Ngwujaꞌri ngwanni ngwüllïjäär je
Ngwïbrü
Änï kitabanu
Yaꞌti linginna ndi ari yärü gwuru gwanni gwullu ngwujaꞌri ngwee, aar be engganalu reꞌdr ndi ari gwanni gullu gwuru dooꞌra deꞌte diru dïkïrïjïn dätäär yelenya giyiꞌdoonga kaji ganni gati ge dooꞌra dani Bulij üllïjï yiꞌdonga yidi Ngwaalu ngwujaꞌri. Ngwujaꞌri ngwee ngwüllïjäär je Ngwüyäwüd ngwoko ngwanni ngwuma ru ngwïkïrïjïn aar je be mïmïnnï nono ndi gatani ämnïng Ngwaalu ngwegen ndi Yicu.
Ngwujaꞌri ngwee ngwüpïdälü ojeme gwe gwudi Yicu ngwïkïrïjïn ꞌdar. Ngwinggida ndi ari nginde gwuru Gïjï gidi Ngwaalu, no nginde gwupana yelenya gïyïꞌrr yanni yati gu Ngwüyäwüd ämnädä. Yäy gu no, nginde gwojemana ngwïjïr ngwudi gitab ganni guꞌrin ꞌdi ngwupani guꞌru ꞌto ndi Müjä, gwanni gwapu yobo Ngwaalu ngwuje enggaci Ngwüyäwüd. Gwanni gwullu ngwujaꞌri ngwee ngwinggida ndi ari Yicu gwurana guꞌru ngwurꞌdal ngwudi Ngwüyäwüd, ndi ari gwaꞌti ape yiꞌral yere yanni yiki no ngwube geꞌte elelleng gwüngün ngwuru mïꞌrïnï nono gwanni gwumbutu ngwuru mïꞌrïnï nono gwanni gwümïꞌrädï gwani yiꞌral yanni yiki yidi ngwüjï ꞌdar kaji ꞌdar.
Ngwujaꞌri ngwudi gitab nggee aar nje enggaci ngwügürnä ngwojema ngwudi Ngwüyäwüd yiꞌral ye yegen yanni yüllïnä kitabanu ganni guꞌrin, lïgäbïcä Ngwaalinga aar jayanu ämnïcï gwe gwegen ꞌdünggüngün. Yäy gu no, gwanni gwullu ngwujaꞌri ngwee ngwe diwayiniyi ngwïkïrïjïnä ndi ari ngindenga ꞌto aar gwuji ämnïcïng Ngwaalinga na aaꞌti la dudanu yiꞌral ye yanni yärrï je Yicu ngwuje enggaci ngwüjü.
Yajang yidi ngwujaꞌri
1. Pani gwudi Gïjï gidi Ngwaalu (1.1–4)
2. Yicu gwupana gïyïꞌrr (1.5—2.18)
3. Yicu gwupana ndi Müjä na Jäjïwä (3.1—4.13)
4. Yicu gwuru diꞌral dipa diru giꞌra (4.14—7.28)
5. Yicu gwapa gekajiding gwanni gwujayana (8.1—9.22)
6. Mïꞌrïnï nono gwudi gwäpïna gomonanu geꞌte pu ꞌdar (9.23—10.31)
7. Loko lanni lidi Ngwaalu lanni lätï ämnïng Ngwaalu gwupa (11.1–40)
8. Gwujani gora gidi Yicu (12.1—13.19)
9. Otacalu gwudi mïꞌrä na aganni (13.20–25)
1
Gïjï gipana guꞌru gïyïꞌrr
1 Gwerre Ngwaalu ngwondaca ngwïjïrä aar ondaci ngwügürnä ngwege ngwujaꞌri ngwe ngwani Ngwaalu yomonanu yonyadu na ngway ngwe ngwonyadanu, 2 a be giyomon giyee yidi gwodaning, gwuminje be ükäcä Gïjü güngün aar nje ondaci ngwujaꞌri ngwüngün, ganni giming ätädä yuꞌrina yidi yiꞌral ꞌdar, na ganni gigeꞌteng ge dïdläyü. 3 Gïjï giru enyanu gwudi näjï gwudi Ngwaalu ngwulingani giꞌremna güngün ꞌdidanu, ngwümätädä yiꞌral ꞌdar ngwuje ruyi yiima ye yidi ngwujaꞌri ngwüngün. Anni ma aar nje gaꞌru gwani ke gwege, nginde gwuma jalu kaama gidi Ngwaalu ngwanni ngwuru Papa gwupa kerala. 4 No nginde gwuma aar ätädä ngwaalinga ngwupana gïyïꞌrr anaku ru gu ngwürïny ngwüngün ngwanni ngwuma aar je ätädä ngwani Gïjï ngwupana ngwürïny ngwegen.
Yicu gwupana gïyïꞌrr
5 Ndi ari Ngwaalu ngwaꞌti ca gïꞌrrä gere ngwujaꞌri ngwanni ngwondacung ngwe Kïjü güngün ngwuci,
“Nga gwuru Gïjï güny.
Gwene äny gwuma ru Papa gwunga.”1.5 Mäjïmür 2.7
Ngwoꞌre ngwari,
“Äny gwa ru Papa gwüngün
na nginde gwa ru Gïjï güny.”1.5 2 Jämüwïl 7.14
6 Na mana anni ma Ngwaalu ükäjä Gïjü güngün ganni giru giꞌra gïdïdlä ngwari,
“A yïꞌrr ꞌdar yidi Ngwaalu gwucalu yirku ye.”
7 Na ndi ondaji gwani yïꞌrr, a nginde ari nu,
“Gwugeꞌta yïꞌrrä yüngün yiru dirun
ngwugeꞌte ngwïnädä ngwüngün lïgä liru lingla.”1.7 Mäjïmür 104.4
8 A be ndi ondaji gwani Gïjï, nginde gwaru nu,
“Yeleny yunga gwani Ngwaalu yadi jalu pupud,
nga gwa ruyi yelenya yunga gay ge gïdünälü.
9 Yima je ämnï yanni yïdünälü nga je be ꞌdonya yanni yiki
yäy gu no, Deleny diru Ngwaalu ngwunga, dima ang mädïnïyänï kimaad gunga
jayanu gwe gwanni gwuma ara gwe bruti yelenya.”1.9 Mäjïmür 45.6–7
10 Nginde gwaru ꞌto,
“ꞌTuꞌtu gwerre, gwani Deleny, nga gwugeꞌta dïyäng
nga geꞌte gere yiiru ye yidi guy gunga.
11 Giyee ya medadi, a gwa be jalu.
Ngwa mani ꞌdar ngwa ru nono ati gu ngwured mani.
12 Ngwa je ꞌrïkäjänü nono gwele ngwureda
ngwa gwurli nono ati gu ngwured gwurli diloya.
A be nga gwa jalu gwuru gweꞌte gweꞌte,
na ngwüdlä ngwunga ngwaꞌti ngwa medadi.”1.12 Mäjïmür 102.25–27
13 Ngwaalu ngwaꞌti ca gïꞌrrä gere güngün ngwujaꞌri ngwee ngwucung ngwe Gïjü güngün ndi ari,
“Jicinyalu kaama güny
ꞌdi nyi gäbïcï güwänü gunga
nga roꞌtalu gora ge”1.13 Mäjïmür 110.1?
14 Yïꞌrr ꞌdar yäꞌtüdï ngwügïꞌrïm ngwäpïjä Ngwaalinga yiiro? Yükäjäär je ndi äpïjï ngwüjü yiiru ngwanni ngwadi aar je ätädä yuꞌrina yidi gïlängïdïne.