1 Lani ngwumaad, ngwujaꞌri ngwee ngwuru ngwudi gwodaning ngwüllïjä je. Na ngwanni ngwüllïjä je gwerre, ngwüllïjä je ꞌdün nunnu a je ngwe diwayiniyi yiꞌral giyee a je ngwe arrijaji ngaa gu ïräjï ngwäyälü gwanni gwujuꞌru. 2 Nunnu ngaa diwayini ngwujaꞌri ngwanni ngwondaja ngwe ngwïjïr ngwanni ngwujuꞌru luubu gwerre a ngwujaꞌri ngwanni ngwätädï je Deleny diru Gilang gwege ngwoꞌra ngwükäjäär je ngwalu.

3 Gwerre gwerre giyiꞌral ꞌdar, lïngïdär ndi ari giyomon gïyäꞌdï yidi gwodaning, ngwüjï ngwa ji ngwila ngwanni ngwati münä ngwujaꞌranu, ngwa ärï ngwujaꞌri ngwïmä ngwanni ngwuru ꞌdidanu ngwa gwuji amiꞌrang gwudi yigor yegen gwanni gwuki. 4 La ari nu, “Kirictu gwaru gwadi ila, gwanna gwe? Ngwügüürnä ngwege ngwuma ayi, yiꞌral yïndï yiru yeꞌte yeꞌte ꞌtuꞌtu anaku geꞌta gu Ngwaalu dïdläyü.” 5 A be ngindenga lïꞌdädänü aar määtä ngwäyälü rüny aar dodani ndi ari luubu gere gïgïꞌtïnä ngwujaꞌri ngwe ngwudi Ngwaalu na dïyäng dïndï giyaw aar geꞌte yaw ye. 6 Na ndi ari ꞌto dïdlä duubu duꞌrin dïꞌdätü a yaw dudiyi ngwüjü. 7 Na ndi ari ngwujaꞌri ngwe ngweꞌte ngweꞌte, gere na dïyäng ndee gweneno dïgïꞌtäjäär lïgälü aar gïꞌtïjï gomonalu gadi ge Ngwaalu pïcï ngwüjü yelenya a gomon gadi ge ngwüjï ngwanni ngwuki drü dudi.

8 A be aaꞌti ngaa la dodani yiꞌral giyee yeꞌte pu lani ngwumaad, gomon geꞌte pu (1) ngwäyänü Gideleny diru Ngwaalu, giru nono ngwüdläyü ngwüüꞌrï (1,000) na ngwüdläyü ngwüüꞌrï (1,000) ngwuru nono gomon geꞌte pu (1) ngwäyänü Gideleny diru Ngwaalu. 9 Deleny daꞌti rüdï dirony ndi ärrï ngwujaꞌri ngwanni ngwaru ngwe anaku ati gu ngwüjï ngwoko engga yironyo. A be gwugeraca je länï gwaꞌti mïnä dïjü dere ndi dudi ngwube mïnï ndi aar joꞌrenyana ꞌdar.

10 A be gomon gidi Deleny gadi ila nono gwele duꞌramu. Gere ga mïꞌrïnänü yal ye yipa ga dudi, ngwong kerala ngwa üꞌdïnï le lïgä ngwa miꞌrinyi, dïyäng da uꞌdi na ngwong ꞌdar ngwa ele mbüny.

11 A be anni adi gu yiꞌral ꞌdar ele ndi dudi no, nga nga ladi be ru ngwüjï ngwuru ꞌtaa? Rüdär ngwüjï ngwujuꞌru, ngaa elelle drü de didi Ngwaalu. 12 A anaku dünïcä gu gomon nggäꞌdï gidi Ngwaalu lïtï je yigoranu, apanar ngwïtü ndi undi ngwäy nding ila puprang. Gomon nggoo gadi apa duding gwudi gere lïgä le na ngwübürtä ngwa miꞌrinyi ngwony kerala. 13 Ar be dünïcï ngwujaꞌri ngwudi Ngwaalu ngwaru ngwe ngwani gere ganni giyang na dïyäng danni diyang ngwuru ꞌdunu gwudi ngwüjï ngwanni ngwüdünälü.

14 Yäy gu no, lani ngwumaad ngwüny, anni dünïcängää ngwujaꞌri ngwee ngwaru ngwe Ngwaalu, undar be ngwäy nunnu ngaa ji ngaa mbüjïnï lijuꞌru ngaa jayi nono ngaa adatalu Delenyanga le. 15 Diwayinar ndi ari määtä liguri gwudi Deleny dege gwani gilang anaku ülläjärä je gu ꞌto diweengga dege dämnär dani Bulij bebere gwe gwanni gwätädï Ngwaalu. 16 Nginde gwullu gu no ngwujaꞌri ngwüngün ꞌdar ngwanni ngwullung je gwondaja gu ngwujaꞌranu ngwani yiꞌral giyee. Ngwujaꞌri ngwüngün ngwätï yiꞌralanu yoko yojema ndi a je ngwüjï lenge. Ngwati je ngwüjï ape ngwanni ngwuru ngwuꞌdeꞌrr ngwaꞌti määtïnälü aar je ruji yiꞌduru anaku ati aar je gu ruji yiꞌduru yiꞌter yidi gitab gidi Ngwaalu aar ye geradalu.

17 Yäy gu no, lani ngwumaad anni lïngïdä gu gwerre yiꞌral giyee, arnganar be nunnu aaꞌti ngaa laji la gätïnï mbüny yiꞌral ye yegen yidi dudi, yaꞌti ïndï kayalu yidi ngwüjï ngwïndälü mbüny ara je ïꞌdïyï ngaa gatani mätïnïngälü gwalu. 18 A be ꞌrünär gïyïmïꞌrü na ndi bebere gwudi Deleny na Gilang gwege gwani Yicu Kirictu. Gwanni gwünäjïnä gweneno ꞌdi aar gu ru gwurꞌtal. Yiru gu.