1 A Ngwübärrïjï na Ngwüjändügï ila ndi Yicu nunnu aar ïdäjï. Aar be ci, “Enggaci nje giꞌremna gere kerala.”

2 A je Yicu ci, “Manari lingen lima ru digera ngwaalu ngwati mïꞌrïnï duy de kerala aang ari, ‘Ngwaalu ngwadi jayi.’ 3 Ma dilu danu ru, ngaa ari, ‘Dirun dadi ari gwene ngwuniyi giranyu ndi ari gere gïgätïnälä.’ Ngaa lïlïngïdï ndi inggidi yiꞌral ngwäy ngwe kere ngaa ꞌti be lïngïdï ndi inggidi yiꞌremna yadi ye gaji gidi dïdlä medadi. 4 Gimaad gidi dïdlä ndee giki gïmïꞌrïdï ngwäyänü gïmïnü ndi engga giꞌremna giru yiima kerala, gäꞌtüdï gadi ar je enggaci giꞌremna gere ar be enggaci ꞌdogo giꞌremna gidi dïjïr dani Yunan.” A be Yicu ꞌtü ngwuje gatani ngwele.

5 Anni ma ngwooꞌra ngwudi Yicu dambu kïmämü ngenone gwe, aar dodani ndi apani yona yidi eny. 6 A je Yicu ci, “Arnganar mama ngaa arngani ngwüꞌrïdü ngwudi Ngwübärrïjï na Ngwüjändügï.”

7 Aar otajidalu ngwujaꞌranu ngwee aar ari, “Yiru giyee ndi ari alanga lima ꞌti apana yona yere.”

8 Anni ma Yicu lenge ngwujaꞌri ngwee, ngwuje ci. “Ngaa gilee lätï ämnïng Ngwaalu gwooko, ngaa larra ngaa be ondajidi ndi ari ngaa laꞌti apana yona yere. 9 Ngaa gilona lamiꞌratu ndi lenge ngwujaꞌri ngwee? Ngaa lima dodani yona yanni yiru tudini (5) yïtï je ngwüjï ngwuru ngwüüꞌrï tudini (5,000) na yanni yima je utalu yonyadu yiꞌramala ümne? 10 Na ngaa lima dodani yona yanni yiru kwoꞌra täꞌrïl (7) yïtï je ngwüjï ngwuru ngwüüꞌrï kwoꞌrongo (4,000) aar je pe na yanni yima je utalu yonyadu yiꞌramala ümne? 11 Ange gwuru ngaa ꞌti be lïngïdï ndi ari äny gwaꞌti ondijaja gwani yon? A be arnganar gwani ngwüꞌrïd ngwudi Ngwübärrïjï na Ngwüjändügï.” 12 A ngwooꞌra ngwüngün lenge ngwujaꞌri ndi ari laꞌti je Yicu ondajaca gwani ngwüꞌrïd ngwanni ngwati aar ngwe ütädä ngwülä ngwudi yon, ngwuje be ondajaci gwani ngwujaꞌri ngwudi Ngwübärrïjï na Ngwüjändügï ngwanni ngwati aar je enggaci ngwüjü.

13 Anni ma Yicu obani ngwaalu ngwani Gäyïjärïyä Bïlïpï, ngwotaci ngwoꞌralu ngwüngün ngwuje ci, “Ngwüjï ngwati ari Gïjï gidi Dïjï dümnä gani yärü?”

14 Aar ci, “Loko lati ari Yuwana Almamadan na loko ari Ïlïyä na loko ari Ärmïyä na dïjïr deꞌte.”

15 Ngwuje be otacalu, “A be nga nga, lati ari äny gwuru gwani yärü?”

16 A Jamaan gwani Butruj ci, “Nga gwuru gwanni Gwubrutaar yelenya gwuru Gïjï gidi Ngwaalu ngwanni ngwumidu!”

17 A Yicu ci, “Lonjacanga gwani Jamaan gïjï gidi Yuna. Dïjï dere däꞌtüdï dïꞌtäcängä ngwujaꞌralu ngwee a be Papa gwüny ru ꞌdogo gwanni nggwo kerala. 18 Na nggwa ang ci ndi ari nga gwuru gwani Butruj, na ngwurꞌda ngwee äny gwa gu odada giꞌdonga güny na gaꞌti ga ngwängïr ngwudi del didi yiꞌrany dami. 19 Nggwa ang ätädä yiima yidi yeleny yidi gerala, ndi ari yanni yada je giki gïdïyängälü, ya gïkïnï kerala na yere yanni ya je gäꞌdälü ngene gïdïyängälü, ya gäꞌdänälü kerala.” 20 Ngwugirinya ngwoꞌra ngwüngün nunnu aaꞌti ngwa ondaci dïjü dere ndi ari nginde gwuru gwanni Gwubrutaar yelenya.

21 ꞌTuꞌtu gaji nggoo ngwelada gweere, a Yicu ꞌdïꞌrï ndi enggaci ngwoꞌra ngwüngün ndi ari gwadi ele Üräjälïm gwa yiꞌrendeny mbuji yonyadu ndi mbumbunga na ngwurꞌdal ngwanni ngwuru ngweleny na ngwoorta ngwudi yobo gwa aar ꞌrinye gwa jalu yomon täꞌrïl gwa Ngwaalu ꞌdïꞌrïyälü gwumidu.

22 A Butruj apada gay geꞌte ngwugirinya ngwuci, “Gwani Deleny, yiꞌral giyee yaꞌti ya gu ru ꞌdunggunga aꞌtur.”

23 Yicu gwurlalu ngwuci Butrujing, “Oꞌraciny gwodani dijegoꞌrr! Nga gwuru gimle ꞌdünggüny, yiꞌral yidi Ngwaalu yaꞌti kiꞌranu gunga aar be ru yidi ngwüjï ngwümnä.”

24 A Yicu ci ngwoꞌra ngwüngün, “Manari dïjï dere dima mïnï ndi aar nyi gwujani, ngwudodani ligoꞌro lüngün ngwape güüꞌrï güngün ganni gimamindanu aar nyi gwujani. 25 Ndi ari gwere gwanni gwa mïnï ndi gïlängïdïyï ligoꞌro lüngün, ling dudiyi, na gwanni gwa dudiyi ligoꞌro lüngün gwani äny, ling midiyi. 26 Yiru ange yanni yijaw ya je dïjï mbuji manari dima bile dïdläyälü pipiꞌriꞌti, ngwube geraji linginalu lüngün? Na giru ange gadi ge dïjï üꞌrä linginalu lüngün? 27 Ndi ari Gïjï gidi Dïjï dümnä, gadi ele ndi oꞌra näjï gwe gwudi Papa gwüngün yïꞌrr ye yüngün ga be ätädä dïjï guꞌru gwani yiiru yüngün. 28 Nggwa je ci ꞌdidanu ndi ari, loko gilo lïdünädälä ngene laꞌti la ngille yiꞌrany ꞌdi aar enggadani Gïjü gidi Dïjï dümnä gïndï giyelenyanu yüngün.”