholi, losa ta bisa hule-haladoi neu Lamatuak. Tehuu mete ma hataholi esa ana duduꞌa laꞌeneu hata esa fo ana tao nala ndia nanggenggeo, losa nameda ndia ta naena hak fo hule-haladoi bali, na ela dedeꞌak ndia dadik nalulik neu ndia. 15 Conto leo, mete ma o muꞌa mbaa, na, ndia tao nala o tolanoom dalen hedis, na, o ta matudu o susuem neu ndia, hetu? Makatataka aok dei! Boso tao makalulutu o tolanoom, huu kada o nau muꞌa hata esa! Te Karistus boe maten soaneu hataholi ndia. 16 Ta malole, mete ma o tao dedeꞌak esa fo mae malole, tehuu hataholi feꞌe kala, kokolak tao laboo o nadem, huu ala lae o tataom ndia, manggalauk.
17 Duduꞌa matalolole! Te Manetualain ndia, na ita Manen. Tehuu ita ta dadik Manek hataholin, huu kada ita taꞌa-tinu tungga heti-heuk. Ta! Mete ma ita nau dadik Manek hataholi nala, na, ita musi tao dedeꞌak ndoos, ma ita dale nala malalaok, ita tasoda ndoos mole-dame, ma ita dale nala lamahoko. Basa ia la bisa dadi, mete ma ita nanambaꞌak to Lamatuak Dula-Dale Malalaon. 18 Hataholi fo ono-lau Karistus leondiak, na ana tao nala Lamatuak dalen namahoko. Ma hataholi feꞌek boe lita neulalau hataholi ndia sodan, basa de soꞌuk hataholi ndia naden, nae, “Ndia ndia, malole!”
19 De, ita musi mbalak eik, fo tasoda to mole-dame, ma tao tatetea esa no esa. 20 Boso tao makalulutu Lamatuak uen, nai hataholi feꞌe kala sodan kada huu dedeꞌa nanaꞌa-nininuk. Lamatuak nafada so, nae bole miꞌa sudi hata, te basa-basan malalaok. Tehuu, mete ma o madedeꞌa mua o tolanoom, huu kada nanaꞌa-nininuk, na o sala ndia. Boso leondiak!
21 Malolenak, kada o makatataka aok. Boso muꞌa mbaa, do minu anggol oek, do muꞌa-minu hata feꞌek fo tao nala o tolanoom nakatunu. 22 Leoiak: mete ma o duduꞌa mae, o maketum laꞌeneu nanaꞌa-nininuk ndia nandaa no Lamatuak hihii-nanaun, na nggali heni o dale kabaꞌem ma tao o dalem ndoo-ndoo. Mete ma leondiak, na o mamahoko nai Lamatuak matan. 23 Tehuu mete ma o dalem nabaꞌe muꞌa hata esa fo o mameda ndia manggenggeok nai Lamatuak matan, na Lamatuak fee salak neu o. Ma mete ma o tataom ndia taa nandaa no namahehelek manai o dalem, na Lamatuak nae, salak ndia so.