1 Hataholi esa-esak musi namanene neu hataholi mana palenda la. Te sila laena hak ma koasa, fo palenda hataholi. Tehuu sila koasa nala sila, huu Manetualain ndia fee sala. Mana koasa hatematak ia, lai ndia, huu Lamatuak soꞌu nala sala so. 2 De, mete ma hambu hataholi laban hataholi mana palenda leondiak, na ndia sama leo laban hata fo Lamatuak soꞌu sala so. Mete ma ala tao leondiak, na, dei fo hambu huhukuk neme Lamatuak mai.

3 Mete ma ei tao ndoos, na ei malole mia hataholi mana palenda la. Tehuu mete ma ei tao manggalauk, na malolenak ei bii sala! De, manea aok, fo tao dedeꞌa ndoos, na hahae bii sala. Ma mete ma ei tao leondiak, na, dei fo ala koa ei. 4 Te hataholi mana palenda la, fo Lamatuak hele nala sala, de ala ono-lau ei. Tehuu mete ma ei tao salak makandoo, na, malolenak kada ei mata neuk! Te Lamatuak ta suma-suma fee hak neu hataholi mana palenda fo huku ei. Sila ndia, sama leo Lamatuak hataholi nadedenu nala, fo huku hataholi mana tao manggalau kala. Huu Lamatuak ta simbok dedeꞌa manggalauk fo hataholi taon; Ana luli sala.

5 Huu ndia de ei musi mamanene neu hataholi mana palenda la. Te ei bubuluk so, nai ei dale mala, mae, ndia tetebes. Ma ei boe bubuluk, mae, Lamatuak luli, mete ma ita ta tao tetebes.

6 Leondiak boe, ei musi bae bea fo tetebes, huu mana palenda la lakalalaꞌok Lamatuak uen. 7 Ei musi malole mia mana palenda no mandaan. Bae bea neu mana susu bea la. Fee hada-holomata neu basa hataholi la fo musi simbok hada-holomata. Ma mete ma hambu hataholi tao dedeꞌa malole nakandoo, na soꞌuk sila nade nala, fo basa hataholi la bubuluk, ala tao malole.✡Mateos 22:21; Markus 12:17; Lukas 20:25

8 Bae ketu o huta mala, fo boso masoda munik huta-buꞌuk. Te kada ita bei tahuta dedeak esak, fo ndia nasue-nalaiao. Mete ma ei sue hataholi, na, ei tao tungga Lamatuak Heti-heu nala so. 9 Te Heti-heu kala sila lae, “Boso mambue hohongge; boso tao misa hataholi; boso mamanaꞌo; boso dale hedi hataholi feꞌek buan,” ma bei feꞌek bali. Mete ma nau tao tungga basa Heti-heu kala, na musi tao tungga Heti-heuk esa ia, fo nae, “O musi sue hataholi feꞌe kala, sama leo o sue o ao-ina hehelim.”✡Kalua neme Masir mai 20:13-15, 17; Tui Seluk laꞌeneu Dala Sodak 5:17-19, 21; Malangga Anggama la Heti-heun 19:18; Mateos 22:39; Markus 12:29-31 10 Te mete ma ita tatudu susuek neu hataholi feꞌek, na, ita ta tao manggalauk neu ndia, hetu? De, mete ma ita tatudu susuek takandondoo henin, na, ita bisa tao tungga basa Lamatuak Heti-heun.

11 Yesus fai mamain fo nasalaꞌe ita, deka-deka so. Hatematak ia faik ndia, deka-deka so, mete ma nakasasaman no faik fo ita bei fo tamahele teu Yesus Karistus. Huu ndia de, ita musi tasoda tasueao, huu ita bubuluk dedeꞌak ndia. Nonook leo bali makahulun, ita mana sungguk. Tehuu hatematak ia, ndia fain fo ita musi foꞌa leo! 12 Ta dook, te leꞌodaek basan, boe ma leledok mai so. De, malolenak ita hahae leo, teme ita tatao manggalaun mai. Ndia sama leo hataholi mana leo nai makiuk, ma tao manggalauk, te sila duduꞌa lae, ta hambu hataholi nita sala. Tehuu hatematak ia, ita musi dadik leo soldadu mana pake manala natatik, fo mbalak eik tao dedeꞌa malole la, sama leo hataholi mana masoda nai manggaledok dalek. 13 Ita musi tasoda to ndoos, fo basa hataholi la lita ita tao dedeꞌa malole la. Ta malole, mete ma kada ita tafetak takasoe, ma kada tinu mafuk. Ta malole mete ma ita tambue hohongge. Ta malole mete ma ita tasisimbo bafak kii-konak. Ma ta malole, mete ma ita dale hedi, huu ita ta nau hataholi lena ita. 14 Tehuu malolenak, ei tao masafali ei dale mala, fo dadik sama leo ita Lamatuan Yesus Karistus, fo Manetualain haituan mai so. Ma mete ma o mahiik sangga tao dedeꞌak ta tetebes, na, boso hanu kana, fo o tao tungga o hihii madaba leondiak. Manea o aom!