Ngwujaꞌri ngwanni ngwullu je Bulij
Bïlïmün
Änï kitabanu
Dooꞌra dükäjäär dani Bulij diju korkon anni üllïjïng dimaada düngün dani Bïlïmün ngwujaꞌri ngwee. Gur gani Bïlïmün gïnänü. Ngwuꞌdun ngwüngün ngwati gu ngwïkïrïjïn oꞌrajidalu. Dïnäd didi Bïlïmün dabru dorta düngün dani Bïlïmün. Gaji ganni giju ge Bulij korkon aar mbudi Onejemo gwe gwanni gwuma ru dooꞌra didi Yicu.
A Bulij gwäꞌrä Onejemong gidoorta düngün ngwujaꞌri ngwe ngwükäcüng je Bïlïmünïng ndi aar oꞌrajidi Onejemo gwe ngwämnï ngwügwäꞌrï nono diwengga ndi Kirictu.
Yajang yidi ngwujaꞌri
1. Aganni Bïlïmünïng (1.1–3)
2. Bulij gwuca Ngwaalinga yäy ꞌtu gwani Bïlïmün (1.4–7)
3. Bulij gwondaca Bïlïmünïng ngwämnï Onejemong ngwügwäꞌrï (1.8–22)
4. Aganni gwudi mïꞌrä na otaci Ngwaalingalu (1.23–25)
1
Ngwujaꞌri ngwanni ngwüllïjä je Bulij Bïlïmünïng
1 Äny gwuru gwani Bulij gwanni nggwo giyirna gwani ondaci ngwüjü ngwujaꞌri ngwani Yicu Kirictu. Diweengga dege dani Timijawuj daganna je.
Ngwujaꞌri ngwee ngwükäcï nje dimaada dani Bïlïmün danni diru nyi de gimaad ndi apajidi yiiru yidi Yicu Kirictu. 2 Nyi aganni diwengga dege dani Apibiya na diweengga dani Arikibiyuj gwanni gwati nyii le ape yiiru yidi Yicu Kirictu yongra na nyi aganni giꞌdonga gidi Ngwaalu ganni gati acajidi ngwuꞌdun ngwunga.
3 Ara je gu yïmïꞌrü na adatalu ji gwudi Ngwaalu ngwanni ngwuru Papa gwege na Deleny dani Yicu Kirictu!
Bulij gwati ci Ngwaalinga yäy ꞌtu gwani ämnï gwudi Bïlïmün
4 Äny gwati ci Ngwaalinga yäy ꞌtu giyomon ꞌdar gwani nga minje otacalu. 5 Anaku ati nyi gu ꞌdingini ngwüjï yïkïrïjïïn ye yunga Gideleny dani Yicu na ämnï gwe gwunga ngwüjü ku ngwudi Ngwaalu. 6 Nyi be ari, a acajidi gwudi ämnï gwunga ngwüjïngä le ngwudi Ngwaalu ru ꞌdidanu nunnu nga ätï bebereng ꞌdar giyiꞌral yanni yijaw nda je ärrï ngwürïny ngwe ngwudi Yicu Kirictu. 7 Äny gwujayanu gwulleny nyi ojeme nono gwani mengga ämnï gwe gwunga ngwüjü ngwudi Ngwaalu. Anaku ma gu gäbïcï yigor yegen yima amanu.
Bulij gwondaca Bïlïmünïng Onejemo gwe
8 A be no, gwani mengga, ndi Kirictu nggwaadi ꞌranu, ndi ang girnya dulu de nyi ärrïjï yiꞌral giyee. 9 A be anaku ätï nda gu ämnïng Ngwaalu a ngwengga Ngwaalu, nyi be ari nunnu nggwadi ang päcälü aaꞌti nunnu madinani gwüny ꞌdogo, a be ꞌto anaku jiny gu giyirna yani ondaci gwe güny ngwüjü ngwujaꞌri Gideleny dani Yicu Kirictu. 10 Äny gwüpäcängälü gwani diweengga dani Onejemo gwanni gwuma ru nono gïjï güny, äny gwuma ru nono papa gwüngün anni jiny giyirna. 11 Nginde gwele gwerre gwaꞌti ämbädï* 1.11 Ngwürïny ngwani Onejemo ngwani “amba.” ꞌdunggunga, a be gweneno, gwuma be amba ꞌdengge.
12 Äny gwuminyi gwäꞌrä aar ang oꞌraca gwani nono ma ang üꞌrïcä ligor lüny. 13 Gwunaniny aadi aar nyi jicalu gito gito nunnu ngwuji ngwaalu ngwunga ati aar nyi äpïjï yiiru anaku jiny gu giyirna gwani ondaci ngwüjü nguwjaꞌri ngwanni ngwujaw ngwudi Yicu. 14 Nyi ꞌti be jädï ndi ärrï yiꞌral yere yaꞌti ye ligor lunga aru nunnu yere yanni yijaw ya je ärrï na je ärrï ligor lunga aaꞌti ya aar je linyaci yiima ye. 15 Ya gu mine ru ndi ari nginde gwugatananga giyomon giyee cong, nunnu aar ang oꞌraca gwurꞌtal. 16 Nginde gwaꞌti ba be rüdï nono dïnäd ꞌdunggunga ꞌdogo, nginde gwupana gïdïnäd. Nginde gwuma ru diweengga danni dämnär. Ndi ari nginde gwuma ru dïkïrïjïn Ngwaalu. Gwämnïny gwulleny a be gwa ang ämnänï gwulleny ꞌdünggüny nono dïnädä dunga a dïkïrïjïn Gideleny dani Yicu.
Bulij gwubupa Bïlïmünïng ngwüdüdänïjï Onejemong
17 A no, manari nga gwatiny engga nono dimada ndi apajidi yiiru yidi Kirictu, mätï Onejemong nono aadi nyi gu määtä. 18 A be manari nginde gwärrïjängä yiꞌral yere yiki, yaa gwümïnädängä dämjä nono dere, gäbïcä giligoꞌro lüny. 19 Äny gwani Bulij äny gwullu ngwujaꞌri ngwee guy ge güny äny gwa ang ꞌtücï. Äny gwaꞌti jädï ndi ang ci äny gwümïnädängä dämjä nono dani ligoꞌro lunga ndi ari äny gwuru gwurujanga dïkïrïjïn Ngwaalu guy ge güny. 20 Yäy gwani mengga gäbïcïny nyi mbuji jaying ngwäy ꞌdunggunga Gideleny, gäbïcä ligor lüny ngwamanu ndi ari nga gwuru dïkïrïjïn ndi Kirictu. 21 Äny gwülïngïdï ndi ari ngwujaꞌri ngwee ngwuca je ngwe ngwa ji ngwa je ämnï ꞌdi nga gwäꞌtüdänälü ngwa je ärrï ngwanni ngwonyadana. 22 Nga be ci ꞌto, gïꞌtïjïny ngwuꞌduna mama ngwanni ngwadi nyi gu ila nyi gu üllälü ma Ngwaalu ämnä otacing gwalu ndi ari aar nyi ïgïtïjä gay nyi ila ꞌdanggalu.
Aganni gwudi mïꞌrä
23 Diweengga dani Ababraj danni diju nyi de giyirna gwani ondaci ngwüjü ngwujaꞌri ngwudi Yicu, dagana je 24 na ngwooꞌra ngwuru gimaad güny ngwani Murkuj na Arictakuj na Dimaj na Luka, laganna je ꞌto. 25 Ara je gu yïmïꞌrü ji ꞌdar yidi Deleny dani Yicu Kirictu.