1 Anni ma aar jalu yomon nyärläl, a Yicu apani Butrujing na Yagub na Yuwana gwuru gwenggen ngwuje oktani aar le allu kenala golala jücü. 2 Ngenonala ngwugwurli ngwangina ngwüngün ngwuru ngwäyänü ꞌter aar ru nono lingen, a ngwured ngwüngün gwurli aar enyanu nono buri. 3 No a Müjängä Ïlïyä gwe ꞌtädälü aar ondaji Yicunga le.

4 A Butruj ci Yicung nu, “Gwani Deleny, yijaw ꞌdengge ndi ar ji ngene. Manari nga gwämnä nyi pä yäꞌtä täꞌrïl, geꞌte gunga na geꞌte gidi Müjä na geꞌte gidi Ïlïyä.” 5 Anni mung ji ndi ondaji, a gïbäꞌrü ila gibidu ngwuje gwüꞌrübäjälü, a yal üllä gïbäꞌränü aar ari, “Gïjï güny giru nggee ganni gämnïny ganni gïjädïnyänü gwulleny ꞌdengenacar!”

6 Anni ma ngwooꞌra ꞌdingini ngwujaꞌri, aar ïꞌdï a je yedeny eny gwulleny. 7 A je Yicu ꞌdonggaca ngwuje akani nono ngwuci, “ꞌDïꞌrärälü ara je ꞌti yedeny ïtï.” 8 Anni ma aar ꞌdïꞌrïyï ngwäy aar ombajidalu, aar ꞌti änggädï dïjü dere aar be engga Yicung ꞌdogo jücü.

9 Anni ma aar ji ndi üllä kenala, a je Yicu ondaci ngwuje ci, “Aaꞌti ngaa londaci dïjü dere yiꞌral ye yanni yänggädä je ꞌdi aji aar ꞌdïꞌrïyä Gïjälü gidi Dïjï dümnä giyiꞌranyanu.”

10 A ngwooꞌra ngwüngün otacalu aar ci, “A be ngwoorta arra ngwudi yobo ati aar ari, Ïlïyä gwadi ila gwerre gwerre?”

11 Ngwuje be ci, “ꞌDidanu, Ïlïyä gwadi ila gwerre ngwugegeꞌte yiꞌral ꞌdar mama. 12 A be nggwa je ci Ïlïyä gwuma ila, gwuma ꞌti be ngwüjï lïngïdï, gwuma aar ärrï yiꞌral ꞌdar yanni yiki yïmïnäär je. Yiru yeꞌte yeꞌte Kïjï gidi Dïjï dümnä, gima ji ꞌto gito ndi mbuji yiꞌrendenya ngwuy ngwegen.” 13 No, a ngwooꞌra ngwüngün lenge ndi ari londijaca je Yicu ndi Yuwana Almamadan.

14 Anni ma aar ila ngwüjï ngwoo ngwonyadu, a gur geꞌte elaca Yicung ngwukwucalu giyoranu yüngün ngwuci, 15 “Gwani Deleny, aar ang gïjï güny ïnä gümä gati äyïnï, gïyü dïrbä gwulleny. Gomon geꞌte gati ïꞌdï gïlïgä ngwïꞌdï giyaw 16 nyi be äpïjä ngwoꞌra ngwunga, aar ꞌti be burna ndi uꞌriyi nono.”

17 A be Yicu ci, “Gimaad nggee gïrlänü gaꞌti ämnä Ngwaalu äny gwa je gu ji jadu? Nggwa je gu ji ndi mätïjï liguri jadu? Ilar ge!” 18 A Yicu girinya dïꞌrïllä dulu de, ngwüꞌtü kïjänü kaji nggoo.

19 A ngwooꞌra ngwüngün elaci jücü aar otacalu, “Nyängä larra nyii ꞌti be burnu ndi ꞌtüyï dïꞌrïllä?”

20 A je Yicu ci, “Ndi ari ämnï Ngwaalu gwalu gwaꞌti pa. Nggwa je ci ꞌdidanu ndi ari, adinari ngaa ätï ämnïng Ngwaalu gwooko nono läy lidi goꞌta, ngaa ladi ci geno nggee, ‘ꞌDïꞌrälü ngene ang ele ngenone’ a gaadi ele. Yere yaꞌti ya je berajanu.”*17.20 Yitab yoko yati ari, “A be giyee yidi dijegoꞌrr, yati ꞌtüdï ꞌdogo määtä gwe ngwädä na otaci gwe Ngwaalingalu.”

22 Anni ma aar oꞌrajidalu Jälïl ngwuje ci, “Gïjï gidi Dïjï dümnä ga aar ätädä ngwüjü. 23 Ga aar ꞌrinye na ga jalu yomon täꞌrïl (3) ga ꞌdïꞌrälü gimidu.” A ngwujaꞌri ngwee gäbïcï ngwoꞌra aar runi gwulleny.

24 Anni ma Yicunga ngwooꞌra ngwe ngwüngün obana kündär gani Kaprnawum, a ngwudulba ngwati uti dulba didi gobo ila ndi Butruj aar ci, “Doorta dalu dati geꞌte dulba didi gobo?”†17.24 Dulba didi gobo dïjï deꞌte pu dati geꞌte dinar rom.

25 Ngwuje ci, “Yäy dating geꞌte.” Anni ma aji a Butruj ila ꞌdunu, a Yicu madinani ngwotacalu gwerre gwerre ngwuci, “Nga gwaraa, gwani Jamaan? Ngweleny ngwudi dïdlä ngwati uti dulba ndi yärüngä? Dati aar uti gïyïjï yegen ꞌdunu gwalla dati aar uti ngwüjü ngwuꞌter?”

26 A Butruj ci, “Dati aar uti ngwüjü ngwuꞌter.”

A Yicu ci, “Manari yiru gu no, yïjï yati aar je ꞌti otacalu. 27 Nunnu aaꞌti la ar je kiyi yiguri, ïndï kïbüng gidi yaw ang gatu ngwüꞌdïbä giyaw. A be duum danni da ang mätä gwerre gwerre, ngïrälïdï ngwulemanu ngwüngün nga gwa mbuji bartad gwudi guꞌru dinar kwoꞌrongo, apa nga geꞌte dulba düny na dunga.”