1 Yäy gu no, gay gaꞌti ndi ꞌtü, nga gwanni gwati obalu dïjï de diꞌter, ndi ari yanni yati a ye obalu dïjï de, yübïdä ye ligoꞌralu lunga, ndi ari nga gwanni gwati obalu dïjü de, yiru yeꞌte yeꞌte yanni yati a je ärrï. 2 A be a lïlïngïdï ndi ari Ngwaalu ngwati obalu ngwüjï ngwe ngwanni ngwati ärrï yiꞌral yanni yiru gu no, obalu gwüngün gwätï ngwäyänü. 3 A be nga gwanni gwuru dïjï ꞌdogo, ma ang obalu ngwüjï ngwe nga be ärrï yiꞌral mene yeꞌte yeꞌte, nga gwaru nga gwa ꞌtü ndi aar gwe Ngwaalu obalo? 4 Na nga gwati anidanu jayi gwe liguri gwüngün gwupa na orꞌtemaji gwe na määtä gwe liguri gwüngün, a gwaꞌti lïngïdï ndi ari jayi liguri gwüngün nggwee ngwati ang okta nunnu aar ang gäbïcï nga joꞌrenyana?

5 A be undi kiꞌra na nyurtanu gwudi ligor lunga ndi joꞌrenyana, nga nggwo be ndi gïꞌtïnï gündä nono gidi gomon gadi ge Ngwaalu ꞌtäjï gündälü güngün ma ji ma obalu gwüngün ji gwanni gwüdünälü. 6 Ngwaalu gwadi ätädä dïjü deꞌte deꞌte guꞌru güngün anaku yiꞌral yüngün yanni yärrüng je.2.6 Mäjïmür 62.12; Gagitada 24.12 7 Lanni lïmätï yiguri ndi ärrï yiꞌral yanni yijaw aar mïnï näjïng na denyang na jing gwudi gwurꞌtaling, ling je ätädä miding gwudi gwurꞌtaling. 8 A be lanni gilo lärrädï giyur, lanni lïbüdï yiꞌral yanni yätï ngwäyänü gora ge aar je gwuji ndi ärrï yanni yiki, la je be güündä na kanu mbuji. 9 Dïrbä na yiꞌrendeny ya ji ngwüjï ꞌdar ngwanni ngwati ärrï yiꞌral yanni yiki, ya je gwerre gwerre Ngwüyäwüd aar be ji ngwüjï ngwuru Garany. 10 A be näjï na denya na adatalu gwa ji ngwüjï ꞌdar ngwanni ngwati ärrï yiꞌral yanni yijaw, gwerre gwerre Ngwüyäwüd a be ngwüjï ngwanni ngwuru Garany. 11 Ndi ari Ngwaalu ngwati ꞌti utanu.

12 Ngwüjï ꞌdar ngwanni gwati ꞌti ätï yobo, aar be arri yiꞌral yanni yaꞌti jaw, ngwadi ayi ngwati ꞌti ätï yobo. Na ngwüjï ꞌdar ngwanni ngwätï yobo aar be ärrï yiꞌral yanni yiki, ngwa je ngwe yobo obalu. 13 Ndi ari läꞌtüdï lanni lati ꞌdingini ngwujaꞌri ngwudi yobo ꞌdogo, lïdünälü ngwäyänü Ngwaalu, aar be ru lanni lati ꞌdengenaci yobo, liru la je le Ngwaalu urnidi ndi ari lïdünälü. 14 ꞌDidanu, ngwüjï ngwanni ngwuru Garany ngwanni ngwaꞌti ätï yobo, ma aar ärrï yiꞌral drü de degen yanni yibupa je yobo, linggida ndi ari lïlïngïdï yobo aar je be ꞌti ätï, 15 anni inggidaar ndi ari bupi gwudi yobo nggwo gwüllïnä giyigoranu yegen, gwati ïcïnänü gwegen inggidi na yigor yegen giyee üpäcï je yiꞌral nono gwenene, ngwuje ruci ꞌdi gweneno. 16 Yiꞌral giyee ya ji komon ganni gadi ila gadi ge Ngwaalu obe yujimidalu yidi ngwüjï Yicu Kirictu gwe, anaku urnida gu ngwujaꞌri ngwanni ngwujaw ngwanni ngwati nje ondaji.

17 Gwenene nga gwati ci ligoꞌro lunga nga gwuru Dïyäwüd ati ang gatada ngwäyänü giyobo nga ïrïngïnï Ngwaalu. 18 Nga gwülïngïdï buping gwüngün nga gwällïnï yiꞌral ye yanni yijayana nunnu yobo yenggaca je. 19 Nga gwïcïnänü ndi ari nga gwuru gay gidi ngwüjï ngwanni ngwürïmü ngwäy nga ru buri gwudi ngwüjï ngwanni ngwo gïdïrïmänü, 20 nga gwuru doorta didi ngwüjï ngwanni ngwuru ngweꞌrr nga ru doorta didi yïjï yanni yooko ndi ari nga gwätï bebereng na ꞌdidanung gwongranu giyobo. 21 No nga nggwee gwati enggaci ngwüjü ngwuꞌter, nga be ꞌti enggaca ligoꞌro lunga? Nga gwati ondaci ngwüjü aaꞌti ngaa la eny yuꞌrimi, nga je mene eny yuꞌrime? 22 Nga gwati ari, aaꞌti ngwüjü ngwa mïꞌrï ngwäyänü, nga mene mïꞌrï ngwäyäno? Nga gwanni gwati yiꞌremna yiru ꞌtur ke ngwäy, ati ang mene obe yobo yegene? 23 Nga gwanni gwati ïrïngïnï yobo ye, nga ꞌti be dïnyädï Ngwaalinga kiyi gwe gwunga yobano? 24 Yüllïnä ndi ari, “Ngwürïny ngwudi Ngwaalu ngwati aar ngwe ari ngwulem ngwüjänü ngwuru Garany gwani apepe gwe gwalu.” 2.24 Ajaya 52.5

25 Üꞌrïdänï gwuru guꞌru manari nga gwati määtä yobo, ma be ari nga gwati kiyi yobanu, nga gwuma be ru nono ma ang ꞌti üꞌrïdänä. 26 Manari dïjï danni diru Garany daꞌti üꞌrïdänä, dati ape yiiru yanni yibupa je yobo, daꞌti da Ngwaalu engga nono mung üꞌrïdäne? 27 Dïjï danni diru Garany daꞌti üꞌrïdänä üꞌrïdänïng gwudi ngwanginu, manari dati ꞌdengenaci yobo, diru da je de obalu nga nga lanni lätï yobo yüllïnä ngaa üꞌrïꞌtänï, ngaa be ru likiya yobanu.

28 Dïjï däꞌtüdï Dïyäwüd yiꞌral ye yanni yating je ärrï, aar ꞌti ani üꞌrïdänï gwudi ngwanginu. 29 Bärï, dïjï diru Dïyäwüd danni diru gu ngïnäꞌdänü, ngwüꞌrïdänï üꞌrïdänïng gwudi ligor Lïgïꞌrïm le lidi Ngwaalu gwäꞌtüdï gwudi ngwujaꞌri ngwudi yobo ngwanni ngwüllïnä. Dïjï danni diru gu no, dati ꞌti bupu ortang gwudi ngwüjï ngwube bupi ortang gwudi Ngwaalu.